ខេត្តសៀមរាប៖ប៉ូលិសព្រហ្មទណ្ឌអធិការដ្ឋាននគរបាលក្រុងបាត់ដំបង នៅថ្ងៃទី១០ខែវិច្ឆិកាឆ្នាំ២០២១ ម្សិលមិញបានចាប់ខ្លួនមនុស្សពីរនាក់ករណីលួចម៉ូតូ។

ការចាប់ខ្លួនធ្វើឡើងក្រោយទទួលបណ្ដឹងពីជនរងគ្រោះឈ្មោះ ហង្ស ស្រីពុធ ភេទស្រី អាយុ៣៧ឆ្នាំមានទីលំនៅស្នាក់នៅបន្ទប់ជួលស្ថិតនៅភូមិរំចេក១សង្កាត់រតន: ក្រុងបាត់ដំបង ថាមានករណីអំពើលួច ត្រង់ចំណុច ក្រុមទី ១១ភូមិរំចេក១ សង្កាត់រតន: ក្រុងបាត់ដំបង។
លោកពេជ្រ សារ៉ែន អធិការនគរបាលក្រុងបាត់ដំបង បានឲ្យដឹងថា ជនរងគ្រោះ បាន បាត់បងមានដូចជា៖ ម៉ូតូហុងដាឌ្រីសេ១២៥ សេរីឆ្នាំ២០១៨ ពណ៌ខ្មៅ ពាក់ផ្លាកលេខ បាត់ដំបង ១HD-៤៥១៣ មានលេខតួនិងលេខម៉ាស៊ីន ៥២៩៨២៨៣ ចំនួន១ គ្រឿង។

លោកពេជ្រ សារ៉ែន បន្តថាជនសង្ស័យ ១-ឈ្មោះ យ៉ាល រ៉ូហ្សាភេទប្រុសអាយុ ១៩ឆ្នាំ មានទីលំនៅភូមិនរា១ឃុំនរាស្រុកសង្កែ ខេត្តបាត់ដំបង។

២ឈ្មោះ អុល សុភា ហៅអាហ៊ីងភេទប្រុសអាយុ២១ឆ្នាំ មានទីលំនៅ ភូមិទ្រស់ ឃុំអូរតាគី ស្រុកថ្មគោល ខេត្តបាត់ដំបង។ ជនទាំងពីរ បានសារភាពថាពិតជាបានលួចម៉ូតូជនរងគ្រោះពិតប្រាកដមែន។ ករណីនេះដកហូតម៉ូតូរបស់ជនរងគ្រោះមកវិញ។  បច្ចុប្បន្នជនសង្ស័យ ត្រូវកសាងសំណុំរឿងបញ្ជូនទៅតាមនីតិវិធីច្បាប់៕SRP

1. ខេត្តសៀមរាប៖សេចក្ដីរាយការណ៍ព័ត៌មានបឋមបានឲ្យដឹងថានៅមុននេះបន្តិចនាយប់ ថ្ងៃទី១០ ខែវិច្ឆិកា ឆ្នាំ២០២១នេះ មន្ត្រីបរិស្ថានខេត្តសៀមរាប ម្នាក់ដែលប្រចាំការនៅតំបន់បឹងពែរ បានដួលម៉ូតូ បណ្ដាលឲ្យបាក់កស្លាប់ ខណៈជិះម៉ូតូល្បាត។

ហេតុការណ៍បានកើតឡើងនៅភូមិស្រោង ឃុំខ្វាវស្រុកជីក្រែង ខេត្តសៀមរាប។

បើតាមសេចក្ដីរាយការណ៍បន្តថា ជនរងគ្រោះមានឈ្មោះវែង ហ័រ អាយុ៤៨ឆ្នាំជាមន្រ្តីបរិស្ថាបបឹងពែ ឈរជើងនៅភូមិក្បាលដំរីឃុំពង្រលើស្រុកជីក្រែងខេត្តសៀមរាប៕SRP

ខេត្តសៀមរាប៖យុវជនម្នាក់បានបាត់បងជីវិតដោយសារគ្រោះថ្នាក់ចរាចរណ៍ នៅផ្លូវក្រវ៉ាត់ក្រុងសៀមរាប។

របាយការណ៍របស់នគរបាលចរាចរណ៍ខេត្តសៀមរាបបានបង្ហាញថានៅថ្ងៃពុធទី១០ ខែ វិច្ឆិកា ឆ្នាំ២០២១ វេលា ម៉ោង១២និង៣៧នាទី ត្រង់ចំណុចផ្លូវបំបែកជា៤សាលាខៀវ ស្ថិតនៅភូមិត្រពាំងត្រែង សង្កាត់សាលាកំរើក ក្រុងសៀមរាប លើផ្លូវក្រវ៉ាត់ក្រុង (ប៉េតុង) មានគ្រោះថ្នាក់ចរាចរណ៍មួយរវាងរថយន្តនិងម៉ូតូបណ្ដាលឱ្យយុវជនម្នាក់បានស្លាប់បាត់បង់ជីវិតយ៉ាងអាណោចអាធ័ម។

របាយការណ៍បានបន្តថាគ្រោះថ្នាក់ចរាចរណ៍នេះ
រវាងរថយន្តម៉ាក្សហ៊ីយ៉ាន់ដាយ ពណ៌ស + ខៀវ ពាក់ ផ្លាកលេខក្រុងព្រះសីហនុ 3A5541(មុខ) កន្ទុយក្រោយស្លាកលេខកំពុងចាម 4A.1780 ទិសដៅពីលិច ទៅកើត (អ្នកបើកបររត់គេចខ្លួនបាត់) បានបុកម៉ូតូមួយគ្រឿងម៉ាក ZOOMER ពណ៌ខ្មៅ ផ្លាកលេខ សៀមរាប 1Y.6884 អ្នកបើកបរឈ្មោះឡេង បញ្ញការ ភេទប្រុស អាយុ២៩ឆ្នាំ រស់នៅភូមិត្រពាំងសេះ សង្កាត់ គោកចក ក្រុងសៀមរាប ខេត្តសៀមរាប ទិសដៅពីត្បូងមកជើង(ឆ្លងថ្នល់)បណ្តាលឲ្យស្លាប់នៅនឹងកន្លែងកើតហេតុ។

របាយការណ៍ក៏បានបញ្ជាក់ផងដែរថាម៉ូតូខូចខាតធ្ងន់ ចំណែករថយន្តខូចខាតស្រាល។ ក្រោយពីបានចុះធ្វើការវាស់វែង បានប្រគល់សាកសពឲ្យក្រុមគ្រួសារយកទៅធ្វើបុណ្យតាមប្រពៃណី។ ពាក់ព័ន្ធទៅនឹងការគ្រោះថ្នាក់ចរាចរណ៍នេះ សមត្ថកិច្ចនគរបាលនៅមិនទាន់បញ្ជាក់អំពីមូលហេតុនៅឡើយ។

អង្គភាពសារព័ត៌មានសៀមរាបប៉ុស្ដិ៍ ក៏សុំចូលរួមរំលែកទុក្ខ ជាមួយគ្រួសារជនរងគ្រោះ ដែលកូនបាន ទទួលមរណៈភាព ដោយសារគ្រោះថ្នាក់ចរាចរណ៍ នៅផ្លូវក្រវ៉ាត់ក្រុងសៀមរាបផងដែរ៕SRP

ខេត្តសៀមរាប៖កម្លាំងការិយាល័យព្រហ្មទណ្ឌ កងរាជអាវុធហត្ថ ខេត្តសៀមរាប បានបញ្ជូនខ្លួនមនុស្ស៤នាក់ ទៅតុលាការនៅថ្ងៃនេះដើម្បីអនុវត្តតាមផ្លូវច្បាប់ពាក់ព័ន្ធករណីលួចកាច់សោរកម៉ូតូក្នុងភូមិសាស្រ្តក្រុងសៀមរាប។

លោក សៀក សោភា នាយការិយាល័យព្រហ្មទណ្ឌ កងរាជអាវុធហត្ថខេត្តសៀមរាប បានបង្ហាញថា ជនសង្ស័យទាំង៤នាក់ ត្រូវបានចាប់ខ្លួននៅថ្ងៃទី០៨  ខែតុលា  ឆ្នាំ ២០២១ ដោយការិយាល័យព្រហ្មទណ្ឌ និង កម្លាំងមូលដ្ឋានកងរាជអាវុធហត្ថ ក្រុងសៀមរាប  ស្ថិតនៅភូមិធ្លកអណ្តូង  សង្កាត់ ស្លក្រាម  ក្រុងសៀមរាប។

ជនសង្ស័យ៤៖
១. ឈ្មោះ សូ លាក់ ភេទប្រុសអាយុ២១ឆ្នាំ មុខរបរ មិនពិតប្រាកដ រស់នៅ ភូមិស្ពានជ្រាវ សង្កាត់សៀមរាប ក្រុងសៀមរាប។
២. ឈ្មោះបាង សុធារ៉ា  ភេទប្រុសអាយុ ៣៩ឆ្នាំមុខរបរមិនពិតប្រាកដ រស់នៅភូមិតាភុល  សង្កាត់ស្វាយដង្គំ  ក្រុងសៀមរាប។
៣. ឈ្មោះ ឡាច សម្បត្តិ ភេទប្រុសអាយុ ៣៦ឆ្នាំមុខរបរចុងភៅ រស់នៅភូមិអញ្ចាញ  សង្កាត់នគរធំ  ក្រុងសៀមរាប។
៤. ឈ្មោះថុល សេងធូ ភេទប្រុសអាយុ ៣០ឆ្នាំ មុខរបរជាងជួសជុលម៉ូតូរស់នៅ ភូមិធ្លកអណ្តូង សង្កាត់ស្លក្រាម។

ករណីនេះដកហូតវត្ថុតាងរួមមាន៖ដែកសម្រាប់បុកកាច់សោ រកម៉ូតូ១.ទូរស័ព្ទ២គ្រឿង  នឹងសម្ភារម៉ូតូមួយចំនួន.ម៉ូតូចំនួន ០៥គ្រឿង គឺ៖១. ម៉ូតូម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០១៣ (ឡើងតែមឆ្នាំ២០២១) (គ្មានស្លាកលេខ+លេខតួ+លេខម៉ាស៊ីន)។ ២. ម៉ូតូម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០១៥ (ឡើងតែមឆ្នាំ២០២០) ពាក់ស្លាកលេខ សៀមរាប 1S-4044 លេខតួ+លេខម៉ាសុីន 9430016។ ៣. ម៉ូតូម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០១៥ ពាក់ស្លាកលេខ សៀមរាប 1B-3839 លេខតួ+លេខម៉ាសុីន 8417432។ ៤. ម៉ូតូម៉ាកហុងដាឃ្លិក សេ១២៥ ពណ៌ស ស៊េរីឆ្នាំ២០១៣ ពាក់ស្លាកលេខ សៀមរាប 1V-2510 លេខតួ+លេខម៉ាសុីន 0053845។ ៥. ម៉ូតូម៉ាកយ៉ាម៉ាហា FZ ពណ៌ខ្មៅ ស៊េរីឆ្នាំ២០១៦ គ្មានស្លាកលេខ លេខតួ: 00 01509 លេខម៉ាសុីន: 0019241។

ជាមួយគ្នានេះដែរ លោកសៀក សោភា ក៏បានអំពាវនាវដល់ប្រជាពលរដ្ឋ ដែលបាត់ម៉ូតូអាចទៅ ស្វែងរកម៉ូតូនៅទីបញ្ជាការកងរាជអាវុធហត្ថខេត្តសៀមរាប។

លោក សៀក សោភា បន្តថាប្រតិបត្តិការនេះ តាមការណែនាំរបស់លោកប៉ោ វណ្ណនិត មេបញ្ជាការកងរាជអាវុធហត្ថខេត្តសៀមរាប និងក្រោមការដឹកនាំបញ្ជារបស់លោក ថា ដាលុច មេបញ្ជាការរងទទួលការងារ ស្រាវជ្រាវ និងបង្ក្រាបបទល្មើស និងដោយមានការសម្របសម្រួលពី លោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តសៀមរាប៕SRP

ខេត្តសៀមរាប៖សមត្ថកិច្ចខេត្តសៀមរាបបានចាប់ខ្លួនបុរសម្នាក់ ពីបទរំលោភសេពសន្ទវៈ លើកូនស្រីចុងខ្លួនឯង។

សមត្ថកិច្ចបានឲ្យដឹងថាការចាប់ខ្លួននៅថ្ងៃទី០៩ ខែវិច្ឆិកា ម្សិលមិញ ដោយនគរបាលស្រុកស្វាយលើ។ ជនសង្ស័យឈ្មោះឈន់ ឈី ភេទប្រុស អាយុ៥៤ឆ្នាំ មានទីលំនៅឃុំបឹងមាលា ស្រុកស្វាយលើ។ ចំណែកជនរងគ្រោះឈ្មោះ ស .ន.ស អាយុ១១ឆ្នាំមុខរបរសិស្ស។ ហេតុការណ៍រំលោភកើតឡើង កាលពីថ្ងៃទី២៩ ខែតុលា ឆ្នាំ២០២១ វេលាម៉ោង១៥ នៅទ្រុងមាន់ក្រោយផ្ទះ។ ជនសង្ស័យបានសារភាពថា ពិតជាបានចាប់រំលោភពិតប្រាកដមែន។ ករណីខាងនេះសមត្ថកិច្ចកសាងសំណុំរឿងបញ្ជូនទៅខេត្តតាមនិតិវិធីច្បាប់៕SRP

ខេត្តសៀមរាប៖លោក​ប្រាក់​ វណ្ណះ​ មេបញ្ជាការ​កកងរាជអាវុធហត្ថក្រុង បានដឹកនាំកម្លាំងមូលដ្ឋានកងរាជអាវុធហត្ថក្រុងសៀមរាប ចុះបង្ក្រាបករណីលួចកាច់សោម៉ូតូ និងឈានដល់ការឃាត់ខ្លួនមនុស្ស៣នាក់។

ការបង្ក្រាបធ្វើឡើងថ្ងៃទី៨​ ខែតុលា​ ឆ្នាំ​២០២១​ នៅត្រង់ចំណុចភូមិធ្លូកអណ្តូង​ សង្កាត់​ស្លក្រាម​ ក្រុងសៀមរាប​ តាមការណែនាំរបស់លោក​ ប៉ោ វណ្ណនិត មេបញ្ជាការ​កងរាជអាវុធហត្ថខេត្តសៀមរាប​​។

សមត្ថកិច្ចអាវុធហត្ថក្រុងសៀមរាប បានឲ្យដឹងថាជនសង្ស័យទាំង០៣នាក់៖១-ឈ្មោះ​ បាង​ សុធារ៉ា​ ភេទ​ប្រុស​ អាយុ​៣៩ឆ្នាំ​ មុខរបរ​នៅផ្ទះ​ រស់នៅភូមិតាភុល​ សង្កាត់​ស្វាយដង្គំ​ ក្រុងសៀមរាប។ ២-ឈ្មោះ​ ឡាច​ សម្បត្តិ​ ភេទ​ប្រុស​ អាយុ​៣៦ឆ្នាំ​ មុខរបរ​ចុងភៅ​ រស់​នៅភូមិអញ្ចាញ​ សង្កាត់​នគរធំ​ ក្រុងសៀមរាប។
៣-ឈ្មោះ​ ថុល​ សេងធូ​ ភេទ​ប្រុស​ អាយុ​៣០ឆ្នាំ​ មុខរបរ​ជាងធ្វេីម៉ូតូ​ នៅភូមិធ្លូកអណ្តូង​ សង្កាត់​ស្លក្រាម​ ក្រុងសៀមរាប។

សមត្ថកិច្ចបន្តថាប្រតិបត្តិការនេះដកហូតវត្ថុ​តាងរួមមាន៖ ម៉ូតូ២គ្រឿង.ដែកសម្រាប់បុកកាច់កសោ​ម៉ូតូ១.ទូរស័ព្ទ២គ្រឿង​ និងសម្ភារម៉ូតូមួយចំនួន។

សមត្ថកិច្ចបញ្ជាក់ថាបច្ចុប្បន្ន​ ជនសង្ស័យ​និងវត្ថុតាង ត្រូវបានបញ្ចូនទៅការិយាល័យជំនាញអាវុធហត្ថ ខេត្តសៀមរាប៕SRP

ខេត្តសៀមរាប៖ស្ត្រីម្នាក់ត្រូវបានប្ដីអះអាងថាឧស្សាហ៍ផឹកស្រាបណ្ដាលឱ្យឈឺរហូតដល់ស្លាប់។

ហេតុការណ៍បានកើតឡើងនៅភូមិចុងកៅស៊ូ សង្កាត់ស្លក្រាម ក្រុងសៀមរាប។

របាយការណ៍របស់អាជ្ញាធរមូលដ្ឋានបានបង្ហាញថា ឈ្មោះ ហ៊ន ពុធជា ដែលត្រូវជាប្ដីបានរៀបរាប់ប្រាប់សមត្ថកិច្ចថារូបគាត់បានគ្នាជាប្ដីប្រពន្ធជាមួយនឹងឈ្មោះ គឹម ឡែន អាយុ៣២ឆ្នាំ មានស្រុកកំណើត ភូមិកំពង់ ឃុំព្រះបាទជាន់ជុំ ស្រុកគីរីវង្ស ខេត្តតាកែវ រយៈពេល ០៤ ឆ្នាំមកហើយ ដោយពុំមានសាច់ញាតិនោះទេគឺឪពុកម្ដាយបានស្លាប់អស់ហើយ។ ដោយប្រពន្ធរបស់គាត់មានកូនស្រី ១នាក់ឈ្មោះហ៊ន ពំុពុយ អាយុ ០៥ ឆ្នាំ ជាកូនរបស់ប្ដីមុន។

បុរសជាប្ដីបន្តថារូបគាត់តាំងពីបានគ្នាជាមួយគឹម ឡែន មកប្រពន្ធខ្ញុំនេះគឺផឹកស្រាជាប្រចាំស្រាសត្រាំថ្នាំ រហូតដល់មកដល់ថ្ងៃទី ០៤ ខែវិច្ឆិកា ឆ្នាំ ២០២១ ប្រពន្ធខ្ញុំមានសភាពឈឺធ្ងន់ធ្ងរ ខ្ញុំហៅពេទ្យមកដាក់សេរ៉ូមអស់ចំនួន ០៣ កំផ្លោកក៏គាត់មានសភាពធូរស្រាលបន្តិចរហូតមកដល់ថ្ងៃទី ០៩ ខែវិច្ឆិកា ឆ្នាំ ២០២១ វេលាម៉ោង៨ រូបខ្ញុំបានចេញទៅសុំទានគេនៅផ្សារកន្ត្រក ទុកគាត់ឲ្យនៅនឹងផ្ទះជាមួយនឹងកូនស្រី តែគាត់ដើរមិនរួចទេដេកនៅនឹងកន្ទេលទេ។ រហូតដល់ម៉ោង ១២ ថ្ងៃនេះគាត់ត្រឡប់មកពីសុំទានគេមកដល់ផ្ទះវិញ ស្រាប់តែប្រពន្ធបានស្លាប់បាត់ទៅហើយ ការស្លាប់នេះគឺស្លាប់ដោយសារជម្ងឺប្រចាំកាយរបស់គាត់ទេ ដោយបន្សល់ទុកកូនស្រីឱ្យប្ដីមើលថែ៕SRP

ខេត្តកំពង់ចាម៖អភិបាលខេត្ត បាននាំយកអំណោយ ចែកជូនដល់អតីតយុទ្ធជនចំនួន ៥០គ្រួសារ ដោយក្នុងមួយគ្រួសារ ទទួលបាន៖ អង្ករ ២៥គីឡូ មី១កេសត្រីខ១យួរ ននិងថវិកាចំនួន១០ម៉ឺនរៀល។

ការចែកអំណោយនេះនៅព្រឹកមិញនេះ ក្នុងពិធី រំលឹកខួបលើកទី៦៨​ ថ្ងៃ​បុណ្យឯករាជជាតិ៩ វិច្ឆិកា ឆ្នាំ​១៩៥៣-៩ វិច្ឆិកា ឆ្នាំ២០២១ និង​អបអរ​សាទរ​​ខួប​អនុស្សាវរីយ៍​លើក​ទី​៦៨ នៃទិវា​កំណើត​កងយោធពល​ខេ​ម​ភូភូមិន្ទ ដើម្បីផ្សាភ្ជាប់សម្ដែងនូវសេចក្ដីដឹងគុណ ដល់វីរយុទ្ធជន វីរៈយុទ្ធនារីកម្ពុជា។

ពិធីនេះ​ត្រូវ​បាន​រៀបចំ​ឡើង​នៅបរិវេណ សួនសាធារណ ខាងមុខសាលាគរុកោសល្យភូមិភាគ ខេត្តកំពង់ចាម​ ក្រោម​វត្តមាន លោក​​ អ៊ុន​ ចាន់ដា​ អភិបាលខេត្តកំពង់ចាម​​ និង​លោក​ ខ្លូត​ ផន​ ប្រធាន​ក្រុមប្រឹក្សា​ខេត្ត​ ដោយមានការអញ្ជើញចូលរួមពីលោក​ លោកស្រី​ សមាជិកក្រុមប្រឹក្សាខេត្ត អភិបាលរងខេត្ត ថ្នាក់ដឹកនាំមន្ទីរ អង្គភាពជុំវិញខេត្ត កងកម្លាំងប្រដាប់អាវុធ មន្ត្រីរាជការ​ និង​ព្រះមន្ត្រីសង្ឃ​ ​ផងដែរ​​។

លោក​ អ៊ុន​ ចាន់ដា​ អភិបាលខេត្ត​កំពង់ចាម​ បានឡើងថា ការប្រារឰពិធីអបអរសាទររំលឹកខួបអនុស្សាវរីយ៍លើកទី៦៨ នៃទិវាបុណ្យឯករាជ្យជាតិ ៩ វិច្ឆិកា និងទិវាកំណើតនៃកងយោធពលខេមរភូមិន្ទ (៩ វិច្ឆិកា ១៩៥៣ – ៩ វិច្ឆិកា ២០២១ ) គឺជាទិវាប្រវត្តិសាស្ត្រដ៏ថ្លៃថ្លារបស់ប្រជាជាតិខ្មែរ ដើម្បីរំលឹកគុណូបការៈ ដ៏ខ្ពង់ខ្ពស់បំផុត ចំពោះព្រះវិញ្ញាណក្ខ័ន្ធព្រះបរមរតនកោដ្ឋ ដែលបានដឹកនាំទាមទារឯករាជ្យ ពីអាណានិគមនិយមបារាំង និងរំលឹកគុណដល់វីរៈជន កងកម្លាំងប្រដាប់អាវុធ នៃកងយោធពលខេមរភូមិន្ទ នៅគ្រប់ជំនាន់ ដែលបានឆ្លងកាត់នូវគ្រប់ដំណាក់កាលធំៗ ជាប្រវត្តិសាស្ត្ររបស់ប្រទេសជាតិ រួមមានការ តស៊ូដណ្តើមឯករាជ្យ ការពុះពារ ឆ្លងកាត់ដំណាក់កាលនៃសង្គ្រាម និងរបបប្រល័យពូជសាសន៍ ប៉ុល ពត ជាពិសេសលើមូលដ្ឋាន នៃជ័យជម្នះថ្ងៃ០៧ មករា ឆ្នាំ១៩៧៩ ដែលបានកសាងនូវអ្វីៗគ្រប់បែបយ៉ាង ដូចបច្ចុប្បន្ននេះ។ ទិវាបុណ្យ ឯករាជ្យជាតិ ៩-វិច្ឆិកា និងទិវាកំណើតកងយោធពលខេមរភូមិន្ទនាពេលនេះ បានឆ្លុះបញ្ចាំង ពីជោគជ័យក្នុងកម្លាំងមហាសាមគ្គី របស់ប្រជាជាតិខ្មែរយើងទាំងមូល ដែលបានឆ្លងកាត់ដំណាក់កាលមួយ ទៅដំណាក់កាលមួយប្រកបដោយភាពបត់បែន នៃដំណើរប្រវត្តិសាស្ត្រដ៏ស្មុគស្មាញជាច្រើន ជាពិសេស ឆ្លងកាត់រយៈពេល ៦៨ឆ្នាំកន្លងមក រហូតដល់បច្ចុប្បន្ននេះ គឹនៅតែរក្សាបាននូវអត្តសញ្ញាណជាកម្លាំងប្រដាប់អាវុធ របស់ជាតិកម្ពុជា ជាកងយោធពលខេមរភូមិន្ទដ៏អង់អាចក្លាហាន ដែលប្រសូត្រចេញពីប្រជាជន ដើម្បីប្រជាជន និងឆ្លើយតបទៅនឹងសំណូមពរ នៃការតស៊ូដ៏ត្រឹមត្រូវរបស់ប្រជាជន អ្វីៗទាំងអស់ដើម្បីបម្រើ ឧត្តមប្រយោជន៍ប្រទេសជាតិ និងប្រជាជនកម្ពុជា ជាដរាបតរៀងមក និងយូរអង្វែងផងដែរ៕SRP

ខេត្តព្រៃវែង៖សមត្ថកិច្ចបានបំបែកសំណុំរឿងករណីឃាតកម្មសម្លាប់ក្មេងស្រីដោយទម្លាក់ចូលក្នុងទឹកអូរ​មួយ​ នៅចំណុចភូមិទួលជៃ ឃុំព្រះស្ដេច ស្រុកព្រះស្ដេច ខេត្តព្រៃវែង​។

គួរបញ្ជាក់ថាកាលពីថ្ងៃទី ០៧ ខែវិច្ចិកា ឆ្នាំ២០២១ វេលាម៉ោង ១៥និង៣០នាទី មានករណីប្រទះឃើញសាកសពក្មេងស្រីម្នាក់ស្លាប់នៅក្នុងប្រលាយអូរ ស្ថិតក្នុងភូមិទួលជ្រៃ ឃុំព្រះស្តេច ស្រុកព្រះស្តេច ខេត្តព្រៃវែង។ សាកសពមានឈ្មោះ ផល ផានិត អាយុ ១២ឆ្នាំ ស្នាក់នៅភូមិកើតហេតុខាងលើ។

ប្រត្តិបត្តិការនេះធ្វេីឡេីង នៅថ្ងៃទី ០៨ ខែវិច្ឆិកា ឆ្នាំ២០២១ម្សិលមិញ។

សូមជម្រាបថា ដោយបានបទបញ្ជារពីលោកនេត សាវឿន អគ្គស្នងការនគរបាលជាតិ លោកជាវ វិបុល អនុប្រធាននាយកដ្ឋាននគរបាលព្រហ្មទ័ណ្ឌ បានដឹកនាំសហការជាមួយ នគរបាលខេត្តព្រៃវែង​ ការិយាល័យព្រហ្មទណ្ឌកម្រិតធ្ងន់ បានសហការជាមួយនាយកដ្ឋាបច្ចេកទេស​និងនវិទ្យាសាស្រ្ត និង​ អង្គការ CPU ចុះពិនិត្យកន្លែងកើតហេតុ និងធ្វើកោសល្យវិច័យទ្បើងវិញ ដោយបានវះកាត់សាកសពពិនិត្យឃើញថា៖ មានភក់នៅក្នុងបំពង់កនិងក្នុងសួត , បាក់ឆ្អឹងជំនីខាងស្តាំ, ទ្វារមាសពុំមានស្លាកស្នាមពីការចាប់រំលោភទេ គឺជាករណីឃាតកម្ម។

នៅថ្ងៃម្សិលមិញកម្លាំងជំនាញបានធ្វើការស្រាវជ្រាវរហូតដល់កំណត់បានមុខសញ្ញាម្នាក់ឈ្មោះ យ៉ែម សុផែន ភេទប្រុសអាយុ២១ឆ្នាំ ស្នាក់នៅភូមិទួលជៃ ឃុំព្រះស្តេច ស្រុកព្រះស្តេច ខេត្តព្រៃវែង មកធ្វើការសាកសួរ និងបានសារភាពថា កាពីយប់ថ្ងៃទី ០៦ ខែវិច្ឆិកា ឆ្នាំ២០២១ ខ្លួនបានទៅចូលរួមកម្មវិធីខួបកំណើតកូនរបស់អ្នកជិតខាង រហូតដល់វេលាម៉ោងប្រហែល ២២និង០០នាទី ម្ចាស់កម្មវិធីបានប្រើខ្លួនឲ្យទៅទិញ ទឹកកក ពេលធ្វើដំណើរតាមផ្លូវក៏ប្រទះឃើញក្មេងស្រីរងគ្រោះឈ្មោះ ផល ផានិត ឈរនៅមុខផ្ទះហើយខ្លួនបានឈប់ម៉ូតូនិងបបួលក្មេងស្រីរងគ្រោះទៅផឹកស៊ីដែរ ហើយក្មេងស្រីនោះក៏យល់ព្រមទ្បើងជិះម៉ូតូ ពេលធ្វើដំណើរតាមម៉ូតូក្មេងស្រីរងគ្រោះបានជិះអោបចង្កេះខ្លួន ធ្វើឲ្យមានអារម្មណ៍ផ្លូវភេទ ទើបខ្លួនដឹកក្មេងស្រីរងគ្រោះទៅចំណុចកើតហេតុខាងលើ រួចក៏ធ្វើសកម្មភាពចាប់ស្ទាបអង្អែលសុដន តែត្រូវក្មេងស្រីនោះរើបំរ៉ាស់ ដោយខ្លាចបែកការខ្លួនក៏ច្រាន ក្មេងស្រីរងគ្រោះទម្លាក់ក្នុងអូរ ហើយចាប់សង្កត់ច្រមុជក្នុងទឹកអូរនោះរហូតដល់ដាច់ខ្យល់។ ក្រោយពីធ្វើសកម្មភាព សម្លាប់ក្មេងស្រីរួចហើយខ្លួនក៏ជិះម៉ូតូទៅផ្ទះធ្វើដូចគ្មានរឿងអ្វីកើតទ្បើង រហូតដល់សមត្ថកិច្ចទៅនាំខ្លួនមកសាកសួរ តែម្តង។

បច្ចុប្បន្នជនសង្ស័យ ត្រូវបានប្រគល់ឲ្យនគរបាលខេត្តព្រៃវែង ដើម្បីកសាងសំណុំរឿងបញ្ជូនទៅអយ្យការអមសាលាដំបូងផ្តន្ទាទោសតាមផ្លូវច្បាប់៕SRP

ខេត្តសៀមរាប៖រដ្ឋបាលខេត្តសៀមរាបបានរំលឹកខួបអនុស្សាវរីយ៍លើកទី៦៨ នៃទិវាបុណ្យឯករាជ្យជាតិ ៩ វិច្ឆិកា (៩ វិច្ឆិកា ១៩៥៣- ៩ វិច្ឆិកា ២០២១)។

ពិធីធ្វើនាព្រឹក ថ្ងៃទី០៩ ខែវិច្ឆិកា ឆ្នាំ២០២១នេះ នៅទីលានវិមានរំលឹកគុណអតីតវីរយុទ្ធជនខេត្ត ក្រោមវត្តមានលោកអ៊ាន ឃុនប្រធានក្រុមប្រឹក្សាខេត្ត ដោយ
មានការចូលរួមពីសំណាក់មន្ត្រីរាជការកងកម្លាំងប្រដាប់អាវុធជុំវិញខេត្តនិងសិស្សានុសិស្សផងដែរ។

សូមជម្រាបថាថ្ងៃនេះ គឺជាថ្ងៃដែលប្រទេសកម្ពុជាត្រូវប្រារព្ធខួបអនុស្សាវរីយ៍លើកទី៦៨ នៃទិវាបុណ្យឯករាជ្យជាតិ ៩ វិច្ឆិកា(៩ វិច្ឆិកា ១៩៥៣-៩ វិច្ឆិកា ២០២០) ដែលកម្ពុជាទទួលបានឯករាជ្យ ពីអាណានិគមនិយមបារាំង។ ទិវាបុណ្យឯករាជ្យជាតិ ៩ វិច្ឆិកា បានរំលឹកឲ្យឃើញពីព្រះរាជបេសកកម្មដើម្បីជាតិមាតុភូមិ និងប្រជារាស្ត្រខ្មែររបស់ព្រះករុណាព្រះបាទ សម្តេចព្រះនរោត្តម សីហនុ ព្រះបិតាឯករាជ្យជាតិ ព្រះបរមរតនកោដ្ឋ ដែលព្រះអង្គបានលះបង់ព្រះកាយពល និងព្រះបញ្ញាញាណ យ៉ាងក្លៀវក្លាបំផុតធ្វើការតស៊ូក្នុងក្របខ័ណ្ឌនៃព្រះរាជបូជនីកិច្ច ដើម្បីទាមទារឯករាជ្យដ៏ពិតប្រាកដនៅកម្ពុជា។ផ្តើមចេញពីគំរូព្រះវីរៈភាពនេះ រាជរដ្ឋាភិបាលកម្ពុជា ក្រោមកិច្ចដឹកនាំដ៏ឈ្លាសវៃប្រកបដោយ គតិបណ្ឌិតដ៏ខ្ពង់ខ្ពស់របស់សមេ្តចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានធ្វើឲ្យប្រទេសជាតិ ទាំងមូល មានកិច្ចអភិវឌ្ឍន៍រីកចម្រើន លើគ្រប់ហេដ្ឋារចនាសម្ព័ន្ធ និង បានលើកកម្ពស់ជីវភាពរស់នៅរបស់ប្រជាពលរដ្ឋ កាន់តែមានភាពល្អប្រសើរឡើង ពីមួយថ្ងៃទៅមួយថ្ងៃ ព្រមទាំងទទួលយកនូវក្រុមនិន្នាការនយោបាយ មកចូលរួមក្នុងការ អភិវឌ្ឍន៍សង្គមជាតិហើយនៅក្នុងវិបត្តិកូវិដ១៩នេះសមេ្តចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានយកចិត្តទុកដាក់ខ្ពស់ ពីសុខភាព សាធារណៈជូនប្រជាពលរដ្ឋ ដោយខិតខំស្វែងរកនូវវ៉ាក់សាំងការពារប្រឆាំងជម្ងឺកូវិដ១៩ ចាក់ជូនដល់ប្រជាពលរដ្ឋបាន គ្រប់ៗគ្នា ចាប់ពីកុមារអាយុ៥ ឡើងទៅ ផងដែរ។

សូមបញ្ជាក់ថា ថ្ងៃ ៩ វិច្ឆិកា ទិវាបុណ្យឯករាជ្យជាតិ ត្រូវបានប្រារព្ធឡើងជារៀងរាល់ឆ្នាំ ដើម្បីបង្ហាញពីឯករាជ្យជាតិខ្មែរ និងជាការឧទ្ទិសដល់ព្រះរាជបូជនីយកិច្ច របស់អតីត ព្រះមហាក្សត្រ ព្រះបាទសម្ដេចព្រះនរោត្តម សីហនុ ព្រះបរមរតនកោដ្ឋ ដែលព្រះអង្គ បានលះបង់ព្រះកាយពល និងព្រះបញ្ញាញាណ នៅក្នុងព្រះរាជបូជនីយកិច្ច ទាមទារឯករាជ្យ ពីអាណានិគមបារាំង នៅថ្ងៃទី៩ ខែវិច្ឆិកា ឆ្នាំ១៩៥៣៕SRP

ភ្នំពេញ៖សម្តេចតេជោនាយករដ្ឋមន្ត្រី ហ៊ុន សែន បានផ្ដល់នូវការណែនាំទៅកាន់មន្ត្រីថ្នាក់ដឹកនាំក្រសួងរៀបចំដែនដី នគរូបនីយកម្មនិងសំណង់ដែលទីនូវ៣ចំនុចសំខាន់៖
១- ត្រូវបន្តខិតខំចេញប័ណ្ណកម្មសិទ្ធិអោយប្រជាពលរដ្ឋអោយបានឆាប់។
២- ត្រូវបន្តខិតខំដោះស្រាយជំលោះដីធ្លី ជាពិសេសការដោះក្រៅប្រព័ន្ធតុលាការ ។
៣-ត្រូវខិតខំបន្តដោះស្រាយដីសម្បទានសង្គមកិច្ចជាបន្តបន្ទាប់ទៀត។

សម្តេចហ៊ុន សែន មានប្រសាសន៍បែបនេះ ក្នុងឱកាសអញ្ជើញសម្ពោធអគារទីស្តីការក្រសួងរៀបចំដែនដី នគររូបនីយកម្ម និងសំណង់ នៅព្រឹកមិញនេះ នាយករដ្ឋមន្ត្រីក៏បានមានប្រសាសន៍ដាសតឿនរំលឹក ដល់មន្ត្រីថ្នាក់ដឹកនាំក្រសួងរៀបចំដែនដី នគររូបនីយកម្ម និងសំណង់អោយខិតខំបំពេញការងារអោយបានល្អប្រសើរ។

សម្តេចតេជោបានសង្កត់ធ្ងន់ថា ត្រូវរួមថែរក្សាសមិទ្ធផលដែលកើតមាននេះអោយបានគង់វង្សប្រើប្រាស់អោយបានយូរអង្វែង មានកន្លែងធ្វើការល្អហើយ ត្រូវធ្វើការអោយមានប្រសិទ្ធភាព និងចំនុចមួយទៀតត្រូវចេះសន្សំ ទឹក ភ្លើង ផងដែរ៕SRP

ភ្នំពេញ៖សម្តេចតេជោ ហ៊ុន សែន នាយករដ្ឋមន្ត្រី នៅព្រឹកថ្ងៃចន្ទ ទី៨ ខែវិច្ឆិកា ឆ្នាំ២០២១ នេះ អញ្ជើញជាអធិបតីក្នុងពិធីសម្ពោធទីស្តីការនៃអគារក្រសួងរៀបចំដែនដី នគររូបនីយកម្ម និងសំណង់។

អគារក្រសួងរៀបចំដែនដី នគរូបនីយកម្ម និងសំណង់ ជាសមិទ្ធផលមួយ ដែលបង្ហាញពីគុណតម្លៃនៃការដឹកនាំរបស់រាជរដ្ឋាភិបាលកម្ពុជាក្នុងការលើកម្ពស់តម្លៃស្ថាបត្យកម្ម ដែលជាស្នាដៃផ្ទាល់របស់កូនខ្មែរ ហើយក៏បានបង្ហាញនូវសមត្ថភាពរបស់រាជរដ្ឋាភិបាលលើការគ្រប់គ្រង និងប្រើប្រាស់ថវិកាជាតិ ដើម្បីបង្កើតនូវសមិទ្ធផលជាទីមោទនភាពសម្រាប់ជាតិផងដែរ។

អគារទីស្តីការក្រសួងរៀបចំដែនដី នគរូបនីយកម្ម និងសំណង់ មានទីតាំងស្ថិតនៅ ភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ នាប៉ែកខាងជើងឆៀងខាងលិចរាជធានីភ្នំពេញ ត្រូវបានប្រារព្ធពិធីបើការដ្ឋានសាងសង់នៅថ្ងៃទី២៨ ខែមករា ឆ្នាំ២០២០ ។ អគារនៃក្រសួងនេះសាងសង់នៅលើផ្ទៃដីទំហំ ៤.៥ហិកតា មានទំហំតួអគារបណ្ដោយប្រវែង ១៣២.៧ ម៉ែត្រ និងទទឹងប្រវែង ៩៤.៧ម៉ែត្រ មានចំនួន ៨ជាន់ កម្ពស់សរុបពីទ្រនាប់ខ្សាច់ ដល់ចុងកំពូលបុស្បុក ៨៨.៥ម៉ែត្រ ក្នុងនោះមានកម្ពស់បុស្បុក ៣៣.២៨ម៉ែត្រ មានចំណតរថយន្តប្រមាណ ៤៥០គ្រឿង និងចំណតទោចក្រយានយន្តជាច្រើនគ្រឿងទៀត៕SRP