Siem Reap Post – Page 73 – Siem Reap News, Cambodia News

លោកប៉ែន បូណា ប្រធានអង្គភាពអ្នកនាំពាក្យរដ្ឋាភិបាល បានបកអាក្រាតចរិកពិតរបស់លោកសម រង្ស៊ី។

ការបកអាក្រាតចរិករបស់លោកសម រង្ស៊ី បែបនេះ បន្ទាប់ពីលោកសម រង្ស៊ី បានបង្ហោះសារមួយពីបញ្ហាមង្គលព្រំដែន ដោយលើកយក Google Map មកផ្សព្វផ្សាយ ក្នុងគោលបំណងមូលបង្កាច់និងរិះគន់រដ្ឋាភិបាលកម្ពុជា។

បើតាមលោកប៉ែន បូណា បានសរសេរបង្ហោះនៅលើ facebook ផ្ទាល់ខ្លួនថា

ការបោកប្រាសដែលមិនចេះខ្មាសអៀន

ទោះបីជាក្រុមអ្នកបច្ចេកទេសបានពន្យល់ច្បាស់លាស់អំពីផែនទី Google Map ថាជាផែនទីរបស់ក្រុមហ៊ុនឯកជនដែលគេបង្កើតឡើងក្នុងគោលដៅធ្វើពាណិជ្ជកម្ម និងមិនមែនជាឧបករណ៍សម្រាប់វាស់វែងព្រំដែនរវាងរដ្ឋនិងរដ្ឋក៏ដោយ ក៏បុគ្គលរូបនេះនៅតែនិយាយដដែលដោយមិនចេះអៀនខ្មាសទាល់តែសោះ។ នេះដោយសារតែមនោគមន៍វិជ្ជានយោបាយប្រឆាំងជ្រុលនិយមបានដុះស្លែក្រាស់ពេកក្នុងប្រព័ន្ធគំនិតរហូតមិនអាចកែបាន។

យើងសាកស្រមៃថា ប្រសិនបើបុគ្គលបែបនេះឡើងកាន់អំណាចដឹកនាំរដ្ឋាភិបាល ហើយស្រាប់តែប្រកាសយកផែនទី Google Map ដើម្បីវាស់វែងខណ្ឌសីមា និងការបោះបង្គោលព្រំដែន ពេលនោះប្រទេសជិតខាងច្បាស់ជាអស់សំណើចផង ឆ្ងល់ផងថា មិនគួរមានមេដឹកនាំបែបនេះនៅក្បែរខាងទាល់តែសោះ។ កុំថាឡើយតែផែនទី Google Map ទោះបីជាផែនទីណាក៏ដោយដែលផលិតដោយក្រុមហ៊ុនឯកជនហើយមានគោលដៅពាណិជ្ជកម្មគឺគ្មានតម្លៃសម្រាប់ការងារកំណត់ព្រំដែនរវាងរដ្ឋនិងរដ្ឋឡើយ។

នៅលើពិភពលោកនេះ ការងារខណ្ឌសីមានិងការបោះបង្គោលព្រំដែន គេពឹងផ្នែកតែទៅលើផែនទីដែលមានការទទួលស្គាល់ជាអន្តរជាតិ ហើយដែលប្រទេសជិតខាងពាក់ព័ន្ធព្រមព្រៀងទទួលយកទាំងអស់គ្នា។ បើគ្រាន់តែរឿងប៉ុណ្ណឹងមិនអាចយល់បានផង តើខំធ្វើនយោបាយដើម្បីអ្វី? ឬចង់បានត្រឹមកុំឱ្យគេភ្លេចឈ្មោះទោះជាត្រូវគេសើចចំអកយ៉ាងណាក៏មិនខ្ចីឈឺ?

នេះជាមនោគមន៍វិជ្ជានយោបាយជ្រុលនិយមដ៏អាក្រក់បំផុតដែលយើងទាំងអស់គ្នាត្រូវរួមគ្នាលុបបំបាត់ឱ្យអស់ពីកម្ពុជា៕SRP

ខេត្តបន្ទាយមានជ័យ៖ប្រជាពលរដ្ឋរាប់រយគ្រួសារ បានកើតទុក្ខនិងសុខចិត្ត ចំពោះការសម្រេចចិត្តរបស់អភិបាលខេត្តបន្ទាយមានជ័យ ឯកឧត្តម អ៊ុំ រាត្រី ដោយពួកគាត់អះអាងថា មិនព្រមតាមការសម្រេចចាប់ឆ្នោតដែលមិនប្រក្រតី មិនសមស្រប របស់ឯកឧត្តម អ៊ុំ រាត្រី អភិបាលខេត្តបន្ទាយមានជ័យ រូបនេះ។

ក្នុងលិខិតមានស្នាមមេដៃប្រជាពលរដ្ឋ រាប់រយគ្រួសារ ដែលបានគោរពជូនសម្ដេចធិបតីនាយករដ្ឋមន្ត្រីហ៊ុនម៉ា ណែត ចុះថ្ងៃទី 30 ខែសីហាឆ្នាំ 2024។

យោងតាម៖ អនុក្រឹត្យលេខ ៥៧ អនក្រ.បកចុះថ្ងៃទី ៦ ខែមិនា ឆ្នាំ២០២៣ របស់រាជរដ្ឋាភិបាលកម្ពុជា និង ប្រកាសលេខ ០៧៧ ដនស ប្រ.កអសដភ ចុះថ្ងៃទី ០៩ ខែឧសភា ឆ្នាំ២០២៣។

កម្មវត្ថុ៖ យើងខ្ញុំទាំងអស់គ្នាជាប្រជាពលរដ្ឋ មានដីស្រែកាន់កាប់និងអាស្រ័យផល តាមចំណែករាងៗខ្លួនចាប់តាំងពីឆ្នាំ២០០៤ រហូតមក ដល់បច្ចុប្បន្នដែលមានទីតាំងនៅភូមិ បត់ត្រង់ ឃុំប្រាសាទ និងភូមិកាបៅ ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ និងមានកិច្ចសន្យាផ្ទេរសិទ្ធិ ដីធ្លីស្របច្បាប់ ដែលមានអាជ្ញាធរួមមាន មេភូមិ មេឃុំ បានទទួលដឹងលឺ និងមានឯកសារបញ្ជាក់ច្បាស់ៗ ទាំងអស់ សរុបដីស្រែចំនួន ១៣០២ហិតតា។

នៅឆ្នាំ២០២១ អាជ្ញាធរភូមិ ឃុំ ស្រុក និងខេត្ត បន្ទាយមានជ័យ បានចុះ ពិនិត្យនិងកំណត់ចំណាត់ថ្នាក់ដីឡើងវិញ ឃើញថា ដីស្រែរបស់ពួកយើងខ្ញុំ មានទីតាំងស្ថិតនៅតំបន់៣។ ក្នុងឆ្នាំ២០២២ រាជរដ្ឋាភិបាល បានពិនិត្យកែសម្រួល និងធ្វើចំណាត់ថ្នាក់ឡើងវិញម្តងទៀតឃើញថា ដីស្រែរបស់ពួកយើងខ្ញុំ កំពុងស្ថិតនៅតំបន់២ មិនមែន តំបន់៣ នោះឡើយ។ ក៏ប៉ុន្តែ អាជ្ញាធរថ្នាក់ខេត្តបន្ទាយមានជ័យមិនបានប្រគល់ដីស្រែទាំងនោះ មកអោយពួកយើងខ្ញុំ ដែលជាប្រជាពលរដ្ឋ ធ្លាប់បានកាន់កាប់ដីស្រែនិងអាស្រ័យផលជាយូរមកហើយ និងបន្តអោយធ្វើស្រែចំការ នៅលើដីស្របតាម អនុក្រឹត្យលេខ ៥៧ អនក្រ.បកចុះថ្ងៃទី០៦ ខែមិនា ឆ្នាំ២០២៣ របស់រាជរដ្ឋភិបាលកម្ពុជា និង ប្រកាសលេខ ០៧៧ ដនស/ប្រ.ក/អសដភ ចុះថ្ងៃទី ០៩ ខែឧសភា ឆ្នាំ២០២៣ នោះ វិញទេ។

បែរជាយកដី របស់ពួកយើងខ្ញុំទាំងអស់គ្នា សរុបផ្ទៃដីចំនួន ១៣០២ ហិតតា មកចាប់ឆ្នោត បែងចែកដីអោយទៅបុគ្គល មិនដែលបានមកអាស្រ័យផល លើដីស្រែទាំងនោះផង បែរជាមានមុខចាប់ឆ្នោត យកដីស្រែទាំងអស់នោះផងដែរ។ ពួកយើងខ្ញុំដែលជាប្រជាពលរដ្ឋ ស្លូតត្រង់កើតទុក្ខមិនសុខចិត្ត និងមានក្តី ឈឺចាប់យ៉ាងខ្លាំងចំនួន ២២០គ្រួសារ ដែលមានដីស្រែនៅភូមិបត់ត្រង់ ឃុំប្រាសាទ និងភូមិកាបៅ ឃុំភ្នំលៀប ស្រុកព្រះនេត្រព្រះ ខេត្តបន្ទាយមានជ័យ ជាអ្នកបានកាន់កាប់លើដីស្រែពិតប្រាកដ សូមមិនយល់ស្របតាម សម្រេចរបស់អាជ្ញាធរខេត្ត បានប្រមូលហៅពួកយើងខ្ញុំ មកសម្របសម្រួលចំនួន២ លើកមកហើយ នៅសាលា ខេត្តបន្ទាយមានជ័យ តែពួកយើងខ្ញុំទាំងអស់គ្នា មិនព្រមតាមការសម្រេចចាប់ឆ្នោតដែលមិនប្រក្រតីមិនសមស្រប បែបនេះ របស់ឯកឧត្តម អ៊ុំ រាត្រី អភិបាលខេត្តបន្ទាយមានជ័យនោះដែរ គឺពួកយើងខ្ញុំដែលជាប្រពលរដ្ឋ សូមអំពាវនាវ អង្វរករ និងសូមគោរពជម្រាបជូន សម្ដេចអធិបតីនាយករដ្ឋមន្ត្រីហ៊ុន ម៉ាណែត មេត្តាជួយរកយុត្តិធម៌អោយពួកយើងខ្ញុំបាទដោយក្តីអនុគ្រោះផង។

អាស្រ័យដូចបានគោរពជម្រាបជូនតាមកម្មវត្ថុខាងលើ សូមសម្ដេចអធិបតីហ៊ុន ម៉ាណែត មេត្តាទទួលនូវសេចក្តីគោរពដ៏ខ្ពង់ខ្ពស់បំផុតអំពីពួកយើងខ្ញុំទាំងអស់គ្នា។ និងសូមគោរពជម្រាបជូន នូវឯកសារ ថតចម្លងស្នាមមេដៃប្រជាពលរដ្ឋ ទាំងអស់ចំនួន២២០គ្រួសារ និងសំលេង អភិបាលខេត្តបន្ទាយមានជ័យផងដែរ៕SRP

ខេត្តសៀមរាប៖នាយឧត្តមសេនីយ៍ ជួន សុវណ្ណា បានលើកឡេីងថា រាល់ប្រតិបត្តិករល្បែងផ្សងសំណាង ដែលពុំមានអាជ្ញាបណ្ណល្បែង ផ្សងសំណាង អាជ្ញាបណ្ណសាខា ឬ លិខិតអនុញ្ញាត្តប៉ុស្តិ៍សេវា ល្បែងផ្សងសំណាង ត្រូវចាត់ទុក ការធ្វើអាជីវកម្មល្បែងស៊ីសងខុសច្បាប់ និង ត្រូវផ្តន្ទាទោសតាមច្បាប់បង្ក្រាបល្បែងស៊ីសង។ គណៈបញ្ជាការឯកភាពរដ្ឋបាលខេត្ត ក្រុង ស្រុក ត្រូវពង្រឹងការអនុវត្តច្បាប់ ស្តីពីការបង្ក្រាបល្បែងស៊ីសង ដែលត្រូវបានប្រកាសឲ្យប្រើ ដោយហាមឃាត់ដាច់ខាត់ល្បែងស៊ីសងគ្រប់ប្រភេទ នៅគ្រប់ទីកន្លែងនៅកម្ពុជា លើកលែងតែទទួលបានការអនុញ្ញាត្តពីរាជរដ្ឋាភិបាល និងត្រូវបង្កើនការត្រួតពិនិត្យ ត្រូវស៊ើបបញ្ជាក់ជាប្រចាំ ចំពោះប្រតិបត្តិការ អាជីវកម្ម ល្បែងផ្សងសំណាង ទាំងមានអាជ្ញាបណ្ណ លិខិតអនុញ្ញាត្ត និង មិនមានច្បាប់ឲ្យដល់ទីតាំង ដើមី្បចាត់វិធានការតាមផ្លូវច្បាប់។

លោកថាក្នុងកិច្ចប្រតិបត្តការបង្ក្រាបល្បែងស៊ីសងខុសច្បាប់ ត្រូវរកឲ្យឃើញជនល្មើស និង ជនផ្សំគំនិត ដើមី្បផ្តន្ទាទោសទៅតាមច្បាប់ ឲ្យបានត្រឹមត្រូវ។

លោកបានជំរុញដល់គណៈបញ្ជាការឯកភាពរដ្ឋបាលខេត្ត ក្រុង ស្រុក ត្រូវដឹកនាំអាជ្ញាធរ កងកម្លាំងមានសមត្ថកិច្ច គ្រប់លំដាប់ថ្នាក់ឲ្យបង្កើនការថែរក្សាការពារ សន្តិសុខសណ្តាប់ធ្នាប់ សាធារណៈ និងសុវត្ថិភាពសង្គម ក្នុងក្របខណ្ឌមូលដ្ឋានរបស់ខ្លួនទាំងមូល សំខាន់សន្តិសុខទេសចរណ៍ ដោយខេត្តសៀមរាបជាគោលដៅភ្ញៀវទេសចរណ៍ ដោយត្រូវបន្តជម្រុញ លើកទឹកចិត្តប្រជាពលរដ្ឋគ្រប់មជ្ឈដ្ឋាន ឲ្យចូលរួមអនុវត្តគោល នយោបាយ “ភូមិ-ឃុំ-សង្កាត់ មានសុវត្ថិភាព” ប្រយុទ្ធប្រឆាំងគ្រឿងញៀនខុសច្បាប់ និងលើកកម្ពស់សុវត្ថិភាពចរាចរផ្លូវគោកផងដែរ។

លោកក៏បានជម្រុញដល់គណៈបញ្ជាការឯកភាពរដ្ឋបាលក្រុង-ស្រុក និង អង្គភាពពាក់ព័ន្ធ ត្រូវពង្រឹងកិច្ចសហការគ្នាឲ្យស្អិតរមួត ក្នុងការគ្រប់គ្រងតាមដាន និងការត្រួតពិនិត្យជាប់ជាប្រចាំ ចំពោះរាល់សកម្មភាពលួចលាក់ បង្កប់លេងល្បែងស៊ីសងខុសច្បាប់គ្រប់ប្រភេទក្នុងភូមិសាស្ត្ររបស់ខ្លួន ដោយត្រូវតែចាត់វិធានការម៉ឺងម៉ាត់តាមច្បាប់ និងលិខិតបទដ្ឋានគតិយុទ្ធជាធរមានឲ្យបានទាន់ពេល។

សូមជម្រាបថានៅថ្ងៃទី ២៩ ខែ សីហា ឆ្នាំ២០២៤ នៅសាលប្រជុំសាលាខេត្តសៀមរាប មានបើកកិច្ចប្រជុំគណៈបញ្ជាការឯករដ្ឋបាលខេត្តសៀមរាប ជាមួយក្រុមការងារពិសេស តាមដានការអនុវត្តគោលការណ៍របស់នាយករដ្ឋមន្ត្រី ពាក់ព័ន្ធ និងកិច្ចការងារសន្តិសុខ សណ្តាប់ធ្នាប់សង្គម ក្រោមកិច្ចដឹកនាំរបស់លោក នាយឧត្តមសេនីយ៍ ជួន សុវណ្ណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានក្រុមការងារពិសេស តាមដានការអនុវត្តគោលការណ៍របស់ នាយករដ្ឋមន្ត្រី ពាក់ព័ន្ធ និងកិច្ចការងារសន្តិសុខ សណ្តាប់ធ្នាប់សង្គម និង លោក សំកុល សុចិត្រា អភិបាលរងខេត្ត តំណាងឯកឧត្តម ប្រាក់ សោភ័ណ ប្រធានគណៈបញ្ជាការឯកភាពរដ្ឋបាលខេត្ត ដោយមានការអញ្ជើញចូលរួមពីឯកឧត្តម ប្រតិភូអមដំណើរ ព្រះរាជអាជ្ញា អយ្យការអមសាលាដំបូងខេត្ត អស់លោកលោកស្រី ស្នងការរង មេបញ្ជាការ បញ្ជាការរង ថ្នាក់ដឹកនាំមន្ទីរជុំវិញខេត្ត គណៈអភិបាលក្រុង ស្រុក អធិការនគរបាល កងរាជអាវុធហត្ថ ផ្នែកសឹករង ក្រុង ស្រុក ប្រមាណជា ១៥០នាក់ចូលរួម៕SRP

ខេត្តសៀមរាប៖លោក ឌី រ៉ាដូ ឋានន្តរស័ក្តិ ឧត្តមមន្ត្រី ថ្នាក់លេខ៤ អភិបាលរងខេត្តឧត្តរមានជ័យ ត្រូវបានប្រកាសផ្ទេរភារកិច្ចមកជាអភិបាលរងខេត្តសៀមរាប ជំនួសលោក ពិន ប្រាកដ ដែលត្រូវផ្លាស់ទៅកាន់តំណែងជាអភិបាលរងខេត្តបាត់ដំបង និង លោក ហែន ពុទ្ធី ឋានន្តរស័ក្តិ ឧត្តមមន្ត្រី ថ្នាក់លេខ៣ ត្រូវបានប្រកាសតែងតាំងជាអភិបាលរងខេត្តសៀមរាប ជំនួស ឯកឧត្តម លី សំរិទ្ធ ដែលបានទទួលភារកិច្ចថ្មីជាប្រធានក្រុមប្រឹក្សាខេត្តសៀមរាប។

ពិធីនៅថ្ងៃទី៣០ ខែ សីហា ឆ្នាំ២០២៤ នៅសាលប្រជុំសាលាខេត្តសៀមរាប ក្រោមអធិបតីភាពរបស់លោក អ៊ុំ ម៉ារ៉ា រដ្ឋលេខាធិការក្រសួងមហាផ្ទៃ តំណាងលោកអភិសន្តិបណ្ឌិត ស សុខា និង ការអញ្ជើញចូលរួមពីលោក លី សំរិទ្ធ ប្រធានក្រុមប្រឹក្សាខេត្ត និង លោក ប្រាក់ សោភ័ណ អភិបាលខេត្ត ព្រមទាំងឯកឧត្តម លោកជំទាវជាសមាជិកក្រុមប្រិក្សាខេត្ត អស់លោក លោកស្រីជាគណៈអភិបាលខេត្ត ថ្នាក់ដឹកនាំមន្ទីរ អង្គភាព គណៈអភិបាលក្រុង ស្រុក កងកម្លាំងទាំង៣ប្រភេទ និងមន្រ្តីពាក់ព័ន្ធជាច្រើនទៀត។

លោក ប្រាក់ សោភ័ណ អភិបាលខេត្ត សង្ឃឹមថាមន្រ្តីដែលប្រកាសចូលកាន់តំណែងត្រូវអនុវត្តតួនាទី ភារកិច្ច និងការទទួលខុសត្រូវរបស់ខ្លួនប្រកបដោយការសហការ សាមគ្គីភាព និង ឯកភាពផ្ទៃក្នុង ដើម្បីចូលរួមចំណែកធ្វើឲ្យការអនុវត្តការងារ ក្នុងជួរគណៈអភិបាលខេត្តកាន់តែមានប្រសិទ្ធភាព ជាពិសេសការលើកកម្ពស់ការផ្ដល់ សេវាសាធារណៈជូនប្រជាពលរដ្ឋ និង ការអភិវឌ្ឍខេត្តសៀមរាប ឲ្យកាន់តែមានការរីកចម្រើនថែមទៀត។

លោក អ៊ុំ ម៉ារ៉ា បានកោតសរសើរ និងវាយតម្លៃខ្ពស់ចំពោះក្រុមប្រឹក្សាខេត្ត គណៈអភិបាលខេត្តសៀមរាប អាជ្ញាធរដែនដីគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ និងមន្ទីរ-អង្គភាពពាក់ព័ន្ធក្នុងខេត្តសៀមរាបទាំងអស់ ដែលបានរួមសាមគ្គីសហការគ្នាខិតខំប្រឹងប្រែងយ៉ាងសកម្មក្នុងការអនុវត្តកម្មវិធីនយោបាយរបស់រាជរដ្ឋាភិបាលកម្ពុជា ដោយបានជម្រុញការអភិវឌ្ឍខេត្តឲ្យមានការរីកចម្រើនលើគ្រប់វិស័យ និងរក្សាបាននូវសន្តិសុខ សណ្ដាប់ធ្នាប់សាធារណៈសង្គម បានល្អប្រសើរនាពេលកន្លងមក។

លោករដ្ឋលេខាធិការបានសង្ឃឹមថា អភិបាលរងទាំងពីរដែលទើបប្រកាសចូលកាន់តំណែងត្រូវអនុវត្តតួនាទី ភារកិច្ច និងការទទួលខុសត្រូវរបស់ខ្លួនប្រកបដោយការសហការ សាមគ្គីភាព និងឯកភាពផ្ទៃក្នុង ដើម្បីចូលរួមចំណែកធ្វើឲ្យការអនុវត្តការងារ ក្នុងជួរគណៈអភិបាលខេត្តកាន់តែមានប្រសិទ្ធភាពជាពិសេសការលើកកម្ពស់ការផ្ដល់សេវាសាធារណៈ ជូនប្រជាពលរដ្ឋ និងការអភិវឌ្ឍខេត្តសៀមរាបឲ្យកាន់តែមានការរីកចម្រើនថែមទៀត។

លោកបានមានប្រសាសន៍កោតសរសើរដល់ឯកឧត្តមអភិបាលនៃគណៈអភិបាលខេត្តសៀមរាប ដែលបានខិតខំប្រឹងប្រែង ក្នុងការអនុវត្តគម្រោងទីក្រុងស្អាត ក្នុងនោះមានការរៀបចំសណ្ដាប់ធ្នាប់ក្នុងក្រុង ឲ្យកាន់តែមានរបៀបរៀបរយ និងសោភ័ណ្ឌភាព បរិស្ថានអនាម័យ ក្នុងក្រុងទេសចរ វប្បធម៌ធម្មជាតិ ប្រវត្តិសាស្ត្រ ក្នុងការទាក់ទាញដល់ភ្ញៀវជាតិអន្តរជាតិចូលមកទស្សនាកម្សាន្ត។ក្នុងនោះដែរឯកឧត្តមក៏បានលើកឡើងពីស្ថានភាពនយោបាយ ក្នុងនិងក្រៅប្រទេស ព្រមទាំងលើកផងដែរ អំពីតំបន់ត្រីកោណអភិវឌ្ឍន៍ (CLV) និង បានជម្រុញដល់អាជ្ញាធរក្រុង ស្រុក ឃុំ សង្កាត់លើការអនុវត្តគោលនយោបាយភូមិឃុំ សង្កាត់មានសុវត្ថិភាព ព្រមទាំងបង្កើនការបង្ក្រាបអំពើជួញដូរគ្រឿងញៀន ការជួញដូរមនុស្ស និងបង្ក្រាបក្រុមក្មេងទំនើង ដើមី្បរក្សាសន្តិសុខ សុវត្ថិភាពជូនដល់ប្រជាពលរដ្ឋ ភ្ញៀវទេសចរណ៍ជាតិ អន្តរជាតិ និងបង្ក្រាបល្បែងស៊ីសងគ្រប់ប្រភេទ និង ផ្សព្វផ្សាយពីច្បាប់ចរាចរណ៍ ដែលជាកត្តាចំបងនៅក្នុងពេលបច្ចុប្បន្ន។ ក្នុងនោះដែរឯកឧត្តមក៏បានជម្រុញដល់អាជ្ញាធរខេត្ត ឲ្យមានកិច្ចសហការគ្នាល្អជាមួយអាជ្ញាធរជាតិអប្សរា ក្នុងការបង្ក្រាប នូវរាល់បទល្មើសផ្សេងៗ ដែលកើតមាននៅក្នុងតំបន់រមណីយដ្ឋានអង្គរ។ លោករដ្ឋលេខាធិការ បានផ្ដាំផ្ញើលោកអភិបាលរងខេត្តថ្មីទាំងពីរ ដែលទើបទទួលការតែងតាំងមុខតំណែងថ្មី ត្រូវប្រកាន់ខ្ជាប់នូវសាមគ្គីភាពផ្ទៃក្នុង និង ត្រូវខិតខំប្រឹងប្រែងសហការ ចូលរួមក្នុងដំណើរការអភិវឌ្ឍន៍ខេត្តសៀមរាប ឲ្យមានការរីកចម្រើនបន្ថែមទៀត៕SRP

ខេត្តបន្ទាយមានជ័យ៖សមត្ថកិច្ចចំរុះមានផលិតកម្មនិងបសុព្យាបាលខេត្ត បានហការជាមួយអគ្គនាយកដ្ឋានគយបង្រ្កាបអំពើរត់ពន្ធតំបន់៥ បានចុះចាប់នៅវេលាម៉ោង ១ ថ្ងៃត្រង់ថ្ងៃទី២៩ខែសីហាឆ្នាំ២០២៤ ស្ថិតក្នុងចំណុចក្នុងភូមិទឹកថ្លា សង្កាត់ទឹកថ្លាក្រុងសិរីសោភ័ណ ខេត្តបន្ទាយមានជ័យ។

លោកតោ មេសា អនុប្រធានការិយាល័យផលិតកម្មនិង ឮបសុព្យាបាលនៃមន្ទីរកសិកម្ម រុក្ខាប្រមាញ់និងនេសាទខេត្តបន្ទាយមានជ័យបានឲ្យដឹងថា សមត្ថកិច្ចចម្រុះបានធ្វើការត្រួតពិនិត្យនិងដកហូតនូវផលិតផលបក្សីចុងស្លាបមាន់បង្កកចំនួន២០០កេស ស្មើនឹង២.៤០០គីឡូក្រាម។

ករណីនេះ ម្ចាស់ទំនិញ មាន ឈ្មោះ ឈិន សុខាន់ បានផ្តល់ចម្លើយបំភ្លឺថា ចុង ស្លាបមាន់បង្កក២០០ កេសនេះ ខ្លួនបានទទួលពីអ្នកលួចនាំចូលពីប្រទេសថៃ ទេ។ ហើយខ្លួនក៏បង្កប់ដឹកតាមរថយន្តរត់ទូរម៉ាកយាំយ៉ុង យកមកលក់ឲ្យឈ្មួញទិញដុំដើម្បីចែកចាយបន្តគឺលក់ចែកចាយរាយនៅតាមផ្សារទីតាំងនានាក្នុង។

សមត្ថកិច្ចបានធ្វើការដកហូត វត្ថុតាងមានផលិតផលចុងស្លាបមាន់បង្កក២០០កេះនេះ បានធ្វើកំណត់ហេតុ បានមើលឯកសាររកឃើញថាស្លាបមាន់បង្កកនេះគឺនាំចូលដោយគ្មានច្បាប់អនុញ្ញាតពីក្រសួងកសិកម្មរុក្ខាប្រមាញ់និងនេសាទ និងអគ្គនាយកដ្ឋានសុខភាពសត្វ និងផលិតកម្មសត្វ។

យោងការពិនិត្យបច្ចកទេសឃើញថា ការវេចខ្ចប់ ការដឹកជញ្ជូន និងការថែរក្សា ផលិតផលទាំងអស់ខាងលើ ក៏មិនអនុលោមតាមខ្លឹមសារច្បាប់ ស្ដីពីសុខភាពសត្វ និងផលិតកម្មសត្វ ដែលធ្វើឲ្យបាត់បង់នូវបរិមាណដើម ឬខូចគុណភាព។ ហេតុនេះជំនាញពាក់ព័ន្ធមិនអនុញ្ញាតអោយចែកចាយ លក់ដូរនៅលើទីផ្សារបានជាដាច់ខាត ព្រោះអាចឲ្យប្រជាពលរដ្ឋទិញយកទៅបរិភោគខូចសុខភាព។

សមត្ថកិច្ចបាននាំយកវត្ថុតាងផលិតផលបក្សីដូចខាងលើ យកទៅដុតកំទេចចោលនៅចំណុចដីឡូតិ៍១កន្លែងនាភូមិខ្លាកូន សង្កាត់កំពង់ស្វាយ ក្រុងសិរីសោភ័ណ៕SRP

Sponsored

ភ្នំពេញ៖លោក ឡាយ ម៉ារីវ៉ូ និងប្រពន្ធស បានម្រេចដាក់បណ្តឹងទៅអាជ្ញាធររាជធានីភ្នំពេញ និងមន្ទីរជំនាញ រឿងលោក អ៉ឹង ដារ៉េត និងប្រពន្ធឈ្មោះ ង៉ូវ រ៉ាដែត សាងសង់ខុនដូរ រំលោភលើដីគាត់ និងសង្ស័យខុសលក្ខណៈបច្ចេកទេស។

ការដែលប្រជាពលរដ្ឋជាម្ចាស់ដីពីរនាក់ប្តីប្រពន្ធខាងលើ សម្រេចចិត្តដាក់ពាក្យបណ្តឹងទៅ អភិបាលរាជធានីភ្នំពេញ និង ប្រធានមន្ទីររៀបចំដែនដីនគរូបនីយកម្មសំណង់និងសុរិយោដីរាជធានីភ្នំពេញ ខណៈដែលភាគីម្ខាងទៀត កំពុងតែធ្វើការសាងសង់អាគារខ្ពស់ (ខុនដូរ) រំលោភលើដីរបស់គាត់ មិនតែប៉ុណ្ណោះសង្ស័យសាងសង់ខុសលក្ខណៈបច្ចេកទេសថែមទៀតផង។ សូមឱ្យអាជ្ញាធរ ខណ្ឌ រាជធានីភ្នំពេញ និងជំនាញពាក់ព័ន្ធមេត្តាចុះពិនិត្យដល់ទីតាំងជាក់ស្តែងផង ដែលមានអាសយដ្ឋានផ្ទះលេខ៦ ផ្លូវលេខ៥៧៦ ភូមិ៤ សង្កាត់បឹងកក់ទី២ ខណ្ឌទួលគោក រាជធានីភ្នំពេញ។

បើយោងតាមពាក្យបណ្តឹងរបស់ម្ចាស់ដី ខ្ញុំបាទឈ្មោះ ឡាយ ម៉ារីវ៉ូ ភេទ ប្រុស អាយុ ៦៣ឆ្នាំ ជនជាតិ ខ្មែរ និងប្រពន្ធឈ្មោះ និល សុគុន្ធារី អាយុ ៦១ឆ្នាំ ជនជាតិ ខ្មែរ មានអាសយដ្ឋានផ្ទះ លេខ ៦ ផ្លូវលេខ ៥៧៦ ភូមិ៤ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ជាម្ចាស់ផ្ទះជាប់ការដ្ឋានសាងសង់។

សូមគោរពជូន

លោកប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានីភ្នំពេញ

កម្មវត្ថុ÷ សុំប្តឹងឈ្មោះ អ៉ឹង ដារ៉េត ភេទ ប្រុស អាយុ ៥៣ឆ្នាំ ជនជាតិខ្មែរ និងប្រពន្ធឈ្មោះ ង៉ូវ រ៉ាដែត អាយុ ៤៧ឆ្នាំ ជនជាតិខ្មែរ មាន អាសយដ្ឋានផ្ទះលេខ ១៩២៦ ផ្លូវជាតិលេខ៥ ភូមិផ្សារតូច សង្កាត់ទួលសង្កែ ខណ្ឌឫស្សីកែវ រាជធានី ភ្នំពេញ ជាម្ចាស់សំណង់អគារខ្ពស់ ជាប្រភេទអគារខុនដូរ មានទីតាំងស្ថិតនៅក្នុងក្បាលដីលេខ៧៤ ភូមិ១៧ សង្កាត់ស្រះចក ខណ្ឌដូនពេញ រាជធានីភ្នំពេញ បានសាងសង់ខុសបទដ្ឋានស្តង់ដារ បច្ចេកទេស ធ្វើឲ្យប៉ះពាល់ដល់សន្តិសុខសុវត្ថិភាព រំលោភលើដីឡូតិ៍លំនៅដ្ឋានរបស់យើងខ្ញុំជាម្ចាស់ គឺជាប់ខាង។

តបតាមកម្មវត្ថុ÷ ដូចបានជម្រាបជូនខាងលើ សូម លោកប្រធានមន្ទីរ មេត្តាជ្រាបថា ម្ចាស់ដីឡូតិ៍ ខាងលើកំពុងសាងសង់អាគារខុនដូរលើដីរបស់ខ្លួន បានបង្កបញ្ហាលើរបងព្រំដី ជាហេតុបណ្តាលឲ្យខុស បទដ្ឋានបច្ចេកទេសសំណង់អាគារខ្ពស់ដោយពុំដឹងថាមាន ឬ ពុំមានការអនុញ្ញាតិពីអាជ្ញាធរតាមលំដាប់ថ្នាក់ ហើយ ឬ នៅ? ដោយពុំបានជូនដំណឹងមកយើងខ្ញុំអំពីគ្រោងប្លង់សាងសង់ ដែលកន្លងមកធ្វើឲ្យប្រេះស្រាំ ស្រុតជញ្ជាំងផ្ទះយើងខ្ញុំដោយកន្លែង។ ប៉ុន្តែនៅពេលបច្ចុប្បន្ននេះ ភាគីអ្នកសាងសង់ អាគារបានយករបងព្រំដី ដោយចាក់បេតុងអាមេរថាស់ជណ្តើរ និងសាងសង់ពីលើរបងព្រំដីតែម្តង ដែលអាចនឹងក្លាយទៅជាជញ្ជាំង អាគារក៏ថាបាន ដែលធ្វើឲ្យប៉ះពាល់ដល់សុវត្ថិភាព សន្តិសុខ បរិស្ថានអ្នករស់នៅជាប់ វិឡូតិ៍ភូមិផងរបង រួមជាមួយ។

ខ្ញុំបាទស្នើសុំសំណូមពរឲ្យម្ចាស់ដីឡូតិ៍ សាងសង់សំណង់ ខុនដូរ ខាងលើ ឲ្យគោរពតាមបទដ្ឋាន បច្ចេកទេសសំណង់លំនៅដ្ឋាន ដោយពុំប៉ះពាល់ដល់សុខសុវត្ថិភាពអ្នករស់នៅជុំវិញ ក៏ដូចជាប៉ះពាល់ដល់ សង្គមសាធារណៈ ដោយធ្វើការកែសម្រួលគ្រោងសំណង់ដូចខាងក្រោម៖

• កាត់បន្ថយចម្ងាយគំលាតពីជញ្ជាំងអាគារ ដែលកំពុងសាងសង់ ទៅដល់របងព្រំដីឲ្យបានជាអតិបរិមា តាមតែអាចធ្វើបាន ក្នុងន័យថា ថាស់វ៉េរ៉ង់ដារលៀនចេញពីជញ្ជាំងអាគារដែលកំពុងសាងសង់អោយខ្លីបំផុត។

២-មិនត្រូវយកប្លង់សេនៃជាន់អាគារនីមួយៗ ទៅភ្ជាប់នឹងរបងព្រំដី ធ្វើជាគ្រឿងបង្គុំសំណង់អាគារ ឡើយ ត្រូវមានគំលាតជាអតិបរិមាតាមដែលអាចធ្វើបាន។

៣-មិនត្រូវយកបេតុងថាសជណ្តើរភ្ជាប់នឹងរបងព្រំដីជាជន្ទូលទប់ទ្រ និង ជាគ្រឿងបង្គុំសំណង់ អាគារឡើយ។

៤- មិនអាចយករបងព្រំដីធ្វើជាជញ្ជាំងអាគារ ខុនដូរ ដែលកំពុងសាងសង់នេះឡើយ។

សេចក្តីដូចបានជម្រាបជូនខាងលើ សូម លោកប្រធានមន្ទីរ មេត្តាទទួលនូវពាក្យបណ្ដឹង ដោយផ្អាក
ដំណើរការក្នុងការដ្ឋាន ខុនដូរ ដើម្បីងាកមកពិភាក្សាគ្នា ឲ្យបានត្រឹមត្រូវតាមបទដ្ឋានបច្ចេកទេសសំណង់ លំនៅដ្ឋាន និងមេត្តាជួយដោះស្រាយដល់កង្វល់របស់យើងខ្ញុំដោយអនុគ្រោះ។

លោក ឡាយ ម៉ារីវ៉ូ បញ្ជាក់ថា ក្រោយពីលោកបានដាក់ពាក្យបណ្តឹងរួច។ នៅព្រឹកថ្ងៃទី១៦ ខែសីហា ឆ្នាំ២០២៤នេះ អាជ្ញាធរខណ្ឌ និងមន្ទីរជំនាញបានចុះដល់ទីតាំងដើម្បីពិនិត្យ និងបានធ្វើកំណត់ហេតុដើម្បីឱ្យបញ្ឈប់ការសាងសង់អាគារខុនដូរនោះ ដោយមានភាគីដើមបណ្តឹងចូលរួមផ្តិតមេដៃ ដោយឡែក ភាគីម្ចាស់ខុនដូរ ដែលគេដឹងថាពាក់ផ្កាយ៣លើស្មារនោះ មិនចូលរួមផ្តិតមេដៃឡើយ។

លោក ឡាយ ម៉ារីវ៉ូ ធ្វើការសំណូមពរដល់អាជ្ញាធរ និងជំនាញពាក់ព័ន្ធមេត្តាជួយអន្តរាគមន៍ និងឱ្យម្ចាស់អគារខុនដូរ ដែលសាងសង់រំលោភយ៉ាបចូលមកលើដីរបស់គាត់ចំនួន៧តឹកនោះ កាត់ចេញវិញផង ដោយសារតែរំលោភចូលលើដីរបស់គាត់ ជណ្តើរក៏រំលោភលើដីរបស់គាត់ដែរ។

ម្ចាស់ដី និងជាដើមបណ្តឹងសង្ឃឹមយ៉ាងមុតមាំថា អាជ្ញាធរខណ្ឌ រាជធានី និងមន្ទីរជំនាញពាក់ព័ន្ធនិង ជួយអននតរាគមន៍ដោះស្រាយ រកយុត្តិធម៌ដល់ពួកគាត់ជាម្ចាស់ដីដែលគេរំលោភផងទាន។

ជុំវិញពាក់ព័ន្ធទៅនឹងការប្ដឹងពីសំណាក់ពលរដ្ឋពីរអ្នកប្ដីប្រពន្ធ ដែលបានប្ដឹង លោក អ៉ឹង ដារ៉េត និងប្រពន្ធឈ្មោះ ង៉ូវ រ៉ាដែត យ៉ាងដូច្នេះ ទីភ្នាក់ងារសារព័ត៌មាន សៀមរាប ប៉ុស្តិ៍ នៅពុំទាន់ទទួលបានការបំភ្លឺពី លោក អ៉ឹង ដារ៉េត នៅឡើយទេរហូតដល់ម៉ោងផ្សាយនេះ ខណ:ទំនាក់ទំនងតាមប្រព័ន្ធតេឡេក្រាមមិនមានការឆ្លើយតប៕SRP

ខេត្តសៀមរាប៖ក្នុងនាមអាជ្ញាធរខេត្តសៀម លោក សំកុល សុចិត្រា អភិបាលរងខេត្ត បានដាក់បទបញ្ជា ដល់គណៈ បញ្ជាការឯកភាពរដ្ឋបាល ក្រុង ស្រុកធ្វើការចុះត្រួតពិនិត្យ ទប់ស្កាត់ បញ្ឈប់ជាបន្ទាន់នូវការធ្វើ ប្រតិបត្តិការ អាជីវកម្មឆ្នោត-ឡូតូ និង ឆ្នោតផ្សងសំណាងទាំងអស់នៅ ក្នុងភូមិសាស្ត្រ ខេត្តសៀមរាប។

អភិបាលរងខេត្តសៀមរាបរូបនេះបានបន្តថា សម្រាប់ក្រុមហ៊ុនប្រតិបត្តិការអាជីវកម្មឆ្នោត-ឡូតូ និងឆ្នោតផ្សងសំណា ង នៅក្នុងភូមិសាស្ត្រខេត្តសៀមរាប ដែលបានស្នើសុំប្រតិបត្តិការ អាជីវកម្មមក រដ្ឋបាលខេត្ត សៀមរាប ត្រូវអនុត្តតាមការណែនាំ លិខិតបទដ្ឋានគ តិយុត្តរបស់គណៈកម្មកា រគ្រប់គ្រង ល្បែងពាណិជ្ជកម្មកម្ពុជា តាមរយៈសេចក្តីណែនាំ របស់អគ្គលេខាធិការដ្ឋាន នៃគណៈកម្មការគ្រប់គ្រង ល្បែងពាណិជ្ជកម្ម កម្ពុជា ស្តីពីការធ្វើ អាជីវកម្ម ល្បែងផ្សងសំណាងនៅក្នុង ព្រះរាជា ណាចក្រកម្ពុជា របស់ ប្រតិបត្តិករល្បែងផ្សងសំណាង។ ក្នុងនោះរដ្ឋបាលខេត្តសៀមរាប ក៏បានដាក់នូវគោលការណ៍ណែនាំ មួយចំនួនដល់ក្រុមហ៊ុន ត្រូវអនុ វត្តតាមច្បាប់ និងលិខិតបទដ្ឋានគតិយុត្តនានា ជាពិសេស ពាក់ព័ន្ធនឹងគោលការណ៍ នីតិវិធី បែបបទ សម្រាប់ការធ្វើប្រតិបត្តិកា រអាជីវ កម្មឆ្នោត-ឡូតូ និង ឆ្នោតផ្សងសំណាង របស់គណៈកម្មការគ្រប់គ្រង ល្បែងពាណិជ្ជកម្មកម្ពុជា។

នៅក្នុងកិច្ចប្រជុំនេះផងដែរ គណៈបញ្ជាការឯកភាពរដ្ឋបាលខេត្តសៀមរាប បានណែនាំដល់រដ្ឋបាលក្រុង ស្រុក និងអាជ្ញាធរ មានសមត្ថកិច្ច ចុះតាមដានត្រួតពិនិត្យជាប្រចាំ ក្នុងការទប់ស្កាត់ និងបង្ក្រាបល្បែងស៊ីសងគ្រប់ប្រភេទ ព្រមទាំងតាមដាន ចំពោះក្រុមហ៊ុនដែលមានអាជ្ញាបណ្ណលើករណីធ្វើប្រតិបត្តិការក្រៅដែនអាជ្ញាបណ្ណ។

សូមជម្រាបថា នៅថ្ងៃទី២៦ ខែ សីហា ឆ្នាំ២០២៤ មានកិច្ចប្រជុំស្តីពីការគ្រប់គ្រងល្បែងផ្សងសំណាង និងការគ្រប់គ្រងផលប៉ះពាល់ ពីល្បែងស៊ីសងខុសច្បាប់គ្រប់ប្រភេទ នៅក្នុងភូមិសាស្ត្រខេត្តសៀមរាប ក្រោមការដឹកនាំ លោក សំកុល សុចិត្រា អភិបាលរងខេត្ត តំណាងដ៏ខ្ពង់ខ្ពស់ លោក ប្រាក់ សោភ័ណ អភិបាលខេត្តសៀមរាប។

កិច្ចប្រជុំនេះនៅរដ្ឋបាលខេត្តសៀមរាបដោយមានការចូលរួមពីនាយករងរដ្ឋបាលសាលាខេត្ត លោក ស្នងការនគរបាលខេត្ត លោក មេបញ្ជាការនៃបញ្ជាការដ្ឋានកងរាជអាវុធហត្ថខេត្ត លោក អភិបាលនៃគណៈអភិបាលក្រុង/ស្រុក លោក អធិការនគរបាលក្រុង/ស្រុក លោក មេបញ្ជាការនៃបញ្ជាការដ្ឋានកងរាជអាវុធហត្ថក្រុង/ស្រុក លោកនាយករងទីចាត់ការអន្តរវិស័យសាលាខេត្ត ព្រមទាំងក្រុមការងារជំនាញមួយចំនួនផងដែរ៕SRP

លោកកែវ រតនៈ រដ្ឋមន្ត្រីក្រសួងរ៉ែ និងថាមពលបានលេីកឡេីងថា ប្រសិនបើចង់ឱ្យការងារដែលមានហើយ ប្រាក់ខែបានច្រើនទៀតនោះ គឺធ្វេីយ៉ាងណាត្រូវឱ្យទីផ្សារយេីងរីក ឱ្យផលិតផលយេីងលក់ដាច់ និងមានគុណភាពល្អ ឋាមពលបៃតង ទីផ្សារទូលំទូលាយ ហើយចំណាយថ្លៃដើមទាប ទេីបធ្វើឱ្យប្រាក់ខែកម្មករយេីងឡើងខ្ពស់ទ្វេដង ដូច្នេះសូមឱ្យបងប្អូនចេះជួយគ្នាទៅវិញទៅមកផង។

រដ្ឋមន្ត្រីក្រសួងរ៉ែ មានប្រសាសន៍យ៉ាងដូច្នេះ ក្នុងឱកាស រួមជាមួយលោកអ៊ុន ចាន់ដា អភិបាលខេត្តកំពង់ចាម ជួបសំណេះសំណាល ជាមួយបុគ្គលិក-កម្មករ របស់ក្រុមហ៊ុន ឡុង ស្រេង (ចំការកៅស៊ូ បឹងកេត) នៅថ្ងៃអង្គារម្សិលមិញ។

លោកកែវ រតនៈ រដ្ឋមន្ត្រីក្រសួងរ៉ែ និងថាមពល បានថ្លែងថា ប្រសិនបេីចង់ឱ្យជីវភាពទូលាយ ត្រូវការ ការងារធ្វើ មិនមែនត្រូវការ ការជេរគ្នាទេ និងត្រូវការ ការជួយគ្នាទៅវិញទៅមក។

លោក កែវ រតនៈ បានសង្កត់ធ្ងន់ថា ក្រុមហ៊ុន ឡុង ស្រេង បានវិនិយោគ ផ្តល់ការងារ អតិបរមាឱ្យបងប្អូនប្រជាពលរដ្ឋយើង មានការងារធ្វើ ហើយការផ្ដល់ការងារ អតិបរមានេះ មិនមែនគ្រាន់តែ បានប្រាក់ខែមក បានផលត្រឹមតែកម្មករយើងនោះទេ ពោលគឺពេលដែលបងប្អូនបានប្រាក់ចំណូលហើយនោះ គឺបងប្អូនតែងតែយកប្រាក់ទៅទិញម្ហូបអាហារ ឬរបស់របរផ្សេងៗ ដូចជាការជួយចិញ្ចឹមគ្រួសារខ្មែរយើងជាច្រើនទៀតផងដែរ។

រដ្ឋមន្ត្រី ក៏បានយកឱកាសនោះ ដើម្បីរំលឹកគុណឧបការៈ ដែលកាត់ថ្លៃមិនបាន ទៅដល់សម្តេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា ដែលបាននាំមកនូវក្តីសុខ ផ្តល់អាយុជីវិតដល់យេីងទាំងអស់គ្នា និងថ្លែងអំណរគុណដល់ការបន្តវេនប្រកបដោយក្តីសុខ និងការរីកចម្រើន របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលប្រសូត្រចេញ ពីការបោះឆ្នោតដោយ សេរី តម្លាភាព យុត្តិធម៌។

បេីតាមលោកឧកញ៉ា ហេង ឡុង ប្រធានក្រុមហ៊ុន ឡុង ស្រេង បានឱ្យដឹងថា ក្រុមហ៊ុនមានផ្ទៃដីសរុបជិត ៧០០០ហិកតា ក្នុងនោះផ្ទៃដីចម្ការ កៅស៊ូ ជាង ៣០០០ហិកតា ផ្ទៃដីចំការចេក មានជាង ២០០០ហិកតា ផ្ទៃដីដាំធុរេនមានជាង ៥០០ហិកតា ផ្ទៃដីចម្ការតាង៉ែន ២០០ហិកតា និងផ្ទៃដីដាំក្រូចថ្លុង មាន៧០ហិកតា។ ទន្ទឹមនឹងនេះ ការនាំចេញកៅស៊ូបានប្រមាណជា ៤៥០០តោន និងចេក ៩ម៉ឺនតោន ក្នុង១ឆ្នាំ ផងដែរ៕SRP

ភ្នំពេញ៖នៅទីបំផុតតុលាការក្រុងភ្នំពេញ បានសម្រេចចោទប្រកាន់លោក គុយ វ៉ាត ថៅកែហាង Park Coffee ពីបទ មិនបំពេញកាតព្វកិច្ចចំពោះឧបករណ៍អាចជួញដូរបាន។ ការសម្រេចបើកការស៊ើបសួរនេះ បានធ្វើឡើងនៅថ្ងៃទី២៧ ខែសីហា ឆ្នាំ២០២៤។

អ្នកនាំពាក្យអយ្យការអមសាលាដំបូងរាជធានីភ្នំពេញ បានប្រាប់អ្នកសារព័ត៌មាន នៅរសៀលថ្ងៃទី២៧ ខែសីហា នេះថា “តំណាងអយ្យការសម្រេចបើកការស៊ើបសួរលោក គុយ វ៉ាត ថៅកែហាង Park Coffee ពីបទ មិនបំពេញកាតព្វកិច្ចចំពោះឧបករណ៍អាចជួញដូរបាន”។ កម្លាំងសមត្ថកិច្ចនាយកដ្ឋានព្រហ្មទណ្ឌ នៃក្រសួងមហាផ្ទៃ បានចាប់ខ្លួនលោក គុយ វ៉ាត ពាក់ព័ន្ធបទល្មើសឆបោកប្រាក់រាប់លានដុល្លារ។

គួរបញ្ជាក់ថាការចាប់ខ្លួនបានធ្វើឡើងកាលពីថ្ងៃទី២៤ ខែសីហា ឆ្នាំ២០២៤។ ការចាប់ខ្លួនបន្ទាប់ពី ជនរងគ្រោះជាច្រើននាក់បានដាក់ពាក្យប្ដឹង។

សូមជម្រាបថា លោកគុយ វ៉ាត អគ្គនាយកក្រុមហ៊ុន VTrust Group ចាប់ផ្តើមអាជីវកម្ម នៅឆ្នាំ២០០៣។ ក្រុមហ៊ុនដំបូងដែលលោកបើកដំណើរការ គឺក្រុមហ៊ុន Atech IT Solutions បន្ទាប់មកភោជនីយដ្ឋាន Park Cafe Foods and Beverages, ក្រុមហ៊ុនអចលនទ្រព្យ VTrust Property Co., Ltd រោងម៉ាស៊ីន កិនថ្ម នៅខេត្តកំពង់ស្ពឺ Kamhwa Stone Crushing និងក្រុមហ៊ុន Vtrust Appraisal Co., Ltd។ នាឆ្នាំ ២០០៨ លោកបានវិនិយោគ ទៅលើក្រុមហ៊ុនចំនួន ២បន្ថែមទៀត គឺក្រុមហ៊ុន Impact Digital Advertising និង ក្រុមហ៊ុន Phnom Penh Security Plc៕SRP