ភ្នំពេញ៖សម្តេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា បានលើកឡើងថាចាប់ពីថ្ងៃ ១រោច ខែភទ្របទស្អែកនេះ រហូតដល់ថៃ្ងទី ១៥រោច ក្នុងរយៈពេល១៥ថៃ្ង ជាឱកាសពុទ្ធបរិស័ទ ប្រារព្ធពិធី បុណ្យភ្ជុំបិណ្ឌ ដែលជាពិធីបុណ្យធំប្រចំាឆ្នាំ តាមបែបព្រះពុទ្ធសាសនា ដើម្បីឧទ្ទិសកុសលផលបុណ្យជូនដល់បុព្វការីជន មានឪពុក ម្តាយ ជីដូនជីតា បងប្អូន ញាតិសន្តានទាំងឡាយ ដែលបានចែកឋានទៅកាន់បរមលោក។

សម្តេច ហេង សំរិន បានបន្តថាក្រោមម្លប់សុខសន្តិភាព និងការអភិវឌ្ឍ បងប្អួនជនរួមជាតិ រីករាយ ជ្រះថ្លាក្នុងការធ្វើបុណ្យទាននៅតាមគ្រប់វត្តអារាមនៅទូទំាងប្រទេស។ តែសូមមានការប្រុងប្រយ័ត្នជាប់ជានិច្ច នូវវិធានការការពារជំងឺកូវីដ១៩ តាមការណែនាំរបស់ក្រសួងសុខាភិបាល។

សូមបងប្អូន កូនក្មួយទំាងអស់ កុំធ្វេសប្រហែសការពារខ្លួនពីការឆ្លងជំងឺកូវីដ១៩នេះ។ យើងអាចនឹងភ្លេចកូវីដ១៩ តែជំងឺនេះ មិនដែលភ្លេចយើងនោះទេ។ សូមបងប្អូន កូនក្មួយទំាងអស់ការពារខ្លួនជាប់ជានិច្ច កុំឲ្យជំងឺនេះឆ្លងមកលើខ្លួនយើង គ្រួសារយើង និងសហគមន៍យើង។

ម្យ៉ាងវិញទៀត សូមមានការប្រុងប្រយ័ត្ន ក្នុងការធ្វើដំណើររតាមដងផ្លូវ ចូលរូមគោរពច្បាប់ចរាចរណ៍ មានការយោគយល់ អធ្យាស្រ័យឲ្យគ្នាទៅវិញទៅនៅក្នុងការធ្វើដំណើរ។

សូមជនរួមជាតិប្រកបដោយសេចក្តីសុខ សុភមង្គល គ្រប់ក្រុមគ្រួសារ៕SRP

ខេត្តកំពង់ចាម ៖លោក អ៊ុន ចាន់ដា អភិបាលខេត្តកំពង់ចាម បានលើកឡើងថាដោយសារមានការឆ្លងរីករាលដាលជាសាកល នៃជំងឺកូវីដ១៩ ដ៏កាចសាហាវនេះ នៅមានហានិភ័យខ្ពស់ សូមឲ្យរដ្ឋបាលក្រុង ស្រុក ឃុំ សង្កាត់ បន្តយកចិត្តទុកដាក់ធ្វើការផ្សព្វផ្សាយ អប់រំណែនាំឲ្យបានជាប់ជាប្រចាំនៅតាម មូលដ្ឋានអំពីវិធានការការពារ ទប់ស្កាត់ការឆ្លងរីករាលដាលនៃជំងឺកូវ១៩ តាមការណែនាំរបស់ក្រសួងសុខាភិបាល ដើម្បីប្រយុទ្ធប្រឆាំងកុំឲ្យមានការឆ្លងក្នុងរលកទី២ ក្នុងសហគមន៍យេីង។
ការ ស្នើ ឡើង យ៉ាង ដូច្នេះ ក្នុង សិក្ខាសាលាសមាហរណកម្ម កម្មវិធីវិនិយោគបីឆ្នាំរំកិល (២០២១-២០២៣) របស់រដ្ឋបាល ស្រុក កងមាស នាព្រឹក ថ្ងៃ ទី ១ ខែកញ្ញា ឆ្នាំ ២០២០ ។

លោក អ៊ុន ចាន់ដា បាន ថ្លែង ថា សិក្ខាសាលាសមាហរណកម្ម នាពេលនេះជាសូចនាករមួយបង្ហាញពីការចូលរួមក្នុងការ អភិវឌ្ឍ តាមបែបប្រជាធិបតេយ្យរបស់រដ្ឋបាលថ្នាក់ក្រោមជាតិ។ ការវិវត្តនៃកិច្ចដំណើរការ កំណែ ទម្រង់តាមបែបប្រជាធិបតេយ្យនៅថ្នាក់ក្រោមជាតិ តាមរយៈគោលនយោបាយវិមជ្ឈការ និងវិសហមជ្ឈការ ប្រកបដោយការជឿជាក់យ៉ាងខ្លាំងចំពោះតួនាទីដ៏មានសារៈសំខាន់របស់រដ្ឋបាលថ្នាក់ក្រោមជាតិ ក្នុងការផ្តល់សេវាសាធារណៈ និងការអភិវឌ្ឍសេដ្ឋកិច្ចនៅតាមមូលដ្ឋាន សំដៅលើកកម្ពស់ជីវភាព របស់ប្រជាពលរដ្ឋ និងចូលរួមចំណែកការបន្ថយភាពក្រីក្រប្រកបដោយប្រសិទ្ធភាព។
អភិបាលខេត្តបន្តថា ផ្តើមចេញពីឆន្ទៈ និងជំនឿជឿជាក់នេះ ក្នុងអំឡុងជិត២ទសវត្សរ៍កន្លងមកនេះ រាជរដ្ឋាភិបាល បានជំរុញ និងគាំទ្រយ៉ាង សកម្មដល់ការរៀបចំ និងការអនុវត្តកម្មវិធីកំណែទម្រង់ ការអភិវឌ្ឍតាមបែបប្រជាធិបតេយ្យនៅថ្នាក់ ក្រោមជាតិ។ ក្នុងន័យនេះ រដ្ឋបាលក្រុង -ស្រុក និងរដ្ឋបាលឃុំ-សង្កាត់ បានក្លាយទៅជា រដ្ឋបាលថ្នាក់ មូលដ្ឋានដែលមានមុខងារសំខាន់ ក្នុងការផ្តល់សេវាសាធារណៈ និងកិច្ចអភិវឌ្ឍសេដ្ឋកិច្ច នៅតាមមូលដ្ឋាន ដើម្បីឆ្លើយតបទៅនឹងតម្រូវការរបស់ប្រជាពលរដ្ឋនៅក្នុងដែនសមត្ថកិច្ចរបស់ខ្លួន ដោយផ្អែកតាម ផែនការអភិវឌ្ឍរបស់រដ្ឋបាលក្រុង-ស្រុក និងឃុំ-សង្កាត់ដែលបានរៀបចំ និងអនុវត្តនូវគម្រោង ហេដ្ឋារចនាសម្ព័ន្ធដូចជា ការសាងសង់ផ្លូវលំ ស្ពាន អណ្តូងទឹក ប្រឡាយទឹក អគារសាលារៀន និង គម្រោងផ្តល់សេវាផ្សេងៗទៀតពាក់ព័ន្ធនឹងការផ្តល់សេវាសាធារណៈ ការផ្សព្វផ្សាយព័ត៌មានអំពី បញ្ហាសុខភាព និងអនាម័យតាមជនបទ ការផ្សព្វផ្សាយចំណេះដឹងអំពីបញ្ហាយេនឌ័រ ការទប់ស្កាត់ អំពើហិង្សាក្នុងគ្រួសារ ដោយប្រើប្រាស់មូលនិធិឃុំ សង្កាត់ និងធនធាន ពីប្រភពផ្សេងទៀត ដើម្បី ឆ្លើយតបទៅនឹងតម្រូវការជាអាទិភាពនានា របស់ប្រជាជននៅតាមមូលដ្ឋាន ៕SRP

ខេត្តសៀមរាប៖បុរសម្នាក់បានស្លាប់ភ្លាមៗនៅកន្លែងកើតហេតុដោយសារគ្រោះថ្នាក់ចរាចរណ៍។

ហេតុការណ៍បានកើតវេលាម៉ោង០២និង២៥នាទីរសៀលថ្ងៃទីថ្ងៃទី០១ខែកញ្ញាឆ្នាំ២០២០លេីផ្លូវ ជាតិលេខ០៦ចំណុចភូមិតាអុង ឃុំ ល្វែងឫស្សីស្រុកជីក្រែង។

សមត្ថកិច្ចបានឲ្យដឹងថាករណីនេះនៅរវាងរថយន្ត ម៉ាក ISUZUពណ៌ទឹកមាសស្លាកលេខ ភ្នំពេញ ២F២៦៣៨ ទិសដៅពីកេីតទៅលិច។ចំណែកបេីក បរម៉ូតូម៉ាកwave ពណ៌ខ្មៅពាក់ស្លាកលេខកំពត ១L៦២២៦ ទិសដៅពីលិចទៅកេីត បញ្រ្ចាសទិសគ្នា។
សមត្ថកិច្ចបានបញ្ជាក់ថាជនរងគ្រោះ អ្នកបើកម៉ូតូឈ្មោះ យឿន រ័ត្ន អាយុ៣២ឆ្នាំ មានទីលំនៅ ភូមិប្រាសាទ ឃុំព្រៃប្រស់ ស្រុកកំពង់ស្វាយ ខេត្តកំពង់ធំ។ ដោយឡែកអ្នកបេីកបរ រថយន្តគេចខ្លួនបាត់។

ក្រោយកើតហេតុសមត្ថកិច្ចបានយក រថយន្តនិងម៉ូតូ ទៅរក្សាទុកនៅប៉ុស្តិ៍នគរបាលឃុំល្វែងឫស្សី ដើម្បីស្រាវជ្រាវរកម្ចាស់រថយន្តមកដោះស្រាយ។

ទោះយ៉ាងណាសមត្ថកិច្ចមិនទាន់បញ្ជាក់លម្អិតអំពីមូលហេតុករណីគ្រោះថ្នាក់ចរាចណ៍នេះនៅឡើយទេ៕SRP

ខេត្តកំពង់ធំ៖ក្រុមការងារចល័តរបស់ក្រសួង ដឹកនាំដោយលោកប្រធានលេខាធិការដ្ឋាន នៃគណៈកម្មាធិការសម្របសម្រួលអចិន្ត្រៃយ៍ នៃគណៈកម្មាធិការដឹកនាំត្រួតពិនិត្យយានយន្តលើសទម្ងន់កម្រិតកំណត់ សហការជាមួយប្រធានមន្ទីរសាធារណការ និងដឹកជញ្ជូនខេត្តកំពង់ធំ និងប្រធានស្ថានីយជញ្ជីងប្រាសាទ ស្ថានីយថ្នលកែង និងស្ថានីយខែលជ័យ

នៅថ្ងៃច័ន្ទ ទី៣១ ខែសីហា ឆ្នាំ២០២០ នៅវេលាម៉ោង ៦ល្ងាច បានចុះត្រួតពិនិត្យយានយន្តដឹកជញ្ជូន នៅឃុំបឹងល្វា ស្រុកសន្ទុក ខេត្តកំពង់ធំ ត្រួតពិនិត្យ ១០គ្រឿង និងឃាត់បានរថយន្តដឹកលើសទម្ងន់ចំនួន ៨គ្រឿង ដែលដឹកលើសទម្ងន់ចាប់ពី ១២តោន ដល់ ២៧តោន។

ក្នុងនោះរថយន្ត ៤គ្រឿងដែលដឹកលើសទម្ងន់កម្រិតកំណត់ចាប់ពី ២០តោនឡើងទៅ នឹងត្រូវរក្សាទុក និងដោះស្រាយដោយអនុលោមតាមច្បាប់ផ្លូវថ្នល់មាត្រា ៦០។

សូមបងប្អូនម្ចាស់អាជីវករ ម្ចាស់រថយន្តដឹកទំនិញ និងបងប្អូនប្រជាពលរដ្ឋទាំងអស់មេត្តាជ្រាបថា ការដឹកជញ្ជូនលើសទម្ងន់កម្រិតកំណត់បានបង្កមហន្តរាយដល់ផ្លូវជាតិ និងគ្រោះថ្នាក់ចរាចរណ៍ធ្ងន់ធ្ងរ ៕SRP

ខេត្តកំពង់ចាម ៖លោក ស្រី សម ផល្លា ប្រធាន មន្ទីរ ព័ត៌មាន ខេត្ត កំពង់ចាម បាន ស្នើ ដល់ ក្រុម អ្នក សារព័ត៌មាន ទាំង វិស័យ ឯកជន និង ស្ថាប័ន រដ្ឋ នៅ ក្នុង ខេត្តកំពង់ចាម រួម សហការ គ្នា ដេីម្បី ធ្វើ ការ ប្រឆាំង ទប់ស្កាត់ រាល់ ព័ត៌មាន ក្លែងក្លាយ ពី គ្រប់ មជ្ឈដ្ឋាន ដែល ក្រុម ជ្រុល និយម មួយ ចំនួន បាន ឆ្លៀត ឱកាស បំពុល សង្គម ឲ្យ ធ្លាក់ ក្នុង សភាព វឹកវរ ។

ការ ស្នើ ឡើង យ៉ាង ដូច្នេះ ក្នុង កិច្ច ប្រជុំ រវាង អ្នក សារព័ត៌មាន មក ពី ស្ថាប័ន ឯកជន និង រដ្ឋ ប្រមាណ ជាង ២០នាក់ កាល ពី រសៀល ថ្ងៃ ទី ៣១ ខែសីហា ឆ្នាំ ២០២០ នៅ មន្ទីរ ព័ត៌មាន ខេត្ត កំពង់ចាម ។

ក្នុង កិច្ច ប្រជុំ នោះ ដែរ លោក ស្រី សម ផល្លា ប្រធាន មន្ទីរ ព័ត៌មាន បាន ធ្វើ ការ ណែនាំ ដល់ អ្នក សារព័ត៌មាន ទាំង អស់ អោយគោរពតាមក្រមសីលធម៌វិជ្ជាជីវៈជាអ្នកសារព័ត៌មាន ដេីម្បី នាំ យកដំណឹង ពី មហាជន ជូនដល់ថ្នាក់ដឹកនាំរាជរដ្ឋាភិបាល និង នាំ យក ដំណឹង ពី រាជរដ្ឋាភិបាល ជូនទៅមហាជនវិញ ប្រកប ដោយ និរន្តភាព ដើម្បីឆ្លើយតបទៅនឹងតម្រូវការបច្ចុប្បន្ន និងអនាគតរបស់ភាគីពាក់ព័ន្ធទាំងអស់។

លោកស្រី ប្រធាន មន្ទីរ បាន បញ្ជាក់ ថា កិច្ច ប្រជុំ នេះ បាន ធ្វើ ឡើង ក្នុង គោលបំណង ដើម្បី បង្កើន ភាព ទំនាក់ទំនង ជិតស្និទ្ធ និង ស្វែងយល់ ពី គ្នា ទៅ វិញ ទៅមក រវាង បងប្អូនជា អ្នក សារព័ត៌មាន វិស័យ ឯកជន និង ស្ថាប័ន រដ្ឋ ធ្វើ យ៉ាងណា យេីង ត្រូវ រួម សហការ គ្នា ហើយ ចងក្រង ជា ក្រុម ដេីម្បី រួមចំណែក បម្រើ វិស័យ ព័ត៌មាន ក្នុង ខេត្តកំពង់ចាម ជាមួយគ្នា អោយកាន់តែមានការរីកចម្រើនទៅមុខទាំងអស់ គ្នា ពោល គឺ ត្រូវ ស្គាល់ ពី ទុក្ខ លំបាក និង ត្រូវ ចេះ ជួយ គ្នា គ្រា ដែលមាន អាសន្ន ។

លោកស្រី ក៏បាន អនុញ្ញាត អោយបង្កើតហ្គ្រុបTelegram ដេីម្បី ងាយស្រួល ក្នុង ការ ទំនាក់ទំនង គ្នា ជា ពិសេស ការ ចែករំលែក ដោះដូរ ព័ត៌មាន គ្នា ទៅវិញ ទៅ មក ក៏ដូចជា ការ ចែករំលែក បទពិសោធន៍ ប្រកប ដោយ ភាព ស្និទ្ធស្នាល ផង ដែរ ៕SRP

ខេត្តសៀមរាប៖អាជ្ញាធរខេត្តសៀមរាបបានអះអាងថាជារៀងរាល់ឆ្នាំរដ្ឋបាលខេត្តសៀមរាបតែងតែបានរៀបចំពិធីកាន់បិណ្ឌ-ភ្ជុំបិណ្ឌ​ នៅតាមទីវត្តអារាមចំនួន ៧វត្ត ដើម្បីធ្វើជាគំរូ និងជាបង្ហាញដល់មន្ត្រីរាជការ និងពុទ្ធសាសនិកជនទាំងអស់ បានយល់ដឹង ចូលរួមប្រតិបត្តិ និងចូលរួមអភិវឌ្ឍ វិស័យព្រះពុទ្ធសាសនាអោយខ្ជាប់ខ្ជួន និងកាន់តែមានភាពរុងរឿងទុកជាកេរដំណែលដល់កូនចៅទៅថ្ងៃអនាគត។
សូមបញ្ជាក់ថាលោក​ ពិន​ ប្រាកដ​ អភិបាលរងខេត្ត​ នៅថ្ងៃច័ន្ទ ៣កេីត​ ខែភទ្របទ​ ឆ្នាំជូត​ ទោស័ក​ ព.ស​ ២៥៦៤​ ត្រូវនឹងថ្ងៃទី៣១​ ខែសីហា​ ឆ្នាំ២០២០​ បានដឹកនាំកិច្ចប្រជុំត្រៀមរៀបចំពិធីបុណ្យកាន់បិណ្ឌ-ភ្ជុំបិណ្ឌ របស់រដ្ឋបាលខេត្តសៀមរាប ដោយមានការចូលរួមពីមន្ត្រីជុំវិញខេត្តផងដែរ។បើតាមអាជ្ញាធរខេត្តសៀមរាបថាឆ្នាំ២០២០នេះ ពិធីបុណ្យកាន់បិណ្ឌ-ភ្ជុំ បិណ្ឌ ប្រារព្ធឡើងចាប់ពីថ្ងៃ០១រោច ខែភទ្របទ ដល់ថ្ងៃ១៥រោច ខែភទ្របទ ឆ្នាំជូត ទោស័កព.ស២៥៦៤ ត្រូវនឹងចាប់ពីថ្ងៃពុធ ទី០៣ ខែកញ្ញាដល់ថ្ងៃទី១៧ ខែកញ្ញា ឆ្នាំ២០២០​៕SRP

ខេត្តសៀមរាប៖ជនជាតិបរទេសចំនួនពីរនាក់ត្រូវបានកម្លាំងការិយាល័យស៊ើបអង្កេតនិងអនុវត្តនីតិវិធី សហការជាមួយកម្លាំងប៉ុស្តិ៍នគរបាលរដ្ឋបាលសង្កាត់ស្វាយដង្គំឃាត់ខ្លួន នៅវេលាម៉ោង ០៩និង៣០នាទីព្រឹកថ្ងៃទី៣១ ខែសីហា ឆ្នាំ២០២០ចំណុចបន្ទប់ជួល ស្ថិតនៅភូមិ ស្វាយព្រៃ សង្កាត់ស្វាយដង្គំ ក្រុងសៀមរាប។ នគរបាលបានដឹងថាជនបរទេសទាំងពីរនាក់ ពាក់ព័ន្ធករណីស្នាក់នៅខុសច្បាប់(គ្មានលិខិតឆ្លងដែន)។
ជនបរទេសទាំងពីរនាក់នេះមានឈ្មោះ ៖

១-VOLODYMYR BEHAL ភេទប្រុស កើតឆ្នាំ១៩៨៤ ជនជាតិ អ៊ុយក្រែន គ្មានលិខិតឆ្លងដែនជាប់ខ្លួន មុខរបរ បម្រើការងារតាមប្រព័ន្ធអុិនធើណិត ចូលមកព្រះរាជាណាចក្រកម្ពុជា កាលពីឆ្នាំ២០១៧ តាមច្រកទ្វារព្រំដែនអន្តរជាតិប៉ោយប៉ែត ស្នាក់នៅខេត្តព្រះសីហនុ។នៅថ្ងៃទី ០៧-០៦-២០១៩ ត្រូវបានសាលាដំបូងរាជធានីភ្នំពេញសម្រេចឃុំខ្លួនបណ្តោះអាសន្ននៅពន្ធនាគារព្រៃស នឹងសម្រេចផ្តន្ទាទោសដាក់ពន្ធនាគារកំណត់ចំនួន ០១ឆ្នាំ ពីបទ អំពើលួចនិងចូលមកព្រះរាជាណាចក្រកម្ពុជាដោយគ្មានការអនុញ្ញាតិ។ក្រោយពីអនុវត្តទោសចប់ បានធ្វើដំណើរទៅកាន់ខេត្តព្រះសីហនុដើម្បីរកលិខិតឆ្លងដែន តែរកមិនឃើញ រហូតដល់ថ្ងៃទី០១-០៨-២០២០ ក៍ធ្វើដំណើរមកកាន់ខេត្តសៀមរាបតែម្តង។

២-SERGY PODOSYN ភេទប្រុស កើតថ្ងៃទី២៧-១២-១៩៦២ ជនជាតិរុស្សុី គ្មានលិខិតឆ្លងដែនជាប់ខ្លួន គ្មានមុខរបរ ចូលមកព្រះរាជាណាចក្រកម្ពុជាកាលពីឆ្នាំ២០១៧ តាមច្រកមិនចាំ ដោយធ្វើដំណើរពីប្រទេសថៃ មកស្នាក់នៅខេត្តព្រះសីហនុ រហូតដល់ខែមិថុនា ឆ្នាំ២០២០ ក៏បានផ្លាស់មកស្នាក់នៅខេត្តសៀមរាប។កាលពីខែកក្កដា ឆ្នាំ២០២០ បានប្រគល់លិខិតឆ្លងដែនឲ្យទៅបុរសជនជាតិខ្មែរម្នាក់មិនស្គាល់ឈ្មោះ យកទៅបន្តសុពលភាពទិដ្ឋាការស្នាក់នៅ ប៉ុន្តែរហូតមកដល់ពេលនេះពុំទាន់ទទួលបានលិខិតឆ្លងដែនវិញទេ ហើយក៏មិនអាចទំនាក់ទំនងទៅបុរសនោះបានដែរ។បញ្ជូនទៅស្នាក់ការត្រៀមបណ្តេញចេញចាត់ការបន្តតាមនីតិវិធី៕SRP