ខេត្តប៉ៃលិន៖នគរបាលខេត្តចំនួន​៧៥នាក់​ត្រូវបានប្រកាសផ្ទេរភារកិច្ចនិងតែងតាំងមុខតំណែង​។ថ្នាក់នាយផ្នែក០១នាក់។ថ្នាក់នាយរងផ្នែក០៥នាក់។
ថ្នាក់នាយរងប៉ុស្តិ៍​នគរបាល​រដ្ឋបាល០៤នាក់។
បំពាក់ឋានន្តរស័ក្ដិថ្នាក់អនុសេនីយ៍​ត្រី​​៣១នាក់។
បំពាក់ឋានន្តរស័ក្ដិថ្នាក់ព្រិន្ទបាលឯក៤១នាក់។
បំពាក់ឋានន្តរស័ក្ដិថ្នាក់ព្រិន្ទបាលទោ​០២នាក់។
បំពាក់ឋានន្តរស័ក្ដិថ្នាក់ពលបាលទោ០២នាក់។
ពិធីនេះនៅស្នងការដ្ឋានព្រឹកមិញនេះក្រោមវត្តមានលោកឧត្ដមសេនីយ៍ទោ​ សេង​ សុគន្ធ​ ស្នងការនគរបាលខេត្តប៉ៃលិន។

ថ្លែង​ក្នុងឱកាសនោះ លោក​ឧត្ដមសេនីយ៍​ ស្នងការ​ បានធ្វើការកោតសរសើរ និងវាយតម្លៃខ្ពស់ ចំពោះកងកម្លាំង​មន្រ្តី​នគរបាល​ជាតិ​ នៃ​ស្នងការដ្ឋាន​នគរបាល​ខេត្តប៉ៃលិន​ ទាំងអស់ ដែលបានរួមសាមគ្គីសហការគ្នាខិតខំប្រឹងប្រែងយ៉ាងសកម្មក្នុងការ​ថែរក្សា​សន្តិសុខ​ជូន​ប្រជាពលរដ្ឋ​ ដេីម្បី​អោយ​មាន​ការ​រីកចម្រើនលើគ្រប់វិស័យ និងរក្សាបាននូវសន្តិសុខសណ្ដាប់ធ្នាប់សាធារណៈសង្គមបានល្អប្រសើរ នាពេលកន្លងមក ។

លោក​ឧត្ដមសេនីយ៍​ ស្នងការ​ ក៏បានអបអរសាទរ និងបានផ្ដាំផ្ញើចំពោះ​មន្រ្តី​នគរបាល​ ដែលទើបទទួលបានការផ្ទេរភារកិច្ច និងតែងតាំងមុខតំណែងថ្មី ត្រូវប្រកាន់ខ្ជាប់នូវសាមគ្គីភាពផ្ទៃក្នុង និងត្រូវខិតខំប្រឹងប្រែងសហការ ចូលរួមក្នុងដំណើរការអភិវឌ្ឍខេត្តឲ្យមានការរីកចម្រើន ធ្វើឲ្យប្រជាពលរដ្ឋកាន់តែមានជីវភាពធូរធារ ប្រកបដោយសេចក្ដីសុខសាន្ដបន្ថែមទៀត។ ជាពិសេស​ក៏​ជំរុញ​ឲ្យ​កម្លាំង​ជំនាញ​ការិយាល័យ​ចរាចរណ៍​ផ្លូវគោក​អនុវត្តន៍​ច្បាប់​អោយ​មាន​លក្ខណៈ​សុភាព​រាបសា​ តែ​ម៉ត់ចត់​ដេីម្បី​រក្សា​នូវ​ភាព​ថ្លៃថ្នូរ​របស់​កងកម្លាំង​ និងបន្ដជំរុញគោលនយោបាយភូមិ ឃុំ មានសុវត្ថិភាព ធ្វើយ៉ាងណាបង្ការ ទប់ស្កាត់ និងបង្រ្កាបឲ្យបានចំពោះបទល្មើសគ្រប់ប្រភេទ ជាពិសេសបទល្មេីស​គ្រឿងញៀន ល្បែងស៊ីសង និងត្រូវបន្តពង្រឹងកិច្ចសហប្រតិបត្តិការឲ្យបានល្អប្រសើរជាមួយប្រទេសជិតខាង ដើម្បីរួមគ្នាថែរក្សាសន្តិសុខ សណ្ដាប់ធ្នាប់ព្រំដែន និងការបង្ការ ទប់ស្កាត់បទល្មើសឆ្លងកាត់ព្រំដែនគ្រប់ប្រភេទផងដែរ៕SRP

ខេត្តសៀមរាប៖លោកទៀ សីហា អភិបាល​ខេត្តបានស្នើឲ្យវិស័យឯកជន ចូលរួមជាមួយ អាជ្ញាធរ ក្នុងការស្តារ វិស័យទេសចរណ៍ នៅខេត្តសៀមរាប
ឡើងវិញ។
ការថ្លែងយ៉ាងដូច្នេះនាថ្ងៃទី០២ខែមិថុនាម្សិលមិញនៅសាលាខេត្តសៀមរាបក្នុងពេលលោកបានអនុញ្ញាតឲ្យប្រតិភូសមាគមសហគ្រិនវ័យក្មេងកម្ពុជា ដឹកនាំដោយលោក ឡាយ គីមសួរ ប្រធានសមាគម សហគ្រិនវ័យក្មេង កម្ពុជា សាខាខេត្តសៀមរាប ចូលជួបពិភាក្សា ការងារស្តារឡើងវិញ លើវិស័យទេសចរណ៍ ក្នុងពេលដែលនៅលើពិភពលោក បានកំពុងជួបវិបត្តិជម្ងឺកូវីដ១៩។ក្នុងជំនួបនេះលោកទៀ សីហា បានគាំទ្រនូវគំនិតផ្តួចផ្តើមរបស់សមាគមសហគ្រិនវ័យ ក្មេងកម្ពុជា សាខាខេត្តសៀមរាបដែលបានលើកឡើង ក្នុងគោលបំណងរួមគ្នាស្តារឡើងវិញក្នុងវិស័យទេសចរណ៍ និងបង្កើនការជម្រុញវិស័យ កសិទេសចរណ៍នៅតាមបណ្តាភូមិ ស្រុកក្នុងខេត្តសៀមរាប។
លោកបានបន្តថា រាល់គំនិត ដែលសមាគមសហគ្រិនវ័យក្មេងកម្ពុជា លើកឡើងនេះ គឺស្ថិតនៅក្នុងគម្រោងរបស់ខេត្ត ដែលបានដាក់ទៅក្រសួង ក្នុង គោលដៅអភិវឌ្ឍន៍ខេត្ត។ ម៉្យាងទៀតក្នុងឱកាសដែលភ្ញៀវកំពុងធ្លាក់ចុះ និងជួបនូវវិបត្តិកូវីដ១៩ អាជ្ញាធរខេត្ត បាន កំពុងធ្វើការស្តារឡើងវិញ នូវហេដ្ឋរចនាសម្ព័ន្ធផ្លូវថ្នល់ក្នុងក្រុង និងជនបទ ព្រមទាំងធ្វើការជម្រុញដល់គ្រប់បណ្តាក្រុង ស្រុក ក្នុងការបង្កើតនូវតំបន់ទេសចរណ៍ធម្មជាតិក្នុងសហគមន៍របស់ខ្លួន ដើមី្បលើកកម្ពស់ជីវភាពរបស់ប្រជាពលរដ្ឋ នៅតាមមូលដ្ឋាន ឲ្យកាន់តែប្រសើរឡើងថែមទៀតផងដែរ។
លោកក៏បានផ្តល់នូវអនុសាសន៍មួយចំនួន ដោយបច្ចុប្បន្ននេះប្រមុខរាជរដ្ឋាភិបាល និង ក្រសួងសុខាភិបាល បានធ្វើការរឹតបន្តឹងក្នុងការអនុវត្តប្រយុទ្ធប្រឆាំងនឹង រលកទី២នៃជម្ងឺកូវីដ១៩ កុំឲ្យមានការរីករាលដាលនៅក្នុងសហគមន៍ ។ ដោយកត្តានេះហើយ អាជ្ញាធរខេត្ត បានកំពុងយកចិត្តទុកដាក់ខ្ពស់ ចំពោះបញ្ហាការប្រមូលផ្តុំរបស់ប្រជាពលរដ្ឋ នៅតាមភោជនីយដ្ឋាន តើគ្រប់ម្ចាស់ភោជនីយដ្ឋានទាំងនោះបានអនុវត្តទៅតាមការណែនាំរបស់ក្រសួងសុខាភិបាល និងក្រសួងទេសចរណ៍ អំពីគម្លាតសុវត្ថិភាព ក្នុងការការពារនូវជម្ងឺកូវិដ១៩នេះ។
លោកបានបញ្ជាក់ផងដែរអំពីគម្រោងការជិះកង់ទេសចរណ៍ ដោយអាជ្ញាធរខេត្ត និងអាជ្ញាធរអប្សរា បានបង្កើតផ្លូវសម្រាប់ជិះកង់ ប្រកបទៅពណ៌បៃតងនៅក្នុងតំបន់ទេសចរណ៍ប្រវត្តិសាស្ត្រសៀមរាប ។ សូមបញ្ជាក់ថាចំពោះរាល់បញ្ហាដែលសមាគមសហគ្រិនវ័យក្មេងកម្ពុជា បានលើកឡើងទាំងនោះ អភិបាលខេត្តនឹងយកទៅធ្វើការពិភាក្សាជាមួយ ក្រសួងពាក់ព័ន្ធផងដែរ៕SRP

ខេត្តសៀមរាប៖យោងតាមសេចក្ដីរាយការណ៍ាបានឲ្យដឹងថានៅថ្ងៃទី០១ខែមិថុនាឆ្នាំ២០២០ មានករណីចោរចូលលួចម៉ូតូមួយគ្រឿងរបស់មន្ត្រីបម្រើការងារនៅមន្ទីរព័ត៌មានខេត្តសៀមរាប ដែលទុកនៅមន្ទីរព័ត៌មានខេត្តសៀមរាប។
យោងតាមហ្វេសប៊ុករបស់ជនរងគ្រោះបានឲ្យដឹងថាសូមបងប្អូនជួយស៊ែបន្តផងខ្ញុំបាទឈ្មោះ កើត គឿន បានបាត់ ម៉ូតូ Dream 2020 នៅថ្ងៃនេះថ្ងៃចន្ទ ទី០១ ខែមិថុនា ឆ្នាំ២០២០ នៅកន្លែងធ្វើការបស់ខ្ញុំគឺមន្ទីរព័ត៌មានវាចូលទៅលួចនៅកន្លែងខ្ញុំធ្វើការតែម្ដង ខ្ញុំហូបបាយហើយចូលធ្វើការវិញម៉ោង១:៤៥នាទីដល់ចប់ការងារម៉ោង៥:៣០នាទីចេញមកផ្ទះរកម៉ូតូអត់ឃើញតែម្ដងរូបដាក់ទៅនិងកាលទិញមិនទាន់បានស្លាកលេខទេណាបងប្អូនកាលមានស្លាកលេខអត់បានថតសុំទោសផងណាគឺកន្លែងធ្វើរបស់ខ្ញុំនៅខាងក្រោយគេបង្អស់ជ្រុងខាងលិច នៃមណ្ឌលរដ្ឋបាលមន្ទីរខេត្តសៀមរា ម៉ូតូដែលមានកាតគ្រី និងផ្លាកលេខ Siem Reap 1AI-5240 ដូចរូបភាព បើបងប្អូនណាបានឃើញទាក់ទងមកខ្ញុំលេខ 077 77 23 88; 097 75 45 535 សូមអរគុណ។
ជុំវិញករណីខាងលើនេះលោកស៊ ស៊ិនណារ៉ានាយប៉ុស្ដិ៍នគរបាលសង្កាត់ស្លក្រាមក្រុងសៀមរាបបានឲ្យដឹងថាពិតជាមានករណីនេះមែនកាលពីម្សិលមិញ។លោកថាក្រោយទទួលបានព័ត៌មានភ្លាមៗមន្ត្រីនគរបាលបានចុះទៅដល់កន្លែងកើតហេតុធ្វើការស្រាវជ្រាវនិងធ្វើកំណត់ហេតុបឋមផងដែរ។
លោកបន្តថានៅថ្ងៃទី០២មិថុនានេះជនរងគ្រោះបានមកដាក់ពាក្យបណ្ដឹងនៅប៉ុស្តិ៍រដ្ឋបាលសង្កាត់ស្លក្រាមហើយ។
លោកបានបញ្ជាក់ថានៅមន្ទីររដ្ឋបាលខេត្តសៀមរាបកន្លែងចេញចូលពុំមានដាក់ចង្វាក់នោះទេ ហើយការចេញចូលក្នុងមន្ទីររដ្ឋបាលនានាក៏ពុំមានផាសរដ្ឋបាលសម្រាប់បញ្ជាក់ការចេញចូលដែរ។ទោះយ៉ាងណាលោកនាយប៉ុស្តិ៍បានបន្តថាករណីនេះកម្លាំងសមត្ថកិច្ចកំពុងតែធ្វើការស្រាវជ្រាវយ៉ាងយកចិត្តទុកដាក់បំផុត៕SRP

ភ្នំពេញ៖ក្រសួងសាធារណការនិងដឹកជញ្ជូនបានឲ្យដឹងថាស្ពានតភ្ជាប់ពីស្រុកស្ទឹងត្រង់ (ខេត្តកំពង់ចាម) ទៅស្រុកក្រូចឆ្មារ (ខេត្តត្បូងឃ្មុំ) សម្រេចការសាងសង់បាន ៨៧,៥% គម្រោងនឹងរួចរាល់មុនកាលកំណត់ គឺក្នុងខែមីនា ឆ្នាំ២០២១ (កាលកំណត់ក្នុងខែឧសភា ឆ្នាំ២០២១) ហើយស្ពានអាចតភ្ជាប់រួចរាល់នៅខែធ្នូ ឆ្នាំ២០២០ខាងមុខនេះ។ ស្ពាននេះនឹងចូលរួមចំណែកយ៉ាងសំខាន់ ដើម្បីតភ្ជាប់ទំនាក់ទំនងការដឹកជញ្ជូន និងការធ្វើដំណើរបស់បងប្អូនប្រជាពលរដ្ឋខេត្តកំពង់ចាម និងខេត្តត្បូងឃ្មុំ ដែលរស់នៅយ៉ាងច្រើនកុះករ នៅត្រើយខាងកើត និងត្រើយខាងលិច ទន្លេមេគង្គ ឱ្យបានងាយស្រួល និងឆាប់រហ័ស។សូមបញ្ជាក់ថា ស្ពាននេះមានប្រវែងសរុប ១.១៣១ ម៉ែត្រ និងទទឹង១៣,៥០ ម៉ែត្រ ជាប្រភេទស្ពានបេតុងសរសៃដែក ដោយបើកការដ្ឋានកាលពីថ្ងៃទី០៩ខែកុម្ភៈ ឆ្នាំ២០១៨ ក្រោមវត្តមានរបស់សម្ដេចតេជោ ហ៊ុនសែន នាយករដ្ឋមន្ត្រី។

ស្ពាននេះគ្រោងចំណាយថវិកាសរុប ៥៦,៩៩៨ លាន ដុល្លារសហរដ្ឋអាមេរិក នឹងប្រើប្រាស់រយៈពេលសាងសង់ចំនួន៤២ខែ៕SRP

អាជ្ញាធរខេត្តបានអះអាងព្រលានយន្តហោះអន្តរជាតិសៀមរាបថ្មី ដែលនឹងត្រូវដាក់ដំណើរការនៅឆ្នាំ២០២៣ អាចទាក់ទាញភ្ញៀវទេសចរ តាមគម្រោង នឹងទទួលបានប្រមាណ៩លាននាក់។  នេះតាមគឺជាការលើកឡើងរបស់ លោក លី សំរិទ្ធ អភិ បាលរងខេត្តសៀមរាបក្នុងសន្និសីទសារព័ត៌មានស្តីពី«វឌ្ឍនភាព និង ទិសដៅការងារ បន្តរបស់រដ្ឋបាលខេត្តសៀមរាប» នៅទីស្តីការគណៈរដ្ឋមន្ត្រីនាព្រឹកមិញនេះ។

លោកលី សំរិទ្ធ បានលើកឡើងថា ព្រលានយន្តហោះក្រុងសៀមរាបថ្មីនេះ គឺមាន ចម្ងាយប្រមាណ៣០គីឡូម៉ែត្រស្ថិតនៅភាគខាងកើតក្រុងសៀមរាបដោយបានដំណើរការ សាងសង់អស់រយៈ ជាង១ឆ្នាំមកហើយ។  លោកបានបញ្ជាក់ថា “យើងមានក្តីសង្ឃឹម ដោយសារ រាជរដ្ឋាភិបាលយើងអនុញ្ញាតឱ្យមានព្រលានយន្តហោះអន្តរជាតិបែបនេះ និងអាចឱ្យ យន្ដហោះចុះចត គ្រប់ប្រភេទបាន។ ខុសពីព្រលានយន្ដហោះសព្វថ្ងៃនេះគឺពេលខ្លះ ទទួល ចុះចតមានកម្រិតសម្រាប់តែយន្តហោះ ធុនមធ្យមនោះទេដែលអាចចុះចតបាន ចំណែក ធុនធំមិនអាចចុះបានទេ”។

អភិបាលរងខេត្ដបានបញ្ជាក់ថា តាមផែនការព្រលានយន្តហោះថ្មីនេះ នឹង សម្រេច ការសាងសង់ឱ្យរួចរាល់នៅឆ្នាំ២០២៣ ហើយអាចនឹងដាក់ឱ្យប្រើប្រាស់ជាផ្លូវការ ផងដែរ។ លោករំពឹងថា នៅពេលដែលដាក់ឱ្យដំណើរការព្រលានយន្ដហោះថ្មីនេះ ខេត្តសៀមរាប នឹងមានកំណើនទេសចរកើនដល់ប្រមាណ៩លាននាក់ ដែលព្រលានយន្តហោះ ថ្មីនេះ អាចផ្ដល់សេវាកម្មបានក្នុងចំណោមភ្ញៀវទេសចរដែលបានមកកម្សាន្ដក្នុង ខេត្ដ។
បើតាមអភិបាលរងខេត្ដថា ទិសដៅបន្ត នៅក្នុងឆ្នាំ២០២០នេះ រដ្ឋបាលខេត្ដបានធ្វើការប៉ាន់ប្រមាណ ក្នុង ចក្ខុវិស័យយ៉ាងទូលំទូលាយ ក្នុងការកំណត់ដំណាក់កាលនីមួយៗ នៃការអភិវឌ្ឍ ស្របតាមការ រីកចម្រើនសង្គម ដើម្បី ឆ្លើយតបនឹងសំណូមពររបស់ប្រជាពលរដ្ឋក្នុងរក្សាសណ្តាប់ធ្នាប់ សន្តិសុខ សង្គម បរិស្ថានល្អនិងសេចក្តីថ្លៃថ្នូរ ក្នុងការកាត់បន្ថយភាពក្រីក្រផងដែរ៕SRP

ខេត្តកំពង់ចាម៖លោក​អ៊ុន ចាន់ដា អភិបាល​ខេត្ត​កំពង់ចាម​ និង​ជាប្រធានគណៈកម្មធិការសាខាកាកបាទក្រហមកម្ពុជាខេត្ត នៅព្រឹមិញបាននាំយកអំណោយ​មនុស្សធម៌​កាកបាទក្រហម​កម្ពុជា​ ចែកជូនប្រជាពលរដ្ឋ ងាយរងគ្រោះចំនួន១២០គ្រួសារ នៅសាលាស្រុកកំពង់សៀម។
សូមបញ្ជាក់ថាប្រជាពលរដ្ឋទាំង១២០គ្រួសារមកពីក្រុងកំពង់ចាម ចំនួន៦០គ្រួសារ និងស្រុកកំពង់សៀម ចំនួន៦០គ្រួសារ ដោយក្នុងមួយគ្រួសារៗ ទទួលបានអង្ករ២៥គីឡូក្រាម ទឹកត្រី ទឹកស៊ីអ៊ីវ ត្រីខ អាវយឺត​ ម៉ាស់ និងថវិកា ២០,០០០ រៀលផងដែរ​៕SRP

ខេត្តព្រះវិហារ៖ លោក នួន សុខុម នាយខណ្ឌរដ្ឋបាលព្រៃឈើព្រះវិហារ និងលោកសេង លាង នាយផ្នែកឆែប បានសហការជាមួយកម្លាំងអាវុធហត្ថខេត្ត នៅមិញបានចុះបង្ក្រាបទីតាំងសិប្បកម្មកែច្នៃឈើចំនួន០២កន្លែង នៅ ភូមចំរើន ឃុំ ច្រាច ស្រុកជ័យសែន។

លោក នួន សុខុម បានប្រាប់អោយដឹងថា ក្រោយពីទទួលបទបញ្ជាពីលោក ពឹង ទ្រីដា ប្រធានមន្ទីកសិកម្មខេត្ត លោកបានដឹកនាំក្រុមការងារចុះបង្ក្រាបទីតាំងខាងលើ។

លោកថាម្ចាស់សិប្បកម្មឥតច្បាប់ទាំងនោះហាក់បីដូចជាដឹងមុន បានរុះរើម៉ាស៊ីនតាប និងឈើសម្រាប់កែច្នៃធ្វើសិប្បកម្មជាច្រើនម៉ែត្រគូបដឹកចេញតាមគោយន្ដយកទៅលាក់ទុកអស់អស់មួយចំនួនធំ។
លោក សេងលាង បានប្រាប់ឲដឹងថា ពេលដែលលោកចុះទៅបង្ក្រាបសិបកម្មនោះលោកបានជួបនិងរថយន្ដសាំយ៉ុង ដឹកធ្នង់ ចេញពីតំបន់ខាងលើផងដែរ។

បើតាមលោក សេងលាង ក្រោយពីបង្ក្រាបរថយន្ដដឹកឈើធ្នង់ខាងលើនោះ ត្រូវបានបែកការដល់ក្រុមសិប្បកម្ម០២កន្លែងខាងលើ ទើបម្ចាស់រុះរើជញ្ជូនតាបនិងឈើចេញអស់ដោយរត់គេចខ្លួនបាត់។

វត្ថុតាងត្រូវបានយកមករក្សាទុកនៅសង្កាត់រដ្ឋបាលព្រៃឈើជ័យសែន។ចំណែកឈើរងចាំការវាស់វែងនៅពេលក្រោយ៕SRP

ខេត្តកែប៖លោកនាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ នៅព្រឹកថ្ងៃទី២ ខែមិថុនា ឆ្នាំ២០២០នេះ បានអញ្ជើញជាអធិបតីពិធីប្រកាសផ្ទេរភារកិច្ច និងតែងតាំងមុខតំណែងស្នងការនគរបាលថ្មីខេត្តកែប។
តាមសម្រេចរបស់រដ្ឋមន្រ្តីក្រសួងមហាផ្ទៃ សម្តេចក្រឡាហោម ស ខេង បានសម្រេចតែងតាំងលោកឧត្តមសេនីយ៍ត្រី សម្បត្តិ សុធារដ្ឋ ពីស្នងការរងទទួលផែនអត្តសញ្ញាណកម្ម នៃស្នងការដ្ឋាននគរបាលខេត្តកំពត ទៅជាស្នងការ នៃស្នងការដ្ឋាននគរបាលខេត្តកែប ជំនួសលោកឧត្តមសេនីយ៍ត្រី បែន តារា ដែលត្រូវតែងតាំងជាអនុប្រធាននាយកដ្ឋានកណ្តាលនគរបាលព្រំដែន និងតម្លើងឋានន្តរស័ក្តិជា ឧត្តមសេនីយ៍ទោ៕SRP

ខេត្តសៀមរាប៖នគរបាលការិយាល័យស៊ើបអង្កេតនិងអនុវត្តនីតិវិធី នៃស្នងការដ្ឋានខេត្តសៀមរាប បានឃាត់ខ្លួនជនបរទេសម្នាក់ពាក់ព័ន្ធ ស្នាក់នៅខុសច្បាប់។

ការឃាត់ខ្លួនធ្វើឡើងនៅវេលាម៉ោង១៤នឹង៣០នាទីថ្ងៃទី០១ខែមិថុនាម្សិលមិញនៅជិតព្រះអង្គចេកព្រះអង្គចម ក្នុងភូមិមណ្ឌល១សង្កាត់ស្វាយដង្គំ ក្រុងសៀមរាប។

សមត្ថកិច្ចខេត្តសៀមរាបបានឲ្យដឹងនៅព្រឹកនេះថា ជនបរទេសរូបនេះឈ្មោះ RADU TRAIAN POPESCU ភេទប្រុសអាយុ៣៩ឆ្នាំ ជនជាតិរ៉ូម៉ានី គ្មានលិខិតឆ្លងដែនជាប់ខ្លួន ចូលមកព្រះរាជាណាចក្រកម្ពុជាកាលពីដើមខែមករាឆ្នាំ២០២០ តាមច្រកព្រលានយន្តហោះអន្តរជាតិភ្នំពេញ។លិខិតឆ្លងដែនបានបាត់ប៉ុន្តែមិនដឹងបាត់នៅកន្លែងណា ពេលណានោះទេ ការចំណាយលើការហូបចុកប្រចាំថ្ងៃគឺដើរសុំលុយពីប្រជាពលរដ្ឋខ្មែរនិងជនបរទេសក្នុងក្រុងសៀមរាបស្នាក់នៅតាមវត្តអារ៉ាមនិងទីសាធារណៈ។បច្ចុប្បន្នកម្លាំងនគរបាលបញ្ជូនទៅស្នាក់ការត្រៀមបណ្តេញចេញប្រចាំខេត្តសៀមរាបដើម្បីបន្តតាមនីតិវិធី៕SRP

ខេត្តកំពង់ធំ៖សមត្ថកិច្ចសមត្ថកិច្ចខេត្តកំពង់ធំ បង្ក្រាបទីតាំង ល្បែងជល់មាន់ អាប៉ោង មួយកន្លែងនិងឃាត់ខ្លួនអ្នកលេង១១នាក់។ការបង្ក្រាបនេះធ្វើឡើងនៅរសៀលថ្ងៃទី០១ខែមិថុនាម្សិលមិញនៅចំណុចភូមិគ្រួស ឃុំដូង ស្រុកប្រាសាទបល័ង្គ ដោយកម្លាំងអាវុធហត្ថខេត្តដឹកនាំបញ្ជាដោយលោកសាយ វាសនា ព្រះរាជអាជ្ញារងអមសាលាដំបូងខេត្តកំពង់ធំ។មន្ត្រីក្នុងហេតុការណ៍បានឲ្យដឹងថាការបង្ក្រាបនេះសមត្ថកិច្ចរឹបអូសបានម៉ូតូចំនួន៥៩គ្រឿង មាន់ជល់១០ក្បាល មេអាប៉ោង៦គ្រាប់ មនុស្ស១១នាក់៕SRP

ខេត្តព្រះវិហារ៖លោកសំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ បានឲ្យដឹងនៅល្ងាចថ្ងៃទី០១ខែមិថុនានេះថាស្ពានស្ទឹងស្ដៅ ដែលរងការឆេះដោយភ្លើងព្រៃនារដូវប្រាំងកន្លងទៅ បច្ចុប្បន្ននេះ កំពុងមមាញឹកក្នុងការស្ថាបនាឡើងវិញ ជំនួសដោយស្ពានដែកបេឡេត៍ក្រាលឈើ ក្រោមការជួយឧបត្ថម្ភជ្រោមជ្រែងពី លោក មាស សុភា ទេសរដ្ឋមន្ត្រីទទួលបន្ទុកបេសកកម្មពិសេស ប្រធានក្រុមមការងាររាជរដ្ឋាភិបាលចុះជួយមូលដ្ឋានខេត្តព្រះវិហារ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន លោក សាយ សំអាល់ រដ្ឋមន្ត្រីក្រសួងបរិស្ថាន លោកអភិបាលខេត្តព្រះវិហារ អនុវត្តការសាងសង់ ដោយមន្ទីរសាធារណការ និងដឹកជញ្ជូនខេត្តព្រះវិហារ។
លោកសំ លាងទ្រី បានបញ្ជាក់ថា

ស្ពាននេះមានប្រវែង៤៨ម៉ែត្រទទឹង៤,២០ម៉ែត្រស្ថិតក្នុងឃុំស្ដៅ ស្រុកសង្គមថ្មី ខេត្តព្រះវិហារ ឆ្ពោះទៅកាន់ដែនអភិរក្សសត្វព្រៃភ្នំត្នោត ភ្នំពក៕SRP