សៀមរាប ប៉ុស្តិ៍

ខេត្តសៀមរាប៖បើមិនមានអ្វីប្រែប្រួលនោះទេ នៅថ្ងៃទី០៩ខែកក្កដាឆ្នាំ២០២០ និងពិធីប្រកាសលោកលី ប៊ុនណា ជាប្រធានមន្ទីរអប់រំយុវជននិងកីឡាខេត្តសៀមរាប ក្រោមវត្តមានរដ្ឋលោកហង់ ជួន ណារ៉ុន រដ្ឋមន្ត្រីក្រសួងអប់រំយុវជននិងកីឡា។ ពិធីនឹងធ្វើឡើងនៅរដ្ឋបាលសាលាខេត្តសៀមរាប។នេះបើតាមសេចក្ដីប្រកាសជូនដំណឹង៕SRP

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន បុត្រា បុត្រី ចៅប្រុស ចៅស្រី និងមន្ត្រីរាជការ ពុទ្ធបរិស័ទ
នៅរសៀលថ្ងៃចន្ទ ១រោច ខែអាសាឍ ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី០៦ ខែកក្កដា ឆ្នាំ២០២០នេះ បានអញ្ជើញនាំយកទៀនព្រះវស្សា បច្ច័យ ទេយ្យទាន សម្ភារ បរិក្ខាជាច្រើនមុខ ប្រគេនព្រះសង្ឃដែលគង់ចាំព្រះវស្សានៅវត្តមុនីសុវណ្ណ (ហៅចំពុះក្អែក) ស្ថិតនៅក្នុងសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។

ពិធីបុណ្យចូលព្រះវស្សា ប្រារព្ធធ្វើឡើងជារៀងរាល់ឆ្នាំចាប់ពីថ្ងៃ១រោច ខែអាសាធ ដល់ថ្ងៃ១៥ កើត ខែអស្សុជ។ ពិធីត្រូវបានចាប់ផ្តើមនៅល្ងាចថ្ងៃទី ១៥កើត ខែអាសាឍ ដោយមានការចូលរួមពីសំណាក់ បងប្អូន ចាស់ទុំ ចំណុះជើងវត្ត នាំគ្នាហែរទៀនវស្សា សំពត់ សាដក និងសម្ភារប្រើប្រាស់ផ្សេងៗ ហែរជុំវិញព្រះវិហារ និងបន្ទាប់មកសម្តែងធម៌ទេសនា និងវេរទៀនវស្សា សម្ភារប្រគេនព្រះសង្ឃ។

ប្រជាពុទ្ធបរិស័ទខ្មែរ ដែលជាអ្នកមានជំនឿមុតមាំទៅលើព្រះពុទ្ធសាសនា នៅមុនឈានមកដល់នៃកាលបរិច្ឆេទចូលព្រះវស្សានេះ តែងបាននាំយកទៀនព្រះវស្សា និងទេយ្យទានផ្សេងៗទៅប្រគេនព្រះសង្ឃគង់ចាំព្រះវស្សា ដែលមិនមានការនិមន្តបិណ្ឌបាត្រនេះ។

សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ព្រមទាំងក្រុមគ្រួសារ ជាពុទ្ធសាសនិក ដែលមានជំនឿយ៉ាងមុតមាំចំពោះព្រះពុទ្ធសាសនា។ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ព្រមទាំងក្រុមគ្រួសារតែងតែនាំយកទៀនព្រះវស្សា និងទេយ្យទានប្រគេនព្រះសង្ឃនៅតាមទីអាតាមនានាជារៀងរាល់ឆ្នាំ ពេលគង់ចាំព្រះវស្សារយៈពេល៣ខែនេះ។ ពិធីប្រគេនទៀនព្រះវស្សា និងទេយ្យទានត្រូវបានធ្វើឡើងតាមលំអានព្រះពុទ្ធសាសនាខ្មែរ។ ក្នុងឱកាសនោះក៏មានការសូត្រមន្តប្រោសព្រំប្រសិទ្ធពរជ័យជូនសម្តេចតេជោ និងសម្តេចកិត្តិព្រឹទ្ធបណ្ឌិត ព្រមទាំងបុត្រា បុត្រី ចៅប្រុស ចៅស្រីជាទីស្រឡាញ់ និងមន្ត្រីរាជការដែលបានអញ្ជើញចូលរួមផងដែរ។

អំណោយទេយ្យទានដែលត្រូវបានប្រគេនគ្រប់វត្តនៅបណ្តាខេត្តក្រុង មានចំនួន១២០គូ ហើយក្នុង១គូៗ ដែលយកទៅដាក់នៅតាមបណ្តាវត្ត មានក្នុង១គូៗ មានសម្ភារៈចំនួន ១៣មុខ ក្នុងនោះមាន ទានព្រះវស្សា១គូ,ទឹកដោះគោ១កេស, អូវាន់ទីន ១កេស, មៀនកំប៉ុង ១កេស, ត្រីខ ១កេស, មី១កេសធំ, ស្ករស ១០គីឡូក្រាម, តែ២គីឡូក្រាម, អង្ករ៥០គីឡូក្រាម, ប្រេងម៉ាស៊ូត ៣០លីត្រ, ទឹកក្រូច៥កេស, ទឹកបរិសុទ្ធ៥កេស និងថវិកា ៣០ម៉ឺនរៀល។ នេះចំពោះ គ្រួសាររបស់ សម្តេចគតិព្រឹទ្ធបណ្ឌិត ហ៊ុន សែន ដែលបានយកទៅប្រគេនរួចរាល់ហើយ។

ដោយឡែកព្រះសង្ឃគង់ចាំព្រះវស្សានៅវត្តជំពុះក្អែក ចំនួន២០៩អង្គ ដោយក្នុងមួយអង្គទទួលបាន ១០ម៉ឺនរៀល, យាយជីតាជី១០៨នាក់ ក្នុងម្នាក់ទទួលបាន៥ម៉ឺនរៀល, លោកអាចារ្យ៨នាក់ ក្នុងម្នាក់ៗទទួលបាន២០ម៉ឺនរៀល និងភ្លេងពិនពាទ្យទទួលបាន២០ម៉ឺនរៀលម្នាក់ៗ និងសិស្សលោកចំនួន៥០នាក់ ក្នុងម្នាក់ៗទទួលបាន៥ម៉ឺនរៀល ព្រមទាំងសម្ភារៈមួយចំនួនធំ៕SRP

ខេត្តសៀមរាប៖អភិបាលខេត្តសៀមរាបលោកទៀ សីហា បានដាក់ចេញនូវវិធានការឲ្យមន្ត្រីទប់ស្កាត់ការឈូសឆាយទន្ទ្រានយកដីរបស់រដ្ឋផ្សេងៗ។
បើតាមមន្ត្រីសាលាខេត្តបានបញ្ជាក់ថារដ្ឋបាលខេត្តសៀមរាបដាក់វិធានការចំនួន០៤ចំណុច ដល់លោក លោកស្រី អភិបាលក្រុង ស្រុក និងជាគណៈបញ្ជាការឯកភាពរដ្ឋបាលក្រុង ស្រុក ដើម្បីធ្វើការទប់ស្កាត់ និងបង្ក្រាបការកាប់រាន ដុត ឈូសឆាយ ទន្ទ្រាន និងហ៊ុមព័ទ្ធដីតំបន់សហគមន៍ព្រៃឈើ ដីគម្របព្រៃឈើ ដីតំបន់ព្រៃលិចទឹក និងដីតំបន់ការពារធនធានធម្មជាតិ ឬតំបន់ការពារ អភិរក្សនៅក្នុងភូមិសាស្ត្រខេត្តសៀមរាប។

ព័ត៌មានលម្អិតសូមអានខ្លឹមសារទាំងស្រុងដូចខាងក្រោម៖

ខេត្តកំពង់ចាម៖អភិបាលខេត្តកំពង់ចាម លោក​​ អ៊ុន​ ចាន់ដា​ បាន​ថ្លែង​ថា​ ថ្នាក់ដឹកនាំ​ដែលល្អ​ គឺត្រូវ​មាន​លក្ខណៈសម្បត្តិ​គ្រប់គ្រាន់​ក្នុង​ការ​ច្នៃប្រឌិត​ និង​ភាព​ប៉ុនប្រសព្វ ប៉ុន្តែ​មិន​​អាស្រ័យ​លើ​ខ្លួនឯង​តែ​ម្នាក់​​ទេ​ គឺ​ត្រូវ​ទាមទារ​ឲ្យ​មាន​ការ​ចូលរួម​សហការ​ពី​មន្ត្រី​ក្រោម​ឱវាទ​ផង​ដែរ​។ ព្រោះ​ថា​ការ​យកចិត្ត​ទុកដាក់​ចំពោះ​មន្ត្រី​ក្រោម​ឱវាទ​ គឺជា​គន្លឹះដ៏​សំខាន់​ ដើម្បី​កៀរគរ​ប្រមែប្រមូល​នូវ​កម្លាំង​សរុប​ មធ្យោបាយ​សរុប​ វិធាន​ការ​សរុប​ ជួយ​ដោះ​ស្រាយ​របស់​អង្គភាព​ ហើយ​ធ្វើ​ឲ្យ​មន្ត្រី​រាជការ​យេីង​គោរព​ និង​មាន​ស្មារតី​ចូលរួម​បំពេញ​ការងារ​ប្រកប​ដោយ​ឆន្ទៈ​ខ្ពស់​។
ថ្លែងយ៉ាងដូច្នេះក្នុងពិធីប្រកាសចូលកាន់​មុខ​តំណែង​ប្រធាន​មន្ទីរ​កិច្ចការ​នារី​ខេត្តកំពង់ចាម​ នាព្រឹក​ថ្ងៃ​ទី​០៦​ ខែកក្កដា​ ឆ្នាំ​២០២០​ ក្រោម​វត្តមាន​ លោកស្រី​​ វេជ្ជបណ្ឌិត​ អ៊ឹង​ កន្ថាផាវី​ រដ្ឋមន្ត្រី​ក្រសួង​កិច្ចការ​នារី​ និង​លោក​ ខ្លូត​ ផន​ ប្រធាន​ក្រុមប្រឹក្សា​ខេត្ត​ ដោយ​មាន​ការ​អញ្ជើញ​ចូល​រួម​ពី​ ប្រតិភូ​អមដំណើរ​ អភិបាល​រង​ខេត្ត​ ថ្នាក់ដឹកនាំ​ ​មន្ទីរ​ អង្គភាព​ ​អភិបាល​ក្រុង​-ស្រុក​ និង​មន្ត្រី​ពាក់ព័ន្ធ​ជាច្រើន​រូប​។ ​

លោក​ អ៊ុន​ ចាន់ដា​ អភិបាលខេត្ត​កំពង់ចាម​ បាន​លេីក​ឡើង​ថា​ បច្ចុប្បន្ននេះ​ រាជរដ្ឋាភិបាល​កម្ពុជា​ បាន​កំពុង​កំណែទម្រង់​ស៊ី​ជម្រៅ​គ្រប់​ជ្រុងជ្រោយ​នោះ​ ក្នុង​នាម​ជា​ថ្នាក់​ដឹកនាំ​មន្ទីរ​ជំនាញ​ ត្រូវ​តែ​មាន​ការ​ធានា​រ៉ាប់រង​នូវតួរនាទី​ និង​ភារកិច្ច​ស្នូល​របស់​អង្គភាព​ គឺជា​ប្រការ​សំខាន់​ ដែល​ត្រូវ​យក​ចិត្ត​ទុកដាក់​ នឹង​បំពេញ​តួនាទី​ ភារកិច្ច​ ឲ្យ​បាន​ខ្ជាប់ខ្ជួន​ជា​ប្រចាំ​ គ្រប់​ពេល​វេលា​ និង​ហ្មត់ចត់​បំផុត​។
លោក​ស្រី​ប្រធាន​មន្ទីរ​ ដែល​ទើប​ទទួល​បាន​ការ​ប្រគល់​ភារកិច្ច​ថ្មី​ ត្រូវ​ខិតខំ​បំពេញ​ការងារ​ឲ្យ​អស់​ពី​សមត្ថភាព​ លទ្ធភាព​ ទេពកោសល្យ​ ការ​ប៉ិនប្រសប់​ និង​គំនិត​ច្នៃប្រឌិត​ខ្ពស់​រស់​រវើក​ ក្នុង​ស្មារតី​យក​ចិត្ត​ទុកដាក់​ ​ក្នុង​ការ​​ដឹកនាំ​ និង​ភាពទទួល​ខុសត្រូវ​ខ្ពស់​។ ​

លោកស្រី​រដ្ឋមន្ត្រី​ក្រសួង​កិច្ចការ​នារី​ ក៏បានធ្វើការណែនាំដល់ប្រធានមន្ទីរថ្មី ត្រូវខិតខំពង្រឹងការសាមគ្គីភាព ឯកភាពផ្ទៃក្នុង​ឲ្យ​បានល្អ ដើម្បីធានានិរន្តរភាពការងារប្រកបដោយប្រសិទ្ធភាព និងត្រូវយកចិត្តទុកដាក់គ្រប់គ្រង ដឹកនាំមន្ត្រីរាជការក្រោមឱវាទ​ឲ្យ​បានល្អប្រសើរ ប្រកបដោយការ ទទួលខុសត្រូវខ្ពស់ ព្រមទាំងត្រូវមានការសហការល្អជាមួយរដ្ឋបាលដែនដីគ្រប់លំដាប់ថ្នាក់ មន្ទីរ អង្គភាពនានា ក្នុងការរួមចំណែកលើកកម្ពស់ជីវភាពរស់នៅ និងសុខុមាលភាពរបស់ប្រជាពលរដ្ឋ និងការអភិវឌ្ឍខេត្ត​ឲ្យ​កាន់តែមានការរីកចម្រើន​ផងដែរ​៕SRP

ភ្នំពេញ៖នៅរសៀលថ្ងៃនេះ នាយករដ្ឋមន្ត្រីកម្ពុជាសម្ដេចតេជោ ហ៊ុន សែន និងភរិយា គ្រោងនឹងនាំទ័យទានមួយចំនួនទៅប្រគេនព្រះសង្ឃដែលកំពុងគង់ចូលព្រះវស្សានៅវត្តចំពុះក្អែក។

សម្ដេចហ៊ុន សែន បានបញ្ជាក់ថា សុខសប្បាយជាទេបងប្អូនជនរួមជាតិ?

ខ្ញុំព្រះករុណា​ និងភរិយាសូមផ្ញើសេចក្តីនឹករឮកដល់បងប្អូនជនរួមជាតិ និងព្រះសង្ឃគ្រប់ព្រះអង្គដែលកំពុងគង់ចាំព្រះវស្សាចាប់ពីថ្ងៃទី ៥ ខែ កក្កដា ដល់ថ្ងៃទី ៣ ខែ តុលា ឆ្នាំ ២០២០។

សូមអរគុណបងប្អូនប្រជាពលរដ្ឋឧបាសកឧបាសិកាដែលបាននាំយកទៀនព្រះវស្សានឹងទ័យទានចង្ហាន់ជាច្រើនទៀតប្រគេនដល់ព្រះសង្ឃនៅតាមវត្តអារាម ជាពិសេសវត្តនៅតាមតំបន់ឆ្ងាយដាច់ស្រយាល។

ជាមួយគ្នានេះដែរ សូមអរគុណសម្តេច ឯកឧត្តម លោកជំទាវ​ មន្រ្តីសមាជិករាជរដ្ឋាភិបាល រដ្ឋសភា ព្រឹទ្ធសភា និងមន្រ្តីសមាជិកសមាជិការគណបក្សប្រជាជនដែលបានចូលរួមចែករំលែកនូវអំណោយជាអង្ករ មី ត្រីខ ម៉ាស សាប៊ូ​ ចឹល​ ក្រម៉ា និងថ្នាំពេទ្យចែកជូនដល់បងប្អូនក្រីក្រដែលកំពុងខ្វះខាតនៅទូទាំងប្រទេស។

ទន្ទឹមនឹងនេះដែរ​ សូមបងប្អូនបន្តប្រុងប្រយ័ត្នការពារសុវត្ថិភាពសុខភាពកុំអោយឆ្លងជំងឺកូវីដ១៩ ដោយឧស្សាហ៍ដុសលាងសម្អាតដៃជាមួយសាប៊ូ អាល់កុល ឬចឹល ហើយពាក់ម៉ាសការពារខ្លួនអោយបានត្រឹមត្រូវ។ មកទល់ពេលនេះ ពិភពនៅមិនទាន់មានថ្នាំព្យាបាលកូវីដ១៩ នៅឡើយទេ ហើយចំនួនអ្នកឆ្លងរោគរាតត្បាតនេះ គឺបានកើនឡើងគួរអោយព្រួយបារម្ភខ្លាំងណាស់។

នៅពេលរសៀលនេះ ខ្ញុំនិងភរិយាគ្រោងនឹងនាំទ័យទានមួយចំនួនទៅប្រគេនព្រះសង្ឃដែលកំពុងគង់ចូលព្រះវស្សានៅវត្តចំពុះក្អែក។

ខ្ញុំនិងភរិយា សូមប្រគេនពរដល់ព្រះសង្ឃគ្រប់ព្រះអង្គ និងជូនពរបងប្អូនប្រជាពលរដ្ឋទូទាំងប្រទេសជាមួយពរ៤ប្រការគឺ អាយុ វណ្ណៈ សុខៈ ពលៈ និងចៀសផុតពីជំងឺឆ្លងកូវីដ១៩គ្រប់ៗគ្នា៕SRP

ខេត្តឧត្ដរមានជ័យ៖ប្រជាពលរដ្ឋប្រមាណជាង៥០នាក់ក្នុងចំណោម៧០គ្រួសារ មកពីភូមិបាក់វែកឃុំចុងកាល់ ស្រុកចុងកាល់ ខេត្តឧត្ដរមានជ័យកាលពីថ្ងៃទី០៤ ខែកក្កដាឆ្នាំ២០២០  បានលើកគ្នាមកសាលាឃុំចុងកាល់  ដើម្បីអោយលោកមេឃុំជួយដោះស្រាយ រឿងក្រុមយោធា  បានដាក់គ្រឿងចក្រ០៥គ្រឿង  ធ្វើការឈូសឆាយរំលោភយកដីរបស់ពួកគាត់។ ប៉ុន្តែលោកមេ ឃុំ មិនបាននៅសាលាឃុំដើម្បីជួយដោះស្រាយជូនពួកគាត់នោះទេ ដោយជិះម៉ូតូគេចចេញទៅបាត់។

ប្រជាពលរដ្ឋបានលើកឡើងថាដីស្រែចំការរបស់ខ្លួន ត្រូវបានយោធានៅកងពលលេខ៤១  និងកងពលលេខ៤២ ដាក់គ្រឿងចក្រអេស្កាវ៉ាទ័រ  កាយរានព្រៃរំលោភយកដីរបស់ពួកគាត់។

ករណីនេះប្រជាពលរដ្ឋ  បានសូមអំពាវនាវ ដល់សម្ដេចតេជោ  ហ៊ុន សែន នាយករដ្ឋមន្ត្រី នៃកម្ពុជា ជួយដល់ពួកគាត់ផង ព្រោះពួកគាត់ប្រឈមនឹងការបាត់បង់ដីស្រែចំការ  សំរាប់បង្កបង្កើនផល  ដើម្បីចិញ្ចឹមជីវិត ដោយសារតែអ្នកមានអំណាច  នៅខេត្តឧត្ដរមានជ័យ  រំលោភយក។

ជុំវិញកការលើកឡើងរបស់ប្រជាពលរដ្ឋខាងលើនេះ លោកមេ ឃុំ ចុងកាល់ បានប្រាប់អ្នកសារព័ត៌មានថា គ្រឿងចក្រចូលកាយដីព្រៃ  ជារបស់កងពលលេខ៤២ លោកឧ្ដមសេនីយ៍  ប៉ែន វ៉យ និងកងពល៤១  របស់លោកឧត្ដមសេនីយ៍ទោ  នាង ឃីម។

លោកមេ ឃុំ បានបន្តថាកាលពីថ្ងៃទី៤ខែកក្កដាឆ្នាំ២០២០ ពេលដែលប្រជាពលរដ្ឋ មកដល់មុខសាលាឃុំនោះ គឺគាត់មិនបានរត់គេចនោះទេ គឺមានការរវល់ទៅវាស់វែងដីផ្លូវ ហើយពេលនោះ នៅសាលាឃុំក៏មានក្រុមការងារនៅទីនោះដែរ។ ចំពោះរឿងរ៉ាវដីធ្លីខាងលើនេះគាត់ក៏បានបញ្ជូនទៅដល់លោកអភិបាលស្រុករួចហើយ។

លោក រិទ្ធ ប៉ាក់ អភិបាលស្រុកចុងកាល់  បានអោយដឹងថា ដីដែលពលរដ្ឋចោទថា  ជាដីរបស់គាត់  ត្រូវបានគេរំលោភយកនោះ  គ្មានទេគឺដីនោះ  អតីតជាដីរបស់ក្រុមហ៊ុនទន្លេស៊ូគ័រ ចំនួន ៦០០០ហិចតា (ប្រាំមួយពាន់ហិកតា) សម្បទានសង្គមកិច្ចគ្រួសារអតីតយុទ្ធជនអស់  ២៦០០ហិកតា  (ពីរពាន់ប្រាំមួយរយហិចតា)  និងរៀបចំភូមិជូនពលរដ្ឋស្រះកែវ  ជាងមួយពាន់ហិចតា។ លោកបានបញ្ជាក់ថា  គ្មានដីពលរដ្ឋនៅតំបន់នោះទេ។

ទោះយ៉ាងណាពលរដ្ឋបានបញ្ជាក់ថាដីដែលពួកគាត់កាន់កាប់និងអាស្រ័យផលត្រូវបានអ្នកមានអំណាចឃុបឃិតគ្នា  រំលោភយកនោះ មិនស្ថិតនៅក្នុងតំបន់អភិវឌ្ឍន៍គ្រួសារអតីតយុទ្ធជននោះឡើយ គឺនៅខាងក្រៅ ព្រោះគាត់ធ្លាប់ចូលរួមមើលការកំណត់ក្នុងផែនទីនោះដែរ។

បើតាមសេចក្ដីរាយការណ៍ថា  ដីនៅតំបន់នោះ  គឺអតីតរបស់ក្រុមហ៊ុនទន្លេស៊ូគ័រ ប្រគល់ជូនរាជរដ្ឋាភិបាលវិញ ក្រោយមករដ្ឋាភិបាលប្រគល់អោយក្រសួងកសិកម្ម។  ក្រសួងកសិកម្មបានប្រគល់អោយខណ្ឌរដ្ឋបាលព្រៃឈើខេត្តឧត្ដរមានជ័យ  ជាអ្នកគ្រប់គ្រង និងអោយស្ថានីយផ្សព្វផ្សាយដាំកូនឈើឡើងវិញ។  រហូតមកដល់ពេលនេះ អាចត្រីងៀតឈ្លៀតពង ត្រីក្នុងស៊ងកំពុងឈ្លៀតបណ្ដើរកូន ព្រោះអ្នកមានអំណាច  នៅក្នុងខេត្តឧត្ដរមានជ័យមួយចំនួនធំ កំពុងបំផ្លិចបំផ្លាញព្រៃឈើយកដីចែកគ្នា៕SRP

ខេត្តកំពង់ចាម៖លោកឧបនាយក​រដ្ឋមន្ត្រី​ យឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ និងជាប្រធានក្រុមការងារថ្នាក់ជាតិចុះមូលដ្ឋានខេត្តកំពង់ចាម និងលោកស្រី ព្រមទាំង​បុត្រា​ បុត្រី​ រួមជាមួយ លោក​ អ៊ុន ចាន់ដា អភិបាលខេត្តកំពង់ចាម នៅថ្ងៃទី០៥ ខែកក្កដា​ ម្សិលមិញបានអញ្ជើញប្រគេនទៀនព្រះវស្សា និងទេយ្យទានដល់វត្តចំនួន០៩វត្ត និមន្ត​មក​ពី​វត្ត​ក្នុង​ក្រុងកំពង់ចាម ស្រុកកំពង់សៀម និងស្រុកកោះសូទិន។

ដោយក្នុងមួយវត្តៗទទួលបានទៀនព្រះវស្សា ​ទេយ្យទាន​ រួមជាមួយ​ថវិកា២០០ដុល្លារ​ និង១៨ម៉ឺនរៀល ព្រមទាំងគ្រឿងឧបភោគបរិភោគមួយចំនួន។ ដោយឡែក​លោកយាយ​ លោក​តា​ ពុទ្ធបរិស័ទ​ ចំនួន៥៣នាក់​ ក្នុងម្នាក់ៗ​ទទួល​បាន​ថវិកា​ចំនួន៣ម៉ឺនរៀល គ្រូអាចារ្យធំ ចំនួន២នាក់ក្នុងម្នាក់១០ម៉ឺនរៀល រួមទាំងតាអាចារ្យ អញ្ជើញមកពីតាម វត្តផ្សេងៗក្នុងម្នាក់ទទួលបាន៥ម៉ឺនរៀល ផងដែរ​៕SRP

ខេត្តព្រះវិហារ៖លោកមាស សុភា ប្រធានក្រុមការងាររាជរដ្ឋាភិបាលចុះជួយខេត្តព្រះវិហារ នៅព្រឹកមិញនេះបានអញ្ជើញសម្ពោធស្ពានស្ទឹងស្តៅ ដែលស្តិតនៅក្នុងភូមិសុចឆ្លងទៅភូមិត្រពាំងធ្លក ទៅតំបន់អភិរក្ស័ព្រៃឈើ សត្វព្រៃតំបន់ភ្នំត្នោតភ្នំពក ក្នុងឃុំស្តៅ ស្រុកសង្កមថ្មី។
ពិធីនេះក៏មានការពីលោកប្រាក់ សុវណ្ណអភិបាលខេត្តព្រះវិហារ លោកឡុង សុវណ្ណប្រធានក្រុមប្រឹក្សាខេត្ត ព្រមទាំងថ្នាក់ដឹកនាំខេត្ត ក្រុមការងាររាជរដ្ឋាភិបាលចុះជួយខេត្ត ក្រុមការងារខេត្តចុះជួយស្រុកសង្គមថ្មីនិងមន្ត្រីរាជការជាច្រើនរូបទៀត។

លោកមាស សុភា បានថ្លែងជម្រាបជូនដំណឹងដ៏រីករាយជូនដល់បងប្អូនប្រជាពលរដ្ឋស្រុកសង្គមថ្មីថា៖តាមការជូនដំណឹងរបស់មន្ទីរអភិវឌ្ឍន៍ជនបទខេត្តថា គម្រោងអភិវឌ្ឍន៍ផ្លូវក្រាលគ្រួសក្រហមទៅជាផ្លូវកៅស៊ូ២ជាន់ ចាប់ពីមុខសាលាស្រុកសង្គមថ្មីទៅដល់ទីប្រជុំជនភូមិតាសែងកណ្តាលមានប្រវែង២៤គីឡូម៉ែត្រ គ្រោងសាងសង់នៅឆ្នាំ២០២១និងផ្លូវក្រាលគ្រួសក្រហមប្រវែង៣៨គីឡូម៉ែត្រចាប់ពីខាងលិចសាលាស្រុកគូលែនមកដល់ឃុំស្តៅ ស្រុកសង្គមថ្មី នឹងសាងសង់ផ្លូវក្រាលកៅស៊ូ២ជាន់នៅឆ្នាំ២០២១និងគម្រោងសាងសង់ស្ថានីយ៍ទឹកស្អាតកំរិតសហគម១កន្លែងទៀត ចំណុះ១មុឺនលីត្រនៅភូមិត្បែង ឃុំចម្រើន ដែលគម្រោងនេះនឹងចាប់ផ្តើមអនុវត្តនៅឆ្នាំ២០២១។
ដោយឡែកលោកសំ លាងទ្រី ប្រធានមន្ទីរសាធារណការនិងដឹកជញ្ជូនខេត្តព្រះវិហារ បានថ្លែងអោយដឹងថា៖ស្ពានស្ទឹងស្តៅដែលសម្ពោធអោយប្រើប្រាស់នៅថ្ងៃនេះ មានទទឹង៤.២ម៉ែត្រនិងបណ្តោយប្រវែង៤៨ម៉ែត្រ អនុវត្តសាងសង់ដោយមន្ទីរសាធារណការខេត្ត។ស្ពាននេះសាងសង់ពីដែកបេឡេក្រាលឈើ ដែលមានការឧបត្ថម្ភដែកបេឡេពីលោកទេសរដ្ឋមន្ត្រីស៊ុន ចាន់ថុល និងឈើឧបត្ថម្ភដោយលោករដ្ឋមន្ត្រីសាយ សំអាល់ ចំណែកដែកសរសរស្ពានឧបត្ថម្ភដោយលោកទេសរដ្ឋមន្ត្រីមាស សុភានិងលោកប្រាក់ សុវណ្ណអភិបាលខេត្ត ក្នុងនោះដែរលោកទេសរដ្ឋមន្ត្រីមាស សុភាបានឧបត្ថម្ភថវិកា៥០លានរៀលបន្ថែមទៀតផងដែរ។

សូមបញ្ជាក់ថានៅព្រឹកថ្ងៃនេះដែរ លោក មាស សុភានិងក្រុមការងារបានបន្តសម្ពោធដាក់អោយប្រើប្រាស់ទីស្នាក់ការគណបក្សប្រជាជនឃុំរណសិរ្យដែលសាងសង់អស់ថវិកាជាង១០០លានរៀល និងបានប្រគេនទៀនព្រះវស្សាដល់ព្រះសង្ឃ០៨វត្តនៅក្នុងវត្តបឹង ស្រុកសង្គមថ្មីផងដែរ៕SRP

ខេត្តសៀមរាប៖ អាជ្ញាធរស្រុកស្រីស្នំបានឲ្យដឹងថាបុរសម្នាក់បានលង់ទឹកស្លាប់ វេលាម៉ោង១៣ និង១៦នាទីថ្ងៃទី០៥ខែកក្កដាឆ្នាំ២០២០។

ហេតុការណ៍បានកើតឡើង នៅចំណុចខាងត្បូងភូមិក្របៅឃុំប្រិយ៍ស្រុកស្រីស្នំខេត្តសៀមរាប។ ជនរងគ្រោះ ឈ្មោះ ញ៉ែម- យ៉ាត អាយុ ១៧ ឆ្នាំ មុខរបរកសិករ រស់នៅភូមិឃុំខាងលើ។ អាជ្ញាធរបានបញ្ជាក់ថាមូលហេតុ ចុះងូតទឹកស្រះ បណ្តាលឲ្យលង់ស្លាប់តែម្ដង៕SRP

យោងតាមលិខិតរបស់ក្រសួងព័ត៌មាន ចុះថ្ងៃទី២១ ខែមីនា ឆ្នាំ២០១៦ ក្នុងប្រការ១ អនុញ្ញាតឲ្យលោក ប៊ុត វិចិត្រ បើកអាជីវកម្ម គេហទំព័រឈ្មោះ www.srpostnews.com មានអាសយដ្ឋានទីស្នាក់ការ នៅភូមិចុងកៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប ជាចាងហ្វាងការផ្សាយ។
យោងតាមលិខិតអនុញាត របស់មន្ទីរព័ត៌មានខេត្តសៀមរាប ចុះថ្ងៃទី២២ ខែមេសា ឆ្នាំ២០២០ ដែលបានអនុញាត ឲ្យលោក ប៊ុត វិចិត្រ បន្តធ្វើអាជីវកម្ម គេហទំព័រឈ្មោះ www.srpostnews.com មានអាសយដ្ឋានទីស្នាក់ការ នៅភូមិចុង-កៅស៊ូ សង្កាត់ស្លក្រាម ក្រុងសៀមរាប ខេត្តសៀមរាប។
យោងតាមសេចក្ដីសម្រេចចុះហត្ថលេខានៅថ្ងៃទី០១ខែឧសភាឆ្នាំ២០២០ដែលបានតែងតាំង លោក យូ ផល្លី ជាទីប្រឹក្សាអង្គភាពសៀមរាបប៉ុស្ដិ៍ ។
សម្រេច
ប្រការ១៖   អង្គភាពបណ្ដាញសារព័ត៌មាន សៀមរាបប៉ុស្ដិ៍ www.srpostnews.com សម្រេចបញ្ចប់តួនាទី
លោកយូ ផល្លី  ចេញពីទីប្រឹក្សាបណ្ដាញសារព័ត៌មាន សៀមរាបប៉ុស្ដិ៍ ចាប់ពីថ្ងៃចុះហត្ថលេខានេះតទៅ។
ប្រការ២៖  លោកយូ ផល្លី មិនមានសិទ្ធប្រើប័ណ្ណនិងលិខិតបេសកកម្ម ដែលចេញដោយ អង្គភាពបណ្ដាញសារព័ត៌មាន សៀមរាបប៉ុស្ដិ៍ ទៀតឡើយ។

ប្រការ៣៖  ដូចបានបញ្ជាក់តាមប្រការ១ ប្រការ២ អង្គភាពសៀមរាបប៉ុស្ដិ៍ ឈប់ទទួលស្គាល់ លោក យូ ផល្លី ជាទីប្រឹក្សា និងមិនទទួលខុសត្រូវជាដាច់ខាតប្រសិន លោក យូ ផល្លី បានប្រព្រឹត្តអ្វីអាចខុសច្បាប់។

សេចក្ដីប្រកាសនេះសូមអាជ្ញាធរមន្ត្រីសមត្ថកិច្ចគ្រប់ជាន់ថ្នាក់មេត្តាជ្រាបជាព័ត៌មាន៕SRP

ខេត្តសៀមរាប៖លោកទៀ សីហា និងភរិយា ព្រមទាំងប្រធានក្រុមប្រឹក្សាខេត្ត សមាជិក សមាជិកាក្រុមប្រឹក្សាខេត្ត គណៈអភិបាលខេត្ត មន្ទីរ-អង្គភាពជុំវិញខេត្ត មន្ត្រីរាជការ កងកម្លាំង និងក្រុមគ្រួសារសហភាពសហព័ន្ធយុវជនកម្ពុជាខេត្ត នៅថ្ងៃសៅរ៍ ថ្ងៃទី០៤ខែកក្កដាម្សិលមិញបានរៀបចំពិធីប្រគេនទៀនវស្សា និងទេយ្យវត្ថុ ប្រគេនថ្វាយព្រះសង្ឃដែលអញ្ជើញមក ចំនួន៤៥វត្ត ក្នុងក្រុងសៀមរាប និងស្រុកអង្គរធំ៕SRP

ខេត្តកំពង់ចាម៖ លោកជំទាវ ញូង ចរិយា អ៊ុន ចាន់ដា ប្រធានកិត្តិយសមាគមនារីកម្ពុជា ដើម្បីសន្ភិភាព និងការអភិវឌ្ឍន៍សាខាខេត្ត និង​លោកស្រី​ ប៉ាង ដានី អភិបាលរង ខេត្តកំពង់ចាម
នៅថ្ងៃទី០៤ កក្កដាម្សិលមិញ ​ បាន​នាំយកបច្ច័យ និងទៀនចំណាំព្រះវស្សា ទៅវេរប្រគេនព្រះសង្ឃ នៅវត្តខែលជ័យ ស្រុកកំពង់សៀម និងវត្តស្វាយទាប ស្រុកចំការលើ។
ដោយ​មាន​ការ​អញ្ជើញ​ចូល​រួម​ពី​លោកស្រី​ ស្រី គឹមឆយ តំណាងរាស្រ្តមណ្ឌលកំពង់ចាម ព្រមទាំង លោកស្រី​ សមាជិកក្រុមប្រឹក្សាខេត្ត និងសហការី ជាច្រើនរូបទៀត។
សូមបញ្ជាក់ថាបច្ច័យ គ្រឿងបរិក្ខា និងទៀនចំណាំព្រះវស្សា ទៅវេរប្រគេនព្រះសង្ឃគង់ចាំព្រះវស្សា ក្នុងវត្តចំនួន២គឺ៖ ១.វត្តខែលជ័យ ផ្កាស្រស់ ៤កន្ត្រក់ សាដក់៨ អង្ករ៨បេ ទៀន២គូ ទឹកសុទ្ធ២កេស ទឹកក្រូច៨កេស ទឹកត្រី១៥យួរ ទឹកស៊ីអ៊ីវ១៥យួរ មី១០កេស ត្រីខ១២យួរ បច្ច័យកសាងវត្ត ២លាន៥សែនរៀល និងជូនថវិកាតាយាយ១លានរៀល ២.វត្តស្វាយទាប ផ្កាស្រស់ ៤កន្ត្រក់ សាដក់៨ អង្ករ៨បេ ទៀន២គូ ទឹកសុទ្ធ២កេស ទឹកក្រូច ៨កេស ទឹកត្រី ១៥យួរ ទឹកស៊ីអ៊ីវ១៥យួរ មី ១០កេស ត្រីខ១២យួរ បច្ច័យកសាងវត្ត២លាន៥សែនរៀល ផងដែរ៕SRP