ខេត្តកំពង់ចាម​​៖​គម្រោងមូលនិធិឃុំ-សង្កាត់ឆ្នាំ២០២០ របស់​គណៈកម្មការ​ជាតិ​សម្រាប់​ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ​ ក្នុង​ការ​ជួសជុល​និង​សាងសង់​ផ្លូវ​នៅ​មូលដ្ឋាន​​ ​ចំនួន០៦គម្រោង ស្មើ​នឹង​៦ឃុំ​ នៅស្រុកបាធាយត្រូវបានដំណើរការដាក់ដេញថ្លៃ នៅព្រឹកមិញនេះ។
ការដាក់ដេញថ្លៃធ្វើនៅសាលា​ស្រុក​បាធាយ​​​​​​ ដោយមានការចូលរួមពី លោកឡី មិច​​ នាយក​រង​រដ្ឋបាលសាលា​ខេត្ត​កំពង់ចាម​ និងលោកទឹម ដា​ណា​ អភិបាល​រង​ស្រុក​​ រួមជាមួយតំណាងក្រុមហ៊ុនអ្នក​ទទួល​ការ​ជា​ច្រើន​រូប​។

គួរ​បញ្ជាក់​ផង​ដែរ​ថា​ គម្រោង​ដែល​បាន​ដាក់​ឲ្យ​ដេញ​ថ្លៃ​ខាង​លើ​នេះ​ គឺមាន​ផ្លូវ​ចំនួន​០៦ខ្សែ​ ដែល​ត្រូវ​ស្ថាបនា​​ ជូន​ប្រជាពលរដ្ឋ​សម្រាប់​ប្រើប្រាស់​ ក្នុង​នោះ​មាន​
១-ឃុំ​សំបូរ​ សាងសង់ផ្លូវបេតុងអាមេ ប្រវែង៣០៥ម៉ែត្រ​ ទទឹង៥ម៉ែត្រ​ នៅភូមិសង្កើប។
២-ឃុំ​ត្រប់​ សាងសង់ផ្លូវបេតុងអាមេ ប្រវែង៣១២ម ទទឹង៤ម នៅភូមិរោធិ៍។ ​
៣-ឃុំ​ផ្អាវ​ សាងសង់ផ្លូវបេតុងអាមេ ប្រវែង២៩៥ម ទទឹង៤ម នៅភូមិបាកាស ភូមិផ្អាវ។
៤-ឃុំ​មេព្រីង​ សាងសង់ផ្លូវបេតុងអាមេ ប្រវែង២៧៤ម ទទឹង៤ម នៅភូមិតាំងរលៀង និងភូមិតាំងថ្លើង។
៥-ឃុំសណ្តែក​ សាងសង់ផ្លូវបេតុងអាមេ ប្រវែង២៣៣ម ទទឹង៥ម នៅភូមិកំប៉ាល់ ភូមិស្រឹង្គ។
និង​៦-​​ឃុំ​តាំង​ក្រសាំង​ ជួសជុលផ្លូវដីក្រាលថ្មភ្នំ ប្រវែង២.៩៤៧គ.ម​ ទទឹង៤ម និងសាងសង់លូទោល មុខកាត់៦ម ប្រវែង៦ម នៅភូមិជីនាង ភូមិខ្វិត-ភូមិស្តុកធំ។
ក្នុង​ពិធី​នោះ​ ​ប្រធាន​គណៈ​កម្មាការ​ម្ចាស់​លទ្ធកម្ម​ទាំង​០៦ឃុំ បាន​ធ្វើការ​ប្រកាស​ទទួល​យក​ទាំង​​០៦គម្រោង​ ព្រមទាំង​បាន​ធ្វើការ​ផ្តាំផ្ញើរ​ដល់​ក្រុមហ៊ុន​​អ្នក​ទទួល​ការ​ទាំង​អស់​ ត្រូវ​​​អនុវត្តន៍​ការងារ​សាងសង់​ផ្លូវ​ ឲ្យ​មាន​គុណភាពល្អ​ ​និង​ត្រូវ​តាម​ស្តង់ដារ​ ​លក្ខណៈ​បច្ចេកទេស​​​ ប្រយោជន៍​ដល់​ការ​ប្រើប្រាស់​​ផងដែរ​៕SRP

ខេត្តសៀមរាប៖បុរសម្នាក់បានដេកស្លាប់បង្កឲ្យមានការភ្ញាក់ផ្អើល។

ហេតុការណ៍បានកើតឡើងវេលាម៉ោង០៧និង៣០នាទីថ្ងៃទី០៩ខែមិថុនា ឆ្នាំ២០២០នេះ នៅចំណុចភូមិតាច្រនៀង ឃុំកំពង់ឃ្លាំង ស្រុកសូទ្រនិគម ខេត្តសៀមរាប។

សមត្ថកិច្ចបានឲ្យដឹងថាជនរងគ្រោះឈ្មោះឆាយ ឈុន ភេទប្រុស អាយុ៦៣ឆ្នាំ រស់នៅភូមិ ឃុំកើតហេតុខាងលើ។
សមត្ថកិច្ចបានបញ្ជាក់ថាករណីដេកស្លាប់ នេះមូលហេតុ បណ្ដាលមកពីខ្យល់គរ។ តាមការពិនិត្យ ធ្វើកោសល្យវិច្ច័យ របស់មន្ត្រីជំនាញ បញ្ជាក់ថាពុំមានស្លាកស្នាមអ្វី ពាក់ព័ន្ធនិងបទល្មើសនោះទេ៕SRP

ខេត្តសៀមរាប៖លោកសូរ ប្លាតុង អភិបាលស្រុកប្រាសាទបាគង នៅថ្ងៃទី០៨ខែមិថុនានេះចុះពិនិត្យមើល គ្រឿងសម្ភារបរិក្ខារ និង​អគារការិយាល័យច្រកចេញចូលតែមួយ​ នៃរដ្ឋបាលស្រុកប្រាសាទបាគង ដែលទើប​សាងសង់​រួចរាល់​ ត្រៀម​ នឹងរៀបចំពីធីសម្ពោធដាក់អោយប្រើប្រាស់ជាផ្លូវការ​ នាថ្ងៃទី១៦​ ខែមិថុនា​២០២០​ខាងមុខនេះ​។

ក្រោយពីសម្ពោធដាក់អោយប្រើប្រាស់ជាផ្លូវការ​រួចរាល់ការិយាល័យច្រកចេញចូលតែមួយនេះ​ នឹង​រួមចំណែក​យ៉ាងសកម្ម​ ក្នុងការបម្រើសេវាប្រកបដោយ តម្លាភាព រហ័សទាន់ពេលវេលា ស្របតាមតម្រូវការរបស់បងប្អូនប្រជាពលរដ្ឋ​៕SRP

ខេត្តសៀមរាប៖លោក​ ស៊ុំ​ វ៉េ​ ត្រូវបានប្រកាសជាស្មៀនឃុំ នៅឃុំត្រពាំងធំ ស្រុកប្រាសាទបាគង បន្ទាប់ពីស្មៀនឃុំចាស់បានទទួលមរណ:ភភាពកាលពីពេលកន្លងទៅ។
ការប្រកាសនេះធ្វើនៅព្រឹកមិញនេះ ក្រោមវត្តមានលោក នឹម សុវណ្ណ អភិបាលរងស្រុក។
លោក នឹម សុវណ្ណ បានថ្លែងថាលោកស្មៀនឃុំត្រូវខិតខំបំពេញការងារ ស្របតាមតួនាទីភារកិច្ចរបស់ខ្លួន និងតាមការណែនាំពីថ្នាក់ដឹកនាំក្នុងគោលបំណងបម្រើសេវាសាធារណៈជូនបងប្អូនប្រជាពលរដ្ឋនៅក្នុងមូលដ្ឋានអោយបានល្អប្រសើរ។ ស្មៀនឃុំត្រូវធ្វើសេនាធិការដល់ក្រុមប្រឹក្សាឃុំ របស់ខ្លួនក្នុងការកាត់ត្រា និងការថែរក្សា ការពារចលនវត្ថុ និងអចលនវត្ថុទាំងអស់ដែលជាទ្រព្យសម្បត្តិសាធារណៈ និងទ្រព្យសម្បត្តិឯកជនរបស់ឃុំ។ដោយ ស្មៀនឃុំត្រូវធ្វើសេនាធិការអោយក្រុមប្រឹក្សាឃុំ ក្នុងការធ្វើសេចក្តីសម្រេច និងអនុវត្តសេចក្តីសម្រេចនានា ដោយអនុលោមទៅតាមច្បាប់ស្តីពីការគ្រប់គ្រងរដ្ឋបាលឃុំ អនុក្រឹត្យ ប្រកាស និងលិខិតបទដ្ឋាននានា ដែលបានអនុម័តដោយគណៈកម្មាធិការជាតិគាំទ្រ ឃុំ សង្កាត់។
អភិបាលរងក៏បានផ្សព្វផ្សាយពីវិធីការពារជំងឺកូវិដ១៩ សូមកុំធ្វេសប្រហែសខ្លួនអោយសោះព្រោះជំងឺនេះ កាចសាហាវណាស់វាបានរាលដាលលើពិភពលោក ដូចនេះយើងត្រូវចូលរួមការពារនិងអនាម័យអោយបានគ្រប់ៗគ្នា​តាមគោលការណ៍ណែនាំ របស់ក្រសួងសុខាភិបាល ។
សូមបញ្ជាក់ថាពិធីប្រកាសនេះ មានលោកនាយករដ្ឋបាលស្រុក​ មន្ត្រីសាលាស្រុក មេឃុំ ក្រុមការងារថ្នាក់ស្រុកចុះជួយឃុំ មេប៉ុស្តិ៍ ប្រធានមណ្ឌលសុខភាព លោកគ្រូ អ្នកគ្រូនៃវិទ្យាល័យ និងអនុវិទ្យាល័យក្នុងឃុំ តំណាងសមាគម​ អង្គការក្រៅរដ្ឋាភិបាល សរុបប្រមាណ៣៧នាក់ស្រី១៩នាក់ផងដែរ៕SRP

ភ្នំពេញ៖សម្ដេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា នៅថ្ងៃទី០៨ខែមិថុនាឆ្នាំ២០២០នេះ បានសម្រេចតែងតាំង លោកហ៊ុន ម៉ាណែត ឋានៈពីអនុប្រធានទៅជាប្រធានយុវជនគណបក្សប្រជាជនកម្ពុជាថ្នាក់កណ្តាល។នេះបើ យោងតាមសេចក្ដីសម្រេចដែលបណ្ដាញសារព័ត៌មានទទួល បាននៅល្ងាចថ្ងៃនេះ៕SRP

ខេត្តកំពង់ធំ៖ លោកឧត្តមសេនីយ៍ទោ អ៊ុក កុសល ស្នងការនគរបាលខេត្តកំពង់ធំ នៅព្រឹកមិញនេះអញ្ជើញបញ្ចុះបឋមសិលាសាងសង់ប៉ុស្តិ៍នគរបាលរដ្ឋបាលស្រឡៅ ស្ថិតក្នុងភូមិ ទោង ឃុំ ស្រឡៅ ស្រុក តាំងគោក ខេត្តកំពង់ធំ។

លោកឧត្តមសេនីយ៍ទោ អ៊ុក កុសល បានថ្លែងថា ដោយមានការយកចិត្តទុកដាក់ ពីសំណាក់ដឹកនាំ ជាពិសេស សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ លោក សុខ លូ អភិបាលខេត្ត កំពង់ធំ ថ្ងៃនេះលោក បានបើកការដ្ឋាន និងបញ្ចុះបឋមសិលា ដើម្បីសាងសង់អាគារប៉ុស្តិ៍នគរបាលរដ្ឋបាលស្រឡៅ ថ្មីស្រឡាងមួយបន្ថែមទៀត ដែលមានលក្ខណៈរឹងមាំុធំទូលំទូលជំនួសអាគារប៉ុស្ដិ៍រដ្ឋបាលដែលសាងសង់អំពីឈើ ដែលមានសភាពចាស់ទ្រុឌទ្រោម តូចចង្អៀត ដំបូលប្រេះស្រាំធ្លុះធ្លាយ នារដូវវស្សាមានទឹកភ្លៀងជោគជាំហូរមកក្នុងអាគារផ្ដល់ផលលំបាកខ្លះៗ ដល់បងប្អូន ក្នុងកាបំពេញភារកិច្ច។

លោកឧត្តមសេនីយ៍ទោ អ៊ុក កុសល បន្តថ្លែងថាអាគារប៉ុស្តិ៍នគរបាលរដ្ឋបាល ដែលត្រូវសាងសង់នេះ មានទំហំ ៦ម៉ែត្រ ×១០ម៉ែត្រ ក្រាលការ៉ូ ជញ្ជាំងឥដ្ឋ ប្រក់ដំបូលសង្ក័សី ដែលជាការឧបត្ថម្ភ គាំទ្រ ពីសំណាក់ថ្នាក់ដឹកនាំ កងកម្លាំងនៃអធិការដ្ឋាននគរបាលស្រុកតាំងគោក និងបងប្អូនសប្បុរសមានសទ្ធាជ្រះថ្លា នៅពេលដែល ឃើញអង្គភាពមានការខ្វះខាត បងប្អូនតែងតែចូលរួមឧបត្ថម្ភ គាំទ្រជាបន្តបន្ទាប់ ដើម្បីអង្គភាពផ្លាស់ប្ដូរមុខមាត់ថ្មី ពីអ្វីដែលមិនល្អ កែប្រែជាទីកន្លែងមានសោភ័ណភាព ល្អស្អាត ដែលជាទីកន្លែងនៅគៀកជិតជាមួយប្រជាពលរដ្ឋ និងជាផ្ដល់សេវាសាធារណៈយ៉ាងមានប្រសិទ្ធភាព ជូនបងប្អូនប្រជាពលរដ្ឋ ដែលមកប្រាស្រ័យទំនាក់ទំនងលើកិច្ចការងារដែលពាក់ព័ន្ធ។​ ឆ្លៀតក្នុងឱកាសនោះដែរលោកឧត្តមសេនីយ៍ទោ អ៊ុក កុសល
បានឧបត្ថម្ភស៊ីម៉ង់ត៍១០តោន ,ឥដ្ឋ ៥.០០០ដុំ និងថវិកាមួយចំនួន។

លោកឧត្តមសេនីយ៍ទោ អ៊ុក កុសល ក៏បានថ្លែងអំណរគុណចំពោះសប្បុរសជននានាដែលបានជួយឧបត្ថម្ភនូវថវិកានិងសម្ភារដើម្បីសាងសង់អគារប៉ុស្ដិ៍ស្រឡៅខាងលើនេះផងដែរ៕SRP

ខេត្តសៀមរាប៖លោកសេង លន នាយសង្កាត់រដ្ឋបាលព្រៃឈើកន្ទួតខ្នាក្រៅនៃខេត្តសៀមរាប បានថ្លែងថាការលបលួចចូលកាប់ឈើនៅក្នុងតំបន់នេះ ត្រូវបានកាត់បន្ថយស្ទើរតែទាំងស្រុង ក៏ប៉ុន្តែអ្វីដែលជាការព្រួយបារម្ភខ្លាំងបំផុតនោះ គឺតំបន់ដីព្រៃក្រៅចំការពូជឈើគ្រញូងនោះ កំពុងទទួលរងនូវគ្រោះថ្នាក់ដ៏ធ្ងន់ធ្ងរ ក្នុងរយៈពេល៣ឆ្នាំចុងក្រោយនេះ  ឆ្នាំ២០១៧-២០១៨និង២០១៩។

លោកសេង លន បន្តថាករណីនេះគឺដោយការកើតឡើងនូវអំពើឃុបឃិតគ្នាជាប្រព័ន្ធ រំលោភវាស់វែងផ្ទេរកម្មសិទ្ធិ លក់ ដូរ ដីព្រៃរបស់រដ្ឋ ដែលគ្រប់គ្រងដោយច្បាប់។
លោកក៏បានអំពាវនាវឲ្យបញ្ឈប់ការផ្ទេរសិទ្ធិរំលោភលើផ្ទៃដីព្រៃរបស់រដ្ឋដែលគ្រប់គ្រងដោយច្បាប់ផងដែរ។
លោកថ្លែងយ៉ាងដូច្នេះក្នុងពេលចុះប្រតិបត្តិការដាក់ពង្រាយកម្លាំងល្បាតព្រៃ និងបំពាក់បំរាមនៅតាមព្រំប្រទល់ រវាងដែនដីព្រៃរបស់រដ្ឋ និងដែនដីព្រៃរបស់សហគមន៍ នៅពីថ្ងៃទី០៦ខែមិថុនា ឆ្នាំ២០២០នេះ។
លោក សេង លន ក៏បានសំណូមពរសុំឲ្យអាជ្ញាធរស្រុកពាក់ព័ន្ធ សហការចូលរួមដោះស្រាយករណីរំលោភច្បាប់ព្រៃឈើដោយការឃុបឃិតគ្នា ខណៈដែលដីព្រៃរបស់រដ្ឋនៅក្នុងតំបន់គ្រប់គ្រងដោយសង្កាត់រដ្ឋបាលព្រៃឈើកន្ទួតខ្នារក្រៅប្រមាណជាង១ម៉ឺន៨ពាន់ហិកតា កំពុងបង្កឲ្យមានគ្រោះបាត់​បង់ដីព្រៃ ដោយការទិញលក់ដីព្រៃរបស់រដ្ឋ ដែលគ្រប់គ្រងដោយច្បាប់ ក្រោមអំពើឃុបឃិតគ្នាជាប្រព័ន្ធ៕SRP

ខេត្តកំពង់ចាម៖:​គម្រោង​មូលនិធិ​ឃុំ​-សង្កាត់​ ​ឆ្នាំ​២០២០​ របស់​គណៈកម្មការ​ជាតិ​សម្រាប់​ការអភិវឌ្ឍន៍​តាម​បែប​ប្រជាធិបតេយ្យ​នៅ​ថ្នាក់​ក្រោម​ជាតិ​ ក្នុង​ការ​ជួសជុល​ និង​សាងសង់​ផ្លូវ​នៅ​តាម​មូលដ្ឋាន​ ត្រូវ​បាន​ដាក់​ឲ្យ​ដំណើរ​ការ​​​ដេញ​ថ្លៃ​ ​ចំនួន១០គម្រោង​ ស្មើ​នឹង​៨ឃុំ​ ទទួលបានជោគជ័យ។
ការដាក់ដេញថ្លៃ​ធ្វេី​ឡើង​​ព្រឹក​ថ្ងៃ​ទី​០៨​ខែខែមិថុនានេះនៅ​សាលា​ស្រុក​ព្រៃឈរ​​​​​ ក្រោម​វត្តមាន​ លោក​ឡោ​ ចាន់​លី​ អភិបាល​ស្រុក​ និង​លោក​អុំ​ ប៉ុណ្ណា​កា​ នាយក​រង​ទីចាត់ការ​ផែនការ​និង​វិនិយោគ​ខេត្តកំពង់ចាម​​ ដោយ​មាន​ការ​ចូលរួម​ពី​ អភិបាល​រង​ស្រុក​​ គណៈកម្មការ​ម្ចាស់​លទ្ធកម្ម​ និង​តំណាង​ក្រុម​ហ៊ុន​ អ្នក​ទទួល​ការ​ ជា​ច្រើន​រូប​ផង​ដែរ​។

​លោក​ ឡោ​ ចាន់​លី​ បាន​ធ្វើ​ការ​ណែនាំ​ជំរុញ​​​ដល់​គណៈកម្មការ​លទ្ធកម្ម​ និង​ក្រុម​ហ៊ុន​ អ្នក​ទទួល​ការ​ទាំងអស់​ ត្រូវ​អនុវត្ត​គម្រោង​ឲ្យ​មាន​តម្លាភាព​ និង​ធ្វើ​ការ​សាងសង់​ឲ្យ​ត្រូវ​តាម​បទដ្ឋាន​លក្ខណៈ​បច្ចេកទេស​ ប្រយោជន៍​ដល់​ការ​ប្រើប្រាស់​បាន​យូរ​អង្វែង​។

គួរ​បញ្ជាក់​ផង​ដែរ​ថា​ គម្រោង​ដែល​បាន​ដាក់​ឲ្យ​ដេញ​ថ្លៃ​ខាង​លើ​នេះ​ គឺមាន​ផ្លូវ​ចំនួន​១០ខ្សែ​ ដែល​ត្រូវ​ស្ថាបនា​​ ជូន​ប្រជាពលរដ្ឋ​សម្រាប់​ប្រើប្រាស់​ ក្នុង​នោះ​មាន​
១-នៅឃុំ​ល្វា មាន​​២គម្រោង​ គឺសាងសង់ផ្លូវបេតុងអាមេ ប្រវែងជាង២០០ម៉ែត្រ​ នៅភូមិតាំងគោក​ និង​ជួសជុលផ្លូវក្រាលក្រួសក្រហម ប្រវែង​ជាង១០០០ម៉ែត្រ​ នៅភូមិស្តុកអន្ទង់-ភូមិល្វា។
២-នៅឃុំជ្រៃវៀន​ មាន​២គម្រោង​ សាងសង់ផ្លូវបេតុងអាមេ ប្រវែងជាង​៤០០ម៉ែត្រ​ នៅភូមិត្រពាំងទូក​ និង​ជួសជុលផ្លូវក្រាលកំទេចថ្ម ប្រវែងជាង៨០០ម៉ែត្រ​​ នៅភូមិខ្វិតតូច-ភូមិក្លែងពណ៌។
៣-ឃុំខ្វិតធំ​ មាន​១គម្រោង​ សាងសង់ផ្លូវបេតុងអាមប្រវែង​ជាង​៣០០ម៉ែត្រ​ នៅភូមិតាង៉ាល។
៤-ឃុំ​ត្រពាំងព្រះ​ មាន​១គម្រោង​ សាងសង់ផ្លូវបេតុងអាមេ ប្រវែងជាង៦០០ម៉ែត្រ​ នៅភូមិគូរ។
៥-ឃុំព្រៃឈ​រ​ មាន​១គម្រោង​ សាងសង់ផ្លូវបេតុងអាមេ ប្រវែងជាង​២០០ម៉ែត្រ​ នៅភូមិសេកយំ។
៦-ឃុំសំរោង​ មាន​១គម្រោង​ សាងសង់ផ្លូវបេតុងអាមេ ប្រវែងជាង៣០០ម៉ែត្រ​ នៅ ភូមិសូដី។
៧-ឃុំ​បារាយណ៍​ មាន​១គម្រោង​ សាងសង់ផ្លូវបេតុងអាមេ ប្រវែងជាង៤០០ម៉ែត្រ​ នៅភូមិលាងខ្សាច់។
និង​៨-ឃុំតុងរ៉ុង មាន​១គម្រោង​ សាងសង់ផ្លូវបេតុងអាមេ ប្រវែងជិត៤០០ម៉ែត្រ​ នៅភូមិផ្ទះខ្ពស់។
ជាមួយ​គ្នា​នោះ​ ​ប្រធាន​គណៈ​កម្មាការ​ម្ចាស់​លទ្ធកម្ម​ឃុំ​ទាំង​៨ឃុំ បាន​ធ្វើការ​ប្រកាស​ទទួល​យក​ទាំង​​១០គម្រោង​ ព្រមទាំង​បាន​ធ្វើការ​ផ្តាំផ្ញើដល់ក្រុមហ៊ុនអ្នកទទួលការទាំងអស់ ត្រូវ​​​អនុវត្តន៍​ការងារ​សាងសង់​ផ្លូវ​ ឲ្យ​មាន​គុណភាពល្អ​ ​និង​ត្រូវ​តាម​ស្តង់ដារ​ ​លក្ខណៈ​បច្ចេកទេស​​​ ប្រយោជន៍​ដល់​ការ​ប្រើប្រាស់​ របស់​ប្រជាពលរដ្ឋ​ ដែល​កំពុងតែ​ទន្ទឹង​រង់ចាំ​ ផងដែរ​៕SRP

ខេត្តមណ្ឌលគិរី៖ មានការលើកឡើងថាសកម្មភាពដឹកជញ្ជូនឈើនៅ ខេត្តមណ្ឌលគិរី ហាក់មានកំរើកឡើងវិញបន្ទាប់ពីបានស្ងប់ស្ងាត់មួយរយ:។

តាមសេចក្ដីរាយការណ៍បានឲ្យដឹងថាការដឹកជញ្ជូនឈើនៅខេត្តមណ្ឌលគិរី ដោយមានឈ្មួញម្នាក់ឈ្មោះឌី ជាឈ្មួញរកស៊ីឈើដ៏សកម្មបំផុត ប៉ុន្តែមិនទាន់មានការបង្ក្រាបពីអាជ្ញាធរនិងសមត្ថកិច្ចជំនាញនោះឡើយ។

សេចក្ដីរាយការណ៍បានបញ្ជាក់ថា ឈ្មួញឈើដែលគេស្គាល់ថាឈ្មោះឌី បានដឹកឈើតាមផ្លូវនៅ ចំណុច ភូមិពូត្រុំ  ក្រុងសែនមនោរម្យ ខេត្តមណ្ឌលគិរី។
ទោះយ៉ាងណាគេសង្ឃឹមថាអាជ្ញាធរសមត្ថកិច្ចជំនាញនឹងបង្ក្រាបការដឹកជញ្ជូនឈើរបស់ឈ្មោះឌី ជាក់ជាមិនខានឡើយ៕SRP

ខេត្តសៀមរាប៖ប្រជាពលរដ្ឋហាក់សម្ដែងនូវការមិនសប្បាយចិត្តចំពោះរថយន្តធំៗដែលបានដឹកថ្មចេញពីក្រុមហ៊ុនចំនួនពីរបណ្ដាលឲ្យខូចផ្លូវក្នុងមូលដ្ឋានរបស់ពួកគាត់ជាយូណាស់ហើយ។
សេចក្ដីរាយការណ៍បានឲ្យដឹងថាក្រុមហ៊ុនកិនថ្មចំនួន០២កន្លែង គឺក្រុមហ៊ុនថៃ និងក្រុមហ៊ុនកូរ៉េ កំពុងតែធ្វើអាជីវកម្មកិនថ្មបំផ្លាញធនធានធម្មជាតិនៅ(ភ្នំព្រៃបាំង)ជិតរលាយហិនហោចទៅហើយ ដែលមានទីតាំងស្ថិតនៅភូមិ ដូនអែម ឃុំគោកដូង ស្រុកអង្គរជុំ ខេត្តសៀមរាប។ មិនតែប៉ុណ្ណោះមានរថយន្តធំៗបានដឹកជញ្ចូនថ្មបំផ្លាញផ្លូវថ្នល់០២ខ្សែខូចទាំងស្រុងផងដែរ។ ដោយផ្លូវទី០១គឺចាប់ពីឃុំគោកដូងទៅទល់និង ឃុំល្វាទ្រាំង ស្រុកវ៉ារិន។ មួយខ្សែទៀតចាប់ពីឃុំគោកដូង មកទល់នឹងឃុំលាងដៃ ស្រុកអង្គរធំ។
ជុំវិញការលើកឡើងរបស់ប្រជាពលរដ្ឋនេះ លោក វុទ្ធី មេការក្រុមហ៊ុនថៃ បានប្រាប់អ្នកសារព័ត៌មានថា ការចោទប្រកាន់មកលើក្រុមហ៊ុនរបស់លោកមិនត្រឹមត្រូវទេ។ លោកវុទ្ធី ថា ផ្លូវថ្នល់ខូចហិនហោចនោះគឺមានក្រុមហ៊ុនកូរ៉េមួយទៀតដឹកជញ្ជូនយ៉ាងសកម្មជាងក្រុមហ៊ុនរបស់លោកទៅទៀត ហើយក៏មាន រថយន្ដដឹកដំឡូងមីរបស់ពលរដ្ឋផងដែរ។
ចំណែកលោកលុក ផុស អភិបាលស្រុកអង្គរជុំ បានបញ្ជាក់ប្រាប់អ្នកសារព័ត៌មានថាលោកនិងជំរុញឲ្យក្រុមហ៊ុនទាំងពីរធ្វើការជួសជុលឡើងវិញដើម្បីកុំឲ្យមានការខូចខាតហិនហោចផ្លូវនិងផលប៉ះពាល់មកលើពលរដ្ឋធ្វើដំណើរ។
អង្គភាពសៀមរាបប៉ុស្ដិ៍នៅមិនទាន់ទទួលបានការបកស្រាយពីលោកមាស ជូរានី ប្រធានមន្ទីររ៉ែនិងថាមពលខេត្តនៅឡើយទេជុំវិញការធ្វើអាជីវកម្មរបស់ក្រុមហ៊ុនទាំងពីរនេះ តើច្បាប់ដែរឬយ៉ាងណា។
ប្រជាពលរដ្ឋបានលើកឡើងថាថា កសិផលរបស់ពួកគាត់ក្នុងមួយឆ្នាំបានទទួលផលតែមួយដងគត់ វាមិនសាកសមនិងខូចផ្លូវនោះទេ។ ទោះយ៉ាងណាប្រជាពលរដ្ឋសង្ឃឹមថាអាជ្ញាធរជំនាញពាក់ព័ន្ធនិងធ្វើការដោះស្រាយបញ្ហាផ្លូវខូចទាំងនេះ។
សូមបញ្ជាក់ថាកាលកន្លងទៅប្រជាពលរដ្ឋបាននាំគ្នាបិទផ្លូវមិនឲ្យរថយន្តដឹកថ្មរបស់ក្រុមហ៊ុនខាងលើធ្វើចរាចណ៍នោះឡើយដោយពួកគាត់ថាបានបង្កឲ្យមានការដីហ៊ុយទ្រលោមនិងធ្វើឲ្យផ្លូវក្នុងតំបន់រស់នៅពួកគាត់រងការខូចខាតយ៉ាងធ្ងន់ធ្ងរផងដែរ៕SRP

ខេត្តកំពង់ធំ៖មានការលើកឡើងថាក្រុមឈ្មួញនៅតែអាចដឹកជញ្ជូនឈើចេញពីទឹកដីស្រុកសណ្ដាន់យកទៅចែកចាយតាមដេប៉ូនានាក្នុងស្រុកបារាយណ៍និងស្រុកតាំងគោក យ៉ាងអនាធិបតេយ្យបំផុត ប៉ុន្តែការបង្ក្រាបបានតិចតួចទៅវិញ។

សេចក្ដីរាយការណ៍បានឲ្យដឹងថាឈ្មួញរកស៊ីដឹកឈើឈ្មោះ(ខ្លី)ត្រូវបានគេរាយការណ៍ថាបានដឹកជញ្ជូនមិនមានសមត្ថកិច្ចណាហ៊ានបង្ក្រាបនោះឡើយ។ ប្រការដែលឈ្មួញរូបនេះអាចដឹកជញ្ជូនឈើបានដោយសេរីបែបនេះទំនងមានការឃុបឃិតគ្នាជាមួយសមត្ថកិច្ចជំនាញពាក់ព័ន្ធផងដែរ។

សេចក្ដីរាយការណ៍បានបន្តថាសកម្មភាពដឹកឈើ របស់ឈ្មោះ(ខ្លី)គឺដឹកចេញពីតំបន់ព្រៃឡង់ នៃទឹកដីស្រុកសណ្ដាន់ ដោយបានប្រើប្រាស់រថយន្តប្រភេទកូរ៉េជាយូណាស់មកហើយ។ក្នុងនោះមានឈ្មួញជាច្រើនទៀតបានធ្វើសកម្មភាពដឹកឈើ ចេញពីអូងាវ ពីតំបន់៩៩ និងឃុំមានរិទ្ធ និងចេញពីឃុំទំរីងបានដោយរលូនបើទោះបីជាមានការ រឹកបន្តឹងពីសំណាក់អាជ្ញាធរសមត្ថកិច្ចជំនាញក៏ដោយ ក៏ឈ្មួញឈើនៅតែអាចដឹកបានដដែល។

ប្រជាពលរដ្ឋតែងតែលើកឡើងថាសមត្ថកិច្ចជំនាញចាប់បានតែពលរដ្ឋដឹកបន្តិចបន្តួចយកមកប្រើប្រាស់លក្ខណ:គ្រួសារតែប៉ុណ្ណោះចំណែកឈ្មួញធំៗមិនត្រូវបានគេបង្ក្រាបនោះឡើយ។ពាក់ព័ន្ធករណីនេះលោកវែង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ លោកសាយ សំអាល់ រដ្ឋមន្ត្រីក្រសួងបរិស្ថាន និងលោកសុខ លូ អភិបាលខេត្តកំពង់ធំ ជួយមើលមន្ត្រីជំនាញរបស់ខ្លួនផង៕SRP

ខេត្តកំពង់ចាម៖ផ្ទះប្រជាពលរដ្ឋចំនួន០២ខ្នងត្រូវបានអគ្គិភ័យឆាបឆេះអស់ស្ទើរទាំងស្រុង។ហេតុការណ៍នេះបាន កើតឡើងនៅវេលាម៉ោង១និង២៨នាទីរសៀលថ្ងៃទី០៦ខែមិថុនាឆ្នាំ២០២០ នៅភូមិប្រាំយ៉ាមឃុំប្រាំយ៉ាម ស្រុកស្រីសន្ធរខេត្តកំពង់ចាម។

សមត្ថកិច្ចបានឲ្យដឹងថាក្រោយពីទទួលបានព័ត៌មានថាមានករណីអគ្គិភ័យភ្លាមលោកឧត្តមសេនីយ៍ទោឯម កុសល ស្នងការនគរបាលខេត្តកំពង់ចាម បានបញ្ជាឱ្យលោកវរសេនីយ៍ឯក សុខ យ៉េន អធិការនគរបាលស្រុកស្រីសន្ធរ ដឹកនាំកម្លាំងជំនាញនិងកម្លាំងប៉ុស្តិ៍នគរបាលរដ្ឋបាលប្រាំយ៉ាម ចុះទៅអន្តរាគមន៍ ដោយចេញរថយន្តពន្លត់អគ្គិភ័យចំនួន០២គ្រឿងប្រើប្រាស់អស់ទឹក០៤ឡានក្នុងការអន្តរាគមន៍ជួយពន្លត់។

សមត្ថកិច្ចបានបញ្ជាក់ថាករណីនេះបណ្ដាឲ្យឆេះផ្ទះទី០១-ម្ចាស់ឈ្មោះឯមនឿន ភេទស្រីអាយុ៥៧ឆ្នាំផ្ទះមានទំហំ៨ម៉ែត្រx៩ម៉ែត្រ ដំបូលប្រក់ក្បឿងជញ្ជាំងក្តាររនាបឫស្សី បេតុងក្រោមឆេះអស់ទាំងស្រុងនិងសម្ភារនៅលើផ្ទះដូចជា៖ម៉ាស៊ីនដេ០៥គ្រឿង ម៉ូទ័រ០១គ្រឿងក្បាលខ្យល់០១គ្រឿង ម៉ាស៊ីនបូមទឹក០១គ្រឿង ខ្សែកមាស១០ជី  លុយ១២០០ដុល្លារទូដាក់ខោអាវ០៣ ម៉ូតូគប់ជ្រង់០១គ្រឿង និងសម្ភារប្រើប្រាស់មួយចំនួនទៀត។

ដោយឡែកផ្ទះមួយខ្នងទៀតម្ចាស់ឈ្មោះជាចាន់ណាភេទស្រី អាយុ៣៧ឆ្នាំ ឆេះផ្ទះអស់០១ខ្នងមានទំហំ៧ម៉ែត្រx៩ម៉ែត្រធ្វើអំពីឈើប្រក់ក្បឿងជញ្ជាំងក្តាររនាបក្តារបេតុងក្រោម ផ្ទះនេះឆេះអស់៧០ភាគរយនឹងសម្ភារមួយចំនួនផងដែរ។ ករណីដោយសមត្ថកិច្ចដាក់ការសង្ស័យលើការទុស្សេខ្សែភ្លើង៕SRP