មនុស្សចំនួន៤នាក់ដែលរួមទាំងមេក្លោង ត្រូវបានមន្ត្រីចាប់ខ្លួនពាក់ព័ន្ធករណីកាប់ឆ្ការគាស់ឈូសឆាយដីព្រៃលិចទឹកខុសច្បាប់ នៅក្នុងភូមិគងទំ ឃុំពាមឯក ស្រុកឯកភ្នំ។

ការចាប់ខ្លួនធ្វើឡើងនៅថ្ងៃសៅរ៍ ម្សិលមិញ ដឹកនាំដោយលោកហួត សុភាព មេបញ្ជាការរងទទួលការងារ ស្រាវជ្រាវព័ត៌មានសន្ដិសុខ។

លោកឧត្តមសេនីយ៍ត្រី ហែម វុទ្ធី មេបញ្ជាការកងរាជអាវុធហត្ថខេត្តបាត់ដំបង បានឲ្យដឹងថា យោងតាមបទបញ្ជារបស់សម្តេចតេជោ ប្រមុខរាជរដ្ឋាភិបាល ក៏ដូចជាបញ្ជារបស់នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស និងក្រោយទទួលព័ត៌មាន

លោក ហួត សុភាព បានថ្លែងប្រាប់អ្នកសារព័ត៌មានថា ការចុះបង្រ្កាបករណីបទល្មើសជាក់ស្តែង ខណ:ជនសង្ស័យ កំពុងធ្វើសកម្មភាព កាប់ឆ្ការគាស់ ឈូសឆាយព្រៃលិចទឹក ចំនួនសរុប ៣៩.០៧ហិកតា (ក្នុងនោះដីតំបន់២ ចំនួន២៩.៩៨៨ហិកតា និងដីតំបន់៣ ចំនួន៩.០៨២ហិកតា)។

លោកបានថ្លែងបន្តថា ជនសង្ស័យទី១៖ ឈ្មោះ ឯម ប៊ុនថន អាយុ៣៧ឆ្នាំ មុខរបរកសិករ រស់នៅភូមិពាមឯក ឃុំពាមឯក ស្រុកឯក ភ្នំ ខេត្តបាត់ដំបង (មេក្លោង), ទី២៖ឈ្មោះ ជឿន រ៉ា អាយុ៤៧ឆ្នាំ (ស៊ីឈ្នួលបើកត្រាក់ទ័រឲ្យឈ្មោះ ឯម ប៊ុនថន), ទី៣៖ឈ្មោះ យួង អឿត អាយុ៥០ឆ្នាំ (ស៊ីឈ្នួលបើកត្រាក់ទ័រឲ្យឈ្មោះ ឯម ប៊ុនថន) រស់នៅភូមិតាគម ឃុំពាមឯក ស្រុកឯកភ្នំ និងទី៤៖ឈ្មោះ ប៉ាន់ ភន អាយុ៤០ឆ្នាំ រស់នៅភូមិគោកដូង ឃុំពាមឯក ស្រុកឯកភ្នំ (ត្រាក់ទ័រផ្ទាល់ ខ្លួនស៊ីឈ្នួលទន្ទ្រានដីព្រៃលិចទឹកក្នុងតំបន់ហាមឃាត់ ឲ្យឈ្មោះ ឯម ប៊ុនថន)។

បើតាមលោក ហួត សុភាព បន្ទាប់ពីចាប់ខ្លួនជនសង្ស័យទាំង៤នាក់ និងរឹបអូសបានវត្ថុតាង ជាមួយត្រាក់ទ័រ៤គ្រឿង និងម៉ូតូ១គ្រឿង នាំយកមកទីបញ្ជាការដ្ឋានកងរាជអាវុធហត្ថខេត្ត ដើម្បីសាកសួរនិងប្រគល់ឲ្យរដ្ឋបាលព្រៃឈើ ដើម្បីចាត់ការបន្តតាមនីតិវិធី៕ដោយនាគខៀវ

លោក សុខ លូ អភិបាលខេត្តបាត់ដំបង បានណែនាំដល់អាជ្ញាធរមូលដ្ឋាន មានភូមិឃុំ ត្រូវធ្វើយ៉ាងណាបង្កលក្ខណៈងាយស្រួល ដល់អ្នកវិនិយោគ ដែលមានបំណងចង់ធ្វើការវិនិយោគ នៅលើមូលដ្ឋានរបស់ខ្លួន ព្រោះកាលណា ដែលមានអ្នកវិនិយោគ គឺធ្វើឱ្យជីវភាពរបស់ប្រជាពលរដ្ឋ កាន់តែមានភាពល្អប្រសើរឡើង ហើយរដ្ឋបាលខេត្តស្វាគមន៍ជានិច្ច និងបង្កលក្ខណៈងាយស្រួល ដល់អ្នកវិនិយោគទាំងក្នុងស្រុក និងក្រៅស្រុកផងដែរ។

លោក សុខ លូ បានបញ្ជាក់ទៀតថា ក្រុមហ៊ុន ខេម៉ា ស៊ីធីគ្រុប ដែលកំពុងធ្វើការវិនិយោគ នៅក្នុងខេត្តបាត់ដំបង ហើយក្នុងនោះដែរ ខេត្តបាត់ដំបងក៏នៅតែបន្តចង់បានអ្នកវិនិយោគជាច្រើន មកវិនិយោគនៅក្នុងខេត្តបាត់ដំបង ជាពិសេសផ្នែកកសិឧស្សាហកម្ម ដែលខេត្តបាត់ដំបង សម្បូរទៅដោយផលកសិកម្មជាច្រើន មិនទាន់បានយកទៅកែច្នៃឱ្យអស់លទ្ធភាពនៅឡើយ ដោយសារខ្វះបច្ចេកទេស និងខ្វះអ្នកវិនិយោគផ្នែកនេះជាច្រើន។

លោក សុខ លូ ក៏បានថ្លែងអំណរគុណយ៉ាងជ្រាលជ្រៅ ជូនចំពោះក្រុមហ៊ុន ខេម៉ា ស៊ីធីគ្រុប ដែលបរិច្ចាគនូវធនធានរបស់ខ្លួន​ ដើម្បីផ្ដល់ជូនដល់ប្រជាពលរដ្ឋ ដែលកំពុងជួបការលំបាក ចំនួន៣,០០០ គ្រួសារនេះ ដែលនេះគឺជាសកម្មភាពមនុស្សធម៌ បង្ហាញពីការស្រឡាញ់គ្នា ការចេះជួយគ្នាទៅវិញទៅមកក្នុងនាមជាខ្មែរដូចគ្នា ដែលជាទឹកចិត្តមនុស្សធម៌មិនអាចកាត់ថ្លៃបាន។

លោកក៏បានអំពាវនាវដល់ប្រជាពលរដ្ឋ ទាំងអស់ ដែលគ្រប់អាយុបោះឆ្នោត សូមចូលរួមបោះឆ្នោត ជ្រើសរើសអ្នកតំណាងរាស្រ្ដ ដែលខ្លួនស្រឡាញ់ នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ ដើម្បីបំពេញជាតួនាទីប្រជាពលរដ្ឋ ពេញលក្ខណៈ ហើយចំពោះប្រជាពលរដ្ឋណា ដែលបាត់ ឬខូចអត្តសញ្ញាណប័ណ្ណ សូមប្រញាប់ទៅទាក់ទង ឃុំ សង្កាត់របស់ខ្លួន ដើម្បីធ្វើលិខិតបញ្ជាក់អត្តសញ្ញាណ ដើម្បីយកធ្វើជាឯកសារ សម្រាប់ប្រើប្រាស់ពេលបោះឆ្នោតនាពេលខាងមុខនេះ។

លោកសុខ លូ មានប្រសាសន៍លើកឡើងយ៉ាងដូច្នេះ ក្នុងឱកាស អញ្ជើញជាអធិបតីភាព ក្នុងពិធីសំណេះសំណាលសួរសុខទុក្ខ និងនាំយកអំណោយមនុស្សធម៌ ចែកជូនដល់ប្រជាពលរដ្ឋ ដែលកំពុងជួបការលំបាកចំនួន១,០០០គ្រួសារ ក្នុងឃុំជ្រោយស្ដៅ ស្រុកថ្មគោល នៅរសៀលថ្ងៃសុក្រ ម្សិលមិញ៕ដោយនាគខៀវ

សម្តេចតេជោ ហ៊ុន សែន បានបន្តអំពាវនាវដល់ម្ចាស់រោចក្រ និងកម្មករនិយោជិត ត្រូវរួមគ្នាធ្វើយ៉ាងណា ឱ្យរោងចក្រ​មួយ ក្លាយទៅជាសហគមន៍ សុខសាន្តមួយ។ ដូច្នេះទាំងកម្មករនិយោជិត និងម្ចាស់រោងចក្រ ត្រូវធ្វើបែបណា កុំឱ្យមានគ្រឿងញៀន កុំឱ្យមានបងតូច បងធំ កុំឱ្យមានជម្លោះ រវាងកម្មករនិយោជិត និងថៅកែរោងចក្រ និងកុំឱ្យក្លាយជាកន្លែងឆ្លងរីករាលដាលជំងឺអេដស៍។

ពាក់ព័ន្ធនឹងជំងឺអេដស៍នេះ ផងដែរ សម្តេចតេជោបានមានប្រសាសន៍ថា និន្មាការ នៃការចម្លងមេរោគអេដស៍មានការកើនឡើងនៅឆ្នាំ២០២៣នេះ ខណៈដែលក្រុមគោល ដែលមានការចម្លងច្រើនជាងគេ គឺក្រុមដែលមាននិន្នាការស្រលាញ់ភេទដូចគ្នា ក្នុងនោះគឺ ក្រុមបុរសស្រលាញ់បុរសដូចគ្នា។ដូច្នេះ សម្តេចេរតេជោបានអំពាវនាវកុំឱ្យភ្លើតភ្លើនភ្លេចខ្លួន​ និងត្រូវមានវិធានការការពារពីជំងឺអេដស៍នេះអោយបានគ្រប់ៗគ្នា។

សម្តេចហ៊ុន សែន មានប្រសាសន៍យ៉ាងដូច្នេះ ក្នុងឱកាស អញ្ជើញចុះជួបកម្មករ កម្មការិនី ជិត២ម៉ឺននាក់នៅភ្នំពេញ នាថ្ងៃសៅរ៍នេះ៕ដោយនាគខៀវ

មានប្រសាសន៍ ក្នុងពិធីបើកការដ្ឋានជួសជុលផ្លូវក្រាលបេតុងសរសៃដែក ចំនួន០២ខ្សែ ស្ថិតក្នុងសង្កាត់អូរចារ ក្រុងបាត់ដំបង លោក សុខ លូ អភិបាលខេត្តបាត់ដំបង បានលើកឡើងថា តាមការសន្យាជូនប្រជាពលរដ្ឋនៅសង្កាត់អូរចារ គឺត្រូវបានរៀបចំដាក់អំពូលសូឡាតាមដងផ្លូវនានានៅក្នុងសង្កាត់អូរចារ។

លោក សុខ លូ បានលើកឡើងថា សម្រាប់ផ្លូវនៅក្នុងសង្កាត់អូរចារ​ ត្រូវបាន​ជួសជុលក្រាលបេតុង បានរួចស្រេចមួយចំនួនធំ ក្នុងនោះមានផ្លូវតូចៗ ជាច្រើនទៀតកំពុងបន្តធ្វើ។ ដូច្នេះស្នើឱ្យអាជ្ញាធរសង្កាត់អូរចារ ខិតខំដោះស្រាយផ្លូវតូចៗ ទាំងនោះ ដោយប្រើប្រាស់នូវថវិកា ដែលសង្កាត់មាន ដោយមិនត្រូវពឹងតែលើរដ្ឋបាលខេត្ត ឬរដ្ឋបាលក្រុងតែមួយមុខនោះទេ ធ្វើយ៉ាងណា ព្យាយាមដោះស្រាយផ្លូវតូចៗ ជូនប្រជាពលរដ្ឋ ឱ្យបានប្រើប្រាស់ ហើយរដ្ឋបាលខេត្ត ក៏នៅតែបន្តជួយដូចគ្នា។

លោកក៏បានស្នើសុំដល់រដ្ឋាករទឹក ធ្វើការដាក់កន្លែងទុយោ សម្រាប់ភ្ជាប់ពេលមានអគ្គិភ័យកើតឡើង ពិសេសកន្លែង ដែលពិបាករថយន្តអគ្គិភ័យចូលទៅដល់ទីតាំង។

លោក សុខ លូ ក៏បានថ្លែងអំណរគុណយ៉ាងជ្រាលជ្រៅ ជូនចំពោះ លោក កែវ រតនៈ រដ្ឋមន្រ្តីប្រតិភូអមនាយករដ្ឋមន្រ្តី អគ្គនាយកអគ្គិសនីកម្ពុជា ដែលបានផ្ដល់នូវអំពូលសូឡានៅសង្កាត់អូរចារនេះ ចំនួន៣ភូមិជូនប្រជាពលរដ្ឋផងដែរ។

លោកក៏បានសំណូមពរដល់ប្រជាពលរដ្ឋ នៅតាមដងផ្លូវ សូមមេត្តាសម្រួលដល់ក្រុមការងារជួសជុលផ្លូវ ក្នុងនោះត្រូវចូលរួមសហការ ដោយត្រូវផ្តល់ជាចំណីផ្លូវ ឬថយរបងរបស់ខ្លួន ដើម្បីធ្វើការពង្រីកផ្លូវកាន់តែធំ ហើយអាជ្ញាធរមូលដ្ឋាន ត្រូវធ្វើការសម្រួលដល់ប្រជាពលរដ្ឋ ក្នុងការថយរបងរបស់ខ្លួន សម្រាប់ផលប្រយោជន៍ប្រជាពលរដ្ឋជាធំ។

លោកក៏បានធ្វើការណែនាំដល់ក្រុមការងារជំនាញ ពិនិត្យមើលផ្លូវថ្នល់ណា ដែលបានជួសជុល និងកសាងដោយចាក់កៅស៊ូ ឬបេតុងហើយ ត្រូវរៀបចំអ៊ុតជាគំនូសនៅតាមដងផ្លូវ ឱ្យបានស្អាត។ ដោយឡែកសម្រាប់ផ្លូវចាស់ៗ ណាមិនមានប៉ះដល់គម្រោងកសាងស្ដារប្រព័ន្ធរំដោះទឹកកខ្វក់ទេ ត្រូវរៀបចំអ៊ុតគំនូសសម្គាល់ជាបណ្ដើរៗ និងត្រូវប្រើប្រាស់ថ្នាំ ដែលមានគុណភាពខ្ពស់ ប្រើប្រាស់បានរយៈពេលយូរអង្វែង ផងដែរ។

បញ្ជាក់ថា ពិធីនេះធ្វើឡើង នៅថ្ងៃសុក្រនេះ ដោយ
ជួសជុលផ្លូវក្រាលបេតុងសរសៃដែក ចំនួន០២ខ្សែ ដែលផ្លូវលេខ៥៤២ ចាប់ពីផ្លូវជាតិលេខ៥ រហូតដល់ផ្លូវលេខ៥០៧ ប្រវែង ៦២១ម៉ែត្រ ទទឹង ៨ម៉ែត្រ និងដាក់លូរំដោះទឹកចំនួន ៥២០កង់ និងកំណាត់ផ្លូវមុខវត្តទួលដូនប៉ុក ដល់ផ្លូវលេខ៥៤០ ប្រវែង៥០៣ម៉ែត្រ ទទឹង ៨ម៉ែត្រ ស្ថិតក្នុងភូមិអញ្ចាញ សង្កាត់អូរចារ ក្រុងបាត់ដំបង៕ដោយនាគខៀវ

លោកសុខ លូ អភិបាលខេត្តបាត់ដំបង និងប្រធានគណៈបញ្ជាការឯកភាពរដ្ឋបាលខេត្តបានមានប្រសាសន៍ថា លើកឡើងថា ថ្មីៗនេះមានករណីមួយបាន​កើតឡើងនៅក្នុងស្រុកមួយ​ចំនួននៃខេត្តបាត់ដំបង ដែលកើតឡើងនៅតាមភូមិមួយចំនួននៅក្នុងស្រុកបាណន់ និងស្រុករតនមណ្ឌល ទាក់ទងទៅនឹង ក្រុមជនជាតិឥណ្ឌាមួយក្រុម រកស៊ីចងការប្រាក់ជាមួយប្រជាពលរដ្ឋខ្មែរ ដោយគ្រាន់តែយកអត្តសញ្ញាណប័ណ្ណសញ្ជាតិខ្មែរ ឬឯកសារបញ្ជាក់ផ្សេងៗទៀត ធ្វើជាទ្រព្យសម្រាប់បញ្ចាំ ក្នុងនោះសម្រាប់ទឹកប្រាក់ចំនួន ២០ម៉ឺនរៀល ចុះក្រោមគឺត្រូវយកឯកសារស្រាលៗ ដូចជាអត្តសញ្ញាណប័ណ្ណ សំបុត្រកំណើត សៀវភៅគ្រួសារ បណ្ណបើកបរ កាតគ្រីជាដើម ធ្វើជាទ្រព្យសម្រាប់បញ្ចាំ ហើយចំពោះទឹកប្រាក់ចាប់ពី ៤០ ម៉ឺនឡើងគឺតម្រូវយកឯកសារ ដែលមានលក្ខណៈសំខាន់ៗ លើសពីឯកសារទាំងអស់ខាងលើនេះ ធ្វើជាថ្នូរសម្រាប់បញ្ចាំ មិនត្រឹមតែប៉ុណ្ណោះ ក្រុមជនជាតិឥណ្ឌាដែលដើរចងការប្រាក់ឥណទាននេះគឺ តម្រូវឲ្យប្រជាពលរដ្ឋខ្មែរយើងបង់ប្រាក់ដើម និងការប្រាក់ជារៀងរាល់ថ្ងៃ មិនតម្រូវឲ្យមាន​ការបង់ប្រាក់​ជារៀងរាល់​ខែនោះទេ ក្រៅពីនេះក៏មានជា ស្ថាប័នឥណទាន ឬអង្គការមួយចំនួន​មានការយកនូវឯកសារ​សម្គាល់ អត្តសញ្ញាណបុគ្គលទាំងនេះ មកធ្វើជាទ្រព្យសម្រាប់បញ្ចាំផងដែរ ដែលវាអាចជាការព្រមព្រៀងរវាងបុគ្គល និងភាគីខាងនីតិបុគ្គល មួយជាលក្ខខណ្ឌណាមួយប្រសិនបើប្រជាពលរដ្ឋគ្មានទ្រព្យក្នុងការដាក់បញ្ចាំជាថ្នូរនោះ។

ពាក់ព័ន្ធទៅនឹងបញ្ហានេះ លោក សុខ លូ បានធ្វើការក្រើនរំលឹកដល់ អាជ្ញាធរមូលដ្ឋាន ទាំងអស់ ត្រូវធ្វើការតាមដាន និងយកចិត្តទុកដាក់លើបញ្ហានេះ ឲ្យមែនទែន ព្រោះនេះជាករណីដែលល្មើសច្បាប់ ដែលខុសពីគោលការណ៍កំណត់របស់ រាជរដ្ឋាភិបាលកម្ពុជា ក្នុងនោះត្រូវធ្វើការស្រាវជ្រាវ និងបង្ក្រាបនូវករណីនេះ ឲ្យបានឆាប់រហ័សទាន់ ពេលវេលា ហើយចំពោះក្រុមដែលដើរចងការប្រាក់ឥណទាន នៅតាមភូមិក្នុងស្រុកទាំងនោះ ត្រូវធ្វើការចាត់វិធានការទៅតាមច្បាប់ ជាធរមាន និងធ្វើការពន្យល់ណែនាំដល់ប្រជាពលរដ្ឋ ឱ្យមានការយល់ដឹងខ្ពស់អំពីបញ្ហានេះ ជៀសវាងមានការចាញ់បោកពីសំណាក់ជនទុច្ចរិតណាមួយ។

អភិបាលខេត្តបាត់ដំបង បានមានប្រសាសន៍ក្រើនរំលឹក និងដាស់តឿនទៅដល់សាធារណជន ប្រជាពលរដ្ឋ ដែលរស់នៅក្នុងខេត្តបាត់ដំបង ឲ្យមានការយកចិត្តទុកដាក់និង ចូលរួមសហការគ្នា ដើម្បីទប់ស្កាត់ កុំឲ្យបញ្ហានេះមានការកើតឡើង ជាបន្តបន្ទាប់ទៀត មិនត្រូវធ្វើការផ្ដល់ជាអត្តសញ្ញាប័ណ្ណ ឬឯកសារណាមួយជាទ្រព្យបញ្ចាំ សម្រាប់ជាការខ្ចីប្រាក់ឡើយ ព្រោះឯកសារអត្តសញ្ញាប័ណ្ណនេះ គឺជាឯកសារសំខាន់សម្រាប់ យកទៅប្រើប្រាស់ពេលបោះឆ្នោតខាងមុខនេះ ដូចនេះគោលបំណងនៃក្រុមនេះគឺដើម្បីចង់ឱ្យដំណើរការបោះឆ្នោតមិនឱ្យប្រព្រឹត្តិដោយរលូននោះទេ ដូចនេះសូមប្រជាពលរដ្ឋ សូមធ្វើការប្រុងប្រយ័ត្ន ចំពោះបញ្ហានេះ។

លោកបញ្ជាបែបនេះនៅរសៀល ថ្ងៃពុធ ម្សិលមិញ ក្នុងឱកាសដឹកនាំ កិច្ចប្រជុំគណៈបញ្ជាការឯកភាពខេត្តបាត់ដំបង៕ដោយនាគខៀវ

សម្ដេចអគ្គមហាពញាចក្រី ហេង សំរិន ប្រធានរដ្ឋសភានៃព្រះរាជាណាចក្រកម្ពុជា នៅព្រឹកថ្ងៃពុធ ទី២១ ខែមិថុនា ឆ្នាំ២០២៣ នេះ បានអញ្ជើញដឹកនាំកិច្ចប្រជុំគណៈកម្មាធិការ អចិន្ត្រៃយ៍រដ្ឋសភា នៅវិមានរដ្ឋសភា។

ជាលទ្ធផលកិច្ចប្រជុំបានអនុម័ត កំណត់កាលបរិច្ឆេទបន្តសម័យប្រជុំរដ្ឋសភាលើកទី៩ នីតិកាលទី៦ នៅព្រឹកថ្ងៃសុក្រទី២៣ ខែមិថុនាឆ្នាំ២០២៣ ចុងសប្តាហ៍នេះ ដើម្បីពិភាក្សា អនុម័តសេចក្តីព្រាងច្បាប់ចំនួន៦ មាន៖
១- សេចក្តីព្រាងច្បាប់ស្តីពី វិសោធនកម្មច្បាប់បោះឆ្នោត។

២- សេចក្តីព្រាងច្បាប់ស្ដីពី ការអនុម័តយល់ព្រមលើការធានា ទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ខ្មែរ អេឡិកទ្រីខល ផៅវ័រ សម្រាប់ គម្រោងអភិវឌ្ឍវារីអគ្គិសនីស្ទឹងឫស្សីជ្រុំកណ្តាល អានុភាព ៧០មេហ្កាវ៉ាត់ ផ្គួបគ្នាជាមួយ គម្រោងអភិវឌ្ឍវារីអគ្គិសនីស្ទឹងវាលថ្មកំបុត អានុភាព ១០០មេហ្កាវ៉ាត់ ខេត្តកោះកុង។

៣- សេចក្តីព្រាងច្បាប់ស្ដីពី ការអនុម័តយល់ព្រមលើការធានា ទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ឡាក់ឃី សូឡា ផៅវ័រ ឯ.ក សម្រាប់គម្រោងអភិវឌ្ឍស្ថានីយផលិតអគ្គិសនី ដើរដោយថាមពលពន្លឺព្រះអាទិត្យ អានុភាព ៨០មេហ្កាវ៉ាត់ ខេត្តព្រៃវែង។

៤- សេចក្តីព្រាងច្បាប់ស្តីពី ការអនុម័តយល់ព្រមលើការធានា ទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ស្នេថេក ខូ អិលធីឌី សម្រាប់ គម្រោងអភិវឌ្ឍស្ថានីយផលិតអគ្គិសនីដើរដោយថាមពលពន្លឺព្រះអាទិត្យ អានុភាព ១៥០មេហ្កាវ៉ាត់ ខេត្តពោធិ៍សាត់។

៥-សេចក្តីព្រាងច្បាប់ស្តីពី ការអនុម័តយល់ព្រមលើការធានា ទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ស្នេថេក ខូ អិលធីឌី សម្រាប់ គម្រោងអភិវឌ្ឍស្ថានីយផលិតអគ្គិសនីដើរដោយថាមពលពន្លឺព្រះអាទិត្យ អានុភាព ៦០មេហ្កាវ៉ាត់ ខេត្តស្វាយរៀង។

៦- សេចក្តីព្រាងច្បាប់ស្តីពី ការអនុម័តយល់ព្រមលើការធានា ទូទាត់របស់រាជរដ្ឋាភិបាលនៃព្រះរាជាណាចក្រកម្ពុជា ឱ្យក្រុមហ៊ុន ស្នេថេក ខូ អិលធីឌី សម្រាប់គម្រោងអភិវឌ្ឍស្ថានីយផលិតអគ្គិសនីដើរដោយថាមពលពន្លឺព្រះអាទិត្យ អានុភាព ៦០មេហ្គាវ៉ាត់ ខេត្តកំពង់ឆ្នាំង៕ដោយនាគខៀវ

ខេត្តបាត់ដំបង៖អាជ្ញាធរខេត្តបាត់ដំបងបានចេញសេចក្ដីប្រកាសព័ត៌មាន ធ្វើការបដិសេធចោលទាំងស្រុងចំពោះការបង្ហោះព័ត៌មានថា មានការចាក់ដីរំលោភចូលស្ទឹងសង្កែ និងសាងសង់សំណង់រឹង។

សេចក្តីបំភ្លឺព័ត៌មាន របស់រដ្ឋបាលខេត្តបាត់ដំបងនៅថ្ងៃទី២០ ខែវិច្ឆិនា ឆ្នាំ២០២៣ បន្ទាប់ពីមានករណីហ្វេសប៊ុកចំនួនពីរ បានចុះផ្សាយព័ត៌មានចោទប្រកាន់ទៅលើអាជ្ញាធរមន្ត្រីមូលដ្ឋានថាបានបណ្ដែតបណ្ដោយឲ្យមានការចាក់ដីលុបស្ទឹងសង្កែ។

ខាងក្រោមនេះគឺសេចក្ដីប្រកាសព័ត៌មានរបស់រដ្ឋបាលខេត្តបាត់ដំបង៖

រដ្ឋបាលខេត្តបាត់ដំបងមានកិត្តិយស សូមជម្រាបជូនបងប្អូនប្រជាពលរដ្ឋ និងសាធារណជនជ្រាបថា៖ ថ្មីៗនេះមានការចុះផ្សាយព័ត៌មាន តាមបណ្តាញសង្គមជាគណនីហ្វេសប៊ុកផេក ឈ្មោះ មាតាធម្មជាតិកម្ពុជា Mother Nature Cambodia (ស្ទឹងសង្កែដែលជាស្ទឹងប្រវត្តិសាស្ត្រមួយ របស់ប្រទេសកម្ពុជាកំពុងត្រូវបានរំលោភបំពានដោយអ្នក មានលុយ មានអំណាចចាក់ដីរំលោភចូលស្ទឹងសង្កែ និងការសាងសង់សំណង់រឹងនៅលើដីនោះ ហើយមន្ត្រីមូលដ្ឋាន ហាក់មិនអើពើនឹងការរំលោភបំពានទាល់តែសោះ) ដែលបានចុះផ្សាយនៅថ្ងៃទី១៩ ខែមិថុនា ឆ្នាំ២០២៣ នេះ និងគណនី ហ្វេសប៊ុកឈ្មោះ លោក មេភូមិ (ដីមាត់ស្ទឹងសង្កែ ខេត្តបាត់ដំបង ដែលចាក់ដីលុបចូលស្ទឹងសង្កែជិតដល់កណ្ដាលស្ទឹង ដើម្បីធ្វើជាកម្មសិទ្ធិឯកជនគឺជារបស់កូនលោកប្រាជ្ញ ចន្ទ ដែលជាប្រធានគ.ជ.ប សព្វថ្ងៃ។

សេចក្ដីប្រកាសរបស់ខេត្តបាត់ដំបងបន្តថា ករណីចោទប្រកាន់របស់គណនីហ្វេសប៊ុកផេកឈ្មោះ មាតាធម្មជាតិកម្ពុជា Mother Nature Cambodia និងគណនីហ្វេសប៊ុក ឈ្មោះ លោកមេភូមិ នេះគឺជាព័ត៌មានបែបញុះញង់ បំភាន់ បំភ្លៃការពិតក្នុងគោលបំណង មានចេតនាទុច្ចរិត វាយប្រហារ មកលើអាជ្ញាធរក្នុងផ្លូវនយោបាយ ដែលព្រះរាជាណាចក្រកម្ពុជា កាន់តែកៀកឈានឆ្ពោះទៅរក ការបោះឆ្នោតជ្រើសតាំងតំណាងរាស្ត្រនីតិកាលទី៧ខាងមុខ។

ហេតុនេះរដ្ឋបាលខេត្តបាត់ដំបងសូមធ្វើការបំភ្លឺដូចតទៅ៖

ក្រុមការងាររដ្ឋបាលខេត្ត រដ្ឋបាលស្រុកសង្កែ និងមន្ទីរ អង្គភាពជំនាញបានចុះទៅត្រួតពិនិត្យ ដោយផ្ទាល់ជាក់ស្ដែងនៅនឹងទីតាំងការដ្ឋានដោយពិនិត្យឃើញថាម្ចាស់ដី ឈ្មោះ ចៅ ម៉ាដូនេត្រ នៅភូមិបោះពោធិ៍ ឃុំអូរដំបង១ ស្រុកសង្កែ ខេត្តបាត់ដំបង ដែលបានសាងសង់អគារនៅលើដីរបស់ខ្លួន ស្របតាមប្លង់កម្មសិទ្ធិ (វិញ្ញាបនបត្រសម្គាល់ម្ចាស់អចលនវត្ថុ) មិនប៉ះពាល់ដីចំណីស្ទឹងសង្កែទេ និងបានចាក់បេតុងសាងសង់ច្រាំងស្ទឹង ទៅតាមលំនាំច្រាំងចាស់ មិនមានការរំលោភយកស្ទឹងដូច ការចោទប្រកាន់នោះទេ។

ចំពោះបច្ចេកទេសនៃការសាងសង់គឺលើកដីទប់សិនបន្ទាប់ពីសាងសង់រួចរាល់ បានកាយដីចេញវិញអស់ហើយ មិនមានការរាំងស្ទះមុខទឹក ហើយថែមទាំងបានចាក់បេតុងសាងសង់ច្រាំងស្ទឹង នៅខាងមុខសាលាឃុំអូរដំបង១ ប្រវែង១០០០ ម៉ែត្រ ដើម្បីការពារការបាក់ដី ដែលកន្លងមក នៅចំណុចទីតាំងនេះ គឺចំមុខទឹកបុកខ្លាំងនៅរដូវវស្សាធ្វើឱ្យបាក់ច្រាំងស្ទឹងជាបន្តបន្ទាប់ ស្ទើរតែធ្វើចរាចរណ៍ទៅមកលែងបាននៅលើដងផ្លូវមុខសាលាឃុំអូរដំបង១។

បច្ចុប្បន្នបានធ្វើការសាងសង់ផ្លូវបេតុងប្រវែង២០០០ម៉ែត្ររួចរាល់ ធ្វើចរាចរណ៍ទៅមកងាយស្រួល បងប្អូនប្រជាពលរដ្ឋសាទរ។ ដូច្នេះសកម្មភាពចាក់ដីធ្វើច្រាំងស្ទឹង មិនមានផលប៉ះពាល់ដល់លំហូរ ទឹកស្ទឹងសង្កែទេ ប៉ុន្តែថែមទាំងបានការពារយ៉ាងរឹងមាំការបាក់ច្រាំងស្ទឹងសង្កែទៀតផង។

ចំពោះការចោទប្រកាន់ថា បុគ្គលនេះឬបុគ្គលនោះ ជាម្ចាស់កម្មសិទ្ធិ លើដី ដូចការចុះផ្សាយលើបណ្ដាញសង្គម របស់គណនីហ្វេសប៊ុកផេកឈ្មោះ មាតាធម្មជាតិកម្ពុជា Mother Nature Cambodia និងគណនី ហ្វេសប៊ុកឈ្មោះ លោក មេភូមិ រដ្ឋបាលខេត្តបាត់ដំបង សូមច្រានចោលទាំងស្រុង នៅព័ត៌មាន មិនពិតទាំងអស់នេះ៕ដោយនាគខៀវ

លោក សុខ លូ បានអំពាវនាវ លោកតា លោកយាយ អ៊ំពូមីង និងបងប្អូនប្រជាពលរដ្ឋទាំងអស់ សូមមេត្តាអញ្ជើញទៅបោះឆ្នោតជ្រើសតាំងតំណាងរាស្ត្រ នីតិកាលទី៧ ឱ្យបានគ្រប់ៗគ្នា នៅថ្ងៃទី ២៣ ខែកក្កដា ឆ្នាំ២០២៣។

លោកក៏បានអំពាវនាវ ដល់បងប្អូនប្រជាពលរដ្ឋបន្តខិតខំប្រឹងប្រែង ដើម្បីជីវភាពគ្រួសារ ព្រោះថាអំណោយ របស់កាកបាទក្រហមកម្ពុជា អាចជួយសម្រាលការលំបាក ដល់បងប្អូនតែមួយគ្រាប៉ុណ្ណោះ ហើយសូមបងប្អូនទាំងអស់ចូលរួមថែរក្សាសុខសន្តិភាព ឱ្យបានគង់វង្ស ព្រោះមានតែសន្តិភាព ទេ ដែលអាចឱ្យប្រទេសយើងមានការអភិវឌ្ឍ រីកចម្រើនរុងរឿងបានជាមួយគ្នា។

លោក សុខ លូ អភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជា ខេត្តបាត់ដំបង អំពាវនាវ នៅរសៀលថ្ងៃអង្គារ នេះក្នុងឱកាស អញ្ជើញសំណេះសំណាលសួរសុខទុក្ខ និងនាំយកអំណោយមនុស្សធម៌ជូនប្រជាពលរដ្ឋងាយរងគ្រោះបំផុតចំនួន ២០០គ្រួសារ ក្នុងស្រុកបាណន់។

ក្នុងឱកាសជួបសំណេះសំណាល ជាមួយប្រជាពលរដ្ឋ ទាំងអស់ លោក សុខ លូ បានសម្តែងនូវក្តីសោមនស្សរីករាយ និងនាំនូវការផ្តាំផ្ញើសួរសុខទុក្ខ ក្តីនឹករលឹកពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បើទោះបីជា សម្តេច មិនបានអញ្ជើញផ្ទាល់ ប៉ុន្តែតាមរយៈសហការីនៃកាកបាទក្រហមកម្ពុជា សម្តេចតែងតែផ្តាំផ្ញើនូវការសាកសួរសុខទុក្ខ ការគិតគូរពីជីវភាពរស់នៅរបស់បងប្អូន ប្រជាពលរដ្ឋទាំងអស់ ជាពិសេសនាំនូវសារអប់រំថែទាំសុខភាព ត្រូវគិតគូរថែទាំទាំងសុខភាពផ្លូវកាយ ផ្លូវចិត្តឱ្យបានល្អ និងបន្តចូលរួមទប់ស្កាត់ជំងឺកូវីដ-១៩។

លោកក៏បានក្រើនរំលឹកដល់ប្រជាពលរដ្ឋ ត្រូវពិសាទឹកដាំឆ្អិន រស់នៅមានអនាម័យ សម្រាកក្នុងមុងជានិច្ច និងលើកកម្ពស់សុវត្ថិភាព អាហារប្រចាំថ្ងៃ តាមរយៈការដាំបន្លែបង្ការក្នុងគ្រួសារ ដើម្បីបានសុខភាពល្អផង និងកាត់បន្ថយការចំណាយក្នុងគ្រួសារផងដែរ។

លោក សុខ លូ ក៏បានថ្លែងអំណរគុណយ៉ាងជ្រាលចំពោះសប្បុរសជន គ្រប់មជ្ឈដ្ឋាន ដែលបានបរិច្ចាគធនធានថវិកាប្រកបដោយទឹកចិត្តជ្រះថ្លាជូន សាខាកាកបាទក្រហមកម្ពុជាខេត្ត ក្នុងឱកាសទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ដើម្បីឱ្យសាខាកាកបាទក្រហមកម្ពុជាខេត្ត អាចចុះបំពេញប្រតិបត្តិការមនុស្សធម៌បានដូចនាពេលនេះ និងជាបន្តបន្ទាប់ទៀត។

សូមបញ្ជាក់ថា អំណោយផ្តល់ជូនគ្រួសារនីមួយៗទទួលបាន ៖ អង្ករ ២៥គីឡូក្រាម, មី១កេស, ទឹកបរិសុទ្ធ១កេស,ត្រីខ ១០កំប៉ុង, ទឹកត្រី ១យួរ, ទឹកស៉ីអ៉ីវ១យួរផងដែរ៕ដោយនាគខៀវ

ឯកឧត្តម បណ្ឌិត ហ៊ុន ម៉ាណែត សមាជិកគណៈអចិន្ត្រៃយ៍ នៃគណៈកម្មាធិការកណ្តាលគណបក្សប្រជាជនកម្ពុជា និងជាប្រធានយុវជនគណបក្សថ្នាក់កណ្តាល មានប្រសាសន៍សំខាន់ៗរបស់ថ្លែងក្នុងពិធីសំណេះសំណាលជាមួយក្រុមការងារយុវជនគណបក្សប្រជាជនកម្ពុជាខេត្តបាត់ដំបង (ថ្ងៃអង្គារ ទី២០ ខែមិថុនា ឆ្នាំ២០២៣)៖

១. សូមចូលរួមអបអរសាទរចំពោះពិធីរំឭកខួបលើកទី ៤៦ ឆ្នាំ នៃដំណើរឆ្ពោះទៅរកការរំដោះជាតិចេញពីរបបប៉ុលពត ដែលបានកាប់សម្លាប់ប្រជាពលរដ្ឋ និងបំផ្លិចបំផ្លាញសមិទ្ធផលជាតិ ដោយបង្កនូវភាពសោកសង្រេងដល់ប្រជាជនកម្ពុជាគ្រប់ក្រុមគ្រួសារ និងមហាវិនាសកម្មដល់សង្គមជាតិកម្ពុជាទាំងមូល ។ ទោះបីព្រឹត្តិការណ៍ទាំងនេះ បានក្លាយជារឿងរ៉ាវប្រវត្តិសាស្ត្រទៅហើយក្តី ប៉ុន្តែសច្ចភាពមួយដែលមិនសាបសូន្យ គឺ សម្តេចតេជោ រួមនឹងថ្នាក់ដឹកនាំគណបក្សប្រជាជនកម្ពុជា ជាវីរជនដែលបានរំដោះជាតិ និងប្រជាជនឱ្យរួចផុតពីរបបសាហាវយង់ឃ្នង ប៉ុល ពត ហើយក្នុងរយៈពេលប្រមាណ ៤៤ ឆ្នាំ កន្លងមកនេះ ពួកគាត់ក៏បាននៅបន្តការពារ និងបម្រើប្រជាជន និងមិនធ្លាប់បោះបង់ចោលប្រជាជនទ្បើយ ទោះក្នុងកាលៈទេសៈលំបាកបំផុតយ៉ាងណាក៏ដោយ «ទីណាប្រជាជនមានទុក្ខ គឺមានមុខរបស់គណបក្សប្រជាជនកម្ពុជា»។

២. សូមសម្តែងនូវការដឹងគុណចំពោះសមិទ្ធផល ដែលយុវជនរៀមច្បងបានតស៊ូ លះបង់ និងបន្សល់ទុកឱ្យរហូតមកដល់បច្ចុប្បន្ននេះ ហើយក៏សូមប្តេជ្ញាចិត្ត និងរួមកម្លាំងយកជ័យជម្នះនៅថ្ងៃទី២៣ ខែកក្កដា ខាងមុខ ដើម្បីថែរក្សាសមិទ្ធផលដ៏ថ្លៃថ្លាទាំងនេះ និងបន្តអភិវឌ្ឍឱ្យកាន់តែរីកចម្រើនទៅមុខបន្ថែមទៀត លើមូលដ្ឋាននៃម្លប់រាជានិយមអាស្រ័យរដ្ឋធម្មនុញ្ញ, គោលការណ៍លទ្ធិប្រជាធិបតេយ្យសេរីពហុបក្ស, នីតិរដ្ឋ និងការប្រកាន់ខ្ជាប់នូវផលប្រយោជន៍ជាតិ និងប្រជាជនជាធំ។

៣. គណបក្សប្រជាជនកម្ពុជា គឺជាបង្អែកដ៏រឹងមាំរបស់ប្រជាជន ក្នុងការធានាការពារសន្តិភាព ស្ថិរភាព ភាពសុខសាន្ត វឌ្ឍនភាព និងវិបុលភាព ហើយក៏អាចនិយាយបានថា គឺជាគណបក្សតែមួយគត់ ដែលតែងបានលះបង់អ្វីៗគ្រប់យ៉ាងដើម្បីជាតិ និងប្រជាជន ។ ការទទួលបាននូវទំនុកចិត្តរបស់ប្រជាជន ដែលជាជោគជ័យធំរបស់គណបក្សយើងកន្លងមកនេះ គឺដោយសារគណបក្សបានកសាងសមិទ្ធផលជាច្រើនជូនជាតិទាំងក្នុងអតីតកាល និងបច្ចុប្បន្ន ហើយក៏មានចក្ខុវិស័យវែងឆ្ងាយសម្រាប់អនាគតផងដែរ។ ដូច្នេះ ក្នុងនាមយើងទាំងអស់គ្នាជាកោសិកាបន្តវេនរបស់គណបក្ស គឺចាំបាច់ត្រូវបន្តនូវស្មារតី, ប្រពៃណី, គំរូវីរភាព និងបេសកកម្មដ៏ឧត្តុង្គឧត្តមថ្លៃថ្លារបស់បក្ស ព្រមជាមួយនឹងការបន្តពង្រឹងសាមគ្គីឯកភាពផ្ទៃក្នុងឱ្យបានល្អរឹងមាំ ដើម្បីរក្សាប្រៀបឈ្នះរបស់បក្ស និងភាពសុខសាន្តរបស់ប្រជាជនជានិច្ចនិរន្តរ៍។

៤. ការជួបជុំរបស់សកម្មជនយុវជនបក្សក្នុងថ្ងៃនេះ គឺជាលទ្ធផលនៃការរៀបចំរចនាសម្ព័ន្ធ និងការបែងចែកភារកិច្ចការងារ ក៏ដូចជាការទទួលខុសត្រូវបានច្បាស់លាស់រឹងមាំ ដែលពិតជាបានបង្ហាញអំពីសាមគ្គីឯកភាពផ្ទៃក្នុងល្អរបស់កម្លាំងសកម្មជនយុវជនគណបក្សយើង សំដៅចូលរួមចំណែកបំពេញបេសកកម្ម និងសម្រេចសមិទ្ធផលវិជ្ជមានកាន់តែច្រើនឡើងថែមទៀតជូនជាតិ និងប្រជាជន ស្របតាមបុព្វហេតុ និងគោលនយោបាយដ៏ត្រឹមត្រូវរបស់គណបក្សប្រជាជនកម្ពុជា។ សន្ទស្សន៍ឆ្នាំ២០២២ អាចជាតម្រុយវិជ្ជមានសម្រាប់បក្សយើងក្នុងឆ្នាំ២០២៣ នេះ ប៉ុន្តែយ៉ាងណាក៏ដោយ យើងទាំងអស់គ្នាចាំបាច់ត្រូវបន្តកិច្ចខិតខំប្រឹងប្រែងបម្រើប្រជាពលរដ្ឋឱ្យបានកាន់តែប្រសើរឡើងបន្ថែមទៀត ដើម្បីធានាប្រៀបឈ្នះជានិច្ចនិរន្តរ៍៕ដោយនាគខៀវ

ខេត្តកំពង់ចាម​៖ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់​ និង​នេសាទ​ បាន​ថ្លែង​ប្រាប់​ បងប្អូន​ប្រជាកសិករ​ ​ឱ្យ​សន្សំ​សំចៃ​​រក្សា​ទឹក​ទុក​ សម្រាប់​ប្រេីប្រាស់​ពេល​អាកាសធាតុ​រាំងស្ងួត​ ​ក្នុង​កូន​រដូវ​ប្រាំង​ឆ្នាំ​នេះ​ ពោលគឺ​កុំ​ឱ្យ​មាន​ការ​បង្ហូរ​ទឹក​ចោល​ឱ្យ​សោះ​ ព្រោះ​កូន​រដូវ​ប្រាំង​ឆ្នាំ​នេះ​ អាចកើតឡើង នឹងអូសបន្លាយ​ពេល​យូរ​។

លោកថ្លែង​បែប​នេះក្នុងពិធីបើកការរដ្ឋាន​ស្ថាបនា​ផ្លូវក្រាលកៅស៊ូ ប្រភេទ DBST ចំនួន ៤ខ្សែ សរុប​ប្រវែង២២,៥៣គម ក្នុងក្របខណ្ឌគម្រោងពិពិធកម្មកម្ពុជា នៅភូមិក្រដាស (ខ) ឃុំតាំងក្រសាំង ស្រុកបាធាយ​ ខេត្ត​កំពង់ចាម​ នៅថ្ងៃអង្គារនេះ។

រដ្ឋមន្ត្រី​ក្រសួង​កសិកម្ម​ បានថ្លែងថា​ រាជរដ្ឋាភិបាល​តែងតែ​មាន​ការ​គិតគូរ​ ចង់​ឱ្យ​បងប្អូន​ប្រជាពលរដ្ឋ​ ធ្វើ​ស្រែ​ទទួល​បាន​ផល​ច្រើន​ និង​មាន​តម្លៃ​ខ្ពស់​​ ប៉ុន្តែ​កសិផល​យេីង​មាន​តម្លៃ​ខ្ពស់​ពេក​ កូនចៅ​យេីង​ក៏​គ្មាន​អី​ហូប​ចុក​ដែរ​ ព្រោះ​អ្នក​ដែល​ធ្វើការ​រោងចក្រ​ ឬ​អ្នក​រៀនសូត្រ​នៅ​រាជធានី​ ​តែងតែ​ទិញ​ចំណីអាហារ​ពី​​​គេ​ហូប​ដូច​តែ​គ្នា​ហ្នឹង​ ​អញ្ចឹង​ហើយ​បាន​ជា​យេីង​រៀបចំ​ធ្វើ​គម្រោងពិពិធកម្ម វិស័យកសិកម្មកម្ពុជា​ ដេីម្បី​ឱ្យ​បងប្អូន​ប្រជាពលរដ្ឋ​ មាន​ការ​ចំណេញ​ តាម​រយៈ​ការធ្វើដំណើរ​បាន​ស្រួល​ ក៏ដូចជា​ការ​ផ្លាស់ប្តូរពាណិជ្ជកម្ម និង​ការ​ដឹកកសិផលទៅកាន់ទីផ្សារ បស់ប្រជាកសិករ សំដៅជំរុញការអភិវឌ្ឍន៍សេដ្ឋកិច្ច មូលដ្ឋាន លើកកម្ពស់កម្រិតជីវភាពប្រជាជន នៅតាមជនបទ ដើម្បីបង្ខិតជនបទ​ ឱ្យមានជីវភាពប្រហាក់ប្រហែលនឹងទីប្រជុំជនផងដែរ​។​ ​

លោក សាន​ វិសាល​ រដ្ឋលេខាធិការ​ក្រសួង​អភិវឌ្ឍន៍ជនបទ និងជាប្រធានសម្របសម្រួលគម្រោងពិពិធកម្មវិស័យកសិកម្មកម្ពុជា​ បានថ្លែងថា​​ សម្តេចតេជោ​ ហ៊ុន​ សែន​ បាន​ណែនាំ​ដល់​ក្រសួង​អភិវឌ្ឍន៍​ជនបទ​ ឱ្យ​អនុវត្ត​ការងារ​ជួសជុល​ កែលំអ​ផ្លូវ​សរុប​ជាង​២២គីឡូម៉ែត្រ​​នេះ​ ឱ្យ​ធានា​បាន​គុណភាព​ល្អ​ ដេីម្បី​ឱ្យ​បងប្អូន​ប្រជាពលរដ្ឋ​ បាន​ធ្វើ​ចរាចរ​ដោយ​ងាយស្រួល​ ដេីម្បី​ដឹកជញ្ជូន​​កសិផល​ ទៅ​កាន់​ទីផ្សារ​ ហើយ​​ផ្លូវ​ទាំង​៤​ខ្សែ​ខាងលើ​នេះ​ដែរ​​ គឺ​ត្រូវ​ប្រេីប្រាស់​ថវិកា​អស់​​ប្រមាណ​ជាង​ ២លាន​ដុល្លារ​ និង​ប្រេីប្រាស់​​រយៈពេល​១៥ខែ​ ដេីម្បី​​ស្ថាបនា​ឱ្យ​បាន​រួចរាល់​ជាស្ថាពរ​ ព្រោះ​​នេះ​គឺ​ជា​កញ្ចប់​ទី​១​ នៃគម្រោង​ជួសជុល​កែលំអ​ ផ្លូវ​ចំនួន​ ​៤ខ្សែ​ សរុបប្រវង ២២,៥៣គ.ម ដែល​មាន​មូលដ្ឋាន​​ស្រុក​ចំនួន​ ៤ទទួល​ផល​ គឺ​មាន​​ស្រុក​​ស្ទឹងត្រង់​ ស្រុក​ជេីងព្រៃ​ ស្រុក​ព្រៃឈរ​ និង​ស្រុក​បាធាយ​។

លោកអ៊ុន ចាន់ដា អភិបាលខេត្តកំពង់ចាម ក៏បានថ្លែងថា ដោយសារប្រទេសជាតិយើងមានសុខសន្តិភាព ក្រោមការដឹកនាំប្រកបដោយគតិបណ្ឌិតរបស់ សម្តេចតេជោ​ ហ៊ុន សែន ទើបមានការអភិវឌ្ឍន៍រីកចម្រើនជាបន្តបន្ទាប់ដូចសព្វថ្ងៃនេះ។ ជាក់ស្ដែងការស្ថាបនា​ពី​ផ្លូវ​ដី​ ទៅ​​ជាផ្លូវ​កៅស៊ូ​ខាងលើនេះ​ ពិតជា​មាន​សារៈសំខាន់​ខ្លាំងណាស់​ សម្រាប់​បម្រើឱ្យការធ្វើដំណើរ​។

អភិបាលខេត្ត ក៏​បាន​អំពាវនាវ​ដល់​​ប្រជាពលរដ្ឋ​ទាំង​អស់​ សូម​ចូល​រួម​ការពារ​សុខសន្តិភាព​ ឱ្យបាន​នៅ​​គង់វង្ស​ ស្ថិតស្ថេរ​ជារៀង​ដរាប​ ដេីម្បី​បន្ត​ការ​អភិវឌ្ឍ​រីកចម្រើន​ទៅ​មុខ​ទៀត​ ជាពិសេស​​សូម​ដឹកនាំ​​បងប្អូន​កូនចៅ​ ​និង​ញាតិមិត្ត​ជិត​ខាង​ អញ្ជើញ​ទៅ​បោះឆ្នោតជ្រើសតាំងតំណាងរាស្ត្រ នីតិកាលទី៧ នាថ្ងៃទី២៣ ខែកក្កដា ឆ្នាំ២០២៣​ ​ឱ្យ​បាន​គ្រប់​ៗ​គ្នា​ ផងដែរ​៕ដោយនាគខៀវ

ខេត្តសៀមរាប៖ករណីគ្រោះថ្នាក់ចរាចរណ៍ នៅផ្លូវទៅភ្នំក្រោម កាលពីថ្ងៃទី19 ខែ មិថុនា ឆ្នាំ 2023 វេលាម៉ោង 14 និង 50 នាទី ត្រង់ចំណុចទល់មុខអាហាដ្ឋានជួបស្នេហ៍ លើផ្លូវក្រាលកៅស៊ូទៅភ្នំក្រោមស្ថិតនៅ ភូមិភ្នំក្រោម សង្កាត់ សៀមរាប ក្រុងសៀមរាប បណ្ដាលឲ្យស្លាប់កូនក្មេង អាយុ៥ខែម្នាក់ និងរបួសធ្ងន់៣នាក់។

លោកវរសេនីយ៍ទោសោម វីរ: នាយការិយាល័យចរាចរណ៍ផ្លូវគោក នៃស្នងការដ្ឋាននគរបាលខេត្តសៀមរាប បានឲ្យដឹងថា គ្រោះថ្នាក់ចរាចរណ៍រវាងម៉ូតូសណ្ដោងរ៉ឺម៉ក និងម៉ូតូ។ ម៉ូតូមួយគ្រឿងម៉ាកសង់កូរ៉េ ពណ៌ ខៀវគ្មានស្លាកលេខ (អ្នកបើកបរមិនស្គាល់អត្តសញ្ញាណ) អូសម៉ូតូសណ្ដោងរ៉ឺម៉កមួយគ្រឿងម៉ាក DAELIM សង់កូរ៉េ C100ពណ៌ខ្មៅផ្លាកលេខគ្មាន បេីកបរដោយ ឈ្មោះ ម៉ៅ សុក្រ ភេទប្រុស អាយុ21ឆ្នាំស្រុកកំណើត ភូមិ វ៉ារិន ឃុំវ៉ារិន ស្រុកវ៉ារិន ខេត្តសៀមរាប បច្ចុប្បន្ន ស្នាក់នៅភូមិកសិកម្ម សង្កាត់ស្រង៉ែ ក្រុងសៀមរាប បើកបរទិសដៅពីជើងទៅត្បូង បុកម៉ូតូ ម៉ាក ហុងដាវ៉េវ ពណ៌ខ្មៅ ពាក់ស្លាកលេខ 1CQ.0475 ភ្នំពេញ បើកបរដោយឈ្មោះ ម៉ៅ សារ៉ាត់ ភេទប្រុស អាយុ15ឆ្នាំ នៅភូមិអារញ្ញ សង្កាត់សៀមរាប ក្រុងសៀមរាប អ្នករួមដំណើរ 3នាក់ រស់នៅ ភូមិឃុំជាមួយគ្នា។

លោកវរសេនីយ៍ទោសោម វីរ: បន្តថាករណីនេះ
បណ្ដាលឲ្យរងរបួសធ្ងន់3ននាក់ និងស្លាប់ម្នាក់។
1អ្នកបើកបរម៉ូតូឈ្មោះ ម៉ៅ សារ៉ាត់ បាក់ដៃខាងឆ្វេង 2កំណាត់ ធ្ងន់ សម្រាកព្យាបាល មេឌីឃែរអង្គរ
១.ឈ្មោះ វណ្ណា ចិន្ដា ភេទស្រី អាយុ38ឆ្នាំ របួសធ្ងន់សម្រាកព្យាបាល មេឌីឃែរអង្គរ
២.ឈ្មោះ ធី វែង ភេទប្រុស អាយុ របួសធ្ងន់សម្រាកព្យាបាល នៅមន្ទីរពេទ្យគន្ធបុប្ផា
៣.សំ សំណាង ភេទប្រុស អាយុ៥ខែស្លាប់។

លោកបន្តថាក្រោយពេលកើតហេតុអ្នកបើកបរម៉ូតូម៉ាកសង់កូរ៉េពណ៌ខៀវផ្លាកលេខគ្មានបើករត់គេចខ្លួនបាត់។ ការខូចខាត:
_ម៉ូតូសណ្ដោងរ៉ឺម៉កខូចខាតស្រាល
_ម៉ូតូវេវខូចខាតផ្នែកខាងមុខ មធ្យម
*មូលហេតុអ្នកបេីកបរម៉ូតូអូសរុឺម៉កមិនប្រកាន់ស្តាំ
ចំណាត់ការ: វាស់វែងយកវត្ថុតាងយកទៅរក្សាទុកនៅការិយាល័យចរាចរណ៍ផ្លូវគោក៕ដោយនាគខៀវ

ខេត្តសៀមរាប៖បុរសម្នាក់ត្រូវបានកម្លាំងនគរបាលស្រុកបន្ទាយស្រីធ្វើការឃាត់ខ្លួន ពីបទធ្វើអោយខូចខាតដោយចេតនាមានស្ថានទម្ងន់ទោស(យកដុំថ្មគប់កញ្ចក់ឡាន)។

ការគប់កញ្ចក់រថយន្តនេះ នៅវេលាម៉ោង2និង30នាទីនៅថ្ងៃ ទី20 ខែមិថុនា ឆ្នាំ2023ចំណុច ភូមិកំព្រហ្ម ឃុំឃុនរាម ស្រុកបន្ទាយស្រី ខេត្តសៀមរាប។

អធិការនគរបាលស្រុកបន្ទាយស្រី លោកឡុង សំណាង បានប្រាប់អង្គភាពសារព័ត៌មានសៀមរាប ប៉ុស្ដិ៍ ថា ជនសង្ស័យ ឈ្មោះម៉ន ចាន់ណា ភេទប្រុសអាយុ23ឆ្នាំ នៅភូមិកំព្រហ្ម ឃុំឃុនរាម ស្រុកបន្ទាយស្រី ខេត្តសៀមរាប។ ចំណែកជនរងគ្រោះ ឈ្មោះសំ រ៉ាន ភ័ត្រា ភេទប្រុសអាយុ31ឆ្នាំ នៅភូមិវត្ត ឃុំស្រែណូយ ស្រុកវ៉ារិន ខេត្តសៀមរាប។

អធិការស្រុកបន្ទាយស្រីបន្តថា យោងតាមការបំភ្លឺពីជនរងគ្រោះ បានបញ្ជាក់ថា នៅវេលាម៉ោងក2និង០០នាទី ថ្ងៃទី20 ខែមិថុនា ឆ្នាំ2023 គាត់បានបើកបរឡានមកពីទិសខាងជើង គឺមកពីផ្ទះ។ នៅពេលមកដល់ចំណុចភូមិកំព្រហ្ម មានគេដាក់មែកឈើស្រាស់ផ្លូវទាំងសងខាង លុះឃើញដូច្នេះ គាត់ក៏បានបន្ថយល្បឿនឡាន ស្រាប់តែក្នុងពេលនោះមានគប់ដុំថ្មមកលើឡានរបស់ខ្ញុំ បណ្តាលអោយបែកធ្លាយ កញ្ចក់ខាងឆ្វេង និងខាងក្រោយ (ឡានសាមយ៉ុងពណ៌ស)។

ជនរងគ្រោះបន្តថា ដោយភ័យស្លន់ស្លោរពេករូបគាត់ក៏បានមកប្តឹងនៅសមត្ថកិច្ចប៉ុស្តិ៍នគរបាលរដ្ឋបាលឃុនរាម ប្រហែលម៉ោង2និង35នាទី ថ្ងៃកើតហេតុខាងលើ។

អធិការបន្តថាក្រោយពីកម្លាំងទទួលបានព័ត៌មាន បានចុះប្រតិបត្តិការ ភ្លាមៗ តែដោយឡែកជនសង្ស័យ បានគេចខ្លួនបាត់ លុះម៉ោង5និង30នាទី ទើបស្រាវជ្រាវចាប់ខ្លួនបាន។

តាមចម្លើយសារភាពរបស់ជនសង្ស័យបានបញ្ជាក់ថានៅវេលាម៉ោង2 និង10នាទី ខ្លួនបានទៅកាត់ធាងត្នោត និងមែកអំពិល យកមកស្រាសផ្លូវ ហើយដើររើសយកដុំថ្មមបាន៥ដុំ មកអង្គុយចាំ ក្នុងគោលបំណងគប់ឡាន។ លុះដលប្រហែលជា2និង30នាទី មានឡានមកដល់គោលដៅ ភ្លាមនោះខ្លួនបានយកដុំថ្ម ដែលបានគរទុកជាស្រេច គប់ទៅលើឡានតែម្តង។ ដោយក្នុងគោលបំណងធ្វើអោយខូចខាត ឬបែកកញ្ចក់
ដោយឈរនៅពីមុខផ្ទះរបស់ខ្លូនគេផ្ទាល់ក្នុងមួយយប់នោះគប់ឡាន2 លើកផងដែរ។

ដោយលើកទី1ឡានហ្វតពណ៌ស តែគប់ខុស និងគប់លើកទី2បានគប់ទៅលើឡាន សាមយ៉ុងពណ៌ស ដោយគប់ត្រូវកញ្ចក់ចំហៀងបែកធ្លាយដល់កញ្ចក់ខាងក្រោយក៏បែកតែម្ដង។

បើតាមអធិការសង្ស័យរូបនេះ មានសារធាតុញៀននៅក្នុងខ្លួន ព្រោះទើបតែប្រើប្រាស់នៅសារធាតុញៀនហើយកន្លងមកក៏ធ្លាប់ជាប់នៅមណ្ឌលកែប្រែគ្រឿងញៀនរយ:ពេល05ខែផងដែរ៕ដោយនាគខៀវ