ខេត្តសៀមរាប៖មានការលើកឡើងថា បទល្មើសនេសាទ ក្នុងស្រុកសូទ្រនិគម នៅតែបន្តកើតមានឡើងក្នុងដែននេសាទសហគមន៏កំពង់ឃ្លាំង។

ជាក់ស្ដែងសមត្ថកិច្ចចម្រុះ នៅថ្ងៃម្សិលមិញបានចុះបង្ក្រាបបទល្មើស នេសាទដោយខុសច្បាប់ នៅក្នុងដែននេសាទសហគមន៍កំពង់ឃ្លាំង ក្នុងស្រុកសូទ្រនិគម ខេត្តសៀមរាប។

ប្រភពបានឲ្យដឹងថាការបង្រ្កាបលទ្ធផល កាប់បង្គោលឆ្នុក១០កន្លែង បង្គោល៤០ដើម, ក្បាលប៧គ្រឿង, របាំងសាច់អួន ៦០០ ម៉ែត្រ, ចម្រឹង៣០០ ដើម នឹងលែងកូនត្រី១៥ គីឡូក្រាម៕SRP

ភ្នំពេញ៖រដ្ឋមន្ត្រីក្រសួងមហាផ្ទៃសម្តេចស ខេង បានអះអាងថា គ្រោះថ្នាក់ចរាចរណ៍ ក្នុងខែតុលា កើនឡើងច្រើនជាងខែកញ្ញា។

សម្ដេចស ខេង បានលើកឡើងថា ស្ថានភាពគ្រោះថ្នាក់ចរាចរណ៍ប្រចាំខែតុលា ឆ្នាំ២០២១ ដែលយើងបានមើលឃើញថាទាំងអត្រាអ្នករងគ្រោះបាត់បង់ជីវិត អត្រាអ្នករងរបួស និងចំនួនគ្រោះថ្នាក់ចរាចរណ៍គឺមានការកើនឡើងច្រើនជាងខែកញ្ញា ដែលបញ្ហានេះយើងបានពិនិត្យឃើញថាដោយសារមានកំណើនច្រើនការធ្វើចរាចរណ៍ឡើងវិញបន្ទាប់ពីស្ថានភាពជម្ងឺកូវីដបានធូរស្រាល។

ប្រការគួរឱ្យសោកស្ដាយបំផុតនោះគឺនៅក្នុងខែតុលា ឆ្នាំ២០២១ នេះ របាយការណ៍បានបង្ហាញគ្រោះថ្នាក់ចរាចរណ៍ទូទាំងប្រទេសបានកើតឡើងចំនួន ២៤៣លើក គឺមានការកើនឡើងជាងខែកញ្ញាចំនួន២៣លើក ស្មើនឹង១០ភាគរយ។ ចំនួនអ្នករងរបួសមានចំនួន៣៤០នាក់ កើន ឡើងជាងខែកញ្ញាចំនួន៦៦នាក់ ស្មើនឹង២៤ភាគរយ និងចំនួនអ្នក ស្លាប់ មានដល់ទៅ១៤០នាក់គឺកើនឡើងជាងខែកញ្ញាចំនួន២១ នាក់ស្មើនឹង១៨ភាគរយ។

តាមការសន្និដ្ឋានរបស់ផ្នែកជំនាញប្រតិបត្តិជាក់ស្តែងបានកត់សម្គាល់ថាកំណើនគ្រោះថ្នាក់ចរាចរណ៍ កំណើនអ្នករងរបួសនិងអ្នកស្លាប់នាខែតុលានេះគឺដោយសារកំណើនសន្ទុះធ្វើចរាចរឡើងវិញបន្ទាប់ពីសភាពធូស្រាលនៃជម្ងឺកូវីដ-១៩ ហើយ មូលហេតុកំណើនគ្រោះថ្នាក់ ស្លាប់ និងរបួសនេះ គឺបណ្តាលមកពីការបើកបរលឿនមានចំនួន ៣៨ភាគរយ ការមិនគោរពសិទ្ធ មានចំនួន២៧ភាគរយ ការមិនប្រកាន់ស្តាំមានចនួន១៦ភាគរយ ជាមួយការបត់ ការជែង និងការ បើកបរក្នុងស្ថានភាពស្រវឹង។

ទោះជាយ៉ាងណាក៏ដោយអត្រាគ្រោះថ្នាក់ចរាចរណ៍ក្នុងខែតុលា ឆ្នាំ២០២១នេះ បើប្រៀបធៀប ទៅនឹងខែតុលា ឆ្នាំ២០២០ គឺមានការថយចុះតិចតួចប៉ុន្តែចំនួនអ្នកស្លាប់មានការកើនឡើងទៅ វិញ ។អត្រាគ្រោះថ្នាក់ចរាចរណ៍ បានថយចុះ២លើកស្មើនឹង១ភាគ រយ អត្រាអ្នករងរបួសថយចុះ៤ នាក់ស្មើនឹង១ភាគរយ ប៉ុន្តែអត្រាអ្នកស្លាប់បានកើន២៩នាក់ស្មើនឹង២៦ភាគរយ។

ឆ្លៀតក្នុងឱកាសនេះខ្ញុំសូមអំពាវនាវដោយទទូច ដល់បងប្អូនជនរួមជាតិទាំងអស់ ជាថ្មីម្តងទៀត សូមរក្សាស្មារតីគោរព និងអនុវត្តច្បាប់ស្ដីពីចរាចរណ៍ផ្លូវគោកឱ្យបានគ្រប់ពេលវេលានៃការធ្វើដំណើរលើដងផ្លូវ និងសូមមានស្មារតីប្រុងប្រយ័ត្ន បើកបរមានការយោគយល់អធ្យាស្រ័យឱ្យគ្នា ដើម្បីការពារសេចក្ដីសុខខ្លួនយើង អ្នកដំណើរផ្សេងទៀតលើដងផ្លូវ ដើម្បីចៀសផុតពីគ្រោះថ្នាក់។

ក្នុងនាមប្រធាន គណៈកម្មាធិការជាតិសុវត្ថិភាពចរាចរណ៍ផ្លូវគោក ខ្ញុំក៏សូមក្រើនរំលឹកដល់មន្ត្រីមានសមត្ថកិច្ចដឹកនាំ និងប្រតិបត្តិការអនុវត្តច្បាប់ស្ដីពីចរាចរណ៍ផ្លូវគោកទាំងអស់ សូមបង្កើនការបន្តរឹតបន្តឹងការអនុវត្តច្បាប់ស្តីពី ចរាចរណ៍ផ្លូវគោកឱ្យបានសកម្ម គ្មានការលើកលែង ឬយោគ យល់អ្វីទាំងអស់ ពីព្រោះនេះជាភារកិច្ចការពារសេចក្ដីសុខ សុវត្ថិភាព និងអាយុជីវិតប្រជាពលរដ្ឋយើង។

យើងទាំងអស់គ្នាចូលរួមគោរពច្បាប់ចរាចរណ៍ដើម្បីសុវត្ថិភាពរបស់យើងតាមពាក្យស្លោក៖
ថ្ងៃនេះ ថ្ងៃស្អែតកុំឲ្យមានគ្រោះថ្នាក់ចរាចរណ៍.
គោរពច្បាប់ចរាចរណ៍ផ្លូវគោក ជាកាតព្វកិច្ចរបស់អ្នកប្រើប្រាស់ផ្លូវគ្រប់រូប. បើកបរលើសល្បឿនដែលច្បាប់កំណត់ ងាយប្រឈមនឹងគ្រោះថ្នាក់.បើស្រវឹង សូមកុំបើកបរ.
គោរពច្បាប់ស្តីពីចរាចរណ៍ផ្លូវគោក គឺគោរពជីវិតខ្លួនឯង និងអ្នកដទៃ. គោរពច្បាប់ស្តីពីចរាចរណ៍ផ្លូវគោក គឺលើកកម្ពស់កិត្យានុភាពជាតិ.ការពារជីវិតអ្នក ត្រូវពាក់មួកសុវត្ថិភាព៕SRP

ខេត្តត្បូងឃ្មុំ ៖ក្នុងឱកាសបេីក យុទ្ធនាការ ចាក់ វ៉ាក់សាំង បង្ការ ជំងឺ កូវីដ -១៩ ដល់កុមារអាយុ៥ឆ្នាំ នៅមណ្ឌលសុខភាព ក្រែក១ ក្នុងស្រុកពញាក្រែក នៅព្រឹក មិញនេះ លោក ជាម ច័ន្ទសោភ័ណ អភិបាលខេត្តត្បូងឃ្មុំ បានអំពាវនាវដល់ប្រជាពលរដ្ឋ ជាមាតា បិតា អាណាព្យាបាលរ ឲ្យ នាំកូនអាយុ៥ឆ្នាំ ទៅទទួលការចាក់វ៉ាក់សាំងការពារជំងឺកូវីដ១៩ ឲ្យបានគ្រប់ៗគ្នា នៅគ្រប់មន្ទីរពេទ្យបង្អែក និងមណ្ឌលសុខភាព ក្នុងក្រុង-ស្រុកទាំង៧ ទូទាំងខេត្តត្បូងឃ្មុំ។

លោក ជាម ច័ន្ទសោភ័ណ បានថ្លែងអំណរយ៉ាងជ្រាលជ្រៅ ចំពោះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបានយកចិត្តទុកដាក់គិតគូរផ្តល់វ៉ាក់សាំង ដល់មនុស្សពេញវ័យ រហូតដល់ កុមា ជាពន្លកទំពាំង ស្នង ឫស្សី ។

អភិបាលខេត្ត ក៏បានថ្លែងក្រើនរំលឹកដល់ពលរដ្ឋទាំងអស់ថា <<សូមក្លាចកូវីដ កុំក្លាហានជាមួយកូវីដ>> ដោយបន្តចូលរួមអនុវត្តវិធានការ «៣ការពារ ៣កុំ » ឲ្យ បានខ្ជាប់ខ្ជួន ដើម្បីរួមគ្នាទប់ស្កាត់ការឆ្លងរាលដាលជំងឺកូវីដ-១៩ ចូលក្នុងសហគមន៍ ក៏ដូចជាក្នុងដំណើរការបើកប្រទេសឡើងវិញ ជាពិសេសការបើកដំណើរការសាលារៀន ឲ្យសិស្សានុសិស្ស ចូលសិក្សារៀនសូត្រឡើងវិញ។

សូមជម្រាបថាក្នុងឱកាសបេីកយុទ្ធនាការចាក់វ៉ាក់សាំងជូនកុមារនៅខេត្តត្បូងឃ្មុំ សង្កេតឃើញថា មាតាបិតា អាណាព្យាបាល និងកុមារ កុមារី បានសម្តែងនូវសេចក្តីរំភើបរីករាយ និងដឹងគុណយ៉ាងជ្រាលជ្រៅ ចំពោះសម្ដេចហ៊ុន សែន ដែលបានផ្តល់ការចាក់វ៉ាក់សាំង ដោយយុទ្ធនាការចាក់វ៉ាក់សាំងការពារជំងឺកូវីដ-១៩ដល់កុមារអាយុ៥ឆ្នាំ នៅទូទាំងខេត្តត្បូងឃ្មុំ ចាប់ពីថ្ងៃទី១ ដល់ថ្ងៃទី១៤ ខែវិច្ឆិកា ឆ្នាំ២០២១ សម្រាប់ដូសទី១ និងដូសទី២ ចាប់ពីថ្ងៃ២៨ ខែវិច្ឆិកា ដល់១១ ខែធ្នូ ឆ្នាំ២០២១ ៕SRP

ខេត្តសៀមរាប៖លោកអេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានឲ្យដឹងថាកម្លាំងជំនាញកងរាជអាវុធហត្ថខេត្តសៀមរាប បានចុះស៊ើបអង្កេត ប្រមូលវត្ថុតាង និងបាននាំខ្លួនលោក អាង សែន បញ្ជូនមកទីបញ្ជាការកងរាជអាវុធហត្ថខេត្តសៀមរាប ដើម្បីបន្តធ្វើការស្រាវជ្រាវ និងអនុវត្តតាមនីតិវិធី។

លោកអេង ហ៊ី បានឲ្យដឹងថាកងរាជអាវុធហត្ថ នឹងបន្តធ្វើការស៊ើបអង្កេត ស្រាវជ្រាវរកភស្តុតាង និងបុគ្គលដែលពាក់ព័ន្ធនឹងអំពើល្មើសនេះ ដោយភាពយុត្តិធម៌ និងម៉ឺងម៉ាត់បំផុត។ ជាមួយគ្នានេះដែរ កងរាជអាវុធហត្ថ សូមអភ័យទោសជាសាធារណៈចំពោះទង្វើរបស់យោធិននៃកងរាជអាវុធហត្ថខាងលើ ក៏ដូចជាយោធិនចំនួន០២រូប នៃកងរាជអាវុធហត្ថខេត្តក្រចេះ ដែលបានប្រព្រឹត្តនាពេលកន្លងទៅផងដែរ។

លោកអេង ហ៊ី បានបន្តថាកងរាជអាវុធហត្ថខេត្តសៀមរាប ០១រូប បានប្រើប្រាស់អាវុធខ្លីបាញ់ផ្ចុកដី ដោយសារទំនាស់ពាក្យសម្តី កាលពីវេលាម៉ោង២២និង១៥នាទី ថ្ងៃទី០១ ខែវិច្ឆិកា ឆ្នាំ២០២១ នៅចំណុចការ៉ាសសាំងសូរិយា ភូមិតាវៀន សង្កាត់សាលាកំរើក ក្រុងសៀមរាប ខេត្តសៀមរាប។

តាមសេចក្តីរាយរបស់លោកប៉ោ វណ្ណនិត មេបញ្ជាការកងរាជអាវុធហត្ថខេត្តសៀមរាបបានឱ្យដឹងថា នៅវេលាម៉ោងនិងចំណុចខាងលើ លោកវរសេនីយ៍ត្រី អាង សែន នាយការិយាល័យប្រឆាំងការជួញដូរមនុស្ស កងរាជអាវុធហត្ថខេត្តសៀមរាប បានមានទំនាស់ពាក្យសម្តីគ្នាជាមួយឈ្មោះ ហាត សុភា ភេទប្រុស អាយុ៣៧ឆ្នាំ មុខរបរអាជីករ ទីលំនៅភូមិឃុនមោគ ឃុំកណ្តែក ស្រុកប្រាសាទបាគង ខេត្តសៀមរាប ហើយលោកវរសេនីយ៍ត្រី អាង សែន បានយកកាំភ្លើងខ្លី ម៉ាកCF98 ប័ណ្ណសម្គាល់អាវុធខ្លីសមូហភាព ចុះបញ្ជី បខ.២៩៤៧៤ កពជ លេខអាវុធ 015892 បាញ់ផ្ចុកដីចំនួន០១គ្រាប់ បានខ្ទាតបំណែកថ្មត្រូវឈ្មោះ ហាត សុភា រលាត់ក្រោមត្របកភ្នែកខាងស្តាំ បណ្តាលអោយរបួសស្រាល។ បន្ទាប់មកភាគីម្ខាងទៀតរបស់ឈ្មោះ ហាត សុភា បាននាំគ្នីគ្នា (មិនស្គាល់ឈ្មោះ) មកជាបន្តបន្ទាប់រួចក៏បានបាញ់ចំនួន០២គ្រាប់ ដោយអាវុធខ្លី មិនស្គាល់ម៉ាក់ តែមិនបណ្តាលអោយមានរបួសនោះទេ។

លោកអេង ហ៊ី បញ្ជាក់ថាកងរាជអាវុធហត្ថ នឹងបន្តធ្វើការស៊ើបអង្កេត ស្រាវជ្រាវរកភស្តុតាង និងបុគ្គលដែលពាក់ព័ន្ធនឹងអំពើល្មើសនេះ ដោយភាពយុត្តិធម៌ និងម៉ឺងម៉ាត់បំផុត៕SRP

ខេត្តសៀមរាប៖ប៉េអឹមខេត្តសៀមរាប ម្នាក់ឈ្មោះ អាំង សែន ហៅចិត្របានបាញ់មួយគ្រាប់គំរាមប៉ូលិសអន្តរាគមន៍ ក្នុងពេលប៉ូលិសចុះសាកសួររឿងជម្លោះសម្ដីកន្លែង។

ហេតុការណ៍បានកើតឡើង នៅវេលាម៉ោង២២និង១៥នាទីថ្ងៃទី១ ខែវិច្ឆិកា ឆ្នាំ២០២១ ចំណុចទីតាំងនឹងផ្ទះលក់សាំង ស្ថិតភូមិតាវៀន សង្កាត់សាលាកំរើក ក្រុងសៀមរាប ខេត្តសៀមរាប ដែលមានម្ចាស់ឈ្មោះយ៉ា ភេទស្រី។

ប្រភពពីសមត្ថកិច្ចដែលនៅកន្លែងកើតហេតុបានឲ្យដឹងថា អ្នកបង្កជាមន្ត្រីអាវុធហត្ថឈ្មោះ អាំង សែន ហៅចិត្រឋាន:នាយការិយាល័យប្រឆាំងការជួញដូរមនុស្ស និង ការពារអនីតិជន កងរាជអាវុធហត្ថខេត្តសៀមរាប។

ប្រភពដដែលបានបន្តថា មុនពេលកើតហេតុ នៅទីតាំងនឹងផ្ទះលក់សាំង ភូមិតាវៀន ម្ចាស់ឈ្មោះយ៉ា ភេទស្រី អាយុប្រហែល៤០ឆ្នាំ ដោយឈ្មោះ អាំង សែន ហៅចិត្រ ជាប៉េអឹម បានទៅផឹកស៊ីនៅទីតាំងខាងលើ ដោយក្នុងនោះក៏មានមនុស្សប្រុសម្នាក់ទៀតអាចជាដៃគូរម្ចាស់ផ្ទះឈ្មោះយ៉ា។

សមត្ថកិច្ចបន្តទៀតថានៅពេលនោះក៏កើតមានពាក្យគងគ្នា ហើយម្នាក់ប្រុស ដែលអាចជាដៃគូរឈ្មោះយ៉ា ក៏បានខលហៅលោក នួន សារុន នាយការិយាល័យ អន្តរាគមន៍ស្នងការខេត្តសៀមរាប អោយជួយអន្តរាគមន៍ក្រែងមានរឿង លុះពេលទៅដល់សាកសួរបានបន្តិច ឈ្មោះ អាំង សែន ហៅចិត្រ ជាប៉េអឹម បានបាញ់ទៅលើទាំងកំរោលសាបមុខផ្ទះតែម្ដង។ ជុំវិញករណីនេះ អង្គភាពសៀមរាបប៉ុស្ដិ៍ មិនទាន់ទទួលបានការបំភ្លឺពីលោកអាំង សែន ហៅចិត្រ នាយការិយាល័យប្រឆាំងការជួញដូរមនុស្ស និង ការពារអនីតិជន កងរាជអាវុធហត្ថខេត្តសៀមរាប នៅឡើយទេ។

ចំណែកលោក នួន សារុន នាយការិយាល័យ អន្តរាគមន៍ស្នងការប៉ូលិសខេត្តសៀមរាប សៀមរាបប៉ុស្ដិ៍ មិនអាចទាក់ទង ដើម្បីបំភ្លឺបានទេ ដោយទូរស័ព្ទនៅក្រៅតំបន់សេវា។ បើតាមប្រភពបានបន្តថាករណីនេះ ជនរងគ្រោះបានដាក់ពាក្យបណ្ដឹងនៅការិយាល័យនគរបាលព្រហ្មទណ្ឌខេត្តសៀមរាប៕SRP

ខេត្តក្រចេះ៖នៅទីបំផុតតុលាការខេត្តក្រចេះបានសម្រេចចេញដីកាឃុំខ្លួន ឈ្មោះ ទេព ហ៊ុយ ជា​មេបញ្ជាការ​មូលដ្ឋាន​កង​រាជ​អាវុធហត្ថ​ក្រុង​ក្រចេះ និង​ឈ្មោះ គឹម សុ​វណ្ណា​រឹទ្ធ ជា​មេបញ្ជាការរង​មូលដ្ឋាន​កងរាជអាវុធហត្ថ​ក្រុង​ក្រចេះ​ ជាបណ្ដោះអាសន្ន ក្រោយពីបានសាកសួរ៕SRP

ខេត្តសៀមរាប៖អាជ្ញាធរបានអះអាងថាផ្ទះរបស់ពលរដ្ឋមួយខ្នងត្រូវបានអគ្គិភ័យឆាបឆេះបំផ្លាញគ្មានសល់ដោយរួមទាំងបន្ទប់ជួលនិងទ្រព្យសម្បត្តិ គិតជាទឹកប្រាក់ជាង១០ម៉ឺនដុល្លារ។

ស្ត្រីម្ចាស់ផ្ទះឈ្មោះ ញឹម អ៊ីប អាយុ៦៥ឆ្នាំ មុខនៅផ្ទះ ជាស្ត្រីមេម៉ាយមានកូន៤នាក់ប្រុសម្នាក់។ មុនពេលកើតហេតុស្ត្រីជាម្ដាយបាននាំកូនប្រុសទៅចាក់វ៉ាក់សាំង។

អាជ្ញាធរបានបន្តថាអគ្គិភ័យនេះបណ្ដាលឲ្យបាត់បង់រួមមាន៖ផ្ទះ១ខ្នង ធ្វើពីឈើលើថ្មក្រោមប្រក់ស៊ីប្រូទំហំ១៥ម គុណ០៨ម -បន្ទប់ចំនួន០៨ លើចំនួន០៣បន្ទប់និងខាងក្រោម ០៥ បន្ទប់-.ម៉ូតូ១គ្រឿង ម៉ាកវេវអាលហ្វា ១១០ សេរី២០១៩ពណ៌ខ្មៅ -ទូរទឹកកក០១គ្រឿង- ទូរទស្សន៍១ គ្រឿង-កំព្យូទ័រចំនួន០៩គ្រឿង-កាមេរា១គ្រឿង- ទូរស័ព្ទចំនួន០៣ គ្រឿង -សំលៀកបំពាក់និងរបស់ប្រើប្រាស់ក្នុងផ្ទះមួយចំនួនធំ (ខូចខាតទាំងស្រុង)។ ដោយប្រើប្រាស់រថយន្តពន្លត់អគ្គីភ័យចំនួន៧គ្រឿង នគរបាលខេត្ត២គ្រឿង -អាវុធហត្ថខេត្ត២គ្រឿង-.អប្សរា២គ្រឿង និងនគរបាលក្រុង១គ្រឿង។ បើគិតជាទឹកប្រាក់អស់ប្រមាណជាង១០ម៉ឺនដុល្លារនេះ បើយោងតាមសម្តីរបស់ម្ចាស់ផ្ទះ។ បើតាមអាជ្ញាធរបញ្ជាក់ថាហេតុការណ៍នេះ បានកើតឡើងនៅសៀលថ្ងៃទី០១ ខែ វិច្ឆិកា ឆ្នាំ២០២១ស្ថិតនៅក្រុមទី១០ ភូមិគ្រួស សង្កាត់ស្វាយដង្គំ ក្រុងសៀមរាប។ មូលហេតុទុស្សេខ្សែរភ្លើង៕SRP

ខេត្តសៀមរាប៖មន្ត្រីសង្កាត់ជ្រាវចាប់ផ្តើមដាក់គ្រឿងចក្រស្តារត្រពាំងបុរាណឈ្មោះ´ហែផ្កា` ហើយរៀបចំទីនោះអោយក្លាយទៅជាតំបន់ទេសចរ បន្ទាប់ពីទទួលបានច្បាប់អនុញាត្ត។

លោក ក្អោប រ៉ន ចៅសង្កាត់ជ្រាវបានបញ្ជាក់ថា ដើម្បីរក្សាសម្បត្តិជាតិអោយស្ថិតស្ថេរគង់វង្ស ហើយទីតាំងត្រពាំងបុរាណនេះមានសក្តានុពល អាចកែប្រែអោយក្លាយទៅជាតំបន់ទេសចរដ៏ទាក់ទាញបានផងនោះ អាជ្ញាធរជាតិអប្សរា និងអាជ្ញាធរខេត្ត.ក្រុង សម្រេចអោយមានការស្តារដើម្បីអភិរក្សបែបនេះ។

លោកបន្តថា ត្រពាំងបុរាណឈ្មោះ ហែផ្កា មានទំហំជាង៦ម៉ឺនម៉ែត្រក្រឡា(ជាង៦ហិកតា) ហើយត្រូវជីកជម្រៅ៣ម៉ែត្រ ដោយយកអាចម៍ដីមកចាក់បំពេញជុំវិញទួលមាត់ត្រពាំងកំពស់០.៥ទៅ១ម៉ែត្រតាមស្ថាន ភាពជាក់ស្តែង។ បន្ទាប់ពីរៀបចំរួចរាល់ អាជ្ញាធរនឹងផ្តល់ទីតាំជុំវិញមាត់ត្រពាំងអោយពលរដ្ឋក្នុងមូលដ្ឋានមានការលក់ដូរតាមតម្រូវការ។

ការជីកស្តារត្រពាំងបុរាណនេះ ក្រៅពីរក្សាសម្បត្តិបេតិកភណ្ឌជាតិអោយគង់វង្ស និងរៀបចំទៅជាតំបន់ទេសចរ ក៏អាចផ្តល់មុខរបរដល់ពលរដ្ខក្នុងមូលដ្ឋានមួយចំណែកទៀតដែរតាមរយ:ការលក់ដូរផ្សេងៗ។

លោកចៅសង្កាត់បន្ថែមថា ដោយអាជ្ញាធរគ្រប់ជាន់ ថ្នាក់បានស្រង់ឈ្មោះ និងដោះស្រាយផលប៉ះពាល់ដល់ពលរដ្ឋប៉ុន្មានគ្រួសារ ហើយការជីកស្តារដំណើរ ការបានដោយរលូន គម្រោងនេះនឹងបញ្ចប់នាចុងរដូវប្រាំងខាងមុខនេះហើយ។

សូមបញ្ជាក់ថា ត្រពាំងបុរាណឈ្មោះ´ហែផ្កា` មានទីតាំងស្ថិតក្នុងភូមិបុស្សក្រឡាញ់ សង្កាត់ជ្រាវ ក្រុងសៀមរាប ខេត្តសៀមរាប មានទំហំជាង៦ហិកតា។ កន្លងមកត្រពាំងនេះរងការរំលោភបំពានគ្រប់គ្រងកាន់ កាប់ដោយបុគ្គលមានឥទ្ធិពល៤ទៅ៥រូប ដោយពួកគេវាស់វែងចែកគ្នាសាងសង់មួយផ្នែក និងវាស់ពុះជាដីឡូត៍សម្រាប់លក់មួយផ្នែក។ ប៉ុន្តែក្នុងកំឡុងចុងឆ្នាំ ២០១៩ ដើមឆ្នាំ២០២០កន្លងមកនេះ អាជ្ញាធរជាតិអប្សរា សហការជាមួយអាជ្ញាធរក្រុង និងខេត្តជួយ សង្គ្រោះមកវិញទាន់ពេល ដោយឈូសឆាយវាយ កម្ទេចសំណង់ល្មើសច្បាប់ទាំងនោះ និងដកហូតយកដីត្រពាំងមករក្សាជាសម្បត្តិរដ្ឋ ហើយរៀបចំជាតំបន់ទេសចរ ក្រោមការចូលរួមសហការពីក្រុមពលរដ្ឋបែបនេះ៕SRP

ខេត្តសៀមរាប៖លោក សឹង្ហ សំរឹទ្ធិ អនុប្រធាន សមាគមចលនាយុវជនកម្ពុជា (ក្រុម១៥៧) សាខាខេត្តសៀមរាប នៅថ្ងៃចន្ទ ទី១ ខែវិច្ឆិកា ឆ្នាំ២០២១នេះ បានដឹកនាំសមាជិក សមាជិកា ចូលរួមគោរពវិញ្ញាណក្ខន្ធ ឯកឧត្តម ឧត្តមសេនីយ៍ឯក ទឹម ទឿង អតីតមេបញ្ជាការរងយោធភូមិភាគទី៤ ដែលបានអនិច្ជកម្មនៅថ្ងៃទី៣០ ខែតុលា ឆ្នាំ២០២១ វេលាម៉ោង ៦និង២៥នាទីព្រឹក ដោយរោគាពាធ។

លោក សឹង្ហ សំរឹទ្ធិ ក្នុងនាមតំណាងលោក ហ៊ុន ប៉ូគា ប្រធានសមាគមចលនាយុវជនកម្ពុជា (ក្រុម១៥៧( សាខាខេត្តសៀមរាប និងក្នុងនាម សមាគមចលនាយុវជនកម្ពុជា ពិតជាមានសេចក្តីរន្ធត់ សោកស្តាយយ៉ាងក្រៃលេងឥតឧបមា ចំពោះការបាត់បង់នូវ ឥស្សរៈជនរបស់កងយោធពលខេមរភូមិន្ទ បាត់បង់នូវស្វាមីជាទីស្រលាញ់ បាត់បង់នូវឪពុកជាទីគោរព បាត់បង់នូវជីតាប្រកបដោយគុណធម៌ ហើយសូមចូលរួមរំលែកទុក្ខយ៉ាងក្រៀមក្រំនេះ និង បាននាំយកនូវថវិកាចំនួន ៧០មុឺនរៀល និង ទឹកសុទ្ធចំនួន ២០០យួរ ប្រគល់ជូនលោកជំទាវដែលជាគ្រួសារនៃសពផងដែរ៕SRP

ខេត្តកំពង់ចាម៖អភិបាលខេត្តកំពង់ចាម​ អ៊ុន ចាន់ដា នៅព្រឹកមិញនេះបានក្រើនរំលឹកដល់ក្មួយៗសិស្សានុសិស្ស ទាំងអស់ដែលមានឱកាសបានចូលរៀនសូត្រឡើងវិញ សូមក្មួយៗបន្តខិតខំសិក្សារៀនសូត្រ ទទួលយកចំណេះដឹងពីលោកគ្រូ អ្នកគ្រូ ដើម្បីត្រៀម ប្រឡងសញ្ញាបត្រនៅពេលខាងមុខនេះ ដែលជាថ្នាលបណ្តុះធនធានមនុស្ស និងជាទំពាំងស្នងឫស្សីសម្រាប់គ្រួសារ ក៏ដូចជា​សង្គមជាតិទាំងមូល ។

អភិបាលខេត្ត​ ក៏បានណែនាំដល់ក្មួយៗសិស្សានុ សិស្ស លោកគ្រូ អ្នកគ្រូ ឲ្យ​បន្តអនុវត្ត​ឲ្យ​បានខ្ជាប់ខ្ជួន នូវវិធានការរបស់ក្រសួងសុខាភិបាល និងវិធានការ ៣ការពារ ៣កុំ ដើម្បីសំដៅធ្វើយ៉ាងណាកាត់ផ្តាច់ខ្សែចម្លងជំងឺកូវីដ-១៩ និងត្រូវរៀនរស់ និងការសិក្សាជាមួយគន្លងថ្មី នៃបរិបទកូវីដ-១៩ ប្រកបដោយការទទួលខុសត្រូវខ្ពស់។

លោករំលឹកបែបនេះ ក្ក្នុងពេលជួបសំណេះសំណាល ជាមួយគណៈគ្រប់គ្រងសាលា លោកគ្រូ អ្នកគ្រូ និងសិស្សានុសិស្ស នៃវិទ្យាល័យព្រះសីហនុ ក្នុង​ពិធី​ប្រកាស​បេីកឲ្យដំណើរការរៀន និងបង្រៀនឡើងវិញ។

ក្នុងឱកាសនោះដែរ​ ​អភិបាលខេត្ត​ ក៏បានឧបត្ថម្ភថវិកាចំនួន ១លានរៀល ម៉ាស ១០.០០០ កៅអីជ័រ២០០ ដល់វិទ្យាល័យព្រះសីហនុផងដែរ​៕SRP

ភ្នំពេញ៖សម្តេចតេជោនាយករដ្ឋមន្ត្រី ហ៊ុន សែន បានថ្លែងនូវការអបអរសាទរនូវការខិតខំរបស់រាជរដ្ឋាភិបាលកម្ពុជា ក្នុងការប្រយុទ្ធទប់ស្កាត់ជំងឺកូវីដ-១៩ ដែលរហូតមកដល់ពេលនេះមាន ចំនួន៤ដំណាក់កាលរួមមាន៖ ដោយដំណាក់កាលទី១ គឺដំណាក់កាលប្រយុទ្ធនឹងទប់ស្កាត់ការឆ្លងជំងឺចូលក្នុងសហគមន៍ ចាប់ពីខែមីនា ឆ្នាំ២០២០ រហូតដល់ខែតុលា ឆ្នាំ២០២០, ដំណាក់កាលទី២ ការគ្រប់គ្រងការឆ្លងរាលដាលការឆ្លងកូវីដ-១៩ ចូលសហគមន៍ គឺចាប់ពីខែវិច្ឆិកា ឆ្នាំ២០២០ ដល់ថ្ងៃទី២០ កុម្ភៈ ឆ្នាំ២០២១, ដំណាក់កាលទី៣ ការបង្កើតភាពសុំាក្នុងសហគមន៍ប្រឆាំងកូវីដ-១៩ តាមរយៈការអនុវត្តន៍យុទ្ធនាការជាតិចាក់វ៉ាក់សាំង បង្ការជំងឺកូវីដ-១៩ គួបផ្សំជាមួយការបន្តគ្រប់គ្រងការឆ្លងរាលដាលជំងឺកូវីដ-១៩ ចូលសហគមន៍ ចាប់ពីថ្ងៃទី២០ ខែកុម្ភៈ ឆ្នាំ២០២១ រហូតមកដល់បច្ចុប្បន្ននេះ និងដំណាក់កាលទី៤ ចាប់ពីពេលនេះ គឺការបើកដំណើរការពេញលេញឡើងវិញលើគ្រប់វិស័យ។ ជាមួយគ្នានេះដែរ សម្តេចតេជោនាយករដ្ឋមន្ត្រី ក៏មានប្រសាសន៍លើកឡើងពីការពិចារណា ក្នុងការបើកអាជីវកម្មដែលមានហានិភ័យខ្ពស់ផងដែរ ដូចជាខារ៉ាអូខេ ក្លឹបកម្សាន្តជាដើម។

សម្តេចហ៊ុន សែន ថ្លែបនេះក្នុងពិធី បិទយុទ្ធនាការចាក់វ៉ាក់សាំង បង្ការជំងឺកូវីដ-១៩ សម្រាប់អ្នកមានអាយុ ៦ឆ្នាំឡើង និងបើកយុទ្ធនាការចាក់សម្រាប់ក្មេងអាយុ៥ឆ្នាំ នៅព្រឹកមិញនេះ។

សម្តេចនាយករដ្ឋមន្ត្រី បានបង្ហាញនូវក្តីរីករាយ ដែលកម្ពុជាសម្រេចបាននូវភាពជោគជ័យក្នុងការចាក់វ៉ាក់សាំងកូវីដ-១៩ទៅដល់ប្រជាពលរដ្ឋទូទាំងប្រទេសដោយទទួលបានលទ្ធផលល្អប្រសើរ។ នៅថ្ងៃនេះ នាយករដ្ឋមន្ត្រី បានប្រកាសបើកដំណើរការប្រទេសពេញលេញឡើងវិញ លើគ្រប់វិស័យ និងការរស់នៅជាមួយកូវីដ-១៩ តាមបែបគន្លងថ្មី ចាប់ពីថ្ងៃទី០១ ខែវិច្ឆិកា ឆ្នាំ២០២១នេះតទៅ។

សម្តេចតេជោនាយករដ្ឋមន្ត្រីបានមានប្រសាសន៍ថា ភាពជោគជ័យលើការបើកប្រទេសឡើងវិញនេះមានកត្តា៤សំខាន់

ទី១)យើងទទួលបាននូវភាពជោគជ័យលើការចាក់វ៉ាក់សាំង

ទី២)រាជរដ្ឋាភិបាលបានខិតខំពង្រីក និងពង្រឹងការព្យាបាលអ្នកជំងឺកូវីដប្រកបដោយការទទួលខុសត្រូវ ទី៣)បទពិសោធន៍នៃការទប់ស្តាត់ការរីករាលដាលនៃជំងឺកូវីដបានល្អប្រសើរ និងទី៤)ពលរដ្ឋយើងមានការយល់ដឹងកាន់តែច្បាស់អំពីការការពារខ្លួនពីជំងឺកូវីដ៕SRP

ភ្នំពេញ៖នាយករដ្ឋមន្ត្រីហ៊ុន សែន បានអះអាងថាលេខរៀងទី១០លានគឺបានទៅលើអ៊ុំស្រី ឈ្មោះសុខ ផាត់អាយុ៨៩ឆ្នាំរស់នៅភូមិទ្រាំង សង្កាត់ស្លក្រាម ក្រុងសៀមរាប
ខេត្តសៀមរាប ដែលខ្ញុំសូមអបអរសាទរ។លោកជំទាវ ឱ វណ្ណឌីន នឹងនាំយកជំនួយថវិកា១០លានរៀលព្រមទាំងសម្ភារៈផ្សេងៗទៀតទៅប្រគល់ជូនដោយផ្ទាល់។

នៅថ្ងៃនេះនាយករដ្ឋមន្ត្រីហ៊ុន សែន បានប្រកាសថានៅថ្ងៃនេះកម្ពុជាយើងបានចាក់វ៉ាក់សាំងការពារកូវីដ-១៩ បាន១០លាន ៨៨នាក់រួចហើយ គឺស្មើនឹងជាង១០០% នៃប្រជាពលរដ្ឋ១០លាននាក់ដែលត្រូវចាក់វ៉ាក់សាំង។ នាយករដ្ឋមន្ត្រីថានេះជាជោគជ័យធំធេងណាស់នៅក្នុងក្របខ័ណនៃខឿនការពារសុខភាពរបស់ប្រជាជនយើង។

នាយករដ្ឋមន្ត្រីបន្តថាទោះបីយើងចាក់វ៉ាក់សាំងបានជាង១០លាននាក់ស្មើនឹងជាង១០០%នៃចំនួនគ្រោងដំបូងក៏ដោយ ក៏យើងនៅមានប្រជាជនរាប់មុឺននាក់ទៀតដែលមិនទាន់បានចាក់វ៉ាក់សាំងដែលយើងត្រូវបន្តចាក់វ៉ាក់សាំងជូនឲ្យបានគ្រប់ៗគ្នា។ ក្រៅពីប្រជាជនដែលមានអាយុ១៨ឡើងចំនួនជាង១០លាននាក់បានចាក់វ៉ាក់សាំងយើងក៏បានចាក់វ៉ាក់សាំងជូនកុមារនិងយុវវ័យអាយុ១២ទៅ១៨ឆ្នាំបានចំនួន១.៧៨៨.៨០២នាក់ដែលស្មើនឹង៩៧.៨៩%និងកុមារអាយុពី៦ដល់១២បានចំនួន១.៩២០.៥៩៩នាក់ស្មើនឹង១០១.២២%ផងដែរ។

បើតាមនាយករដ្ឋមន្ត្រីគិតសរុបយើងបានចាក់វ៉ាក់សាំងជូនជនរួមជាតិយើងចំនួន១៣.៧០៩.៤៨៧នាក់ស្មើរនឹង៨៥.៦៨%នៃប្រជាជនសរុប១៦លាននាក់។
កិច្ចការបន្តរបស់យើងគឺត្រូវបញ្ចប់ការចាក់ដូស
ទី២សម្រាប់អ្នកដែលបានចាក់ដូសទី១និងបន្ត
ចាក់ជូនប្រជាជនដែលមិនទាន់បានចាក់វ៉ាក់សាំងដូសទី១។ វាកាន់តែសំខាន់ជាងទៀតគឺយើងត្រូវតែបន្តការខិតខំចាក់វ៉ាក់សាំងដូសទី៣ជូនប្រជាជនយើងឱយខាងតែបានដែលមក
ដល់ពេលនេះយើងមានវ៉ាក់សាំងក្នុងដៃប្រមាណជិត១០លានដូសនិងមានមនុស្សបានចាក់វ៉ាក់សាំងដូសទី៣ប្រមាណជិត២លាននាក់រួចមកហើយ។វ៉ាក់សាំងនឹងមកដល់ជាបន្ត
បន្ទាប់ទៀត។ ថ្ងៃស្អែក១វិច្ឆកា២០២១យើងនឹងចាប់ផ្តើមចាក់ជូនកុមារអាយុ៥ឆ្នាំដែលមានជាង៣០មុឺននាក់បន្តទៀត។

ជាមួយនិងការកោតសសើរនិងថ្លែងអំណរគុណចំពោះគ្រប់តួរអង្គពាក់ព័ន្ធដែលបានចូលរួមក្នុងយុទ្ធនាការចាក់វ៉ាក់សាំង ការពារកូវីដ.១៩ខ្ញុំសូមអំពាវនាវបងប្អូនជនរួមជាតិបន្តអនុវត្តវិធានការការពារតាមការណែនាំ របស់ក្រសួងសុខាភិបាលពិសេសវិធានការ៣ការពារ និង៣កុំព្រោះថាវ៉ាក់សាំងតែមួយមុខបើទោះបីចាក់បានប៉ុន្មានដូសរហូតមុជវ៉ាក់សាំងក៏មិនអាចការពារបានដែរប្រសិនជាបងប្អូនធ្វេសប្រហែសបោះបង់ចោលវិធីការពារខ្លួនតាមរយះវិធានការ៣ការពារនិង៣កុំ។ ខ្ញុំសូមជូនពរជូនបងប្អូនជនរួមជាតិសូមជួបតែសេចក្តីសុខសេចក្តីចម្រើននិងចៀសផុតពីជំងឺកូវីដ-១៩៕SRP