ខេត្តសៀមរាប៖នគរបាលការិយាល័យប្រឆាំងការជួញដូរមនុស្ស និងការពារអនីតិជនខេត្ត  បានចាប់ខ្លួនជនបរទេសម្នាក់ ករណីទិញពេស្យាចារកុមារ។
លោកវសេនីយ៍ឯកជា ហេង នាយការិយាល័យនគរបាលប្រឆាំងការជួញដូរមនុស្ស និងការពារអនីតិ ជនខេត្តសៀមរាប បានអោយដឹងថា ការចាប់ខ្លួនជនខាងលើបានធ្វើឡើងកាលពីម៉ោង៩និង៣០នាទីយប់ ថ្ងៃទី២៤ខែឧសភាឆ្នាំ២០២០ នៅចំណុចបន្ទប់ជួលភូមិតាវៀន សង្កាត់សាលាកំរើក ក្រុងសៀមរាប។
ជនសង្ស័យមានឈ្មោះ TRILESSKY RAN កើតថ្ងៃទី 27 ខែមករា ឆ្នាំ1978 ភេទប្រុសជនជាតិអ៊ីស្រាអែល កាន់លិខិតឆ្លងដែនថតចំលងលេខ 23293412។ ជននេះ ធ្លាប់ជាប់ពន្ធនាគារនៅខេត្តស្វាយរៀងពីបទប្រើប្រាស់ដោយខុសច្បាប់នូវសារធាតុញៀនសាលក្រមលេខ 263 (គ) ចុះថ្ងៃទី31 ខែតុលា ឆ្នាំ2019 ។
លោកនាយការិយាល័យបន្តថា តាមសេចក្តីរាយការណ៍ ជនបរទេសម្នាក់នេះ កាលពីចុងខែមេសាឆ្នាំ២០២០ បានជិះម៉ូតូដើររកកុមារីនៅតាមភូមិសុំធ្វើជាកូនធម៌។ បន្ទាប់មកជនបរទេសនោះ បានចូលមកផ្ទះជួលរបស់ឈ្មោះ យ៉ា ម៉ៃសារី ហើយបានទាក់ទងកូនគាត់ម្នាក់ឈ្មោះ ល.ហ.ហ្ស ភេទស្រី អាយុ 11ឆ្នាំ ។ លោកបន្ថែមថា ក្រោយពេល ធ្វើការជាមួយជនរងគ្រោះភ្លាម ឈ្មោះ ល. ហ.ហ្ស និងម្ដាយបានឆ្លើយថា ជនបរទេសនេះបានទៅដល់ផ្ទះរបស់គាត់នៅអំឡុងចុងខែ មេសា ឆ្នាំ 2020 ចំនួន ២ដង ហើយបានចាប់កូនស្រីរបស់គាត់ឈ្មោះ ល. ហ.ហ្ស ទៅដេកអោបក្នុងផ្ទះរបស់គាត់  ហើយកូនស្រីរបស់គាត់ខ្លាចក៏រត់ចេញ ជនបរទេសនោះក៏បានលួងលោមឲ្យប្រាក់ 50000៛។ ក្រោយមកជនបរទេសនោះបានទៅរកកូនស្រីគាត់ម្តង ទៀតតែគាត់មិនឲ្យចូលផ្ទះ។ លុះយប់ថ្ងៃទី ២៤ខែឧសភា ឆ្នាំ២០២០នេះ ជននេះទៅម្តងទៀត ទើបគាត់រាយការណ៍ជូនប្រជាការពារភូមិអោយជួយតែម្ដង។ ករណីនេះមានជនរងគ្រោះ ៤នាក់ ហើយត្រូវបានអាណាព្យាបាលប្តឹង ទាំង៤នាក់។
លោកជា ហេង បញ្ជាក់ទៀតថា តាមការ សាកសួរជនសង្ស័យមិនសារភាពទេ ព្រមទាំងមានចរិកច្រងេងច្រងាងដាក់សមត្ថកិច្ចថែមទៀត។ ជននេះ ត្រូវឃាត់ខ្លួនតាមបញ្ជាលោក កើត វណ្ណារ៉េត ព្រះរាជ អាជ្ញាអមសាលាដំបូងខេត្តសៀមរាប។ ជនសង្ស័យ បានកសាងសំណុំរឿងបញ្ជូនទៅតុលាការនៅថ្ងៃទី ២៥ ខែឧសភា ឆ្នាំ២០២០នេះចាត់កាតាមនីតិវិធី៕SRP

ខេត្តសៀមរាប៖សង្កាតរដ្ឋបាលព្រៃឈើប្រាសាទបាគងនៅត្រូវថ្ងៃទី២៤ខែឧសភាឆ្នាំ២០២០បានទទួលសត្វស្វាព្រាហ្មណ៏មួយក្បាល   ពីមន្រ្តីអភិរក្យអង្គរ។ លោកយឹម ស៊ីវន នាយសង្កាត់រដ្ឋបាលព្រៃឈើបាគងបានឲ្យដឹងថាក្រោយទទួលលោកបានប្រគល់ជូនបន្តទៅមជ្ឈមណ្ឧលអង្គការអភិរក្សសត្វព្រៃ (ក្បាលស្ពាន)៕SRP

ខេត្តសៀមរាប៖អាហរដ្ឋានចំនួន០៣ទីតាំងត្រូវបានសមត្ថកិច្ចចុះបង្ក្រាបក្រោមរូបភាពបទល្មើសសត្វព្រៃ។ ការបង្ក្រាបធ្វើឡើង

ថ្ងៃទី២៤ខែឧសភាឆ្នាំ២០២០ ដោយសង្កាត់រដ្ឋបាលព្រៃឈើប្រាសាទបាគង នៃខណ្ឌរដ្ឋបាលព្រៃឈើសៀមរាប សហការជាមួយក្រុមអន្តរាគមន៍បង្ក្រាបបទល្មើសសត្វព្រៃចល័តនៃរដ្ឋបាលព្រៃឈើ។

ទីតាំងដូចខាងក្រោម៖ ០១.អាហារដ្ឋានម្លប់មហាហេង  ស្ថិតនៅភូមិទ្រាំងសង្កាត់ស្លក្រាម  ក្រុងសៀមរាប ដោយរឹបអូសវត្ថុតាងដូចខាងក្រោម៖

-ទោមងាប់ចំនូន១១ក្បាល

-លលកងាប់ចំនួន៥០ក្បាល

-និងចាបស្រូវងាប់ចំនួន២៣០ក្បាល។

០២. អាហារដ្ឋានថារីម៉ាក់ប្រាង្គ  ស្ថិតនៅភូមិទ្រាំង សង្កាត់ស្លក្រាម ក្រុងសៀមរាប ដោយរឹបអូសវត្ថុតាងដូចខាងក្រោម៖

-សាច់ជ្រូកព្រៃស្រស់ចំនួន៣គីឡូក្រាម

-លលកទ្រាំងងាប់ចំនួន៣៧ក្បាល

-ចាបស្រូវងាប់ចំនួន១៥០ក្បាល

-និងគ្រួចអ៊ីតងាប់ចំនួន១០ក្បាល។

០៣. អាហារដ្ឋានសម្រស់ម្លប់ម៉ាក់ប្រាង្គថ្មី ស្ថិតនៅភូមិទ្រាំង សង្កាត់ស្លក្រាម ក្រុងសៀមរាប ដោយរឹបអូសវត្ថុតាងដូចខាងក្រោម៖

-សាច់អន្សងស្រស់ចំនួន៣.៣គីឡូក្រាម

-សាច់ជ្រូកព្រៃស្រស់ចំនួន៥.៣គីឡូក្រាម

-ចាបស្រូវងាប់ចំនួន៨០ក្បាល

-លលកបាយងាប់ចំនួន១០ក្បាល

-និងអណ្តើកស្រែងាប់១ក្បាលស្មើនឹង០.៨គីឡូក្រាម។

វត្តុតាងទាំងអស់ខាងលើ ត្រូវបានកប់បំផ្លាញចោលនៅថ្នាលបណ្តុះកូនឈើស្ពានអង្គរភូមិអញ្ចាញ សង្កាត់នគរធំ ក្រុងសៀមរាប។

សូមបញ្ជាក់ថានៅក្រុងសៀមរាប​ភោជនីយដ្ឋានមួយចំនួនបានលក់សត្វព្រៃរាប់ឆ្នាំមកហើយដោយមិនខ្លាចញញើតទៅនឹងច្បាប់បន្តិចសោះឡើយ ដោយរូបភាពនេះជាការចូលរួមបំផ្លាញសត្វព្រៃយ៉ាងធ្ងន់ធ្ងរ។ទោះយ៉ាងណាករណីបង្ក្រាបនូវទីតាំងទាំងបីខាងលើប្រជាពលរដ្ឋមានការគាំទ្រយ៉ាងខ្លាំងនឹងសង្ឃឹមថាសមត្ថកិច្ចនិងធ្វើការបង្ក្រាបកន្លែងផ្សេងទៀតផងដែរ៕SRP

ខេត្តសៀមរាប៖លោកម៉ុង ប៊ុនលីម នាយខណ្ឌរដ្ឋបាលព្រៃឈើសៀមរាប បានឲ្យដឹងថាជាលទ្ធផលនៃការបង្ក្រាបរថយន្តស៊ីតែនដឹកឈើមានចំនួនជាង៩ម៉ែត្រគូប។

លោកម៉ុង ប៊ុនលីម បានបន្តថារថយន្តដែលសមត្ថកិច្ចបង្ក្រាបម៉ាកFUSOពាក់ស្លាកលេខ២C-២៨៥៩ដឹកឈើប្រណិត(ធ្នង់) ចំនួន ២១២ដុំ ស្មើនឹង៩,២៧១ម៉ែត្រីគុណ ដឹកជញ្ជូនឈើអារដោយគ្មានលិខិតអនុញ្ញាតពីរដ្ឋបាលព្រៃឈើ។ តៃកុងរថយន្តបានរត់គេចខ្លួនបាត់។

សូមបញ្ជាក់ថាការបង្ក្រាបធ្វើឡើងនៅពីថ្ងៃទី២២ខែឧសភាឆ្នាំ២០២០វេលាម៉ោង១៦និង៣០នាទីត្រង់ចំណុចភូមិធ្លកអណ្តូងសង្កាត់ស្លក្រាម ក្រុងសៀមរាប ខេត្តសៀមរាប។ ដោយការបង្ក្រាបនេះរួមមានលោកម៉ុង ប៊ុនលីម នាយខណ្ឌរដ្ឋបាលព្រៃឈើសៀមរាប ផ្នែករដ្ឋបាលព្រៃឈើបន្ទាយស្រី នឹងកងរាជអាវុធហត្ថខេត្តសៀមរាប ដឹកនាំដោយលោក សេង.វុទ្ធី មេបញ្ជាការរងកងរាជអាវុធហត្ថខេត្តសៀមរាប។

បើតាមលោកម៉ុង ប៊ុនលីម រថយន្តវត្ថុតាងនៃបទល្មើសដូចរៀបរាប់ខាងលើត្រូវក្រុមការងារសំរេចយកទៅរក្សាទុកនៅ ស្នាក់ការ ផ្នែករដ្ឋបាលព្រៃឈើបន្ទាយស្រី ស្ថិតនៅភូមិព្រះដាក់ ឃុំព្រះដាក់ ស្រុកបន្ទាយស្រី ខេត្តសៀមរាប ដើម្បីចងក្រងសំណុំរឿងតាម និតិវិច្បាប់ស្តីពីព្រៃឈើបញ្ជូនទៅថ្នាក់លើពិនិត្យនឹងសម្រេច។សូមរំលឹកថាបច្ចុប្បន្ននៅខេត្តសៀមរាប ឈ្មួញឈើមួយចំនួននៅតែបន្តលួចលាក់ដឹកជញ្ជូនឈើចូលមកចែកចាយតាមដេប៉ូនិងមួយចំនួនទៀតដឹកដោយចំហប្រភេទរថយន្តធំៗដោយគេអះអាងថាមានលិខិតអនុញាត៕SRP

ខេត្តកំពង់ចាម៖លោកអ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មាធិការគ្រប់គ្រងគ្រោះមហន្តរាយខេត្ត នៅថ្ងៃទី២៤ខែឧសភាម្សិលមិញបានអញ្ជើញចុះពិនិត្យការដ្ឋានសាងសង់ច្រាំងព្រែកកុយ​ ប្រវែង២៥០ម៉ែត្រ ដែលគ្រោងសម្រេច​ឲ្យ​បាន​រួចរាល១០០% នៅមុនរដូវទឹកឡើងឆ្នាំនេះ។ការសាងសង់ច្រាំងព្រែកកុយ យោងតាមសំណើររបស់អាជ្ញាធរមូលដ្ឋាន រដ្ឋបាលខេត្ត​កំពង់ចាម​ បានស្នើសុំបន្តទៅក្រសួងធនធានទឹកនិងឧតុនិយម ជួយអន្តរាគមន៍ ដើម្បីជាខឿនការពារច្រាំង និងផ្លូវអមតាមមាត់ព្រែកនេះ។

ក្នុងឱកាសនោះដែរ លោក​អភិបាលខេត្ត រួមនឹង​ប្រតិភូ​អមដំណើរ​ បានបន្តនាំយកគ្រឿងឧបភោគបរិភោគ ថវិកា និងសម្ភារមួយចំនួន ដែលជាអំណោយរបស់រដ្ឋបាលខេត្ត​កំពង់ចាម​ ចែកជូនដល់​បងប្អូន​ប្រជាពលរដ្ឋ ដែលបានរុះរើផ្ទះ​គេចចេញ​ពីកន្លែងបាក់ច្រាំង ចំនួន​២គ្រួសារ​ នៅឃុំសូរគង និងប្រជាពលរដ្ឋរងគ្រោះដោយភ្លើងឆេះផ្ទះ​ ចំនួន​២គ្រួសារ កាលពីថ្ងៃទី០៦ ខែឧសភា ឆ្នាំ២០២០កន្លងទៅ​ថ្មីៗ​នេះ​ ស្ថិតនៅក្នុងភូមិអន្លង់គគីរ ឃុំព្រែកកុយ ស្រុកកងមាស៕SRP

ខេត្តកំពង់ចាម៖លោកអ៊ុន ចាន់ដា អភិបាល​ខេត្តកំពង់ចាម​ និង​ជា​ប្រធានគណៈកម្មាធិការសាខា​កាកបាទក្រហម​កម្ពុជា​ខេត្ត​ នៅព្រឹកថ្ងៃទី២៤ ម្សិលមិញ
បានអញ្ជើញចុះសាកសួរសុខទុក្ខ និងនាំយកអំណោយមនុស្សធម៌ដ៏ថ្លៃថ្លារបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចែកជូនដល់ប្រជាពលរដ្ឋ ចំនួន៦៩គ្រួសារ​ នៅស្រុកស្រីសន្ធរ។​
នាឱកាសនោះដែរលោក​​ អ៊ុន​ ចាន់ដា​ ​បានពាំនាំនូវប្រសាសន៍ផ្ដាំផ្ញើសាកសួរសុខទុក្ខ ពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ​ ​ដល់​បងប្អូន​ប្រជាពលរដ្ឋ​ ផងដែរ។
លោកអភិបាលខេត្តក៏បានថ្លែងដល់ពលរដ្ឋឲ្យ​បន្ត​ការ​ប្រុងប្រយ័ត្ន​ចំពោះ​ការ​ឆ្លង​រីករាល​ដាល​នៃ​ជំងឺ​កូវីដ​១៩​ គឺ​ត្រូវ​ធ្វើ​អនាម័យ​ជា​ប្រចាំ​ តាម​ការណែនាំ​​​របស់​ក្រសួង​សុខាភិបាល​ ដោយ​រស់នៅ​ស្អាត​ ហូប​ស្អាត​ និង​ផឹក​ស្អាត​​ ព្រមទាំង​ចូលរួម​គោរព​ច្បាប់​ចរាចរ​ឲ្យ​បាន​ខ្ជាប់ខ្ជួន​ផងដែរ​។ លោកថា ការ​ថែទាំ​សុខភាព​ ចៀសផុតពីជំងឺដង្កាត់ផ្សេងៗ និង​ការចូលរួមគោរពច្បាប់ចរាចរណ៍ ព្រមជាមួយ​ការ​បេីកបរ​ដោយ​ប្រយ័ត្ន​ខ្ពស់​ ក៏ជា​ការ​រួមចំណែក​កាត់បន្ថយ​ភាព​ក្រីក្រ​បាន​យ៉ាង​ល្អ​ប្រសើរ​ផង​ដែរ​។
​អំណោយមនុស្សធម៌កាកបាទក្រហមកម្ពុជា ដែលត្រូវចែកជូនដល់បងប្អូនប្រជាពលរដ្ឋងាយរងគ្រោះ ដែល​មាន​ចាស់ជរាគ្មានទីពឹង ជនពិការភាព ស្រ្តីម៉េម៉ាយមានកូនច្រើន អ្នកជំងឺរាំរ៉ៃ ចំនួន៦០គ្រួសារ ដោយក្នុង១ គ្រួសារៗទទួលបាន៖ អង្ករ២៥គីឡូ,ទឹកសុីអុីវ១យួរ,ទឹកត្រី១យួរ,ត្រីខកំប៉ុង១យួរ, ម៉ាស់៥ និងថវិកា២០,០០០រៀល​។
ដោយឡែក​ ប្រជាពលរដ្ឋ​ដែល​​រុះរើផ្ទះដោយការបាក់ស្រុតច្រាំងទន្លេចំនួន៩គ្រួសារ នៅឃុំកោះអណ្តែត ស្រុកស្រីសន្ធរ ដោយក្នុង០១គ្រួសារទទួលបាន តង់០១ អង្ករ៥០គីឡូក្រាម មី២កេស ត្រីខកំប៉ុង២យួរ ទឹកស៊ីអុីវ២យួរ ទឹកត្រី២យួរ ថវិកា២០ម៉ឺនរៀល និងប្រគេនបច្ច័យ៤០ម៉ឺនរៀល​ ដល់វត្ត​ក្រូច​សេីច​ ផងដែរ​៕SRP

ភ្នំពេញ៖សម្ដេចតេជោ ហ៊ុន សែនបានលើកឡើងថាក្នុងនាមខ្ញុំ ជានាយករដ្ឋមន្ត្រី នៃព្រះរាជាណាចក្រកម្ពុជា និងភរិយា ខ្ញុំសូមអបអរសាទរ និង សូមជូនពរជ័យ សិរីសួស្ដី សុភមង្គល បវរល្អមហាប្រសើរ ជូនដល់បងប្អូនសាសនិកខ្មែរឥស្លាមកម្ពុជា ក្នុង និងក្រៅប្រទេស រួមទាំងបងប្អូនសាសនិកឥស្លាមនៅទូទាំងពិភព លោកផងដែរ ដែលបានបញ្ចប់នូវពិធីអំណត់បួសខែរ៉ម៉ាឌនប្រកបដោយជោគជ័យ​ និង អារម្មណ៍ជ្រះថ្លា​ ហើយនឹងរីករាយស្វាគមន៍បុណ្យរ៉យ៉ាហ្វ៊ីទ្រី​ នៅថ្ងៃអាទិត្យ ទី ១ ខែ ស្ហាវ៉ាល់ ឆ្នាំ ១៤៤១ មូហាំម៉ាត់សករាជ ត្រូវនឹងថ្ងៃ ៣កើត ខែជេស្ឋ​ ឆ្នាំជូត​ ទោស័ក​ ព.ស ២៥៦៤ ដែលត្រូវនឹងថ្ងៃទី ២៤ ខែឧសភា​ ឆ្នាំ២០២០ ។

សម្ដេចបានបន្តថាខ្ញុំសូមផ្ញើនូវក្តីនឹករលឹក និង អរគុណយ៉ាងជ្រាលជ្រៅបំផុតចំពោះបងប្អូនខ្មែរឥស្លាមកម្ពុជា ដែលបានចូលរួមថែរក្សាសន្តិភាព រួមគ្នានឹងប្រជាជនកម្ពុជា ដែលប្រកាន់យកសាសនាផ្សេងៗ ហើយមានជំនឿជឿជាក់លើការដឹកនាំរបស់ខ្ញុំ និង គណបក្ស ប្រជាជនកម្ពុជា តាំងពីដើម តរៀងមក ជាពិសេសបានចូលរួមជាមួយរាជរដ្ឋាភិបាល​ ក្នុងការទប់ស្កាត់ការរីករាលដាលជំងឺកូវីដ-១៩ ដោយគោរពអនុវត្តបាន យ៉ាងខ្ជាប់ខ្ជួនទៅតាមសារាចរណែនាំ និង សេចក្ដីណែនាំទៅតាមវិធានការនាៗ របស់រាជរដ្ឋាភិបាល ។

ជាមួយគ្នានេះដែរ ក្នុងនាមនាយករដ្ឋមន្ត្រី សម្ដេចតេជោ ហ៊ុន សែន បានបន្ថែមថាខ្ញុំក៏សូមអំពាវនាវ​ឱ្យបងប្អូនបន្តអនុវត្តតាមនូវរាល់វិធានការនានារបស់រាជរដ្ឋាភិបាល​ ក្នុងការការពារពីជំងឺកូវីដ-១៩នេះ​ ទោះបីអ្នកជំងឺកូវីដ-១៩បានជាសះស្បើយ​អស់​ ១២២ នាក់កន្លងមក ហើយទើបមាន នាំចូល មកថ្មីពីរ នាក់ក៏ដោយ ដែលគិតត្រឹមថ្ងៃទី២៣​ ខែឧសភា​ ឆ្នាំ២០២០នេះ គឺយើងមិនត្រូវមានការធ្វេសប្រហែស មើលស្រាលចំពោះជំងឺឆ្លងដ៍កាចសាហាវនេះ នោះឡើយ ។
ខ្ញុំ និង ភរិយា សូមបួងសួងអោយបងប្អូនទាំងអស់​ ទទួលបាននូវសេចក្កីសុខ​ស្លាម៉ាត់ ករុណារ៉ស់ម៉ាត់ ចំរើនព្ហារ៉កាត់ សុភមង្គល​ ក្ដីមេត្តាករុណា និង អាណិត ស្រឡាញ់​ពីអល់ឡោះគ្រប់ៗគ្នា និង សុំអោយអល់ឡោះ ទទួលយកនូវកុសលផល បុណ្យទាំងឡាយនៃខែបួសរ៉ម៉ាឌនដែលបងប្អូនបានប្រតិបត្តិកុំបីអាក់ខានឡើយ ៕SRP

ភ្នំពេញ៖ប្រមុខដឹកនាំកម្ពុជាសម្ដេចតេជោហ៊ុន សែន នាយករដ្ឋមន្ត្រី នៅរសៀលថ្ងៃនេះ បានបន្តអំពាវនាវដល់បងប្អូនប្រជាពលរដ្ឋឲ្យមានការប្រុងប្រយ័ត្នខ្ពស់ចំពោះជំងឺកូវីដ19។
ប្រមុខដឹកនាំកម្ពុជារូបនេះបានលើកឡើងថាកាលពីសប្តាហ៍មុនប្រទេសយើងបានព្យាបាលអ្នកឆ្លងជំងឺកូវីដ-១៩ បានជាសះស្បើយទាំង១២២នាក់។ ប៉ុន្តែក្នុងសប្តាហ៍នេះ យើងក៏មានអ្នកឆ្លងជំងឺកូវីដ-១៩ ថ្មីចំនួន២នាក់មកវិញ។ ស្ថិតិអ្នកឆ្លងជំងឺកូវីដ១៩ តាមការបញ្ជាក់របស់អង្គការសុខភាពពិភពលោក (WHO) មកទល់ពេលនេះ គឺបានកើនឡើងរហូតដល់ជិត៥លាននាក់ (៤,៩៩៥,៩៩៦) ដែលមានអ្នកស្លាប់ជាង៣០ម៉ឺននាក់ (៣២៧,៨២១) ។ ជំងឺរលាកផ្លូវដង្ហើមកូវីដ១៩ នេះគឺកាចសាហាវខ្លាំងណាស់ដែលកំពុងវាយលុកលើ ២១៦ ប្រទេស។
នាយករដ្ឋមន្ត្រីបានបន្តថាប្រជាពលរដ្ឋត្រូវមានការយល់ដឹងខ្ពស់អំពីជំងឺឆ្លងដ៏កាចសាហាវនេះ។ ត្រូវបង្កើនអនាម័យសុខភាពរស់នៅអោយបានល្អ គឺត្រូវពាក់ម៉ាស ឬក្រម៉ា ហើយត្រូវដុសលាងសម្អាតដៃអោយបានស្អាតជាប្រចាំជាមួយសាប៊ូ, ទឹកអាល់កុលឬ ចឹលកម្ចាត់មេរោគនិងបាក់តេរីផ្សេងៗ។ បើមានការសង្ស័យទៅលើអ្នកណាម្នាក់ ឬចំពោះខ្លួនឯងផ្ទាល់ សូមទូរស័ព្វមកលេខ ១១៥។ សូមកុំចម្លងរោគពីយើងទៅគេ ហើយក៏កុំចម្លងរោគពីគេមកក្រុមគ្រួសារយើងផងដែរ។ កន្លែងណាដែលមិនចាំបាច់ទៅ សូមកុំទៅ ជាពិសេសទីកន្លែងដែលមានក្រុមមនុស្សច្រើន។ សូមស្តាប់នឹងធ្វើតាមការណែនាំរបស់ក្រសួងសុខាភិបាលអោយបានជាប់ជានិច្ច។សូមជូនពរបងប្អូនជនរួមជាតិជួបតែសេចក្តីសុខ និងសំណាងល្អក្នុងថ្ងៃឈប់សម្រាកចុងសប្តាហ៍៕SRP

ខេត្តសៀមរាប៖លំនៅដ្ឋានរបស់ប្រជាពលរដ្ឋជាង៣០ខ្នង ក្នុងខេត្តសៀមរាប បានរងការប៉ះពាល់ដោយខ្យល់កន្ត្រាក់។តាមសេចក្ដីរាយការណ៍ថាករណីនេះស្រុកក្រឡាញ់ ក្នុងឃុំសែនសុខ មានចំនួន០៤ខ្នងក្នុងនោះធ្លាក់ពីជើងសសរចំនួន០២ខ្នងរបើកដំបូលចំនួន០២ខ្នង និងតូបលក់០១តូប៖

ភូមិតាប៉ាង ចំនួន០១ខ្នងធ្លាក់ពីលើជើងសសរ។
ភូមិក្សី០១ខ្នងធ្លាក់ពីលើជើងសសរ ។ និងតូបលក់០១ខ្នង (របើកដំបូលតូបលក់ទាំងស្រុង)។ដោយឡែក០២ខ្នងទៀតស្ថិតនៅភូមិស្វាយឃំុសែនសុខស្រុកក្រឡាញ់ខេត្តសៀមរាប។
១. ផ្ទះឈើប្រកសង្ក័សី(របើកដូល)។
២. បើកសំយ៉ាបដែកប្រកសង្ក័សី។
ដោយឡែកនៅភូមិបុស្សក្រឡាញ់ សង្កាត់ជ្រាវ ក្រុងសៀមរាប ដួលលំផ្ទះចំនួន០៣ខ្នង របេីកដំបូល២៦ខ្នងនិងរបួសមនុស្សម្នាក់ស្រាល។

សូមបញ្ជាក់ថាគ្រោះធម្មជាតិនេះបានកើតឡើងនៅលងាចថ្ងៃទី២២ខែឧសភាឆ្នាំ ២០២០ បន្ទាប់ពីមានភ្លៀងនិងខ្យល់កន្ត្រាក់ទើបបណ្ដាលឲ្យឲ្យលំនៅដ្ឋានខាងលើរងការខូចខាតបែបនេះ៕SRP

ខេត្តសៀមរាប៖បុរសម្នាក់ត្រូវបានកំលាំងមូលដ្ឋានកងរាជអាវុធហត្ថស្រុកសូទ្រនិគម ឃាត់ខ្លួនករណីគ្រឿងញៀន។
ហេតុការណ៍ធ្វើឡើងវេលាម៉ោង១៦ ថ្ងៃទី២២ ខែឧសភា ឆ្នាំ២០២០ នៅចំណុចភូមិបុស្ស ឃុំដំដែក ស្រុកសូទ្រនិគម ដឹកនាំដោយលោកវរសេនីយ៍ត្រីអ៉ឹម មុន្នី មេបញ្ជាការស្រុក។

ជនសង្ស័យ ឈ្មោះ ជា លាប ភេទប្រុស អាយុ១៧ឆ្នាំ ទីលំនៅភូមិតាអី ឃុំត្រពាំងធំ ស្រុកប្រាសាទបាគង ខេត្តសៀមរាប និងដកហូតវត្ថុតាងរួមមាន ម្សៅក្រាមសថ្លា(ម៉ាទឹកកក)ចំនួន០២កញ្ចប់ និងទូរស័ព្ទដៃ ០១គ្រឿង ។
ជនសង្ស័យ និងវត្ថុតាង បញ្ជូនទៅ ការិយាល័យប្រឆាំងគ្រឿងញៀនកងរាជអាវុធហត្ថខេត្តសៀមរាប បន្តនីតិវិធី៕SRP

ខេត្តកំពង់ចាម៖រដ្ឋបាលខេត្ត បានចែកម៉ាសជូនដល់បងប្អូនប្រជាពលរដ្ឋ ដែលមកកំសាន្តនៅសួនសាធារណៈនានាក្នុងក្រុងកំពង់ចាម​។
ការចែកនេះចាប់​ពី​ថ្ងៃ​ទី​២២​តទៅ​ ដែល​ធ្វើ​ឡើង​ជារៀង​រាល់​ថ្ងៃ​ រហូត​គ្រប់​ចំនួន​១ម៉ឺន​ម៉ាស​។
សូមបញ្ជាក់ថាលោក​អ៊ុន ចាន់ដា អភិបាលខេត្តកំពង់ចាម និងជាប្រធានគណៈកម្មការខេត្តប្រយុទ្ធប្រឆាំងនឹងជម្ងឺកូវីដ១៩ បាន​ធ្វើ​ការ​ណែនាំ​ដល់​មន្ត្រី​ពាក់ព័ន្ធ​ ឲ្យ​បន្តការផ្សព្វផ្សាយ​សារ​អប់រំ​អំពី​វិធានការ​បង្ការ​ទប់ស្កាត់​ការ​ឆ្លង​រីករាល​ដាល​នៃ​ជំងឺ​កូវីដ​១៩។
ជាមួយគ្នា​នោះ​ដែរ​ រដ្ឋបាល​ខេត្ត​​ បាន​ធ្វេី​សេចក្ដី​ណែនាំ​ដល់​
១- ម្ចាស់អាជីវកម្មភោជនីយដ្ឋាន អាហារដ្ឋាន គណៈអាជីវករ ម្ចាស់មីនីម៉ាត ម្ចាស់ម៉ាត ម្ចាស់ ចំណតរថយន្តក្រុង ចំណតរថយន្ត ម្ចាស់រថយន្តឈ្នួលទាំងអស់ នៅខេត្តកំពង់ចាម ត្រូវ​មាន​ការ​ប្រុងប្រយ័ត្ន​ និង​គោរព ឱ្យបានត្រឹមត្រូវតាមការណែនាំរបស់ក្រសួងសុខាភិបាល ស្តីពីផែនការទប់ស្កាត់ការរីករាលដាល នៃជម្ងឺកូវីដ-១៩(Covid-19)។
២ -ម្ចាស់អាជីវកម្មភោជនីយដ្ឋាន អាហារដ្ឋាន ត្រូវរៀបចំឱ្យមានទឹកអាល់កុល ឬដែល សម្រាប់ លាងដៃ នៅមុខ ច្រកចេញ-ចូល និងចាត់តាំងបុគ្គលិកធ្វើការវាស់កំដៅភ្ញៀវទាំងអស់ មុននឹង អនុញ្ញាតឱ្យចូលក្នុងភោជនីយដ្ឋាន អាហារដ្ឋាន ។

៣-ម្ចាស់អាជីវកម្មមីនីម៉ាត ម៉ាត អ្នកគ្រប់គ្រងចំណតរថយន្តក្រុង ត្រូវរៀបចំឱ្យមានទឹកអាល់កុល ឬជែល សម្រាប់លាងដៃ នៅមុខច្រកចេញ-ចូល ហើយកន្លែងរង់ចាំរបស់អ្នកដំណើរ ត្រូវចាត់ តាំងបុគ្គលិកធ្វើការវាស់កំដៅភ្ញៀវ ទាំងអស់ មុននឹងអនុញ្ញាតឱ្យចូលក្នុងមីនីម៉ាត និងអង្គុយរង់ចាំរថយន្ត។ សម្រាប់ម្ចាស់ចំណតរថយន្តក្រុង នៅកន្លែងរង់ចាំ ត្រូវបាញ់អាល់កុលសំលាប់មេរោគ និងក្នុងរថយន្តរបស់ខ្លួន មុនពេល និងក្រោយពេលដែលអ្នកដំណើរចាក ចេញ ឬចូលក្នុងរថយន្ត។
៤-ម្ចាស់អាជីវកម្ម​ អាជីវកទាំងអស់​ ត្រូវ​រក្សា​គម្លាត​សុវត្ថិភាព​​ឲ្យ​បាន​ត្រឹម​ត្រូវ​តាម​ការ​ណែនាំ​របស់ក្រសួងសុខាភិបាល។
៥-គណៈអាជីវករ ត្រូវធ្វើការណែនាំ ទឹកអាល់កុល ឬដែល ឲ្យបានជាប់ជាប្រចាំដល់អាជីវករនៅតាមទីផ្សារ ឲ្យរៀបចំ សម្រាប់លាងដៃ ក្រោយពីអតិថិជនមកទិញទំនិញ និងត្រូវមានការ ប្រុងប្រយ័ត្នខ្ពស់ដោយគិតពីគម្លាតរវាងអតិថិជន និងអ្នកលក់ដូរ។
៦-អ្នក​គ្រង់គ្រងចំណតរថយន្តឈ្នួល និងម្ចាស់រថយន្តឈ្នួលទាំងអស់ ត្រូវមានទឹកអាល់កុល ឬ ដែលសម្រាប់លាងដៃ និងត្រូវបាញ់អាល់កុលសំលាប់មេរោគមុនពេល និងក្រោយពេលភ្ញៀវ ចូល និងចាកចេញពីរថយន្តផងដែរ​៕SRP

ខេត្តសៀមរាប៖មនុស្សម្នាក់បានស្លាប់និងពីរនាក់ទៀតបានរងរបួសករណីគ្រោះថ្នាក់ចរាចណ៍។

ហេតុការណ៍បានកើតឡើងនៅវេលាម៉ោង១៨និង៣០នាទី ថ្ងៃទី២២ ខែឧសភា ឆ្នាំ២០២០ នៅចំណុចភូមិតាអួស ឃុំកំពង់ឃ្លាំង ស្រុកសូទ្រនិគម ខេត្តសៀមរាប។រវាងម៉ូតូនិងម៉ូតូម៉ាកC១២៥ហុងដាឌ្រីម ពណ៌ខ្មៅ ពាក់ស្លាកលេខ កំពង់ធំ១E២៣២៥និងម៉ូតូ ម៉ាកC១២៥ហុងដាឌ្រីម ពណ៌ខ្មៅ ពាក់ស្លាកលេខ ភ្នំពេញ១CV៨៨៩៩។

អ្នកស្លាប់ ឈ្មោះ ឡូន ធាវី ភេទស្រី អាយុ១៧ឆ្នាំ ទីលំនៅភូមិព្រែកស្រម៉ោច ឃុំកំពង់ឃ្លាំង ស្រុកសូទ្រនិគម ខេត្តសៀមរាប (ជាអ្នកបើកបរម៉ូតូពាក់ស្លាកលេខកំពង់ធំ១E២៣២៥)។
អ្នករបួស ៖

១/ឈ្មោះឡៃ សារី ភេទស្រី អាយុ២០ឆ្នាំ ទីលំនៅភូមិព្រែកស្រម៉ោច ឃុំកំពង់ឃ្លាំង ស្រុកសូទ្រនិគម ខេត្តសៀមរាប ជាអ្នករួមដំណើរ ជាមួយអ្នកស្លាប់។

២/ឈ្មោះរុន សូជីអូរ ភេទប្រុសអាយុ១៩ឆ្នាំ នៅភូមិព្រះត្រពាំង ឃុំដំដែក ស្រុកសូទ្រនិគម ខេត្តសៀមរាប របួសស្រាលជាអ្នកបើកបរម៉ូតូ ពាក់ស្លាកលេខ១CV៨៨៩៩។

ករណីនេះជនរងគ្រោះប្រគល់អោយក្រុមគ្រួសារធ្វើបុណ្យតាមប្រពៃណី។ចំណែក អ្នករបួសបញ្ជូនទៅមន្ទីពេទ្យស្រុក។ឯ ម៉ូតូរក្សារទុកកន្លែងនគរបាលស្រុកដើម្បីរងចាំការដោះស្រាយ៕SRP