សម្ដចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ មានប្រសាសន៍ថា កាលណាប្រទេសមានសង្គ្រាមហើយ អ្នកដែលគ្រោះថ្នាក់មុនគេគឺប្រជាពលរដ្ឋ ដូច្នេះប្រជាពលរដ្ឋត្រូវការពារសន្ដិភាពឲ្យបាន ព្រោះសន្ដិភាព មានតម្លៃណាស់។

សម្ដេចក្រឡាហោម ស ខេង មានប្រសាសន៍បែបនេះ ក្នុងឱកាសអញ្ជើញជាអធិបតីដ៏ខ្ពង់ខ្ពស់សម្ពោធដាក់ឲ្យប្រើប្រាស់ ស្ពានដែកបេឡេតិ៍ ចំនួន ០១ខ្សែ ប្រវែង១២៦ម៉ែត្រ និងអគារសិក្សា ចំនួន ២ខ្នង នៅក្នុងសាលាបឋមសិក្សាស្វាយព្រៃ និងអនុវិទ្យាល័យកន្ទឺ១ ស្រុកបាណន់ ខេត្តបាត់ដំបង នាថ្ងៃទី១៩ ខែសីហា ឆ្នាំ២០២០។

សម្ដេចក្រឡាហោម រំលឹកថា សន្ដិភាព គឺជាសេចក្ដីត្រូវការចាំបាច់ ដោយមិនអាចខ្វះបាន ខណៈសន្ដិភាពបង្កលក្ខណៈឲ្យមានការអភិវឌ្ឍ។ ហើយប្រជាពលរដ្ឋត្រូវការពារ សន្ដិភាពឲ្យបាន ព្រោះសន្ដិភាពមានតម្លៃណាស់ សម្រាប់ប្រជាពលរដ្ឋខ្មែរទាំងមូល។

សម្ដេចក្រឡាហោម មានប្រសាសន៍ថា «កាលណាមានសង្គ្រាម អ្នកដែលមានគ្រោះថ្នាក់ជាងគេ គឺប្រជាពលរដ្ឋ ប្រទេសណាក៏ដោយ ស្រុកណាក៏ដោយ អ្នកដែលគ្រោះថ្នាក់បាត់បង់ជីវិតរងគ្រោះមុនគេ គឺប្រជាពលរដ្ឋ ទោះបីប្រទេសគោរពសិទ្ធិមនុស្សក៏ដោយ នៅពេលសង្គ្រាមកើតឡើង គឺប្រើគ្រប់មធ្យោបាយ ដើម្បីយកឈ្នះសង្គ្រាម។ ដូច្នេះមិនគិតថា រំលោភសិទ្ធិមនុស្ស ឬមិនរំលោភទេ? បាញ់គឺបាញ់ហើយ»។

សម្ដេចក្រឡាហោម បន្ដថា សព្វថ្ងៃនេះរាជរដ្ឋាភិបាលកម្ពុជា ទោះបីនៅក្នុងតម្លៃណាក៏ដោយ គឺត្រូវរក្សាសន្ដិភាពឲ្យបាន ចង់និយាយបានថា «ដើម្បីសន្ដិភាព យើងហ៊ានចំណាយ ហ៊ានលះបង់ ដើម្បីរក្សាសន្ដិភាព»។ សម្ដេចក្រឡាហោម បន្តទៀតថា ដូច្នេះប្រជាពលរដ្ឋខ្មែរត្រូវរួបរួមគ្នាការពារសន្ដិភាព ព្រោះមានសន្ដិភាពទើបអាចកសាងប្រទេសបានដោយងាយស្រួល បើគ្មានសន្ដិភាព មិនអាចកសាងប្រទេសជាតិបានឡើយ។

ជាងនេះទៅទៀត សម្តេច បានលើកឡើងថា រាជរដ្ឋាភិបាលមួយខ្លាំងបាន រដ្ឋាភិបាលនោះ អាស្រ័យដោយប្រជាពលរដ្ឋគាំទ្រ បើរដ្ឋាភិបាលគ្មានប្រជាពលរដ្ឋគាំទ្រ រដ្ឋាភិបាលនោះ មិនខ្លាំងទេ។ សម្ដេចថា ក្នុងបរិបទនេះ កម្ពុជាប្រកាន់យករបបប្រជាធិតេយ្យសេរីពហុបក្ស ដើម្បីគាំទ្រកម្មវិធីនយោបាយ រដ្ឋាភិបាលរបស់គណបក្សខ្លួន ដូច្នេះ ការខិតខំដើម្បីកសាងអំពើល្អជាមួយប្រជាពលរដ្ឋ និងការជួយដោះស្រាយបញ្ហា សុខទុក្ខរបស់ប្រជាពលរដ្ឋ គឺជាកិច្ចដ៏ចំបង និងសំខាន់បំផុត ឬក៏អាចនិយាយថា ការកសាងប្រព័ន្ធយុត្តិធម៌ ដើម្បីធ្វើឲ្យស្រុកទេសមានស្ថេរភាពយូរអង្វែង៕SRP

ខេត្តសៀមរាប៖មនុស្សម្នាក់បានស្លាប់និងពីរនាក់ទៀតបានរងបួសធ្ងន់ស្រាលករណីគ្រោះថ្នាក់ចរាចរណ៍រវាងម៉ូតូនិងម៉ូតូ។

ហេតុការណ៍បានកើតឡើងនៅថ្ងៃទី១៨ខែសីហា ឆ្នាំ២០២០
ម៉ោង២០និង២០នាទី ចំណុចផ្លូវជាតិលេខ៦ចំណុចគីឡូម៉ែត្រលេខ327_328ភូមិពួកចាស់ ឃុំពួក ស្រុកពួក ខេត្តសៀមរាប។

ម៉ូតូទីមួយម៉ាក ហុងដាក្លិច ពណ៌ស្លែ ផលិតឆ្នាំ2019ពាក់ស្លាកលេខលេខសៀមរាប1AC30 68 បើកបរដោយឈ្មោះយៀម យ៉េង ភេទប្រុសអាយុ34ឆ្នាំ(មានមួកសុវត្ថិភាព) នៅភូមិតាទក ឃុំពួក ស្រុកពួក ខេត្តសៀមរាប រងរបួសធ្ងន់ ដឹកឈ្មោះវ៉ង់ សីហា ភេទប្រុស អាយុ32ឆ្នាំ (អត់មួកសុវត្ថិភាព)នៅភូមិជាមួយគ្នា របួសស្រាល បើកបរទិសដៅពីត្បូងបត់ទៅលិចបានបុកជាមួយម៉ូតូម៉ាហុងដាឌ្រីមផលិតឆ្នាំ2015 ពណ៌ខ្មៅពាក់ស្លាកលេខបន្ទាយមានជ័យ1K5824 បើកបរដោយឈ្មោះង៉ែ ប៊ុនធឿន ភេទប្រុស អាយុ៥០ឆ្នាំនៅភូមិគោកត្រាច ឃុំខ្នាត ស្រុកពួក ខេត្តសៀមរាប (អត់មួកសុវត្ថិភាព ស្លាប់បើកបរទិសដៅពីលិចទៅកើត។ម៉ូតូខូចខាតទាំង២គ្រឿងធ្ងន់។

បើតាមសមត្ថកិច្ចថមូលហេតុអ្នកបើកបរម៉ូតូម៉ាកហុងដាក្លិចបើកបរចេញពីផ្លូវតូចខ្វះការប្រុងប្រយ័ត្ន។ ក្រោយពេលកើតហេតុកម្លាំងជំនាញបានចុះវាស់វែងនិងយកជនរងគ្រោះទៅសង្គ្រោះនៅមន្ទីរពេទ្យ។សាកសពប្រគល់ជូនគ្រួសារ យកទៅធ្វើបុណ្យតាមប្រពៃណី។ចំណែកវត្ថុតាងរក្សាទុកនៅអធិការដ្ឋាននគរបាលស្រុកដើម្បីចាត់ការតាមនិតិវិធី៕SRP

ខេត្តសៀមរាប៖នគរបាលក្រុងសៀមរាបបានបំបែកសំណុំរឿងករណីឃាតកម្មវាយសម្លាប់បងថ្លៃរបស់ខ្លួន កាលពីជាង ១ឆ្នាំមុន ក្រោយរត់ទៅសម្ងំលាក់ខ្លួននៅខេត្តពោធិ៍សាត់។ ការចាប់ខ្លួននេះ ធ្វើឡើងកាលថ្ងៃទី១៦ខែសីហា នៅក្នុងភូមិស្ទឹងថ្មី ឃុំប្រម៉ោយ ស្រុកវាលវែង ខេត្តពោធិ៍សាត់ នឹងនាំយកមកស្នងការដ្ឋាននគរបាលខេត្តសៀមរាប ដើម្បីយកទៅធ្វើត្រាប់។

របាយការណ៍របស់ប៉ូលិសក្រុងសៀមរាបបង្ហាញថា កាលពីថ្ងៃទី១៥ ខែកក្កដា ឆ្នាំ២០១៩ មានស្ត្រីឈ្មោះសុគុណ វីឡា អាយុ៣៩ឆ្នាំរស់នៅភូមិតាគង់ សង្កាត់សំបួរ ក្រុងសៀមរាប បានមករាយការណ៍ថា ខ្លួនបានបាត់ប្តីឈ្មោះញ៉ាង វណ្ណនី អាយុ៤៣ឆ្នាំ តាំងពីខែឧសភា ឆ្នាំ២០១៩ ដោយមិនដឹងជាទៅទីណា។ក្រោយពីទទួលដំណឹងកម្លាំងនគរបាលក្រុងសៀមរាប ក៏បានជួយ ស្រាវជ្រាវ និងប្រកាសស្វែងរក ។ លុះដល់នៅថ្ងៃទី១៦ ខែកញ្ញា ឆ្នាំ២០១៩ លោកនាយប៉ុស្តិ៍សង្កាត់សំបួររាយការណ៍ថា នៅភូមិតាគង់ សង្កាត់សំបួរ ក្រុងសៀមរាប មានធុំក្លិនស្អុយចេញពីពំនូកដីនៅរោងផ្ទះបាយ ឈ្មោះ ញ៉ាង វណ្ណនី(ស្ត្រីបាត់ប្តី)។ ករណីនេះលោកវរសេនីយ៍ទោនួន ស័ក្តិចំរើនរិទ្ធ អធិការរង បានដឹកនាំកម្លាំង ចុះដល់កន្លែងកើតហេតុ នឹងបានជីកគាស់ ទើបដឹងថាជាសាកសពរបស់មនុស្ស។

របាយការណ៍បង្ហាញទៀតថា ក្រោយពេលធ្វើកោសល្យពិច័យទើបដឹងថា សាកសព មនុស្សស្លាប់ ដោយអំពើឃាតកម្ម ដែលជនរងគ្រោះឈ្មោះញ៉ាង វណ្ណនី ភេទប្រុស អាយុ៤៣ឆ្នាំ ជាប្តីរបស់ឈ្មោះសុគុណ វីឡា ដែលបានបាត់ខ្លួនក្នុងកំឡុងខែឧសភា ឆ្នាំ២០១៩ កន្លងទៅ ។

របាយការណ៍បានបញ្ជាក់ទៀតថាបានបើកការស្រាវជ្រាវ នឹងបំភ្លឺសាក្សីនៅជុំវិញកន្លែងកើតហេតុ និងបានកំណត់មុខសញ្ញាជនសង្ស័យ គឺមានឈ្មោះសុគុណ ច័ន្ទតារា ភេទប្រុស អាយុ៣២ឆ្នាំ ដែលត្រូវជាប្អូនបង្កើតរបស់ឈ្មោះសុគុណ វីឡា នឹងត្រូវជាប្អូនថ្លៃជនរងគ្រោះ ។

របាយការណ៍បានបញ្ជាក់បន្ថែមថានៅចំពោះមុខសមត្ថកិច្ចជនសង្ស័យខាងលើបានឆ្លើយសារភាពថា ខ្លួនពិតជាបានវាយសម្លាប់ ជនរងគ្រោះឈ្មោះញ៉ាង វណ្ណនី នឹងចបកាប់ ចំលលាដ៍ក្បាល ចំនួន២កន្លែង វាយដៃអោយបាក់ រួចអូសយកសពទៅកប់នៅផ្ទះខាងក្រោយផ្ទះពិតមែន។ មូលហេតុ មានទំនាស់ពេលផឹកស៉ី បណ្តាលអោយក្លាយជាគំនុំ។ជនសង្ស័យ ត្រូវបាន បញ្ជូនទៅតុលាការ នៅថ្ងៃទី១៧ ខែសីហាឆ្នាំ២០២០ និងត្រូវបានតុលាការសំរេចឃុំខ្លួនតាមដីកាលេខ១០៦៦/២០២០៕ SRP

ខេត្តសៀមរាប៖ក្មេងទំនើងចំនួន៧នាក់ត្រូវបានឃាត់ខ្លួន ក្រោយធ្វើសកម្មភាពដកសោរម៉ូតូរបស់នារីៗមិនអោយទៅណា និងបង្ករហិង្សាបណ្ដាលអោយបាត់បង់សណ្ដាប់ធ្នាប់សាធារណក្នុងថ្ងៃឈប់សម្រាក។

សមត្ថកិច្ចបានឲ្យដឹងថាក្មេងទំនើងទាំង ៧នាក់៖
ទី១.ឈ្មោះសាន ភ័ក្ត្រ ភេទប្រុស អាយុ ២០ឆ្នាំ មុខរបរកម្មករសំណង់ រស់នៅភូមិតាកម្ម ឃុំដួនកែវ ស្រុកពួក ខេត្តសៀមរាប ,
ទី២.ឈ្មោះយួន វិចិត្រ ភេទប្រុសអាយុ ១៨ឆ្នាំ មុខរបរកម្មករ រស់នៅភូមិល្វា ឃុំ ដួនទ្រ ស្រុកពួក ខេត្តសៀមរាប
ទី៣.ឈ្មោះ ថាម សុធឿង ភេទប្រុស អាយុ ១៦ឆ្នាំ មុខរបរ នៅផ្ទះរស់នៅ ភូមិ តាកម្ម ឃុំដូនកែវ ស្រុកពួក ខេត្តសៀមរាប,
ទី៤.ឈ្មោះ លឿត លីម ភេទប្រុសអាយុ ១៨ឆ្នាំ មុខរបរកម្មករ រស់នៅភូមិព្រលិត ឃុំរើល ស្រុកពួកខេត្តសៀមរាប ,
ទី៥.ឈ្មោះ ថុន សារុន ភេទ ប្រុស អាយុ ១៨ឆ្នាំមុខរបរនៅផ្ទះរស់នៅភូមិតាកម្ម ឃុំ ដូនកែវ ស្រុកពួក ខេត្តសៀមរាប,
ទី៦. ហាំង ឆ្លូញ ភេទ ប្រុសអាយុ២០ឆ្នាំ មុខរបរ នៅផ្ទះ រស់នៅភូមិតាកម្ម ឃុំ ដូនកែវ ស្រុកពួក ខេត្តសៀមរាប,
ទី៧.ឈ្មោះ រោច រំ ភេទ ប្រុស អាយុ ១៦ឆ្នាំមុខរបរកម្មករ រស់នៅភូមិតាកម្ម ឃុំដូនកែវ ស្រុកពួក ខេត្តសៀមរាប។
ការឃាត់ខ្លួនធ្វើនៅថ្ងៃទី១៧ខែសីហាឆ្នាំ២០២០វេលាម៉ោង១៦និង៤០នាទី នៅភូមិសាស្រ្តបារាយណ៍ទឹកថ្លា ក្នុងសង្កាត់ទឹកថ្លា ក្រុងសៀមរាប។

បើតាមរបាយការណ៍
ក្រុមក្មេងទំនើងបានសារភាពថា ក្រុមរូបខ្លួនមានគ្នា ៧នាក់បានផឹកសុីនៅបារាយណ៍ខាងលិច ម្ដុំជិតជណ្ដើរយក្ស តាំងពីវេលាម៉ោង ១២ថ្ងៃត្រង់ លុះរហូតដល់ ប្រហែលម៉ោង០៤រសៀលបានឃើញក្មេងស្រីៗ ចំនួន៤នាក់ដែលជិះមកលេងបារាយណ៍ដែរ ក៏ធ្វើសកម្មភាពកាក់ម៉ូតូ និងដកសោរម៉ូតូរបស់នារីៗ ក្នុងគោលបំណងសុំលេខទូរស័ព្ទ និងញ៉ែ ខណ:ពេលនោះ មានមនុស្សប្រុស១ក្រុម ប្រហែល ១០នាក់ជាង សុទ្ធតែប្រុសអាយុ ប្រហែល ៣០ បានជិះពីទិសខាងត្បូងមកឈប់ពីមុខហើយស្រែកថា ផឹកសុីស្រែកឡូរឡារ រករឿងគេ ពេលនោះជន១ក្រុមនោះក៏ធ្វើសកម្មភាព យកមួកការពារ វាយពួករូបខ្លួន ហើយពួករូបខ្លួន ក៏ដកខ្សែរក្រវ៉ាត់ វាយទៅវិញ មួយសន្ទុះក្រុមម្ខាងទៀតបានរត់គេចខ្លួនអស់។

សមត្ថកិច្ចថាករណីនេះបានសហការណ៍ជាមួយជំនាញប្រឆាំងគ្រឿងញៀនក្រុង ធ្វើតេស្ដរកសារធាតុញៀន ជាលទ្ធិផល មិនមានសារធាតុញៀននោះទេ ដោយនធ្វើការអប់រំ កិច្ចសន្យា និង អោយ អាណាព្យាបាល ធានាយកទៅផ្ទះវិញ៕ SRP

ខេត្តព្រៃវែង៖លោក នេត នឿន មេឃុំរកានិងនគរបាលប៉ុស្តិ៍ ក្រុមប្រឹក្សាឃុំ អាជ្ញាធរភូមិ ប្រជាកាពារនៅថ្ងៃទី១៧ខែសីហាម្សិលមិញ ចុះធ្វើវេទិកាសារធារណៈ នៅភូមិស្នាយពល ឃុំរកា ស្រុកពារាំង ខេត្តព្រៃវែង ដើម្បីផ្សព្វផ្សាយពីគោលនយោបាយភូមិ-ឃុំមាន សុវត្ថិភាព ជូនដល់ប្រជាពលរដ្ឋក្នុងមូលដ្ឋាន។

នៅក្នុងវេទិកានេះ អាជ្ញាធរបានលើកយកលក្ខណៈសម្បត្តិទាំង៩យ៉ាង ស្តីពីគោលនយោបាយភូមិ-ឃុំមានសុវត្ថិភាពរបស់រាជរដ្ឋាភិបាលកម្ពុជាមកផ្សព្វផ្សាយដែលមានដូចជា៖ ផលប៉ះពាល់ដោយសារគ្រឿងញៀន, ល្បែងស៊ីសង, ច្បាប់ចរាចរណ៍, អំពីហិង្សាក្នុងគ្រួសារ, បទល្មើសនេសាទខុសច្បាប់, ក្មេងទំនើង, ផលប៉ះពាល់ដោយសារគ្រាប់យុទ្ធភណ្ឌមិនទាន់ផ្ទុះ អំពើចោរកម្មគ្រប់ប្រភេទនិងផ្សព្វផ្សាយការរីករាលដាលឆ្លងនៃជំងឺកូវីដ១៩ផងដែរ។

លោក នេត នឿន បានណែនាំប្រជាពលរដ្ឋ ទាំងអស់ មានការសហការជាមួយអាជ្ញាធរភូមិ ឃុំ បើសិន ជាមានអ្នកចំណាកស្រុកវិលត្រឡប់មកវិញ ត្រូវរាយការណ៍ មកអាជ្ញាធរជាបន្ទាន់ ដើម្បីដាក់អោយពួកគាត់នៅដាច់ដោយឡែកចំនួន១៤ថ្ងៃ ជាពិសេស(ត្រូវលាងដៃនិងពាក់ម៉ាស់)ជាដើម៕ SRP

ខេត្តកំពង់ចាម៖នាឱកាសឈប់សម្រាកសងថ្ងៃចូលឆ្នាំថ្មីប្រពៃណីជាតិ រយៈពេល ៧ថ្ងៃ គិតចាប់ពីថ្ងៃទី១៧ ដល់ថ្ងៃទី២៣ ខែសីហា ឆ្នាំ២០២០នេះ លោក អ៊ុន ចាន់ដា ប្រធានគណៈកម្មាធិការសាខា បានចាត់ឲ្យ លោក ទូច ឆៃ នាយកប្រតិបត្តិសាខា ដឹកនាំក្រុមប្រតិបត្តិសាខា អនុសាខា និងយុវជនកាកបាទក្រហមកម្ពុជា សហការជាមួយ កម្លាំង នគរបាលចរាចរណ៍ផ្លូវគោក នៅចំណុចកែងភ្លើងស្តុប ទាំង៤កន្លែង ក្នុងក្រុងកំពង់ចាម ដើម្បីធ្វើយុទ្ធនាការអប់រំផ្សព្វផ្សាយ អំពីសុវត្ថិភាពចរាចរណ៍ផ្លូវគោក ក៏ដូចជា ការអប់រំសុខភាព ពាក់ព័ន្ធទៅនឹងការទប់ស្កាត់ហានិភ័យ នៃការឆ្លងជម្ងឺកូវីដ១៩ ជម្ងឺគ្រុនឈីក និងជម្ងឺគ្រុនឈាម ផងដែរ ។

ដោយ នៅតាមគោលដៅស្តុបនីមួយៗ សាខាបានប្រើប្រាស់កម្លាំងយុវជនស្ម័គ្រចិត្ត កាកបាទក្រហមកម្ពុជា ចំនួន ៨នាក់ ទីប្រឹក្សាយុវជន ២នាក់ មន្ត្រីក្រុមប្រតិបត្តិសាខា ២នាក់ និងនគរបាលចរាចរណ៍ផ្លូវគោក ៤នាក់សរុបទាំង ៤គោលដៅស្តុប មានចំនួន៥៤នាក់។

ក្នុង នោះ ក្រុមការងារតាមគោលដៅស្តុបនីមួយៗ បានធ្វើការអប់រំផ្សព្វផ្សាយដល់អ្នកបើកបររថយន្ត ម៉ូតូ និងអ្នកធ្វើដំណើរទាំងឡាយ ខិតខំគោរពអោយបានម៉ឹងម៉ាត់នូវច្បាប់ស្តីពីចរាចរណ៍ផ្លូវគោក ត្រូវពាក់ខ្សែក្រវ៉ាត់សុវត្ថិភាព និងមួកសុវត្ថិភាព កុំបើកបរហួសល្បឿនកំណត់ ត្រូវបំពេញលក្ខខណ្ឌយានជំនិះ របស់ខ្លួនឲ្យបានគ្រប់គ្រាន់ , សូមកុំបើកបរ ពេលពិសារគ្រឿងស្រវឹង ដើម្បី រក្សាការពារអាយុជីវិតខ្លួនឯង និងជីវិតអ្នកដទៃ ស្របតាមទិសស្លោក ” ថ្ងៃនេះ ថ្ងៃស្អែក កុំអោយមានគ្រោះថ្នាក់ចរាចរណ៍ “។

ក្រុមការងារ ក៏បានអប់រំផ្សព្វផ្សាយ ដល់អ្នកដំណើរទាំងឡាយ ឲ្យលើកកម្ពស់ការប្រុងប្រយ័ត្នខ្ពស់ ក្នុងការទប់ស្កាត់ហានិភ័យ នៃការឆ្លងជម្ងឺកូវីដ១៩ តាមរយៈ វិធានការអនាម័យស្អាត ៣ យ៉ាង និងអនុវត្តអោយបានខ្ជាប់ខ្ជួន តាមសារអប់រំរបស់ក្រសួងសុខាភិបាល ពិសេស សារសម្តេចតេជោ ហ៊ុន សែន ដែលបានអំពាវនាវ ដល់ប្រជាពលរដ្ឋទាំងអស់ រក្សាអោយបានសុវត្ថិភាពផ្ទាល់ខ្លួន ហើយត្រូវធានាថា ” ក្រោយថ្ងៃសម្រាកចូលឆ្នាំនេះ មិនមានការឆ្លងជម្ងឺកូវីដ១៩ ចូលក្នុងសហគមន៍ឡើយ។ ទន្ទឹមនឹងនោះ ដោយសាររដូវនេះ ជារដូវស្សា ក្រុមការងារ ក៏បានធ្វើការណែនាំបន្ថែម អំពីការរក្សាអនាម័យលំនៅដ្ឋាន ការកំចាត់ដង្កូវទឹក បំបាត់ជម្រកមូសខ្លា ការគេងក្នុងមុង ដើម្បីបង្ការការពារ កុំអោយឆ្លងជម្ងឺគ្រុនឈីក និងជម្ងឺគ្រុនឈាមផងដែរ៕ SRP