ខេត្តសៀមរាប៖យ៉ាងហោចណាស់មនុស្សប្រុសស្រីចំនួន០៧នាក់ បានរបួសធ្ងន់ស្រាល ក្នុងហេតុការណ៍គ្រោះថ្នាក់ចរាចរណ៍។
លោកវរសេនីយ៍ឯក សុខ សុទ្ធាវុធ អធិការនគរបាលស្រុកជីក្រែង បានឲ្យដឹងថា ករណីនេះកើតឡើងថ្ងៃទី៣១ ខែ
មីនា ឆ្នាំ២០២០វេលាម៉ោង០៩ និង ៤៥នាទី (បង្ករដោយខ្លួនឯង ) ត្រង់ចំណុចទល់មុខផ្ទះឈ្មោះ សាំង នី ស្ថិតនៅក្នុងភូមិគោករមាស ឃុំគោកធ្លកក្រោម ស្រុកជីក្រែង ខេត្តសៀមរាប លើផ្លូវជាតិលេខ០៦។
រថយន្តម៉ាក TOYOTA HIGHLANDER
ពាក់ស្លាកលេខ កោះកុង ២B- ៦៣៦៣
ប្រភេទទេសចរណ៍ធុនតូច(គ្រួសារ)
ពណ៌ស អ្នកបើកបរឈ្មោះ ឈួន ឈុន ភេទប្រុស អាយុ៤៥ឆ្នាំ ទីលំនៅភូមិកោះ
កាពិក ឃុំកោះសារ៉ាយ ស្រុកោះកុង ខេត្តកោះកុង ដឹកមនុស្សចំនួន ៦នាក់ ទិសដៅពីខាងកើត ទៅទិសខាងលិច
បានរេទៅបុកដើមឈើនៅក្បែរផ្លូវ
ដោយខ្លួនឯង ។
បណ្ដាលឲ្យរបួស ១, ឈ្មោះ សែម យ៉ត ភេទប្រុស អាយុ
៣៦ឆ្នាំ អ្នករួមដំណើរ របួសធ្ងន់
២,ឈួន ឈុន អ្នកបើកបរ ស្រាល
៣, ឈ្មោះ ណុវាសនា ភេទប្រុស អាយុ
២៣ឆ្នាំ អ្នករួមដំណើរ របួសស្រាល
៤, សែម ភ័ក្រ ប្រុស អាយុ៥០ ឆ្នាំ
អ្នករួមដំណើរ របួសស្រាល
៥, ម៉ម សារ៉ូន ភេទស្រី អាយុ២៨ឆ្នាំ
អ្នករួមដំណើរ របួសស្រាល
៦, សែន សីហា ភេទប្រុសអាយុ២៨ឆ្នាំ
អ្នករួមដំណើរ របួសស្រាល
៧,ឈ្មោះ ឈួន ផាន់ណា ភេទស្រី
អាយុ៣១ អ្នករួមដំណើរ របួសស្រាល។
មូលហេតុ បើកបរស្ថិតក្នុងស្ថានភាព
ងងុយដេក៕SRP

ខេត្តកំពង់ធំ៖លោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ នៅព្រឹកមិញបានអញ្ជើញជាអធិបតីភាព
ក្នុងពិធីបើកវគ្គបំប៉នសមត្ថភាព មន្ត្រីនគរបាលចរាចរណ៍ផ្លូវគោក ដល់មន្ត្រីនគរបាលទទួលការងារចរាចរណ៍ផ្លូវគោក នៅស្នងការដ្ឋាននគរបាលខេត្តកំពង់ធំ ។

លោកឧត្តមសេនីយ៍ត្រី កែវ ហួរ ស្នងការរង ផែនការងារសណ្ដាប់ធ្នាប់ បានធ្វើរបាយការណ៍ ស្វាគមន៍ ដោយ លើកឡើងថាដោយមានការយកចិត្តទុកដាក់ពីថ្នាក់ដឹកនាំអគ្គស្នងការដ្ឋាននគរបាលជាតិ លោក សុខ លូ អភិបាល និងជាប្រធានគណៈបញ្ជាការឯកភាពរដ្ឋបាលខេត្តកំពង់ធំ និងក្រោមការដឹកនាំចង្អុលបង្ហាញពីលោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ ស្នងការដ្ឋាននគរបាលខេត្តកំពង់ធំ បានរៀបចំប្រារព្វពិធីបើកវគ្គ
បំប៉នសមត្ថភាព មន្ត្រីនគរបាលចរាចរណ៍ផ្លូវគោក ដល់សិក្ខាកាម មកពីអធិការដ្ឋាននគរបាលក្រុង-ស្រុក សរុបចំនួន ២៥ នាក់ស្រី ០២ នាក់  រយៈពេល ០៥ ថ្ងៃ ចាប់ផ្ដើម ថ្ងៃទី ៣១ ខែ មីនា ឆ្នាំ២០២០ដល់ថ្ងៃទី ០៤ ខែ មីនា ឆ្នាំ២០២០ ។

លោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ បានថ្លែងថា លោកមានក្ដីសោមនស្សរីករាយក្រៃលែង ដែលបានចូលរួមក្នុងកម្មវិធីនេះ ដើម្បីពង្រឹងបន្ថែមនូវការងារចរាចរណ៍ផ្លូវគោក និងផ្សព្វផ្សាយអនុក្រឹត្យលេខ ៣៩ អនក្រ.បក ចុះថ្ងៃទី ១៧ ខែ មីនា ឆ្នាំ២០២០ ស្ដីពីការកែសម្រួលអនុក្រឹត្យលេខ ៤៤ អនក្រ.បក ចុះថ្ងៃទី២១ ខែ មីនា ឆ្នាំ២០១៧ ស្ដីពីការពិន័យអន្តការណ៍ ចំពោះអំពើល្មើសនឹងច្បាប់ ស្ដីពី ចរាចរណ៍ផ្លូវគោក ។
លោកឧត្តមសេនីយ៍ ស្នងការ បានថ្លែងអំណរគុណដល់អស់លោក លោកស្រី ជាមន្ត្រីនគរបាលចរាចរណ៍ផ្លូវគោក ដែលរយៈពេលកន្លងមក អស់លោក លោកស្រី បានអនុវត្តជំនាញបានល្អប្រសើរជូនសង្គមជាតិ ប៉ុន្តែតំណាក់កាលនីមួយៗ តែងតែមានការអភិវឌ្ឍ ដូច្នេះហើយ ថ្នាក់ដឹកនាំ លោកតែងតែយកចិត្តទុកដាក់ ពិនិត្យមើលលើកិច្ចការងារជំនាញនីមួយៗ ស្របតាមកាលៈទេសៈ នៃការវិវត្តន៍ទៅរបស់សង្គមជាតិ ដែលកំពង់ តែមានភាពរីកចម្រើនជាលំដាប់។
ដូចក្នុងដំណាក់កាលនេះយើងសង្កេតឃើញថាមានការកែសម្រួលថ្មី អនុក្រឹត្យលេខ ៣៩ អនក្រ.បក ចុះថ្ងៃទី ១៧ ខែ មីនា ឆ្នាំ២០២០ ស្ដីពីការកែសម្រួលអនុក្រឹត្យលេខ ៤៤ អនក្រ.បក ចុះថ្ងៃទី២១ ខែ មីនា ឆ្នាំ២០១៧ ស្ដីពីការពិន័យអន្តការណ៍ ចំពោះអំពើល្មើសនឹងច្បាប់ ស្ដីពីចរាចរណ៍ ផ្លូវគោក នេះស្រាប់តែដែលទាមទារឲ្យយើងយល់ដឹងកាន់តែច្បាស់ សម្រាប់ការអនុវត្ត ច្បាប់ចរាចរណ៍ផ្លូវគោក ។

លោកឧត្តមសេនីយ៍ទោ អ៊ុក កុសល ស្នើឲ្យសិក្ខាកាមខិតខំប្រឹងប្រែង ប្រកប ដោយការយកចិត្តទុកដាក់ ត្រងត្រាប់ ស្ដាប់ ក្រេបជញ្ជក់ កត់ត្រាចំណេះដឹងចំនុចសំខាន់ៗក្នុងមេរៀន ដែលបានបង្ហាត់បង្ហាញដោយគ្រូបង្គោល លើកឡើង ដល់ប្អូនៗ ដើម្បីផ្តល់ជាចំណេះដឹងចំណេះធ្វើ រួមទាំងបទពិសោធន៍ ចែករំលែកដល់បងប្អូនសម្រាប់អនុវត្តភារកិច្ចជាប្រចាំថ្ងៃ ក្នុងអាជីពជាមន្ត្រីនគរបាលជាតិ ។
លោកឧត្តមសេនីយ៍ទោ ស្នងការ បានផ្តាំផ្ញើដល់សិក្ខាកាមទាំងអស់ត្រូវថែទាំសុខភាពជាការប្រពៃ ដើម្បីជៀសផុតពីជំងឺកាចសាហាវ ជាពិសេសការចូលរួម បង្ការ ការឆ្លងរាលដាលវីរ៉ុស COVID-19  និងប្រកាសបើកវគ្គបំប៉នសមត្ថភាព មន្ត្រីនគរបាលចរាចរណ៍ផ្លូវគោក ចាប់ពីខណៈនេះតទៅ៕SRP

ខេត្តសៀមរាប៖ព័ត៌មានបឋមបានឲ្យដឹងថាមនុស្ស ក្មេងចាស់ ប្រុសស្រី មួយគ្រួសារ៧នាក់ បានរងរបួសធ្ងន់និងស្រាល ក្នុងហេតុការណ៍គ្រោះថ្នាក់ ដោយរថយន្តគៀគ្នា ហើយមួយគ្រឿងរេចង្កូតធ្លាក់ចូលស្នាមភ្លោះ ជ្រុលទៅបុកដើមឈើ។
ហេតុការណ៍នោះ បានកើតឡើងនាអំឡុងម៉ោង១០.០០ថ្ងៃទី៣១ខែមីនា លើផ្លូវជាតិលេខ៦ ក្នុងភូមិគោករមាស ឃុំគោកធ្លកក្រោម ស្រុកជីក្រែង។
រថយន្តដែលរងគ្រោះ ម៉ាកហាយលែនឌរ័ ពណ៍ស ពាក់ស្លាកលេខកោះកុង២B ៦៣៦៣។
សមត្ថកិច្ចក្នុងហេតុការណ៍ បានអោយដឹងថា មុនពេលកើតហេតុរថយន្តរងគ្រោះ បានបើកបរពីកើតទៅលិច លុះមកដល់ចំណុចកើតហេតុ ក៏ស្រាប់តែមានរថយន្តមួយគ្រឿងទៀត ក្នុងដំណើរស្របទិស បានឡើងវ៉ាហើយគៀ ទើបរថយន្តរងគ្រោះរេចង្កូតធ្លាក់ស្នាមភ្លោះ ជ្រុលទៅបុកដើមឈើបែបនេះ។ ទោះបីយ៉ាងណា សមត្ថកិច្ច នៅមិនទាន់ទទួលបានឈ្មោះអ្នករងគ្រោះនៅឡើយទេ ដោយកំពុងបញ្ជូនជនរងគ្រោះទៅមន្ទីរពេទ្យ៕SRP

ខេត្តកំពង់ចាម៖ លោក អ៊ុន ចាន់ដា អភិបាលខេត្តកំពង់ចាម អមដំណើរ ដោយ អភិបាល រង ខេត្ត ថ្នាក់ដឹកនាំ មន្ទីរអង្គភាព ពាក់ព័ន្ធ ជុំវិញខេត្ត និង អាជ្ញាធរ មូលដ្ឋាន នៅព្រឹកនេះផងដែរបានដឹកនាំក្រុមយុវជន ស.ស.យ.ក ខេត្ត និងក្រុង ដើម្បីចុះពិនិត្យ និងបំពាក់ឧបករណ៍វាស់ភាពសុទ្ធនៃខ្យល់ក្នុងបរិយាកាស នៅក្នុងសណ្ឋាគារមេគង្គ ក្រុងកំពង់ចាម ដែល ជា កន្លែងបុគ្គលិកក្រុមហ៊ុន Viking Cruise Journey ត្រូវបានដាក់ ឲ្យ នៅដាច់ដោយឡែករយៈពេល១៤ថ្ងៃ លើកទី ២។
គួរ បញ្ជាក់ ផង ដែរថា ក្រុមវាស់ភាពសុទ្ធនៃខ្យល់ ជាក្រុមជំនាញរបស់ក្រសួងបរិស្ថាន ដឹកនាំដោយលោក ចាយ សាមិត្ត អនុរដ្ឋលេខាធិការក្រសួងបរិស្ថាន ដោយ ការវាស់ស្ទង់នេះគឺដើម្បី ឲ្យ ដឹងអំពីបរិយាកាសខ្យល់ក្នុងអគារនោះ។ ចំពោះ លទ្ធផល នៃខ្យល់នឹងត្រូវបានយកទៅវិភាគ ដើម្បីរិះរកមធ្យោបាយជួយរៀបចំបរិយាកាស ក្នុងអគារ ឲ្យ មានភាពល្អប្រសើរ សំដៅជួយបង្កើនបរិស្ថាន និងលើកកម្ពស់សុខភាពរបស់អ្នកដែលស្នាក់នៅក្នុងអគារនេះ។

គួរ រំលឹក ផង ដែរ ថា ភ្ញៀវទេសចរណ៍ លេីនាវាឈ្មោះ Viking Cruise Journey ចំនួន៥៧ នាក់ ដែល មាន អ្នក ផ្ទុក មេរោគ Covid19 តម្រូវ ឲ្យ ស្នាក់នៅសណ្ឋាគារដាច់ដោយឡែក រយៈពេល ១៤ហេីយនោះ នៅ ថ្ងៃ ទី ២៣ ខែមីនា កន្លងទៅ នេះ ក្រុម គ្រូពេទ្យ ខេត្ត កំពង់ចាម បានយកសំណាកពួកគាត់ទៅពិនិត្យជាលើក ទី៣ នៅវិទ្យាស្ថានប៉ាស្ទ័ររាជធានី ភ្នំពេញ ជាលទ្ធផលដោយ គ្មាន ជំងឺ កូវីដ ១៩ ទេនោះ ទេីប អនុញ្ញាតិ ឲ្យ ពួកគាត់ចាកចេញពីសណ្ឋាគារមេគង្គ នេះ ដេីម្បី បន្ត ដំណើរ ត្រឡប់ ទៅ ស្រុក កំណើតវិញ រៀងៗខ្លួន ចំពោះ អ្នក ដែល មាន ផ្ទុក ជំងឺ កូវីដ ១៩ និង អ្នក ប៉ះពាល់ គឺ ត្រូវ បន្តធ្វេី ការ ព្យាបាល ឬ ស្នាក់នៅ ដាច់ ដោយ ឡែក នៅ សណ្ឋាគារ មេគង្គ នេះផងដែរ ៕SRP

ខេត្តកំពង់ចាម៖ស្ពាន​គៀន​ជ្រៃ​ថ្មី ដែល​មាន​ទទឹង​១០ម៉ែត្រ​ និង​បណ្តោយ​៩០ម៉ែត្រ​​ ស្ថិត​នៅ​ក្នុង​ភូមិ​ស្ពាន​ថ្មី​ ឃុំ​គៀន​ជ្រៃ​ ស្រុក​កំពង់​សៀម​ ត្រូវ​បាន​ស្ថាបនា​​ឡើង​ក្នុងរយៈពេល​ជាង​៤ខែ​ ពោលគឺ​ការសាងសង់នេះត្រូវ​បាន​បញ្ចប់​​មុន​ផែនការ​កំណត់​៦ខែ ព្រមទាំង​គ្រោង​អនុញ្ញាត​ឲ្យធ្វើ​ចរាចរ​ណ៍ឆ្លង​កាត់​ជា​បណ្ដោះ​អាសន្ន​ ក្នុង​ពេល​ឆាប់ៗ​ខាងមុខ​នេះ​។  ដែល​ជា​ហេតុ​ធ្វើ​ឲ្យ​បងប្អូន​ប្រជាពលរដ្ឋ​ ​សប្បាយ​រីករាយ​ក្នុង​ការ​ទទួល​ស្វាគមន៍​ដំណើរ​ លោក​​ អ៊ុន​ ចាន់ដា​ អភិបាលខេត្តកំពង់ចាម​ និង​លោក​​ ខ្លូត​ ផន​ ប្រធាន​ក្រុម​ក្រុមប្រឹក្សា​ខេត្ត​ ដែល​បានចុះ​មកពិនិត្យ​ការដ្ឋាន​ខាង​លើ​ នៅព្រឹកមិញនេះ អមដំណើរដោយលោកអភិបាលរងខេត្ត ថ្នាក់ដឹកនាំ​មន្ទីរអង្គភាព​ពាក់ព័ន្ធ​ជុំវិញខេត្ត​ និង​អាជ្ញាធរ​មូលដ្ឋាន​ផងដែរ​។ ​​

គួរ​រំលឹក​ផង​ដែរ​ថា​ ដោយសារទឹកជំនន់​ឆ្នាំ​២០១៩កន្លងទៅ​នេះ​ ឡើងក៏លឿន ហើយស្រកចុះទៅវិញក៏លឿន បានបង្កឲ្យមានការបាក់ស្រុតដីច្រាំងទន្លេជាច្រើនកន្លែង​ នៅតាមបណ្ដោយដងទន្លេមេគង្គ​ បណ្តាល​ឲ្យ​ហេដ្ឋារចនាសម្ព័ន្ធ​មួយ​ចំនួន​ត្រូវ​កាត់​ផ្តាច់​ ជាជាមួយគ្នានោះស្ពានថ្មី ១កន្លែង នៅ​លើកំណាត់ផ្លូវជាតិលេខ២៧៩(កំពង់ចាម – ស្ទឹងត្រង់) ស្ថិតក្នុង​ឃុំគៀនជ្រៃ ស្រុកកំពង់សៀម ខេត្តកំពង់ចាម ដែល​មានទំហំ​ ទទឹង​៤ម៉ែត្រ​ និង​បណ្តោយ​៩០ម៉ែត្រ​ បានកសាងឡើង ក្នុងអំឡុងឆ្នាំ២០០១-២០០២​ បានទទួលរងការបាក់ស្រុតដី ដោយសារទឹកហូរច្រោះ នា​រដូវ​ទឹកសម្រក​ បណ្ដាលឲ្យលេចចេញគ្រឹះផ្នែកខាងក្រោមនៃសរសរ​ជើងស្ពាន ដេីម្បី​បញ្ចៀស​នូវ​គ្រោះ​ថ្នាក់​ជាយថាហេតុ​ ដោយ​សារ​ការ​ធ្វេី​ចរាចរ​ណ៍លើ​ស្ពា​ន​ដែល​ត្រូវ​បាត់បង់​គុណភាព​នេះ លោក​​ អ៊ុន​​ ចាន់ដា  បាន​ស្នើដល់​បងប្អូន​ប្រជាពលរដ្ឋ ឲ្យ​មានការអត់ធ្មត់ ដោយតម្រូវឲ្យធ្វើចរាចរណ៍ ទៅតាមផ្លូវវាង​ក្រោម​ស្ពាន​ ជាបណ្ដោះអាសន្នសិន​ ដោយ​ត្រូវ​រង់ចាំក្រសួង​អភិវឌ្ឍន៍ជនបទ​ រៀបចំ​គម្រោង​​ស្ថាបនា​ស្ពានបេតុង​ថ្មី​ ជំនជំនួសស្ពានចាស់៕​SRP

ភ្នំពេញ៖​​សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅ​ព្រឹកថ្ងៃទី៣១ ខែមីនា ឆ្នាំ២០២០នេះ បានអញ្ជើញដឹកនាំកិច្ចប្រជុំគណៈអចិន្ត្រៃយ៍ គណៈរដ្ឋមន្ត្រី ដើម្បីពិនិត្យទៅលើសេចក្តី​ព្រាងច្បាប់គ្រប់គ្រងប្រទេសជាតិស្ថិតក្នុងភាពអាសន្ន។

ក្នុងកិច្ចប្រជុំដែលធ្វើឡើងនៅវិមានសន្តិភាព ទីស្តីការនាយករដ្ឋមន្រ្តី ចំណាយពេលប្រមាណ៣ម៉ោង សម្តេចតេជោ នាយករដ្ឋមន្រ្តី មានប្រសាសន៍ទៅកាន់គណ:អចិន្រៃ្តយ៍ គណៈរដ្ឋមន្ត្រី ពិនិត្យពិភាក្សាទៅលើសេចក្តី ព្រាងច្បាប់គ្រប់គ្រងប្រទេសជាតិស្ថិតក្នុងភាពអាសន្ន ក្នុងខណ:ប្រទេសជាតិ ក៏ដូចជាពិភពលោក ទាំងមូល កំពុងរីករាលដាលនៃជំងឺកូវីដ១៩ មានលក្ខណះជាសកលនោះ។ សម្តេចតេជោ ហ៊ុន សែន បានបញ្ជាក់ថា កម្ពុជាមិនទាន់មានច្បាប់គ្រប់គ្រងប្រទេសជាតិ ក្នុងគ្រាមានអាសន្ននៅឡើយនោះទេ​ ដូច្នេះការបង្កើតច្បាប់នេះឡើង ដើម្បីជាឧបករណ៍ផ្នែកច្បាប់មួយគ្រប់គ្រងប្រទេសជាតិ ក្នុងគ្រា​មាន​អាសន្ន។ សម្តេចតេជោ ហ៊ុន សែន បានអំពាវនាវដល់ប្រជាពលរដ្ឋ និងអង្គការសង្គមស៊ីវិលផងដែរ កុំឱ្យមានការព្រួយបារម្ភច្បាប់នេះ ព្រោះមិនមែនបង្កើតឡើងមក ដើម្បីរឹតដ្បិតសេរីភាពរបស់​ប្រជា​ពលរដ្ឋ និងសេរីភាពនៃការបញ្ចេញមតិនោះឡើយ។ ដូចគ្នានឹងប្រសាសន៍លើកឡើងរបស់សម្តេចតេ​ជោ នៅក្នុងសន្និសីទសារព័ត៌មាន បន្ទាប់ពីការអញ្ជើញចូលរួមសម័យប្រជុំពេញអង្គលើកទី៣៣ នីតិ​កាលទី៦ នៃរដ្ឋសភា កាលពីថ្ងៃទី៣០ ខែមីនា ម្សិលមិញ ​សម្តេចតេជោ ហ៊ុន សែន បានបញ្ជាក់យ៉ាង​ដូច្នេះ «យើងបានធ្វើសេចក្តីព្រាងច្បាប់នេះរួចរាល់ហើយ មានទាំងសេចក្តីថ្លែងហេតុប្រុងប្រៀប។ យើង​នឹងមានការបែងចែកថាអ្វីខ្លះដែលត្រូវធ្វើ អ្វីខ្លះដែលមិនត្រូវធ្វើ ហើយពេលនោះដាក់ចេញវិធាន​ការ ​បិទទីតាំងសាធារណៈ និងឯកជនណាមួយ ដែលមានភាពចាំបាច់ដើម្បីឆ្លើយតប»។

សម្តេច​តេ​ជោ​បានបញ្ជាក់ផងដែរថា សេចក្តីព្រាងច្បាប់គ្រប់គ្រងប្រទេសជាតិ ក្នុងគ្រាមានសអាសន្ន ត្រូវបាន​រៀប​ចំ​ដោយ លោក កើត រិទ្ធ រដ្ឋមន្ត្រីក្រសួងយុត្តិធម៌ថ្មី ព្រមទាំងបានបញ្ជូនទៅបណ្តា ឧបនា​យក​រដ្ឋ​មន្ត្រីទាំងអស់ផងដែរ។ តាមរដ្ឋធម្មនុញ្ញរបស់កម្ពុជាបានចែងថា ការដាក់ប្រទេសឱ្យស្ថិត​នៅក្នុង​គ្រា​អាសន្ន គឺជាការអនុវត្តតាមមាត្រា២២ នៅពេលដែលប្រទេសជាតិស្ថិតនៅក្នុងគ្រោះថ្នាក់ ដែលមិន​អាចព្យាករណ៍បាន។ ប៉ុន្តែទោះជាយ៉ាងនេះក្តី រដ្ឋធម្មនុញ្ញរបស់កម្ពុជា មិនបានចែងច្បាស់ និងលម្អិត​អំពីអត្ថន័យ ឬសកម្មភាព ការដាក់ប្រទេសជាតិឱ្យស្ថិតនៅក្នុងគ្រាអាសន្ននោះទេ។

​​មាត្រា ២២ថ្មី ចែងថា «នៅពេលប្រជាជាតិប្រឈមមុខនឹងគ្រោះថ្នាក់ ព្រះមហាក្សត្រ ទ្រង់​ប្រកាស​ប្រទានដំណឹងជាសាធារណៈ ដាក់ប្រទេសជាតិស្ថិតនៅក្នុងភាពអាសន្ន ក្រោយពីបានមតិ​ឯកភាពពី នាយករដ្ឋមន្ត្រី ប្រធានរដ្ឋសភា និងប្រធានព្រឹទ្ធសភា»។ សម្តេចតេជោ ហ៊ុន សែន បាន​បញ្ជាក់ថា បន្ទាប់ពីពិនិត្យក្នុងកិច្ចប្រជុំគណៈអចិន្ត្រៃយ៍គណៈរដ្ឋមន្ត្រីនៅព្រឹកនេះរួចហើយ សេចក្តី​ព្រាងច្បាប់គ្រប់គ្រងប្រទេសជាតិ ក្នុងភាពអាសន្ននឹងត្រូវលើកមកពិភាក្សា និងសម្រេចក្នុងកិច្ចប្រជុំ​ពេញអង្គរបស់គណៈរដ្ឋមន្ត្រីនៅពេលខាងមុខ។ សម្តេចតេជោ ហ៊ុន សែន ក៏បានបង្ហាញក្តីរំពឹងផង​ដែរ​ថា រដ្ឋសភានឹងពន្លឿនក្នុងការពិនិត្យ និងអនុម័តទៅលើសេចក្តីព្រាងច្បាប់មួយនេះ បបន្ទាប់ពីគណៈរដ្ឋមន្រ្តីធ្វើការពិនិត្យសម្រេចហើយនោះ​៕SRP

ខេត្តកំពង់ចាម៖ព្រះរាជអាជ្ញាអមសាលាដំបូងខេត្តនៅថ្ងៃទី៣០ ខែមីនាម្សិលមិញ បានបញ្ជា ដល់កម្លាំងសហការចុះឆែកឆេរ នូវគ្រប់ឱសថស្ថានចំនួន៨កន្លែង ក្នុងក្រុងកំពង់ចាម ដើម្បីធ្វើការត្រួតពិនិត្យ ទៅលើឧបករណ៍ ធ្វើតេស្តជំងឺកូវីដ១៩ លក់អាកុល និងលក់ម៉ាស។
លោក សុធា ពិសិដ្ឋ ព្រះរាជអាជ្ញារងអមសាលាដំបូងខេត្ត បានប្រាប់បណ្ដាញសារព័ត៌មាន សៀមរាបប៉ុស្ដិ៍ថា
ដោយមានការសហការ ពីលោក អ៊ុន ចិន្តា អភិបាលខេត្ត លោក ច្រឹង ខ្មៅ ព្រះរាជអាជ្ញាអមសាលាដំបូងខេត្ត
បានបញ្ជាកម្លាំងសហការ មាន នគរបាលយុត្តិធម៌ មន្ត្រីជំនាញពាក់ព័ន្ធចុះ
ទៅទីតាំងឱសថស្ថាន ដើម្បីធ្វើការ ឆែកឆេរ ត្រួតពិនិត្យ និងចាប់យកនូវឧបករណ៍ធ្វើតេស្តទាំងនោះ ដែលពុំមានការទទួលស្គាស់ពីក្រសួងសុខាភិបាល និងអង្គការសុខភាពពិភពលោក។
លោក សុធា ពិសិដ្ឋ បន្តថាកម្លាំងបានចុះ ទៅឱសថស្ថាននីមួយៗ ដែលសង្ស័យ នូវឧបករណ៍ធ្វើតេស្តជំងឺ កូវីដ១៩ កន្លងមកនេះ បច្ចុប្បន្ន គឺមានការផ្សព្វផ្សាយ និងនាំចូល នូវឧបករណ៍ធ្វើតេស្ត កូវីដ១៩នេះ ដោយពុំមានការទទួលស្គាល់ពីក្រសួងសុខាភិបាល និងអង្គការសុខភាព ពិភពលោក ដែលជាការឆរបោក និងជាការចូលទំនិញក្លែងក្លាយ មិនគោរពទៅតាមស្តង់ដារ។
ហេតុដូច្នេះ ដើម្បីជាផលប្រយោជន៍សង្គម ក៏ដូចជាផលប្រយោជន៍របស់ប្រជាពលរដ្ឋ ដូចជាការចូលរួមប្រយុទ្ធប្រឆាំងការរីករាលដាលនៃជំងឺ កូវីដ១៩ នេះ ជាពិសេស ក្រោមការអនុវត្តទៅតាមអនុសាសន៍ដឹកនាំដ៏ខ្ពង់ខ្ពស់របស់សម្តេចនាយករដ្ឋមន្ត្រី និងជាប្រធានគណៈកម្មាការជាតិប្រយុទ្ធប្រឆាំងជំងឺ កូវីដ១៩ នេះ បានចាត់វិធានការជាបន្ទាន់ ក្នុងការអនុវត្តលើករណីទាំងនេះ ។
បើតាមលោកព្រះរាជអាជ្ញារងបានបញ្ជាក់ថា ជាលទ្ធផលក្នុងប្រតិបត្តិការនេះ ក្រោយធ្វើការឆែកឆេរ និងស្វែងរកកន្លែងឱសថស្ថានណាមួយដែលធ្វើការលក់នូវឧបករណ៍តេស្តរកវីរុសកូវីដ១៩នេះ បានត្រួតពិនិត្យ ចំនួន៩៨កន្លែងនៃឱសថស្ថាន ក្នុងនោះដែរ ក៏មានការចូលរួមសហការពីម្ចាស់ឱសថស្ថាននីមួយៗ បានល្អប្រសើរ ហើយក៏ពុំមាន ឱសថស្ថានណាមួយ បានលក់នូវឧបករណ៍ធ្វើតេស្តកូវីដ១៩នេះទេ ដោយម្ចាស់គាត់មានការយល់ដឹងពីបញ្ហានេះ ដោយពួកគាត់បានស្តាប់តាមប្រសាសន៍នាយករដ្ឋមន្ត្រី ហ៊ុន សែន ផងដែរ៕SRP

ខេត្តកំពង់ធំ៖លោកឧត្តមសេនីយ៍ទោ អ៊ុក កុសល ស្នងការនគរបាល
ខេត្តកំពង់ធំ និងជាប្រធានគណៈកម្មាធិការមូលដ្ឋាន
សមាគមមិត្តនគរបាល នៃស្នងការដ្ឋាននគរបាលខេត្ត នៅព្រឹកមិញបានជួបសំណេះសំណាលនិងប្រគល់ថវិកា
សមាគមមិត្តនគរបាលជាតិ ជូនគ្រួសារសមាជិកចំនួន ០៣ គ្រួសារ នៅស្នងការដ្ឋាននគរបាលខេត្តកំពង់ធំ ដែលបានពលីមរណៈ។

១-លោកអនុសេនីយ៍ត្រី ហេង ជ្រុយ ជាមន្ត្រីនគរបាលការិយាល័យសន្តិសុខផ្ទៃក្នុង នៃស្នងការដ្ឋាននគរបាល
ខេត្តកំពង់ធំ ទទួលថវិកាចំនួន ៦.០០០.០០០រៀល។

២-លោកអនុសេនីយ៍ត្រី សុខ ដារី ជាមន្ត្រីនគរបាល ការិយាល័យចរាចរណ៍ផ្លូវគោក នៃស្នងការដ្ឋាន
នគរបាលខេត្តកំពង់ធំ ទទួលថវិកា
ចំនួន ៦.០០០.០០០រៀល។

៣-លោក កិ: ស៊ន ជាមន្ត្រីនគរបាលចូលនិវត្តន៍
ទទួលថវិកាចំនួន ៦.០០០.០០០រៀល ។

សរុបទឹកប្រាក់ចំនួន ១៨.០០០.០០០រៀល៕SRP

ខេត្តសៀមរាប៖នគរបាលសន្តិសុខផ្ទៃក្នុងនៃស្នងការនគរបាលខេត្តសៀមរាប បានឃាត់ខ្លួនស្ត្រីម្នាក់ មានមុខរបរលក់ស្រាបៀរនឹងអីវ៉ាន់ចាប់ហួយ ករណីស៊ែរ facebook បន្ត ពីរអាខោន ដែលបានប្រកាសលក់ប្រដាប់ធ្វើតេស្តរកជំងឺកូវីដ១៩ ដោយមិនចាំបាច់ទៅមន្ទីរពេទ្យ បើមានការសង្ស័យ។
ការឃាត់ខ្លួននេះ ធ្វើឡើងនៅថ្ងៃទី២៩ ខែមីនាឆ្នាំ២០២០។

ស្ត្រីរូបនេះ មានឈ្មោះលាន ស្រីខួច អាយុ២៥ ជនជាតិខ្មែរ រស់នៅភូមិយាង ឃុំឬស្សីលក ស្រុកជីក្រែង ខេត្តសៀមរាបមុខរបរ លក់ស្រាបៀនិង ឥវ៉ាន់ចាបហួយ។
ទោះយ៉ាងណា ស្ត្រីរូបនេះ បានធ្វើកិច្ចសន្យានឹងទទួលស្គាល់កំហុស ដោយសូមអភ័យទោសដល់ដល់ក្រសួងពាក់ព័ន្ធនឹងបញ្ឈប់ការផ្សាយបន្តទៀត។
ជាមួយគ្នានេះ សមត្ថកិច្ចនគរបាលបានធ្វើការណែនាំអប់រំ និងឱ្យវិលត្រឡប់ទៅគេហដ្ឋានវិញ៕SRP

ភ្នំពេញ៖មន្ត្រីជាន់ខ្ពស់រាជរដ្ឋាភិបាល ០៩រូបសច្ចាប្រណិធាន ចូលកាន់តំណែង ក្នុង ព្រះបរមរាជវាំង បន្ទាប់ពីត្រូវបានតែងតាំង។
នៅរសៀលថ្ងៃទី៣០ ខែមីនាម្សិលមិញ
នាព្រះទីនាំងទេវាវិនិច្ឆ័យ ព្រះបរមរាជវាំង ពិធីសច្ចាប្រណិធានចូលកាន់តំណែងត្រូវបានប្រារព្ធធ្វើ ចំពោះព្រះបរមឆាយាលក្ខណ៍ ព្រះករុណា ព្រះមហាក្សត្រ ជាទីគោរពសក្ការៈដ៏ខ្ពង់ខ្ពស់បំផុត ចំពោះព្រះភ័ក្រ្តនៃសម្តេចព្រះមហាសង្ឈរាជទាំងពីរគណៈ និងទេវតាថែរក្សាព្រះមហាសេ្វតច្ឆត្រ នៃឥស្សរជនជាតិក្រោយទទួលបានព្រះរាជក្រឹត្យ តែងតាំង និងកែសម្រួលសមាសភាពរាជរដ្ឋាភិបាល នៃព្រះរាជាណាចក្រកម្ពុជា។

សូមជម្រាបថា នៅថ្ងៃទី៣០ ខែមីនា ឆ្នាំ២០២០ ព្រះមហាក្សត្រនៃព្រះរាជាណាចក្រកម្ពុជា បានចេញព្រះរាជក្រឹត្យកែសម្រួលតែងតាំងសមាសភាពរដ្ឋមន្ត្រីថ្មី ក្នុងនោះតែងតាំងឥស្សរជនជាទេសរដ្ឋមន្ត្រីចំនួន៥រូប ព្រមទាំងកែសម្រួល និងតែងតាំងសមាសភាពរដ្ឋមន្ត្រីថ្មីចំនួន០៤រូប តបតាមសំណើរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។

សម្រាប់តំណែងជាទេសរដ្ឋមន្ដ្រី ទទួលបន្ទុកបេសកកម្មពិសេស មានឥស្សរជន ៤រូប រួមមាន លោក ហ៊ឹម ឆែម ,លោក អង្គ វង្សវឌ្ឍានា , លោក ត្រាំ អ៉ីវតឹក និង លោក ពេជ្រ ប៊ុនធិន ដោយឡែក លោក ចម ប្រសិទ្ធ ជាទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍។

ក្នុងនោះដែរ ក៏មានរដ្ឋមន្ដ្រីថ្មី ចំនួន ៤រូប គឺ៖

០១.លោក កើត រិទ្ធ រដ្ឋមន្រ្តីក្រសួងយុត្តិធម៌។

០២.លោក ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍។

០៣.លោក ឈិត សុខុន រដ្ឋមន្រ្តីក្រសួងធម្មការ និងសាសនា។

និង០៤.លោក ព្រំ សុខា រដ្ឋមន្រ្តីក្រសួងមុខងារសាធារណៈ៕SRP

ខេត្តសៀមរាប៖អ្នកនិយមតាមដានព័ត៌មាន តាមរយ:ការអានកាសែត ទស្សនាវត្តី រួមទាំងម្ចាស់តូបផង បានទទូចសុំអោយអាជ្ញាធរខេត្ត មេត្តារក្សាទុកតូបលក់កាសែតមួយ ដែលមានអាយុកាលជាង១០ឆ្នាំមកហើយ។
ការទទូចស្នើសុំរក្សាទុកនេះ គឺបន្ទាប់ពីកម្លាំងសមត្ថកិច្ចបានចុះរៀបចំសណ្តាប់ធ្នាប់ ដោយតម្រូវអោយរុះរើតូបលក់ដូរផ្សេងៗ ដែលសាងសង់លើចំណីផ្លូវសាធារណ: កាលពីថ្ងៃទី២៣ខែមីនាកន្លងទៅថ្មីៗនេះ ហើយក្នុងនោះក៏តម្រូវអោយរុះរើតូបលក់កាសែតផងដែរ។ ជាមួយគ្នានោះ អាជ្ញាធរទុកពេលត្រឹមតែ១សប្តាហ៍ ក្នុងការរុះរើតូប។ តែបើម្ចាស់មិន ព្រមសហការ កម្លាំងសមត្ថកិច្ចនិងចាត់វិធានការតាមច្បាប់។
ក្នុងករណីនេះ ម្ចាស់តូប អ្នកនិយមតាមដានព័ត៌មាន អ្នកនិយមអាន ពិសេសអ្នកកាសែតក្នុងខេត្តសៀមរាបតែម្តង បានទទូចសុំអោយមានការលើកលែង ដោយរក្សាទុកចំពោះតូបលក់កាសែតមួយនេះ ត្បិតនៅខេត្តសៀមរាប គឺមានតូបលក់កាសែតតែមួយគត់។ ប្រសិនបើបាត់បង់មែននោះ វាហាក់ដូចជាបាត់កូនកញ្ចក់តូចមួយ ដែលធ្លាប់ឆ្លុះមើលទិដ្ឋភាព ក៏ដូចជាសកម្មភាពផ្សេៗក្នុងខេត្តមួយនេះអីយ៉ាងចឹង។
លោកស្រី សំប៊ន ម្ចាស់តូបលក់កាសែត ដែលមានទីតាំងនៅម្តុំផ្សារកណ្តាល រ៉បនិងរបងមន្ទីរពេទ្យបង្អែកខេត្តសៀមរាប បានប្រាប់តាមទូរសព្ទ័នាល្ងាចថ្ងៃទី៣០ខែមីនានេះថា ក្នុងថ្ងៃដែលសមត្ថកិច្ចចម្រុះ ចុះទៅណែនាំនិងជូនលិខិត ស្តីពីការរុះរើតូប រូបលោកបានព្យាយាមសុំក្តីមេត្តា ពីសមត្ថកិច្ច និងថ្នាក់ដឹកនាំដែលចុះផ្ទាល់ដែរ។តែគ្រប់យ៉ាង គឺហាក់មិនទទួលបានក្តីសង្ឃឹមឡើយ ដោយពេលវេលាមិនអំណោយ ផល។ លោកស្រីបន្តថា តូបកាសែតនេះ បានដំណើរការលក់តាំងពីអំឡុងឆ្នាំ១៩៩៦មកម្លេះ។ មុនពេលមានប្រពន្ធ័បច្ចេកវិទ្យាទំនើប និងហ្វេសប៊ុក អ្នកនៅខេត្តសៀមរាប ស្ទើតែ៨០ភាគរយទៅអង្គុយអានកាសែត ពិសេស មន្ត្រីរាជការតែម្តង។ ប៉ុន្តែពេលនេះអាជ្ញាធរបែជាតម្រូវអោយរុះរើ ហើយទៅជួលតូបលក់ក្នងផ្សារ។ កាសែតមិនអាចលក់ក្នុងផ្សារដូចទំនិញផ្សេងៗនោះទេ គឺអាចលក់តែតាមដងផ្លូវប៉ុណ្ណោះ។
លោកសំ ប៊ន បញ្ជាក់ថា ប្រសិនបើអាជ្ញាធរពង្រីកផ្លូវ ដោយបង្រួមខឿនថ្នល់ រូបលោកក៏សុខចិត្តកាត់បង្រួមតូបទៅតាមខឿនថ្នល់ដូចគ្នាដែរ ព្រោះថាបើរើទៅកន្លែងផ្សេង គឺសុទ្ធសឹងជាចំណីផ្លូវទាំងអស់។
ក្នុងករណីនេះលោកនួន ពុទ្ធារ៉ា អភិបាលក្រុងសៀមរាប បានមានប្រសាសន៍តាមទូរសព្ទ័ថា ការងារនោះជាសមត្ថកិច្ចរបស់ខេត្ត ចឹងទេសូមសាកសួរទៅខេត្តចុះ។
អភិបាលរងខេត្តសៀមរាប ដែលដឹកនាំកម្លាំងចុះផ្ទាល់ លោកពិន ប្រាកដ បានមានប្រសាសន៍តាមទូរសព្ទ័ដែរថា ករណីតូបកាសែតខាងលើនេះ លោកមិនថាអ្វីនោះទេ។ តែសុំអោយម្ចាស់តូបដាក់សំណើរសុំ ទៅលោកអភិបាលខេត្តផ្ទាល់ទៅ យ៉ាងណានោះគឺមានប្រសិទ្ធិភាពល្អ។ លោកបន្តថា សម្រាប់លោក ពិតជាមិនចង់អោយបាត់បង់តូបកាសែតដូចគ្នាដែរ ព្រោះថា អ្នកចូលចិត្តអានកាសែត គឺរូបលោកផ្ទាល់តែម្តង។
យោងតាមប្រសាសន៍ ឆ្លើយតបរបស់លោកពិន ប្រាកដ អភិបាលរងខេត្តសៀមរាប ក្នុងមនោ សញ្ចេតនា ដ៍គួអោយគោរពនេះ គេរំពឹងថា ជាភ្លើងខៀវមួយ ឆ្ពោះទៅរកការរក្សាទុកតូបលក់កាសែតខាងលើ និងជាក្តីសង្ឃឹម សម្រាប់អ្នកនិយមខាងព័ត៍មាន៕SRP

ភ្នំពេញ៖លោក ឌីមីទ្រី ធ្វីតកូស(Dmitri Tsvetkov)ឯកអគ្គរដ្ឋទូតសហព័ន្ធរុស្ស៊ីដែលក្នុងអាកាសដែលលិកត្រូវបញ្ចប់បេសកកម្មកាទូតនៅព្រះរាជាណាចក្រកម្ពុជា បានជម្រាបជូន សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅវិមានសន្តិភាព រសៀលថ្ងៃចន្ទនេះថានៅក្នុងដំណាក់កាលខាងមុខនេះ រុស្ស៊ី នឹងផ្ដល់ជំនួយដល់កម្ពុជាជាពិសេសក្នុងការប្រយុទ្ធប្រឆាំងនឹងព័ត៌មានក្លែងក្លាយ ហើយនឹងជួយគាំទ្រដល់កម្ពុជាដើម្បីឱ្យមានការចុះហត្ថលេខាលើកិច្ចព្រមព្រៀងពាណិជ្ជកម្មសេរី ហើយលោកក៏បានជម្រាបជូនសម្ដេចតេជោផងដែរថា រុស្ស៊ីកំពុងតែត្រៀមរៀបចំបញ្ជូនម៉ាស មកផ្ដល់ជូនកម្ពុជា ដើម្បីជាការចូលរួមចំណែក ក្នុងការប្រយុទ្ធប្រឆាំងជំងឺ COVID-19 ផងដែរ ។
លោក ឌីមីទ្រី ធ្វីតកូស បានថ្លែងអំណរគុណជូនចំពោះសម្ដេចតេជោ និងថ្នាក់ដឹកនាំក្នុងជួររាជរដ្ឋាភិបាលកម្ពុជា ក៏ដូចជាប្រជាពលរដ្ឋកម្ពុជាផងដែរដោយ លោកបានមកបំពេញបេសកកម្មការទូតរយៈពេល ៦ឆ្នាំ នៅក្នុងព្រះរាជាណាចក្រកម្ពុជា ទទួលបានការគាំទ្រ និងជួយជ្រោមជ្រែងយ៉ាងខ្លាំងពីសម្ដេចតេជោ ក៏ដូចជាមន្ត្រីថ្នាក់ដឹកនាំទាំងអស់របស់រាជាណាចក្រកម្ពុជា ដែលការគាំទ្រនេះធ្វើឲ្យលោកបានទទួលជោគជ័យយ៉ាងត្រចះត្រចង់ក្នុងបេសកកម្មកាទូត។ ក្នុងរយៈពេល ៦ ឆ្នាំនេះ កម្ពុជា និងរុស្ស៊ី បានចុះហត្ថលេខាលើឯកសារចំនួន ៦២ ហើយក៏បានចុះហត្ថលេខាលើកិច្ចព្រមព្រៀងចំនួន ១៤ ផងដែរ។ ជាមួយនេះ លោកក៏បានរៀបចំឲ្យមានឱកាសដំណើរទស្សនកិច្ចរបស់លោក នាយករដ្ឋមន្ត្រីរុស្ស៊ី មកកាន់កម្ពុជា ក៏ដូចជាដំណើរទស្សនកិច្ចជាផ្លូវការរបស់សម្ដេចតេជោទៅកាន់ប្រទេសរុស្ស៊ីផងដែរ។
សម្ដេចតេជោ ហ៊ុន សែន បានថ្លែងអំណរគុណយ៉ាងជ្រាលជ្រៅចំពោះលោក ឌីមីទ្រី ដែលបានប្រឹងប្រែងអស់ពីកម្លាំងកាយចិត្តក្នុងការបំពេញបេសកកម្មកាទូតនៅកម្ពុជា។
ទន្ទឹមនឹងនេះ សម្ដេចមានប្រសាសន៍ថា លោកឌីមីទ្រី គឺជាឯកអគ្គរដ្ឋទូតមួយដែលបានស្ដារឡើងវិញនូវទំនាក់ទំនងរវាងកម្ពុជា និងរុស្ស៊ីដែលមានវ័យចំណាស់មកហើយមកកាន់ដំណាក់កាលថ្មី។ លើពីនោះទៅទៀតលោកក៏បានរៀបចំឱ្យមានដំណើរទស្សនកិច្ចជាផ្លូវការ ហើយជាប្រវត្តិសាស្ត្ររបស់នាយករដ្ឋមន្ត្រីរុស្ស៊ី និងដំណើរទស្សនកិច្ចជាផ្លូវការរបស់សម្ដេចតេជោទៅកាន់ប្រទេសរុស្ស៊ីផងដែរ។
នាយករដ្ឋមន្ត្រី បានថ្លែងអំណរគុណចំពោះរដ្ឋាភិបាល និងប្រជាពលរដ្ឋរុស្ស៊ីដែលតែងតែជួយកម្ពុជាកន្លងមកហើយបន្តជួយដល់កម្ពុជាតទៀតលើបញ្ហាពាក់ព័ន្ធនឹងការប្រយុទ្ធប្រឆាំងព័ត៌មានក្លែងក្លាយក៏ដូចជាការរៀបចំផ្ដល់ម៉ាសដល់កម្ពុជាដើម្បីប្រយុទ្ធប្រឆាំងនឹងជំងឺកូវីដ១៩នេះ។
សម្ដេចតេជោ បានមានប្រសាសន៍ផងដែរថា ជាការពិតយើងមានទំនាក់ទំនងរយៈពេលយូរឆ្នាំមកហើយ។ យ៉ាងណាក៏ដោយទំហំពាណិជ្ជកម្មរវាងប្រទេសយើងទាំងពីរនៅតូចនៅឡើយ ដូច្នេះគប្បីណាយើងជំរុញពិនិត្យមើលសក្តានុពលទាំងឡាយណាដែលអាចជំរុញពាណិជ្ជកម្មរវាងប្រទេសទាំងពីរឲ្យបានកាន់តែធំធាត់ឡើងថែមទៀត៕SRP